Kiris-nebã vɩɩm la b tʋʋma tigissã na-kẽndr not-rãmbã
SẼOOG RASEM A 2-8
D SẼN BÃNG BIIBLÃ KARENG PƲGẼ | LUK 6-7
“D yɩ kõtba”
(Luk 6:37; MN) “Bɩ y ra le kao y taabã bʋʋdo, tɩ Wẽnnaam me kõn kao yãmb bʋʋd ye. Da ning-y y taabã taale, tɩ Wẽnnaam me kõn ning yãmb taal ye. Kõt-y y taabã sugri, tɩ Wẽnnaam me na n kõo yãmb sugri.
Luk 6:37; nwtsty
Kõt-y y taabã sugri, tɩ Wẽnnaam me na n kõo yãmb sugri: Bɩ, “basd-y y taabã taale, tɩ bãmb me basd-y taale.” Gɛrk gom-bil ning b sẽn lebg tɩ “kõ sugrã” yaa “bas taale, bas tɩ sa, yiisi (makre, yiis ned sẽn be bãens-roogẽ).” B sẽn yeel ka tɩ bas taalã, rat n yeelame tɩ f bas yell ned sẽn maan tɩ sa, bɩ kõ-a sugri, baa a sã n da segd ne sɩbgre, wall sã n da yaa tɩlɛ t’a yao.
w08-MM 1/5 13 s. 13-14
Ket-y n maand-y nebã neere
A Matye wilga a evãnzillã pʋgẽ t’a Zeezi yeela woto: “Da bʋ-y ned bʋʋdo, tɩ Wẽnnaam da wa bʋ yãmb bʋʋd ye.” (Mat. 7:1) La a Luk evãnzillã pʋgẽ, a yeela woto: “Bɩ y ra [le, NW bʋ ned bʋʋd ye, la Wẽnnaam me kõn bʋ yãmb bʋʋd ye. Da mong-y ned bʋʋm ye, la b kõn mong yãmb me bʋʋm ye. Bɩ y kõ sugri, la yãmb me na paam sugri.” (Luk 6:37) Pipi kiris-nebã wakate, fariziẽ rãmbã ra tũuda b rog-n-mik noy sẽn pa be Biiblã pʋgẽ n kaood nebã bʋʋd ne wẽnem. A Zeezi ra rat n yeela a kɛlgdbã tɩ neb nins fãa sẽn maand wa fariziẽ rãmbã segd n basa nebã bʋʋd kaoobo. A sẽn yeel tɩ b ‘kõ sugrã’ rat n yeelame tɩ ned sã n kong bɩ b bas taale. Tʋm-tʋmd a Poll me kõo saglg sẽn wõnd rẽ.
A Zeezi karen-biisã sã n yɩ sug-kõtba, na n kɩtame tɩ nebã rɩk b togs-n-taare, n yɩ sug-kõtba. A yeel-b-la woto: “Yãmb sẽn na n bʋ ned bʋʋd bũmb ninga, yãmb na n paama bʋ-kãnga. La ne makdg ninga yãmb sẽn na n mak n kõ nebã, b na n mak n lebsa yãmb woto.” (Mat. 7:2) Tõnd sẽn maand nebã bũmb ningã, yaa rẽ la b na n lebs-do.—Gal. 6:7
(Luk 6:38; MN) Bɩ y nong n kõtẽ, la nebã me na kõ yãmba. B na n kɩtame tɩ y kolemd y fuugã, tɩ b mak sõma, n dĩ la b yegs tɩ baas n ket n sudgdẽ n kiig-yã. Bala yaa ne makdg ning yãmb sẽn tar n makdẽ wã la b na n mak n lebs yãmba.”
Luk 6:38; nwtsty
nong n kõtẽ: Bɩ “ket-y n kõtẽ.” Gɛrk gom-bilã b sẽn lebg woto wã tõe n dat n yeelame tɩ “kõ.” La a bilgda bũmb f sẽn segd n maandẽ.
(Luk 6:38; MN) Bɩ y nong n kõtẽ, la nebã me na kõ yãmba. B na n kɩtame tɩ y kolemd y fuugã, tɩ b mak sõma, n dĩ la b yegs tɩ baas n ket n sudgdẽ n kiig-yã. Bala yaa ne makdg ning yãmb sẽn tar n makdẽ wã la b na n mak n lebs yãmba.”
Luk 6:38; nwtsty
y fuugã: Gɛrk gom-bil ning b sẽn lebg woto wã rat n yeelame tɩ “yãoogo,” la ka wã yaa fuug ned sẽn kolemd n zems a sɛɛga. ‘Kɩt tɩ ned kolemd a fuug tɩ b mak sõma’ wã tẽegda bũmb lɛɛbdb kẽer sẽn da minim n maandẽ. Ned sã n da ra teed kẽere, a ‘kolemdeda a fuugã’ tɩ koaasã kiig be, n yãk n paas tɩ pid sõma.”
D bʋgs Wẽnnaam Gomdã zug neere
w07-MM 1/8 4 s. a 5
Wãn to la y tõe n paam zood hakɩk ne Wẽnnaam?
A Zeezi ra nong n dɩkda sẽk wʋsg n pʋʋsd Wẽnnaam. (Zã 17:1-26) Wala makre, nand t’a yãk rap 12 sẽn lebg a tʋm-tʋmdbã, a ‘kẽnga tãng zug n na n tɩ pʋʋse, la a paa be yʋngã tõr n pʋʋs Wẽnnaam.’ (Luk 6:12) Neb nins sẽn sɩd tar zood ne Wẽnnaamã tuuda a Zeezi mak-sõngã, baa baa b pa rɩkd yʋng tõr n pʋʋsd Wẽnnaam. Nand tɩ b maan bũmbu, b rɩkda sẽk wʋsg n pʋʋs Wẽnnaam n kos a vʋʋsem sõngã sõngre, sẽn na yɩl tɩ b sẽn na n maan bũmb ningã maneg b zoodã ne Wẽnnaam n paase.
