D paas d koe-moonegã minim: D sõng d Biibl karen-biisã tɩ b zãmsd Biiblã sõma

Saglgã yõodo: Yɩl tɩ Biibl karen-biig tẽeb bɩ, a segd n zãmsda Wẽnnaam goam nins võor wʋmb sẽn yaa toogã sõma tɩ kẽ-a. (Ebre. 5:12–6:1) Rẽ baooda modgre. Baoodame me t’a mak bũmb nins a sẽn zãmsdã, ne bũmb ning a sẽn da zoe n mi wã, n ges yam ning a sẽn tõe n dɩke. (Yel. 2:1-6) Karen-biigã sã n bãng a sẽn tõe n maan vaeesg to-to, na n sõng-a lame t’a tõog n tall tõnd sɛbã n leok sogsg sẽn tik Biiblã. Modgr ning a sẽn maand sẽn na yɩl n tũ bũmb nins a sẽn zãmsdã, na n sõng-a lame t‘a tõog n yals kãn-kãe namsg pʋgẽ.—Luk 6:47, 48.

Ad y sẽn tõe n maan dẽ to-to:

Sõng-y y karen-biigã t’a bãng tɩ nand t’a sɩng zãmsgo, a segd n pʋʋsa a Zeova.—Zã 14:26; 1 Kor. 2:10.
Sagl-y karen-biigã t’a reng n segl a meng zãmsg fãa yĩnga. Wilg-y-yã-a yãmb sebrã, la y wilg-a a sẽn tõe n dẽeg bũmb nins sẽn tar yõod wʋsgã bal to-to.
Kɩt-y tɩ karen-biigã leokd sogsgã ne a meng goama. Ra sokd-y sogsg sẽn na n kɩt tɩ karen-biigã get sebrã pʋgẽ bal n karemd leoorã ye.
Sagl-y karen-biigã t’a karemd Biiblã daar fãa. Wilg-y-yã-a Biiblã kareng na-kẽndrã sẽn be jw.org, n wilgd d sẽn tõe n karem Biiblã to-to wã. Yɩl n minim Biiblã karengo, rẽndame tɩ f modg wʋsgo, la modgrã pa na n yɩ zaalem ye.—Yɩɩn. 1:2, 3.
Wilg-y karen-biigã a sẽn tõe n tall Watchtower Library pa rẽ bɩ BIBLIOTHÈQUE EN LIGNE wã n paam sogsg nebã sẽn wae n sokd Biiblã zugã leoore. Sõng-y-yã-a t’a bãng sɛb nins d sẽn tar n segend d meng tigissã yĩngã bãna. Wala makre, fg yaa Koe-noog sẽn yit Wẽnnaam nengẽ! sebrã bãnde.

Mak-y woto ki-kãngã:

Y sã n pa tar Biibl karen-biiga, bɩ y kʋmsd Biiblã babg y sẽn karme, pa rẽ bɩ Gũusg Gasgã sulli, tɩ sõng-y tɩ y maneg n wʋm a võor sõma.