D sẽn tõe n maan to-to tɩ zãmsgã kẽ karen-biigã
1. A Zeezi kɛlgdbã manesem yɩɩ wãn ne a sẽn zãms-b bũmb ningã?
1 A Zeezi Kiris ra maoodame t’a zãmsgã kẽed a kɛlgdbã. Daar a yembre, a bilga karen-biis Gʋlsg sõamyã võor sõma, hal tɩ b paam ‘sũ-no-kãsenga.’ (Luk 24:32) Sẽn yaa ne a sũur fãa la ned segd n sak Wẽnnaamã, wãn to la d tõe n sõng d karen-biig t’a sak n toeem nana-nana?—Rom. 6:17.
2. Tõnd sã n tar yam la d yaa gũusdba, wãn to la na n sõng tɩ d zãmsgã kẽ d karen-biisã?
2 D tall yam la d yɩ gũusdba: D sã n wilg neb kẽer sẽn segd la sẽn pa segd bala, pa kɩtd tɩ b toeem ye. Sɩd me, d sã n karemd Biiblã vɛrse-rãmb wʋsg n wilgd tɩ b sẽn tẽedã pa sɩda, tõe n kɩtame tɩ b pa le rat n kelg-d ye. Yɩl n sõng neda, d segd n deng n bao n wʋma a tẽebã la a manesmã võore. D sã n tall yam n sok-a sogsg kẽere, na n kɩtame t’a paam raood n togs-d sẽn be a sũurẽ. (Yel. 20:5) Yaa rẽ poor la d na n tõog n bãng n yãk Biiblã vɛrse-rãmba, n sõng-a tɩ zãmsgã kẽ-a. Dẽnd d segd n talla sũ-mare, la d wilg t’a yell pak-d lame. (Yel. 25:15) Tẽeg-y tɩ pa nebã fãa n sakd Biiblã sẽn yetã nana-nana ye. Bas-y t’a Zeova vʋʋsem sõngã sõng-a t’a toeem a yamã la a manesmã.—Mark 4:26-29.
3. Wãn to la d tõe n sõng d karen-biisã tɩ b bɩɩs zʋg-sõma?
3 D sõng-b tɩ b bɩɩs zʋg-sõma: Biiblã vɛrse nins sẽn gomd Wẽnnaam nimbãan-zoeerã la a nonglmã yellã, tõe n sõnga d karen-biisã tɩ b bɩɩs zʋg-sõma. Wala makre, d tõe n karma Yɩɩn-sõamyã 139:1-4 bɩ Luk 12:6, 7 n sõng-b tɩ b bãng t’a Zeova nonga tõnd ned kam fãa. Karen-biisã sũy sã n noom ne a Zeova a maan-neerã yĩnga, b na n maneg n nong-a lame la b sakd-a. (Rom. 5:6-8; 1 Zã 4:19) B sã n bãng me tɩ b manesmã tõe n sãama a Zeova sũur wall noog a sũuri, tõe n kɩtame tɩ b tʋll n maan sẽn noom-a la sẽn tat a yam.—Yɩɩn. 78:40, 41; Yel. 23:15.
4. D sã n wa zãmsd ned Biiblã, wãn to la d tõe n wilg tɩ yaa ned fãa n segd n yãk yam a toore?
4 A Zeova pa modgd ned t’a sak-a ye. La a sõngda ned fãa t’a bãng t’a sã n tũ yẽ, na n naf-a lame. (Eza. 48:17, 18) Tõnd sã n zãmsd nebã tɩ b bãngd n yãkd yam b toore, d rɩkda a Zeova togs-n-taare. Ned sã n wa kɩs sɩd t’a segd n toeemame n sɩd toeeme, na n naf-a-la wʋsgo. (Rom. 12:2) Leb n na n kɩtame t’a paam a Zeova sẽn yaa a soab ning sẽn “makd ninsaalbã sũyã” zoodo.—Yel. 17:3.