Kiris-nebã vɩɩm la b tʋʋma tigissã na-kẽndr not-rãmbã
SƖPAOLG RASEM A 5-11
D SẼN BÃNG BIIBLÃ KARENG PƲGẼ | ZÃ 20-21
“Fo nonga maam n yɩɩd bõn-kãensã bɩ?”
(Zã 21:15, MN) B sẽn wa n sok b noor n sa wã, a Zeezi soka a Sɩmo-Pɩyɛɛr yaa: “A Zã biig a Sɩmo, fo nonga maam n yɩɩd bõn-kãensã bɩ?” T’a leok n yeele: “N-ye, Zu-soaba. Yãmb miime tɩ mam nonga yãmba.” T’a Zeezi yeel-a: “Rɩlg mam pe-bi wã.”
A Zeezi soka a Sɩmo-Pɩyɛɛr yaa: Yɩɩ rasem a wãn a Pɩyɛɛr sẽn kɩɩs naoor a tã t’a pa mi a Zeezi wã poor la a Zeezi sẽn sõs ne-a wã. A Zeezi soka a Pɩyɛɛr naoor a tã n na n bãng a tagsg sẽn yaa a soab yẽ zugu, hal ‘t’a Pɩyɛɛr sũur wa sãame.’ (Zã 21:17) A Zã sẽn togs kibarã Zã 21:15-17 pʋgẽ wã, a pʋda Gɛrk gom-biis a yi: Yaa agapao ne phileo. Moorã Biiblã lebga b yiibã fãa tɩ “nonga.” A Zeezi soka a Pɩyɛɛr naoor a tãab yaa: “Fo nonga maam bɩ?” La naoor a tã wã a Pɩyɛɛr leoka ne a sũur fãa “t’a nonga” a Zeezi. A Pɩyɛɛr sã n da leok t’a nonga a Zeezi fãa, a Zeezi yet-a lame t’a sẽn nong yẽ wã segd n kɩtame t’a rɩlg “pe-bi wã” la a “kɩɩm-ba,” rat n yeel t’a sõng a karen-biisã tɩ b tẽebã tall pãnga. (Zã 21:16, 17; 1 Pɩy. 5:1-3) A Zeezi kõo a Pɩyɛɛr sor t’a wilg naoor a tãab t’a nonga yẽ, t’a yaool n yeel-a t’a ges a piisã yelle. A Zeezi sẽn maan woto wã, a kɩtame t’a Pɩyɛɛr bas a yam tɩ yẽ sẽn kɩɩs a Zeezi naoor a tã wã, a kõ-a-la sugri.
fo nonga maam n yɩɩd bõn-kãensã bɩ?: B sẽn wʋg goamã to-to wã kɩtame tɩ nebã sẽn wʋmd gom-biis nins b sẽn lebg tɩ “n yɩɩd bõn-kãensa” wã võor to-to wã pa yembr ye. Biibl-mitb kẽer yetame tɩ b võorã yaa: “Fo nonga maam n yɩɩd fo sẽn nong karen-biis a taabã to-to wã bɩ?” Wall “fo nonga maam n yɩɩd karen-biis a taabã sẽn nong maam to-to wã bɩ?” La wõnda gomdã võor meng-mengã yaa: “Fo nonga maam n yɩɩd bõn-kãensã bɩ?” Rat n yeel tɩ zĩmã b sẽn yõgã, bɩ tʋʋm nins fãa sẽn da kẽed ne zĩmã yõgbã. Rẽnd wõnda vɛrse-kãngã rat n yeelame yaa: ‘Fo nonga maam n yɩɩd arzɛkã wall bũmb a taabã baoob bɩ? Sã n yaa rẽ, bɩ f rɩlg m piisã.’ D sã n tags a Pɩyɛɛr vɩɩmã sẽn da yaa to-to wã, d yãtame tɩ sokrã sɩd zemsame. Baa ne a Pɩyɛɛr sẽn yɩ a Zeezi pipi karen-biisã nin-yendã, (Zã 1:35-42) a sẽn sɩng a Zeezi pʋgbã, a pa kell n pa ne-a wakat fãa ye. A wa n leba zĩmã yõgbẽ. Kiis a wãn poore, a Zeezi boola a Pɩyɛɛre, n yeel-a t’a bas tʋʋm-kãngã sẽn dɩkd sẽkã, n lebg ‘nin-baooda.’ (Mat. 4:18-20; Luk 5:1-11) A Zeezi kũumã poor bilf me, a Pɩyɛɛr yeelame tɩ yẽ na n kẽngame n tɩ yõg zĩm, tɩ tʋm-tʋmdb a taab tũ-a. (Zã 21:2, 3) Rẽnd wõnda a Zeezi da rat n sõnga a Pɩyɛɛr t’a bãng t’a segd n yãka a sẽn na n maanegã: Ra na n yɩɩ zĩmã yõgb sẽn kẽesd ligdã n da na n tall yõod ne-a n yɩɩd bɩ? Zĩmã sẽn dʋr b taoorã ra makda rẽ. Bɩ a ra na n lʋɩɩsa a Zeezi piisã bɩ a karen-biisã rɩlgr taoore?—Zã 21:4-8.