(Luk 7:35; MN) La yam soab tʋʋm n wilgd t’a tara yam.”
Luk 7:35; nwtsty
w12-MM 1/12 25 s. 13
D yɩ “sãamb” dũni-kãngã pʋgẽ
Ned tʋʋm-sõma tõe n kɩtame t’a wɩtb toeem yam. A Zeezi a ye bal n yɩ ninsaal sẽn sak Wẽnnaam n pa tol n tudgi. Baasgo, neb n wɩd-a. Kẽer da yetame t’a yaa “yão-beed soaba, la rã-yũuda, la yõor yaood dɛɛgdbã ne yel-wẽnã rãmb zoa.” La a yel-manesmã sẽn da yaa sõma wã ra wilgda vẽeneg t’a pa ned a woto ye. A meng yeelame tɩ “yam soab tʋʋm n wilgd t’a tara yam.” (Mat. 11:19) Wala makre, Alemayn Betɛllã sẽn be Selters soolmã yags kẽer da wɩta tõnd saam-biis nins sẽn tʋmd be wã, n getẽ tɩ b sẽn vɩ to-to wã pa sõma ye. La Selters meerã pẽg-b lame n yeel woto: “Yaa sɩd t’a Zeova Kaset rãmb nins sẽn tʋmd be wã sẽn vɩ to-to wã yaa toore, la b pa tiisd tẽngã neb ye.” Yaa woto me rũndã-rũndã.
SẼOOG RASEM A 9-15
D SẼN BÃNG BIIBLÃ KARENG PƲGẼ | LUK 8-9
“Sẽn tũud-b a Zeezi wã segd n maana bõe?”
it-2 399-400
Tʋgdo
Tõog karen-saamb a yembr n kolg a Zeezi n yeel-a yaa: “Karen-saambã, mam na n tũuda yãmb n kẽnd zĩig ning fãa yãmb sẽn na n kẽnge.” La a Zeezi yeela yẽnda: “Waas tara bogdo, tɩ liuuli sẽn yɩgd yĩngrã tar tʋgdo, la Ninsaal Bi-riblã ka tar zĩig n na n gãneg a zug ye.” (Mat. 8:19, 20; Luk 9:57, 58) A Zeezi sẽn yeel ka wã, yaa sẽn na n wilg raoã t’a sã n dat n tũ yẽ, a segd n sak n basa naar vɩɩm ne bũmb a taab nebã sẽn wae n baoodẽ, la a teeg a Zeova zãng-zãnga. Pʋʋsg ning a sẽn zãms a karen-biisã pʋgẽ me, a wilg-b lame tɩ b segd n teega a Zeova zãng-zãnga. A yeel-b lame tɩ b kot Wẽnnaam b “daar woo daar dɩɩbã.” Daar a ye me, a yeel-b lame: “Yãmb ned ning fãa sẽn ka basd bũmb nins fãa a sẽn tarã ka tõe n yɩ mam karen-biig ye.”—Mat. 6:11; Luk 14:33.
Luk 9:59, 60; nwtsty
mum m ba: Raoã goamã pa wilgd t’a ba wã maana kaalem t’a kot a Zeezi sor n na n tɩ solg-a ye. A ba wã sã n sɩd ra maana kaalem, a ra pa na n beẽ ne a Zeezi n sõsd ye. Pĩnd wẽndẽ, soolmẽ be ned sã n da maan kaalem, b solgd-a-la tao-tao. Naoor wʋsgo, b solgd-a-la a kũumã daar menga. Dẽnd tõe t’a ba wã ra kae laafɩ, wall a ra kʋʋlame. A pa maan kaalem ye. Sẽn paase, a Zeezi ra pa na n yeel daoã t’a bas a ba wã, a sã n sɩd ra kʋʋlame bɩ a pa keeme, t’a roagdb kae n na n ges a yell ye. (Mark 7:9-13) Raoã gomdã rat n yeelame yaa: ‘Mam na n tũu foo, la yaa m ba wã kaalem poore. Yals tɩ m ba wã maan kaalem tɩ m solg-a la m wa.’ La a Zeezi yãame tɩ raoã na n bõna segb a sẽn paam n na n lʋɩɩs Wẽnnaam Rĩungã taoore.—Luk 9:60, 62.
Bas kũumã tɩ b mum b kũum: Wa b sẽn yeel Luk 9:59 notã pʋgẽ wã, tõe tɩ rao ning a Zeezi sẽn da gomd ne wã ba ra kae laafɩ, wall a ra kʋʋlame. A pa maan kaalem ye. Dẽnd a Zeezi gomdã rat n yeelame yaa: ‘Bas neb nins sẽn ki Wẽnnaam nifẽ wã tɩ b mum b kũumã.’ Rat n yeel t’a bas a roagdb a taabã tɩ b ges a ba wã yell n tãag a kũum tɩ b solg-a. Raoã sã n da tũu a Zeezi, a na n wa paama vɩɩm sẽn kõn sa wã, a pa na n zĩnd sẽn ki-b Wẽnnaam nifẽ wã sʋk ye. A Zeezi leoorã wilgdame tɩ ned sã n pa rat n yɩ kɩɩng Wẽnnaam nifẽ, a segd n lʋɩɩsa Rĩungã taoore, n moond-a zĩig zãnga.
