D rɩk karen-saam-kãsengã togs-n-taare, d sã n wa zãmsd Biiblã yetame sebrã ne nebã
1. Wãn to la a Zezi ra zãmsd nebã?
1 Karen-saam-kãseng a Zezi ra zãmsda nebã tɩ b tõe n wʋm nana-nana. Wakat ninga, sẽn na yɩl t’a kɛlgdbã tags sõma, a rengd n sokd-b-la b tagsgo. (Mat. 17:24-27) A ra wilgd-b-la Wẽnnaam Gomdã sẽn yet bũmb ningã. (Mat. 26:31; Mark 7:6) A sẽn da mi t’a karen-biisã na n ket n zãmsdame wã yĩnga, a ra gũusdame n da wa zãms-b bũmb wʋsg tɩ wa loog b nug ye. (Zã 16:12) Sẽn da pak a Zezi me yaa a karen-biisã tẽ la b wʋm a zãmsgã võor sõmã. (Mat. 13:51) Biiblã yetame sebrã na n sõnga tõnd tɩ d tõog n dɩk a Zezi togs-n-taare.
2. Wãn to la d tõe n tʋm ne sogsg nins sẽn be sak fãa sɩngrẽ wã?
2 Sogsg nins sẽn be sak fãa sɩngrẽ wã: Y sã n sɩng sak zãmsg ne karen-biiga, yaa sõma tɩ y ges sogsg nins sẽn be sakã sɩngrẽ wã. Karm-y sogsgã tɩ karen-biigã kelg n tʋll n bãng b leoorã, wall y kɩt t’a leok sogsgã koɛɛg-koɛɛg bala. Pa tɩlae tɩ y sõs a sẽn leok to-to wã zug n kaoose, bɩ n baood n dat n dems leoor sẽn pa zems fãa ye. Y tõeeme bal n pʋʋs-a bark a sẽn togs a tagsgã yĩnga, la y sɩng zãmsgã. Karen-biigã sẽn leok sogsg nins sẽn be sakã sɩngrẽ to-to wã na n sõng-y lame tɩ y bãng zĩig ning y sẽn segd n vẽneg-a n paas zãmsgã wakate.
3. Wãn to la d tõe n kɩt tɩ zãmsgã võor wʋmb yɩ nana?
3 Verse rãmbã: Zãmsgã segd n tika Biiblã zugu. (Heb. 4:12) La pa tɩlae tɩ d karem verse rãmbã fãa ye. Sõs-y verse nins sẽn wilgd tõnd sẽn tẽed bũmb ninsã zut n yɩɩda. Pa tɩlae tɩ d karem verse nins sẽn kõt kiba-bõonesã ye. Biiblã yetame sebrã wilgda sɩdã tɩ nebã tõe vʋm a võorã nana-nana. Modg-y tɩ y zãmsgã võor wʋmb yɩ nana. Sõs-y tags-kãsemsã zut la y gũus n da wa sõs n tadg kiba-bõones zut bɩ n sõs bũmb a tãab sẽn pa be zãmsgã pʋg zut ye.
4. Bõe n na n sõng-d tɩ d bãng d sã n segd n dɩka sẽk n zãms karen-biigã bũmb nins sẽn be vẽnegrã pʋgẽ wã?
4 Vẽnegrã: A tara gom-zut 14 sẽn vẽnegd sagsã n paasdẽ. Yaa ned kam fãa n yãkd yam a sã n na n sõsa vẽnegrã zug bɩ a sã n pa na n sõse. Y tõe n sagla karen-biigã t’a karem vẽnegrã zĩis kẽer a toore, sẽn yɩɩd fãa sã n mik t’a wʋmda kibay nins sẽn be sakã meng pʋgẽ wã võore, la a sakd-ba. Wala makre karen-biigã sã n zoe n tẽed tɩ yaa a Zezi la Mesi wã, d sã n wa ta sak a 4 sẽn yet tɩ “A Zezi Kirist yaa ãnda?” wã, pa tɩlae tɩ d vaees gom-zug ning sẽn yet tɩ: “Yaa a Zezi Kirist la Mesi ning b sẽn kãab t’a na n waame wã” sẽn be vẽnegrã pʋgẽ wã ye. La wakat ninga, yɩta sõma tɩ d rɩk sẽk zãmsgã sasa n sõs vẽnegrã zugu.
5. D sã n yãk yam n na n sõs ne karen-biigã kibay nins sẽn be vẽnegrã pʋgẽ wã, wãn to la d tõe n sõs ne-a?
5 Y sã n yãk yam n na n sõs vẽnegrã zugu, y segd n segla sogsgo, la y karem sullã ne verse rãmb nins tags-kãsemsã sẽn tik b rãmb zutã ne karen-biigã. Sã n wa mik tɩ yaa tɩlae ne karen-biig ninga, y tõe n dɩka minit a wãn n vaees zĩ-kãngã ne-a. Rẽ na n sõng-y lame tɩ y bãng karen-biigã sã n wʋmda kibay nins a sẽn karemd a toorã võore.
6. Wãn to la d tõe n sõs zĩ-gũbrã zugu?
6 Sakã baasgẽ zĩ-gũbrã: Zĩ-gũbrã sẽn be sak fãa baasgẽ wã leokda sogsg nins sẽn be sakã sɩngrẽ wã. Y tõe n tũnuga ne zĩ-gũbrã n lebg n tẽeg sakã tags-kãsemse. Koe-moondb kẽer yãame tɩ yaa sõma tɩ b naag karen-biigã n karem goam nins sẽn be zĩ-gũbrã pʋgẽ wã ne verse rãmbã, la b sok-a t’a togs koɛɛg-koɛɛg verse rãmbã sẽn wilgd tɩ goam nins sẽn be zĩ-gũbrã pʋgẽ wã yaa sɩd to-to. Rẽ na n sõnga karen-saambã t’a bãng karen-biigã sã n wʋma tags-kãsemsã võore, a sã n sakd-b lame, la a sã n mii Biiblã sẽn teend tags-kãens to-to. Woto zãmsda karen-biigã me t’a bãng a sẽn tõe n tũnug ne Biiblã n wilg neb a taab sɩdã to-to.
7. Wãn to la d tõe n tũnug ne Biiblã yetame sebrã n maan karen-biisi?
7 D sã n dat n tõog n zãms nebã tɩ b lebg a Zezi karen-biisi, yaa d sẽn na n dɩk a Zezi togs-n-taare. (Mat. 28:19, 20) Biiblã yetame sebrã tõe n sõng-d lame tɩ d tʋm tʋʋm-kãnga. D tʋm ne seb-kãngã sõma sẽn na yɩl n zãms nebã tɩ b wʋm sɩdã võor nana-nana, la zãmsgã yɩ b noog me.