naoor a tãab-n-soaba: A Pɩyɛɛr kɩɩsa naoor a tã t’a pa mi a Zu-soabã ye. A Zeezi sok-a-la naoor a tã, n kõ-a weer t’a wilg sẽn da be a sũurẽ. A Pɩyɛɛr sẽn wa n wilgd sẽn be a sũurẽ wã, a Zeezi yeelame t’a lʋɩɩs Wẽnnaam tʋʋmdã bũmb fãa taoore, n wilg t’a sɩd nong-a lame. A Pɩyɛɛr ne saam-biis a taab sẽn da lʋɩt taoor tigingã pʋgẽ ra segd n dɩlga Kiristã piisã, rat n yeel t’a karen-biisã sẽn maand sɩd ne-a wã, n keng b raoodo, la b wilgd-b sore. B ra paama vʋʋsem sõngã zaeebo, la b ra ket n datame tɩ b sõng-b tɩ b tẽebã kell n tall pãnga.—Luk 22:32.
D bʋgs Wẽnnaam Gomdã zug neere
(Zã 20:17, MN) T’a Zeezi yeel-a: “Bas mam mobgre. Bala, mam nan pa rʋ Ba wã nengẽ ye. La kẽng m saam-biisã nengẽ n tɩ yeel-ba: ‘Mam dʋʋda m Ba sẽn yaa yãmb me Ba wã nengẽ, la m Wẽnnaam sẽn yaa yãmb me Wẽnnaamã nengẽ.’”
Zã 20:17, nwtsty
Bas mam mobgre: Gɛrk gom-bil ning sẽn yaa haptomai wã võor yaa “sɩɩs” bɩ “gãd kãn-kãe.” Biibl-dãmb kẽer pʋsẽ, b lebga a Zeezi goamã tɩ “ra sɩɩs maam ye.” La a Zeezi pa yeel a Maari sẽn yit Magdala wã t’a ra sɩɩs-a ye. Bala, a vʋʋgrã poore, pagb a taab sẽn yã-a n “gãd a naoã,” a pa gɩdg-b ye. (Mat. 28:9) Wõnda a Maari sẽn yit Magdala wã tagsame t’a Zeezi rat n looga saasẽ. A sẽn da rat ne a sũur fãa n pa ne a Zu-soabã yĩnga, a gãd-a-la kãn-kãe n pa rat t’a loog ye. Sẽn na yɩl t’a Maari bas a yam t’a nan pa loogde, a Zeezi yeel-a lame t’a bas yẽ la a tɩ togs a karen-biisã t’a vʋʋgame.
