D kɩt tɩ Biiblã sɩd yetame tɩ bõe sebrã zãmsg tall yamleoogo
1 Rasem a tãab tigis-kãsengã gom-zug sẽn yɩ “Wẽnnaam sakrã” sasa me sẽn tall yamleoog yaa sebr ning sẽn yaa Biiblã sɩd yetame tɩ bõe wã yiibã. Ka la bilfu, d na n tʋma ne-a wʋsg d koe-moonegã pʋgẽ, sẽn yɩɩd fãa, Biiblã zãmsg ne nebã wɛɛngẽ. Dẽnd d segd n bãnga seb-paal-kãngã sõma. D sẽn na n sɩng-a zãmsg tigingã sebr zãmsg sulẽ yʋʋmd 2006 tʋʋl-nif kiuug rasem 17 semennã tɛka yĩnga, d na n bãng-a-la sõma.
2 Tigingã sebr zãmsg taoor lʋɩtã na n taka nebã yam n sik sogsgã sẽn be sak fãa sɩngrẽ wã zugu. Rẽ poore, a na n tika sogsg nins sẽn be seb-nengã tẽngrã n maan zãmsgã. B segd n karma verse nins sẽn teend zãmsgã tags-kãsemsã la b sõs-b zutu. Sogsg nins sẽn be sagsã sɩngrẽ wã leoor bee zĩ-gũbrã sẽn be sak fãa baasgẽ t’a gom-zugã yaa “Biiblã sẽn yet bũmb ningã” pʋgẽ. B na n tikda a zug n maand zãmsgã leb-n-gesã. Sebrã sẽn wɛgsd gom-zug fãa vẽeneg tɩ be yamleoogã yĩnga, leoorã kũun na n yɩɩ nana.
3 Seb-kãngã vẽnegr zĩisã kõta kibay a taab gom-zut toɛy-toɛy zugu. Biiblã karen-biis sã n wa rat kibay zãmsg zug n paase, d na n tika b zut n sõng-ba. D na n sõssa vẽnegr zĩisã kẽer zut tigingã sebr zãmsgẽ. Sebrã zãmsg karemdã na n karma gom-zugã vẽnegr zĩis fãa. La sã n yaa woko, a na n karma sull-sulli. Zãmsgã sogsg pa be vẽnegr zĩisã pʋgẽ ye. La taoor lʋɩtã tõe n tika be n sok sogsg tags-kãsems nins yell b sẽn gomdã zugu.
4 Biiblã yetame sebrã d sẽn na n zãms tigingã sebr zãmsgẽ wã na n yɩɩ tʋʋlle. La b pa yet tɩ d sã n na n zãms-a nebã, bɩ d maan tʋʋll-tʋʋll ye. Sẽn yɩɩd fãa, d sẽn zãmsd b rãmbã sã n mii Biiblã bilf bal wall b pa tol n mi-a ye. (Tʋʋ. 26:28, 29) D sã n zãmsd-a nebã, d segd n sõsda verse rãmbã zut sõma la d bilgd foto rãmbã la yɛl a taaba võore. Bɩ d fãa modg n zĩnd sebrã zãmsgẽ semen fãa la d kõt leoore.