nwtsty, fot-rãmb la video-rãmba
Tak rulsi
Yaa sẽoogo, saagã sẽn wat n sɩng niibu, tɩ tẽngã wĩntoogã sẽn da pãb sɩpaolg wẽndẽ tɩ kʋyã bʋkã, la ka-koaadbã kood b pʋtã n takd rulsi. Wãgs kẽer b sẽn da balgd rũng wall rũms n takd rulsã ra maana ne raado, tɩ b yẽna yaa kutu. B sã n ko n sa, b bʋtame. Biiblã babg ning b sẽn da gʋls ne ebre wã pʋgẽ, b wae n gomda koob yelle. (Bʋ. 14:18; Eza. 2:4; Zer. 4:3; Mii. 4:3) A Zeezi ra mi n dɩka makr ne ka-koaad tʋʋm toor-toor n na n wilg bũmb sẽn tar yõod wʋsgo. Makre, a sẽn gom ka-koaad sẽn takd ruls yellã yɩɩ sẽn na n wilg a kɛlgdbã tɩ yẽ karen-biig segd n tũ-a-la ne a sũur fãa. (Luk 9:62) Ka-koaad sẽn takd ruls sã n bas tɩ bũmb tiis-a, a rulsã pa na n yɩ tɩrs ye. Woto me, kiris-ned sã n bas tɩ dũniyã yɛl tiisd-a t’a pa tõe n tũ Kiristã sõma, a pa zems ne Wẽnnaam Rĩungã ye.
w12-MM 1/4 21-22 s. 11-13
Kell-y n sak-y-yã a Zeova ne y sũurã fãa
Bɩ d maneg n tags a Zeezi makrã zugu, tɩ na n sõng-d lame tɩ d bãng saglg ning a sẽn kõt-dã. Nedã balga rũng n kooda, la a ket n tagsd bũmb ning sẽn be yirã yelle. A tagsda a sẽn da tõe n be ne a zakã rãmb la a zo-rãmba, tɩ b zĩ maasmẽ n dɩtẽ la b kelgd mizik tɩ yaa laado. A rata ne a sũur fãa n da be yiri. A sẽn tar koobã, bõn-noodã tʋlsem wa n paama pãng a sũurẽ, hal t’a ‘wẽnemd n get a poorẽ.’ Baa pʋʋgã a sẽn da segd n ko tɩ b bʋdã sẽn da ket wʋsgã, a basame t’a tʋlsem toor-toorã tiisd-a t’a pa tõe n tʋm a tʋʋmdã sõma ye. Vẽenega, pʋʋgã soab sũur na n sãama ne koaadã a sẽn pa tʋm ne yẽesmã yĩnga.
Bɩ d ges bũmb ning sẽn paam koaadã sẽn tõe n paam ned rũndã-rũndã to-to. Kiris-ned tõe n wa wõnega koaadã, a sã n maand wa a tũuda Wẽnnaam sõma tɩ yaool n pa woto ye. Wala makre, tags-y n ges-y saam-biig sẽn na n kẽnd tigissã la a moond koɛɛgã. La ne rẽ fãa, a ket n tagsda bũmb kẽer sẽn be dũniyã pʋgẽ tɩ b yamleoog tar-a, n tʋll bõn-kãens ne a sũur fãa. Saam-biigã sẽn tũ Wẽnnaam yʋʋm a wãn poore, a tʋlsmã paama pãng a sũurẽ wã, t’a ‘wẽnemd n get a poorẽ.’ Baa koɛɛgã sẽn ket n dat moonegã, a basame n pa le “talld vɩɩm koɛɛgã kãn-kãe,” n pa le tʋmd Wẽnnaam tʋʋmdã sõma me ye. (Fil. 2:16) A Zeova sẽn yaa “tigsgã soabã” sũur pa noom ne a tʋm-tʋmd sẽn pa le tʋmd ne yẽesem ye.—Luk 10:2.
Saglgã yaa vẽenega. D sã n kẽnd tigissã wakat fãa la d moond koɛɛgã n pa vaandẽ, yaa sõma. La tũ Wẽnnaam ne f sũur fãa wã pa tek woto ye. (2 Kib. 25:1, 2, 27) Kiris-ned sã n ‘wẽnemd n get a poorẽ,’ rat n yeel t’a sã n get bũmb nins sẽn be dũniyã pʋgẽ wã kẽer n dat-ba, zood ning a sẽn tar ne a Zeova wã tõe n wa sãamame. (Luk 17:32) Yaa d sẽn na n ‘kisg sẽn yaa wẽnga, la d gãd sẽn yaa sõma kãn-kae’ bal la d na n yɩ ned sẽn “zems tɩ kẽ Wẽnnaam soolmẽ” wã. (Rom 12:9; Luk 9:62) Yaa sɩd t’a Sʋɩtãan dũniyã bũmb kẽer tõe n wõnda b tara yõod wall b tara yamleoogo. La d segd n modgame tɩ baa fʋɩ ra wa kɩt tɩ d pa maan Wẽnnaam daabã ne d sũur fãa ye.—2 Kor. 11:14; karm-y Filip rãmb 3:13, 14.
