Rɩ-y Approchez-vous de Jéhovah sebrã zãmsg nafa
1 “Rĩungã koe-moondb sẽn tar yẽesem” tigis-kãsengẽ wã d sũy yɩɩ noog hal wʋsgo d sẽn paam sebr ning gom-zug sẽn yaa Approchez-vous de Jéhovah wã. Neb wʋsg karma seb-kãngã tao-tao. Sãmbg sẽn ka be, yʋʋmd 2003 verse wã sẽn yaa: “Bɩ y kolg Wẽnnaam la bãmb na n kolg yãmba” kɩtame tɩ neb wʋsg me karm-a.—Zak 4:8.
2 Tʋʋlg kiuugã, d na n sɩnga Approchez-vous de Jéhovah sebrã vaeesg tigingã sebr zãmsgẽ. Bõe la d tõe n maan n dɩ zãmsgã nafa? Seglg yaa tɩlae. D na n dɩka semen a yiib sebrã sak fãa zãmsg yĩnga, n vaees sul a wãn bal semen fãa. Woto na n kɩtame tɩ y paam sẽk n tõogd n kõt leoor sẽn sɩd yit y sũyẽ, sẽn tik bũmb ning y sẽn zãmsã la y sẽn bʋgsã zugu. Sẽn paase, semen nins pʋsẽ d sẽn na n lebg n ges sak fãa zãms-baasgã, d na n vaeesa sul a wãn bal sẽn na yɩl n paam weer n tʋm ne sebrã zĩ-kãseng a yembre.
3 Sẽn na n sɩng ne sak a 2 wã, sak fãa sã n wa kolg saabo, zĩ-gũbr gom-zug sẽn yaa: “Sogsg bʋgsg yĩnga,” n be be. Sakã yaoolem sull vaeesg poore, sebrã zãmsg yel-gɛt na n kosa sullã neb tɩ b togs b tagsgo, b sẽn tik Gʋlsg Sõamyã zug n bʋgsa wɛɛngẽ. (Yel. 20:5) Zĩ-gũbrã pʋgẽ sogsgã toor sẽn ka be, a tõe n maana sogsg wala bãmbã: “Bõe la kɩba-kãngã wilg a Zeova zugu? Wãn to la a tar loees ne yãmb vɩɩmã? Wãn-wãn la y tõe n dɩk-a n sõng neb a taaba?” A bõn-datlã yaa kɩt tɩ nebã kõ leoor sẽn sɩd yit b sũyẽ, la pa sẽn na yɩl n bao n mak sullã neb bãngr yel-bõoneg zut n ges ye.
4 Approchez-vous de Jéhovah sebrã yaa toor ne Biiblã zãmsg sɛb a taabã. Baa ne sɛb ninsã fãa ‘tʋm-tʋmd sẽn tũud sɩd la sẽn tar yamã’ sẽn yiisã sẽn pẽgd a Zeova wã, b yiisa seb-kãngã sẽn na yɩl n wilg a Zeova zʋg-kãsemsã bala. (Mat. 24:45-47) Ad seb-kãngã zãmsg yaa bũmb sẽn na n sɩd tall yamleoog menga. Zãms-kãngã sẽn na n kɩt tɩ d bãng a Zeova sõma n paasã na n naf-d-la wʋsgo. Bɩ a zãmsgã sõng-d tɩ d pẽneg d saasẽ Ba wã la a kɩt tɩ d tõog n sõng neb a taabã me wʋsg tɩ b pẽneg-a.