Zã 20:28, nwtsty
Mam Zu-soaba, la mam Wẽnnaam!: Biibl-mitb kẽer yeelame tɩ baa sẽn yaa a Zeezi la b bool woto wã, yaa Wẽnnaam sẽn yaa a Ba wã la b sẽn da gomd ne wã. La sãnda yetame tɩ Gɛrkã pʋgẽ, gomdã sẽn wʋg to-to wã wilgdame tɩ yaa a Zeezi la b sẽn gomd ne wã. Baa rẽ sã n yaa sɩda, d sã n ges Biiblã vɛrse-rãmb a taaba, d wʋmda ‘mam Zu-soab la mam Wẽnnaamã’ võor sõma. Kibarã wilgame t’a Zeezi ra yeelame tɩ b tɩ togs a karen-biisã yaa: ‘Mam dʋʋda m ba sẽn yaa yãmb ba wã nengẽ, mam Wẽnnaam sẽn yaa yãmb Wẽnnaamã nengẽ.’ Rẽnd bũmb kae d sẽn tõe n tik n tẽ t’a Toma ra tagsdame t’a Zeezi n yaa Wẽnnaam Sẽn-tõe-a-fãa wã ye. (Zã 20:17) A Toma ra wʋmda a Zeezi sẽn pʋʋsd a “Ba” wã, n boond-a tɩ “sɩd Wẽnnaamã.” (Zã 17:1-3) La bõe yĩng t’a Toma bool a Zeezi woto? Tõe t’a yamẽ, a Zeezi yaa wẽnnaam” la a pa Wẽnnaam Sẽn-tõe-a-fãa wã ye. (Zã 1:1) Wall tõe t’a boola a Zeezi wa Wẽnnaam tʋm-tʋmdb sẽn da bool malɛgs a sẽn tʋme, tɩ Biiblã babg ning b sẽn da gʋls ne Ebre wã gomd b yelle. A Toma tog n da mii Biiblã kibay sẽn wilgd neb sẽn gom ne malɛgs a Zeova sẽn tʋme, tɩ yaa wa b gomda ne a Zeova. Biibl-gʋlsdb me maana woto. (Ges-y Sɩng. 16:7-11, 13; 18:1-5, 22-33; 32:24-30; Bʋ. 6:11-15; 13:20-22.) Rẽnd tõe t’a Toma boola a Zeezi tɩ “mam Wẽnnaam” a sẽn da mi t’a gomda Wẽnnaam sɩd-sɩdã yʋʋr yĩnga, n yaa a koe-taasdã.
SƖPAOLG RASEM 12-18
D SẼN BÃNG BIIBLÃ KARENG PƲGẼ | TƲƲMA 1-3
“Wẽnnaam pʋdga a vʋʋsem sõngã kiris-nebã zugu”
Tʋʋ. 2:42-47, w86 1/12 29 s. a 4-5, 7
Kũun sẽn noogd sũuri
Kiris-neb tigingã luglg daar yʋʋmd 33 wã, neb tus a tã wã sẽn deeg lisg paalmã ‘ra tigimda taaba, n dɩt ne taaba, la b pʋʋsdẽ.’ Bõe yĩng tɩ b ra maand woto? Yaa sẽn na yɩl tɩ b ‘ket n wɩngd ne tʋm-tʋmdbã zãmsgã kelgre,’ tɩ keng b tẽebã sẽn da nan pa tar pãngã.—Tʋʋ. 2:41, 42, MN
Zʋɩf-rãmbã la neb sẽn da tuub n sakd Zʋɩf-rãmbã tũudum ra waa Zerizalɛm Pãntekotã yĩng bala. La sẽn lebg-b kiris-nebã yãka yam n na n pa Zerizalɛm n kaoos bilfu, n paam n bãng bũmb a taab tɩ b tẽebã pãng paase. Kɩtame tɩ yɩ tɩlɛ tɩ b sõng nin-kãensã ne rɩɩb la gãag zĩisi. Sãambã kẽer da pa tar ligd wʋsgo, tɩ sãnda ra tarẽ tɩ sek n kelle. Rẽ n so tɩ b ra rɩkd b paoongã n naagd taaba, n pʋɩt tɩ zemsd ne ned kam fãa sẽn tog n paam tɩ sek-a. La pa yɩ bũmb b sẽn da segd n maand wakat fãa ye.—Tʋʋ. 2:43-47.
Pʋtã koosgã ne paoongã pʋɩɩbã ra yaa ne yamleoogo. B pa modg ned baa a ye t’a koos a bũmbu, bɩ a yãk a sẽn tar n kõ ye. Leb n pa sẽn na n wilg tɩ b fãa segd n yɩɩ naong rãmb ye. B pa yeel sẽn da tar-b ligd wʋsgã tɩ b koos b paoongã fãa n lebg naong rãmb ye. B yãa b tẽed-n-taasã zu-loɛɛg n da kʋmd b nimbãanega. Rẽ n so tɩ b koos b paoongã n dɩk b sẽn paamã fãa n kõ n teel Rĩungã tʋʋmdã.—Ges-y 2 Korẽnt rãmb 8:12-15.