D bʋgs Wẽnnaam Gomdã zug neere
Luk 8:3; nwtsty
n sõngd a Zeezi ne b karen-biisã: Bɩ “n teend-ba, n get b yelle.” Gɛrk gom-bil ning b sẽn lebg tɩ diakoneo wã tõe n dat n yeelame tɩ ges ned yelle, sõng-a t’a paam a sẽn date. Makre, bao rɩɩb n kõ-a, segl n kõ-a, wall yãk rɩɩb n kõ neda, la sõng-a ne bũmb a taaba. B lebga gom-bilã Biiblã zĩis kẽer t’a võorã yaa woto. Makre, b lebg-a lame tɩ ‘ges seglg yelle,’ ‘kõ rɩɩbo,’ ‘tall rɩɩb n wa,’ ‘pʋɩ neb rɩɩbo.’ (Luk 10:40; 12:37; 17:8; Tʋʋ. 6:2) La a võorã tõe n yɩɩ bũmb ning fãa b sẽn tõe n maan n sõng neda. Luk 8:2, 3 wã pʋgẽ, b pʋda gom-bilã n bilg pagb sẽn sõng a Zeezi ne a karen-biisã to-to tɩ b tõog n tʋm Wẽnnaam tʋʋmdã. Pagbã sẽn wilg tɩ b yaa kõtb woto wã, b waooga a Zeova. Rẽ n so t’a kɩt tɩ b gʋls b kibarã Biiblã pʋgẽ, zãmaan nins fãa sẽn na n pʋglã neb yĩnga. (Yel. 19:17; Ebre. 6:10) Mat. 27:55 la Mark 15:41 pʋgẽ wã me, yaa gom-bi-kãng la b sẽn lebge, n gom pagb sẽn sõng a Zeezi yellã.
w08-MM 1/3 9 s. a 3
A Luk sebrã vaeesgo
9:49, 50—Baa ne raoã sẽn da pa pʋgd a Zeezi wã, bõe yĩng t’a pa gɩdg-a t’a ra rig zĩn-dãmba? Yaa b sẽn da nan pa lugl kiris-neb tigingã yĩng la a Zeezi sẽn pa gɩdg-a wã. Dẽnd sasa kangã raoã ra tõe n tẽe a Zeezi la a rig zĩn dãmb ne a yʋʋrã t’a pa pʋgd-a ye.—Mark 9:38-40.
SẼOOG RASEM 16-22
D SẼN BÃNG BIIBLÃ KARENG PƲGẼ | LUK 10-11
“Samari nin-sõngã yel-bũndã”
nwtsty, fot-rãmb la video-rãmba
Sor ning sẽn yit Zerizalɛm n debd Zeriko wã
Video wilgda 1) sor sẽn yit pĩnd Zerizalɛmmã n debd Zeriko. Sorã yɩɩda kilo 20, la f sã n yi Zerizalɛm n dɩk-a n debd Zeriko, f sigdame. So-kãng zugu, weoogã pʋgẽ, fãadb n da wae n gɩt nebã. Rẽ n so tɩ sodaas ra be be me n kogend so-loaadbã. Rom-dãmbã 2) Zeriko wã ra bee Zide weoogẽ wã, tɩ pĩnd Zeriko wã 3) ra be zĩig sẽn kolg kilo a 2 ne Rom.
w02-MM 1/9 25 s. 14-15
“A ka gom ne bãmba sã n ka ne yel-bũnd ye”
Yiib-n-soaba, tẽeg-y kibar ning sẽn gomd Samari nin-sõngã yellã yelle. A Zeezi sɩngame n yeele: “Dao a yembre n da yi Zerizalɛm n dabd Zeriko, tɩ fãadb tek n yõk-a n piid a futu la b pogl-a n bas-a t’a rat n ki.” (Luk 10:30) Pa zaalem yĩng la a Zeezi sẽn yeel tɩ yaa sor ning sẽn “da yi Zerizalɛm n dabd Zeriko” wã ye. A Zeezi sẽn da wa n togsd kiba-kãngã wã, a ra bee Zide sẽn da pa zãr ne Zerizalɛmã. Woto kɩtame t’a kɛlgdbã ra mi sor ning yell a sẽn da gomdã. So-kãng ra yaa wẽng wʋsgo, sẽn yɩɩd fãa ne ned ning sẽn togd sor be a yembre. Sorã ra gõdma wʋsg n tar pẽgs ka tɛk tɩ wagda wã ra tõe n tɩ solg be.
Yaa bʋʋm a to yĩng me la a Zeezi sẽn yeel tɩ sorã ‘yii Zerizalɛm n dabd Zeriko’ wã. Sã n yaa ne kibarã, pipi yaa maan-kʋʋda, rẽ poore yaa Levi ned me n da wa n tũud so-kãnga, la bãmb ned ba a ye yaool n pa yals n sõng rao wã b sẽn poglã ye. (Luk 10:31, 32) Maan-kʋʋdbã ra tʋmda maan-kʋʋrã tʋʋmd Zerizalɛm wẽn-doogẽ wã, tɩ Levi nebã ra sõngd-ba. Maan-kʋʋdb la Levi neb wʋsg n da be Zeriko, b sã n da pa tʋmd wẽn-doogẽ wã, bala Zeriko sẽn da zãr ne Zerizalɛm ra yaa kɩlometr 23 bala. Woto kɩtame tɩ sãmbg sẽn ka be, b ra tũud so-kãngã. Ges-y me tɩ maan-kʋʋdã la Levi nedã ra ‘yita Zerizalɛm,’ rẽnd b ra yii wẽn-doogẽ wã n kuusẽ. Rẽnd ned ba a ye ra pa tõe n kõ ra-kãensã bʋʋm b yam-kaalgã yĩng n yeel tɩ: ‘B sẽn pa sõng rao wã sẽn poglã ya a sẽn da wõnd kũum, tɩ kũum sɩɩsg na n wa kɩt tɩ b pa zems ne maan-kʋʋrã tʋʋmd wẽn-doogẽ wã wakat bilf yĩngã.’ (Maankʋʋre 21:1; Sõdbo 19:11, 16) Pa vẽeneg t’a Zeezi makrã ra pukda yɛl a kɛlgdbã sẽn da mi sõma sɩda?
