D tall Biiblã yetame sebrã n sõng Biibl karen-biiga

Karen-biig sã n bãngd Biiblã sẽn sɩd yetã, la a tũudẽ, a tẽebã pãng na n paasdame. (Yɩɩn. 1:1-3) Tõnd sã n tall Biiblã yetame sebrã n tʋm sõma, tõe n sõnga karen-biig t’a tẽebã paam pãnga.

Sogsgã sẽn be sak fãa sɩngrẽ wã: Sak fãa sɩngrẽ, sogsg n be, tɩ b leoorã be sakã pʋgẽ. Y tõe n karma sogs-kãense, tɩ kɩt tɩ karen-biigã tʋlg n kelg zãmsgã neere. Y tõeeme n kos-a t’a togs a tagsg koɛɛg-koɛɛg sogsgã zugu. A sã n togs tɩ pa zemse, bɩ y ra yeel-a tɩ pa zems ye. A leokrã na n sõng-y lame tɩ y bãng sõsgã zĩis nins y sẽn segd n maaneg n wɛgsã.—Yel. 16:23; 18:13.

Vẽnegrã: Karen-biigã sã n wʋm bũmb ning y sẽn zãmsdã võor n sak n deege, y tõe n sagl-a lame t’a karem vẽnegrã. Nindaare, bɩ y rɩk minit a wãn n bao n bãng a sã n wʋma vẽnegrã võore, tɩ y yaool n kẽng taoor ne y sõsgã. La sã n mik t’a pa wʋm vẽnegrã võore, bɩ y naag taab n sõs a zug zãmsgã sasa, wall y karem vẽnegrã sul a wãn tɩ y sõse. Y tõe n deng n segla sogsg rẽ yĩnga.

Zĩ-gũbrã sẽn be sak fãa baasgẽ wã: Zĩ-gũbrã sẽn be sak fãa baasgẽ wã leokda sakã sɩngrẽ sogsgã. Y tõe n tika rẽ zug n bao n bãng karen-biigã sã n wʋma zãmsgã võore, la a sã n tõe n bilga zãmsgã zĩis nins sẽn tar pãngã võore. Naag-y taab n karem leoor fãa, la vɛrse nins b sẽn sõdgã. Rẽ poor bɩ y kos-a t’a tik vɛrse-rãmbã zut n wilg bũmb ning sẽn kɩt tɩ leoorã zemsã.—Tʋʋ. 17:2, 3.