Luk 10:33, 34; nwtsty
Samari ned: Zʋɩf-rãmbã ra pa nand Samari nebã, b ra pa rat n naag-b meng n maan bũmb ye. (Zã 4:9) Zʋɩf-rãmb kẽer da mi n boola b to tɩ “Samari neda,” n na n wilg tɩ b pa nong-a, wall n na n ning-a taale. (Zã 8:48) Zʋɩf-rãmbã Misna wã pʋgẽ, b togsa rabẽ a ye goama. A yeelame tɩ “ned sã n deeg Samari ned bur n wãbe, yaa wa a sẽn wãb kurkuri.” (Shebith 8:10) Zʋɩf-rãmb wʋsg ra pa tẽed Samari ned kaseto, b pa rat a sõngr me ye. A Zeezi sẽn da mi tɩ zʋɩf-rãmbã pa nand Samari nebã, a wẽe yel-bũndã n na n sõng-b tɩ b bãng bũmb sẽn tar yõod wʋsgo. B mi n boonda yel-bũndã tɩ Samari nin-sõngã yel-bũndi.
n tɩbs a noadã ne kaam la reezẽ rãam, la a vil-b ne pɛɛla: A Luk sẽn da yaa logtorã goma a Zeezi yel-bũndã yelle, n bilg b sẽn da tɩbsd nodã to-to wakat-kãngã. Zags wʋsg pʋsẽ, yaa kaam la reezẽ rãam la b ra wae n tar n tɩbsd nodã. B ra sõogda nodr kaam tɩ bʋk n boog zabdmã. (Eza. 1:6) Reezẽ wã rãam tɩpda nodre, n kogend-a tɩ ra põog ye. Sẽn paase, a Luk bilga b sẽn da vind nodã to-to sẽn na yɩl tɩ ra keng ye.
sik zĩigẽ: Gɛrkã gom-bilã b sẽn lebg tɩ sik zĩigã, bilgda zĩig b sẽn sikd neb sãando. Sãamb ne b rũms ra tõe n paama zĩig be n sigi. Sẽn get-a zĩigã yellã kõta sãambã bũmb kẽere, la a tõe n sak n ges ned b sẽn gũnug-a yell me, n deeg yaoodo.
w98 1/7 31 s. a 2
Samari ned sẽn sõng a to tɩ wilg t’a yaa nin-sõngo
A Zeezi yel-bũndã wilgdame tɩ nin-tɩrg pa ned sẽn tũud Wẽnnaam noyã bal ye. A rɩkda a togs-n-taare, la a bɩɩsd zʋg-sõma. (Efɛɛz rãmbã 5:1) Wala makre, Biiblã yetame tɩ “Wẽnnaam ka tũusd neb ye.” (Tʋʋma 10:34) D rɩkda Wẽnnaam togs-n-taar n pa tũusd neb bɩ? A Zeezi yel-bũndã wilgdame tɩ ned buudã fãa yaa tõnd to, baa a yaa tẽn-zẽng neda, tũudum a to wall buud a to neda. Sɩd me, b kõo kiris-nebã noor tɩ b ‘maand nebã fãa neere.’ Pa neb nins sẽn zem-b tarem wɛɛngẽ, b buud wall b tẽng neba, pa rẽ bɩ b tẽed-n-taasã bal ye.—Galat rãmbã 6:10.
D bʋgs Wẽnnaam Gomdã zug neere
Luk 10:18; nwtsty
Mam dag n nee a Sʋɩtãan sẽn yi yĩngr n lʋɩt wa sa-yãgbo: Vẽenega, a Zeezi ra gomda b sẽn da na n wa rig a Sʋɩtãan n yiis saasẽ wã yelle, tɩ yaa wa rẽ zoe n pidsame. Vẽn. 12:7-9 gomda zabr ning sẽn zĩnd saasẽ Mesi wã Rĩung luglg poor tɩ b rig a Sʋɩtãanã yelle. Ka wã, a Zeezi sẽn yeelã wilgda vẽeneg t’a sẽn na n wa zab ne a Sʋɩtãan ne a zĩn-dãmbã, a na n tõog-b lame. Bala Wẽnnaam kõo karen-biis 70 wã sẽn pa zems zãngã tõog tɩ b rig zĩn-dãmba.—Luk 10:17.
w08-MM 1/3 10 s. a 1
A Luk sebrã vaeesgo
10:18—A Zeezi sẽn yeel a karen-biis 70 tɩ yẽ ‘yãa a Sʋɩtãan sẽn yi yĩngr n lʋɩ wa sa-yãgbã’ võor yaa bõe? A Zeezi ra pa rat n yeel tɩ b zoe n diga a Sʋɩtãan n yiis saasẽ ye. Yaa Kirist sẽn deeg naam yʋʋmd 1914 pʋgẽ wã poor bilf la b rig a Sʋɩtãan saasẽ. (Wil. 12:1-10) A sẽn gom to-to wã wõnda a ra wilgdame tɩ b sɩd na n wa riga a Sʋɩtãan n yiis saasẽ.
Luk 11:5-9; nwtsty
m zoa, peng-m bur a tãabo: Israyɛll soolmẽ wã, sãan sã n da sig neda, yaa tɩlɛ t’a ges a yell sõma, wa b sẽn wilg kibarã pʋgẽ wã. Ned sã n da togd sore, bũmb wʋsg tõe n kɩtame t’a pa tõog n taa a sẽn datẽ wã pĩnd ye. Sãanã siga yʋn-sʋka, la baa ne rẽ a gãag-soabã modgame n na n bao bũmb n kõ-a t’a rɩ, hal n sak n na n tɩ nek a yaka, n kos rɩɩbo.
Ra nams maam: Raoã yak sẽn pa tʋlg n na n sõng-a wã, pa a sẽn pa nong-a yĩng ye. Yaa a sẽn da zoe n kẽ gãagã. Wakat kãnga, rotã ra wae n tara pʋg a ye bal sẽn yaa yalenga, sẽn yɩɩd fãa neb nins nus sẽn pa zãadã roto. Raoã yak sã n da na n yiki, a na n tiisa a zakã neb fãa gõeem, baa kambã.
a pẽdgrã: Gɛrk gom-bil ning b sẽn lebg woto ka wã, tõe n dat n yeelame “t’a sẽn pa zoe yãndã.” La vɛrse-kãngã pʋgẽ, a võorã yaa pẽdgre, bɩ wɩng ne kosgo. Kiba-kãngã a Zeezi sẽn togsã pʋgẽ, raoã pa zoe yãnd n bas a sẽn tʋllã kosg ye. A Zeezi yeela a karen-biisã tɩ bãmb me sã n pʋʋsd n kot bũmbu, b segd n pẽdgame.—Luk 11:9, 10.
SẼOOG RASEM 23-29
D SẼN BÃNG BIIBLÃ KARENG PƲGẼ | LUK 12-13
“Yãmb yõod yɩɩda yirs wʋsgo”
Luk 12:6; nwtsty
yirsi: Gɛrk-rãmbã boonda liuul sẽn paood buudã fãa tɩ strouthion. La wae n yaa yirsã nebã sẽn da wãbd tɩ b koosd-b nana n yɩɩdã la b boond woto.
Luk 12:7; nwtsty
Baa yãmb zugã zoobd fãa sõdame: B bilgame tɩ ninsaal zoobd sõor tõe n taa tus-koabga. A Zeova sẽn mi ninsaal zoobd sõorã wilgdame t’a mii kiris-nebã ned kam fãa hal sõma.
cl 241 s. a 4-5
Bũmb pa tõe n ‘welg tõnd ne Wẽnnaam nonglmã’ ye
Pipi, Biiblã yeta vẽeneg tɩ Wẽnnaam nonga a nin-buiidã ned kam fãa. Wala makre, a Zeezi yeelame yaa: “B ka koosd yirs a yiib su bɩ? La baasgo, a yembr ka lʋɩt tẽng tɩ yãmb Ba ka yã ye. La baa yãmb zoobda fãa sõdame. Dẽ yĩnga, bɩ y da zoe rabeem ye. Yãmb yõod yɩɩda yirs wʋsgo.” (Matye 10:29-31) A Zeezi wakatẽ nebã wʋma a gom-kãensã wãn-wãna?
Tõe tɩ y na n sokame yaa: Ãnda n daad yirga? A Zeezi wakatẽ wã, yirsã ra yaa liuuli nebã sẽn wãbde, tɩ b koosd-b nana n yɩɩda. Ne su a ye bala, ned ra tõe n paama yirs a yiibu. Kaoosg zugẽ, a Zeezi paasame tɩ ned sã n yiis su a yiibu, pa a naas bal la a na n paam ye, yaa bãmb b nu. Ye wã yaa lɛnga. Tõe tɩ yirsã ra pa tar yõod nebã nifẽ ye. La wãn to la naandã get-ba? A Zeezi yeelame tɩ “Wẽnnaam ka yĩmd b baa a yembr yell ye.” Baa yirg ning sẽn yaa lɛngã. (Luk 12:6, 7) A Zeezi gomdã võor tog n yaa vẽeneg ne-d masã. Yirg fãa sã n tar yõod a Zeova nifẽ, ninsaal yõod n yɩɩda. Wa a Zeezi sẽn yeelã, a Zeova mii tõnd ned kam fãa sõma. A mii tõnd ned kam fãa zoobd sõore!
D bʋgs Wẽnnaam Gomdã zug neere
Luk 13:24; nwtsty
Nang-y pãnga: Bɩ “ket-y n maood-y.” A Zeezi saglgã wilgdame tɩ yɩl n paam n kẽ rignoor ning sẽn yaa sẽkã, f segd n modga ne f sũur fãa. Sɛb wʋsg pʋsẽ, b lebga vɛrse wã gom-kãensã tɩ “modg-y ne y pãng fãa, bɩ y mao.” Ne gɛrkã, agonizomai ne agon yaa gom-biis b sẽn wae n pʋt ɛspoorã wɛɛngẽ. Gom-bil ning b sẽn pʋd Ebre. 12:1 n gom kiris-nebã zoees yellã yaa agon. B lebga gom-bilã me tɩ ‘mao’ bɩ ‘zabe.’ (Fili. 1:30; 1 Tɩm. 6:12; 2 Tɩm. 4:7) Gɛrkã gom-bil ning b sẽn lebg Luk 13:24 tɩ maoã bee zĩis a taaba, t’a võor me yaa “yõg maoore,” “maoodẽ,” la “zabe.” (1 Kor. 9:25; Kol. 1:29; 4:12; 1 Tɩm. 4:10; 6:12) B sẽn pʋt gom-bilã n gomd zoees yellã, kẽer yeelame tɩ modgr ning a Zeezi sẽn sagl a karen-biisã tɩ b maanã tõe n yɩɩ wa modgr ning zoɛtbã sẽn maand ne b pãng fãa sẽn na yɩl n paam keoorã.
Luk 13:33; nwtsty
ka zems: Bɩ “pa segd ye, pa tõe n tẽ ye.” Biiblã bãngr-gomd baa a ye pa wilg vẽeneg tɩ Mesi wã na n kii Zerizalɛm ye. La d tõe n tika Dãn. 9:24-26 goamã n yeel tɩ b ra pĩnd n wilgame tɩ na n yɩɩ be. Sẽn paase, zʋɩf-rãmbã sã n da na n kʋ no-rɛɛsa, segd n yɩɩ Zerizalɛm, sẽn yɩɩd fãa Mesi wã. Sãnedrẽ wã bʋ-kaoodb 71 wã sẽn yaa bʋ-kaoodb sull sẽn tar noor n yɩɩdã ra segda taab Zerizalɛm n kaood bʋʋdã. Dẽnd b sã n da rõd ned t’a yaa ziri no-rɛɛsa, be la b vaeesd yellã n gese. A Zeezi ra miime me tɩ yaa Zerizalɛm la b kõt Wẽnnaam maand daar fãa, la tɩ yaa be la b ra kʋʋd pakã pe-bilã. Yɛlã sẽn baas to-to wã wilgdame t’a Zeezi gomdã yaa sɩda. B tall-a lame n kẽng Zerizalɛm Sãnedrẽ wã taoore, tɩ b rõd-a. Leb n yɩɩ Zerizalɛm lalsã poor la b kʋ a Zeezi sẽn yaa “pak pe-bilã.” 1 Kor. 5:7; MN.
SẼOOG RASEM 30–SA-SIK RASEM A 5
D SẼN BÃNG BIIBLÃ KARENG PƲGẼ | LUK 14-16
“Biig ning sẽn sãam a ba paoongã yel-bũndã”
Luk 15:11-16; nwtsty
Rao n dag n tar kom-dibli a yiibu: Biig ning sẽn sãam a ba paoongã yel-bũndã goam kẽer tara pãnga. A Zeezi yel-bũnã sʋka, yẽ woglem n yɩɩde. Yel-bũndã bilgda zak neb sẽn nong taab to-to. A Zeezi yel-bũn a taab pʋgẽ, a goma bõn-buudu, la zĩis yelle. A goma zu-soab ne a tʋmd-tʋmdb yell me. (Mat. 13:18-30; 25:14-30; Luk 19:12-27) La yel-bũn-kãngã pʋgẽ, a Zeezi wilga ba sẽn nong a kom-dibli to-to. Tõe tɩ neb wʋsg sẽn wʋm yel-bũndã pa paam ba sẽn nong-b wʋsg ye. Yel-bũndã wilgda d saasẽ ba wã sẽn nong tõnd a kambã n zoet-d nimbãaneg to-to wã, rat n yeel tɩ b rãmb nins sẽn ket n sakd-a wã, la sẽn beeg-b n tek yam n lebg n wat a nengẽ wã.
yaoã: A Moyiiz tõogã wilgame tɩ rao sã n na n pʋɩ a kamb a paoongo, a segd n yãka zĩis a yi n kõ bi-kãsengã. (Tõo. 21:17) Sã n da yaa bãmb b yiibã bal la raoã kamba, yaoã pʋɩɩr yaa kẽemã rẽndã pʋɩ-sʋka.
sãam: Gɛrk gom-bil ning b sẽn lebg tɩ sãamã võor yaa sãeeg zĩis toor-toore. (Luk 1:51; Tʋʋ. 5:37) B lebga gom-bilã Mat. 25:24, 26 pʋgẽ wã tɩ “yɛdge.” Dẽnd Luk 15:11-16 pʋgẽ wã, gom-bilã võor yaa sãame, sãam f paoongo.
tʋʋm-dẽgd maanego: Bɩ vɩɩmd vɩ-yooko, vɩɩmd wa rũnga. Gɛrk gom-bil a to me la b lebg Efɛ. 5:18 ne Tɩt 1:6; la 1 Pɩy. 4:4 pʋgẽ wã t’a võorã yaa woto. B sẽn tõe n lebg-a me tɩ sãame, sãeege, la vɩɩmdã, Biibl-dãmb kẽer lebg-a lame tɩ “vɩɩmd vɩ-yooko.”
gũ kurkuya: A Moyiiz tõogã pʋgẽ, kurkur yaa rẽgdo. Rẽnd b gũub yaa tʋʋmd sẽn paoogd zʋɩfe, yaa tʋʋmd sẽn pa sõma baa bilfu.—Maan. 11:7, 8.
zãbne: Yaa tɩɩg bil sẽn wõnd yɩɩlle, t’a paokã pɩnda. B boond-a-la ne gɛrkã tɩ keration, t’a võorã yaa yɩɩn-bila. Hal ne rũndã, b tar-a lame n dɩlgd wed-moose, niis la kurkuya. B sẽn yeel tɩ bi-riblã ra rata baa kurkuyã rɩɩb n dɩ wã, wilgda a yɛlã sẽn da sãam to-to wã.—Ges-y Luk 15:15
Luk 15:17-24; nwtsty
m beega yãmba: Bɩ “yãmb nifẽ.” Gɛrk gom-bil ning b sẽn lebg woto wã yaa enopion, t’a võorã yaa “taoore, bɩ nifẽ.” Sɛptãntã pʋgẽ, b sẽn lebg gom-bilã 1 Sãm. 20:1 wã, a võorã yaa “taoore, bɩ nifẽ.” Vɛrse-kãng pʋgẽ, a Davɩɩd soka a Zonatã yaa: “Mam maana yel-wẽn-bʋg n beeg y baaba?”
tʋm-tʋmdba: Biigã yeelame t’a na n lebg n kulame, n tɩ kos a ba wã t’a rɩk-a tʋʋmã, la a ra le ges-a wa a biig ye. Tʋm-tʋmd a woto pa wa yamb sẽn vɩ a zu-soabã zakẽ wã ye. A yaa wa yɩng ned sẽn wat n kot tʋʋm daar fãa, t’a sã n sa bɩ b yao-a.—Mat. 20:1, 2, 8.
mobg-a n mok-a: Bɩ, “mok-a sõma.” Gɛrk gom-bil ning b sẽn lebg tɩ mobg-a n mok-a wã yaa phileo, tɩ b wae n lebgd-a tɩ “moke,” la a võorã tara pãnga. (Mat. 26:48; Mark 14:44; Luk 22:47) Zĩis wʋsgo, a võorã yaa “nonglem” (Zã 5:20; 11:3; 16:27). Kibarã pʋgẽ, biigã ba sẽn mobg-a n mok-a wã, wilgdame t’a sak n na n lebg n deega a biigã sẽn tek yamã.
bool maam tɩ yãmb biiga: Luk 15:21 wã pʋgẽ, sɛb-kʋd kẽer b sẽn gʋls ne nug paasame tɩ “sak-y tɩ m lebg y tʋʋm-biiga.” La b sẽn lebg-a to-to tɩ be Biiblã pʋgẽ wã zemsa ne pĩnd sɛb-kʋda. Bãngdbã kẽer yeelame tɩ b sẽn paas gom-kãensã yaa sẽn na yɩl tɩ zems ne Luk 15:19 goamã.
fuugu. . . nugbĩnga. . . neooda: Fuugã ka wã pa fuug yaar ye, yaa fuug sẽn yaa neer n yɩɩda, tɩ tõe tɩ yaa fuug sẽn maneg sõma b sẽn kõt sãan b sẽn nande. Ba wã sẽn kɩt tɩ b ning biigã nugbĩngã wilgdame t’a waoog-a lame, t’a nong-a lame, la t’a ket n yaa a biiga. Yamb ra pa wae n paam nugbĩng la neoodr ye. Rẽnd a ba wã sẽn deeg-a woto wã, a wilga vẽeneg t’a yaa zakã neda.
D bʋgs Wẽnnaam Gomdã zug neere
Luk 14:26; nwtsty
kis: Biiblã pʋgẽ, gom-bil ning b sẽn lebg tɩ ‘kisgã’ võorã yaa toor-toore. B sã n yeel tɩ ned kisa a taaba, tõe n bilgda a sẽn maand a taab wẽnga. B sã n yeel me tɩ ned kisa a taab wall bũmbu, bilgda a sẽn pa rat n pẽneg b rãmbã wall bũmbã. Tõe n bilgda nonglem sẽn pa waooge. Wala makre, b yeelame t’a Zakoob ra nonga a Rasɛlle, la t’a ‘ra pa nong’ a Leya, bɩ t’a ra kis-a lame. La rat n yeelame bal t’a ra nonga a Rasɛll n yɩɩd a Leya. (Sɩng. 29:31; Tõo. 21:15) Gom-bilã bee zʋɩf-rãmbã sɛb-kʋd a taab pʋsẽ me n bilgd nonglem sẽn pa waooge. Dẽnd a Zeezi sẽn yeel a karen-biisã pa rat n yeel tɩ b ra nong b zagsã rãmba, la b mensã ye. Pa rẽ, na n kɩɩsa Biiblã goam a taaba. (Ges-y Mark 12:29-31; Efɛ. 5:28, 29, 33.) Ka wã, b tõe n lebga ‘kisgã’ tɩ “ra nong ned bɩ bũmb a to n yɩɩd ye.”
w17.07-MM 8-9 s. a 7-8
Bao-y paoong sɩd-sɩdã
Karm-y Luk 16:10-13. A Zeezi yel-bũndã pʋgẽ, tʋʋmdã taoor soab sẽn bao zo-rãmbã yaa a meng nafr yĩnga. La a Zeezi sẽn sagl kiris-nebã tɩ b bao zo-rãmb saasẽ wã pa b mens nafr yĩng ye. A ra ratame tɩ d bãng tɩ d sẽn maand bũmb nins ne d paoongã wilgda d sã n maanda sɩd ne Wẽnnaam. Wãn to?
Bũmb a ye d sẽn tõe n maan ne d paoongã, tɩ wilg tɩ d maanda sɩd ne a Zeova, yaa d sẽn na n kõt ligd sẽn na yɩl n sõng tɩ b moon koɛɛgã dũniyã gill zug wa a Zeezi sẽn da pĩnd n togsã. (Matye 24:14) Ẽnd bi-pugl a ye sẽn yaa bilf n bao konkong n poog n bĩngd ligd bilf-bilfu. A ra basame meng n pa le raad reem-teed ye. Konkongã sẽn wa n pidã, a rɩka ligdã fãa n kɩs sẽn na yɩl n teel koɛɛgã moonego. Ẽnd saam-biig a ye me n tar kaok pʋʋgo. A yãkd n kõta siglgã sɛbã lebr biru a ye sẽn be be. A yeelame tɩ sẽn mik tɩ biru wã mi n tɩ raa kaokã, yẽ tagsdame t’a sã n kõt-b kaokã, rẽ sãoo yẽ sẽn na n kõ-b ligd-vẽenega. A sẽn maandã sɩd yaa yam. Gɛrɛs sam-biis me n maand a buudu. B kõta beenẽ Betɛllã zak rãmb oliiv kaam, formaaze, la bũmb a taaba.