D bʋgs Wẽnnaam Gomdã zug neere
Tʋʋ. 3:15, it-2 25 s. a 2
A Zeezi Kirist
“Vɩɩm naabã.” Kirist Zeezi sak n kiime tɩ yɩ maoongo, tɩ wilgdẽ t’a Ba wã yaa bark sẽn ka to soaba. Rẽ paka sor t’a karen-biis kẽer paam n na n tɩ naag-a n dɩ naam saasẽ, tɩ sãnda na n paam n vɩɩmd tẽngã zug a Zeezi naamã sasa. (Mat. 6:10; Zã 3:16; Efɛ. 1:7; Ebre. 2:5) Woto kɩtame t’a lebg “vɩɩm naab” ãdem-biisã fãa yĩnga. (Tʋʋ. 3:15) Gɛrk gom-bil ning b sẽn lebg woto wã võor yaa “taoor lʋɩta.” A wõnda gom-bil ning b sẽn lebg Tʋʋm 7:27, 35 wã. Be, b goma a Moyiiz yell n bool-a tɩ Israyɛll “naaba.”
Tʋʋ. 3:19, cl 265 s. 14
Wẽnnaam sẽn “kõt sugr” wʋsgo
Tʋʋm 3:19 wã pʋgẽ, b bilgda a Zeova sẽn kõt sugr to-to wã sõma. B yeela be yaa: ‘Dẽ, tek-y yam n kos sugri, tɩ Wẽnnaam tõe n yẽes y yel-wẽnã.’ Gɛrk gom-bil ning b sẽn lebg ka tɩ “yẽesã” rat n yeelame me tɩ “yãke, kɩt tɩ sa, bɩ sãame.” Biibl-mitb kẽer yeelame tɩ b sẽn yeel ka tɩ yẽesã yaa wa ned sẽn na n yẽes gʋlsem b sẽn gʋls bũmb zugu. Bõe yĩng tɩ b yet woto? Pĩnd wẽndẽ wã, gʋls-koom ning b sẽn da tar n gʋlsdẽ wã ra maana ne saal ne tɩɩg sũm la koom. Ned sã n da gʋls bũmb tɩ pa kaoose, a tõe n dɩka sɩfõ n madg koom n yẽese. Ad sɩd yaa makr sẽn wilgd t’a Zeova yaa nimbãan-zoɛta! A sã n kõ tõnd sugri, yaa wa a sẽn dɩk sɩfõ n yẽes d yel-wẽnã.
SƖPAOLG RASEM 19-25
D SẼN BÃNG BIIBLÃ KARENG PƲGẼ | TƲƲMA 4-5
“B kell n moona Wẽnnaam koɛɛgã ne raoodo”
Tʋʋ. 4:5-13, w08 1/9 15, zĩ-gũbrã
B sɩnga ne kelgre, n wa gʋls Wẽnnaam sɛba: Pipi kiris-nebã ra nonga sɛb karengo
Tʋm-tʋmdbã ra yaa neb sẽn pa mi kareng bɩ?
Zerizalɛm nanambsã ne kãsem-dãmbã “sẽn yã a Pɩyɛɛr ne a Zã sẽn gomd n pa yɛɛsdẽ wã, n bãng me tɩ b pa paam zãmsg n le yaa nin-talsã, ling-b-la wʋsgo.” (Tʋʋ. 4:13) Tʋm-tʋmdbã sɩd ra yaa neb sẽn pa paam zãmsg bɩ sẽn pa mi kareng bɩ? Biibl-mit a ye goma rẽ yell a sebr pʋgẽ, n yeel yaa: “Pa wõnd gom-kãensã rat n yeelame t’a Pɩyɛɛr [ne a Zã] ra pa kẽ lekolle, la tɩ b pa mi gʋlsg la kareng ye. Yaa sẽn na n wilg bal tɩ welg-kãseng n be tʋm-tʋmdbã ne sẽn zĩ-b n na n kao b bʋʋdã sʋka.”
w08-MM 1/5 30 s. a 6
Tʋʋm sebrã vaeesgo
Rẽ yĩnga a Pɩyɛɛr ne a Zã ra yaa neb sẽn pa karem lae-lae bɩ? Ayo, b ra paama zãmsgo. B ra boond-d lame tɩ “nin-tals sẽn ka paam zãmsgo,” bala b pa kẽ rabẽ-rãmbã lekoll sẽn da zãmsd tũudmã yɛlã ye.
Tʋʋ. 4:23-31, it-1 141 s. a 1
Tʋm-tʋmdbã
B sẽn tʋm tʋʋmd ning tigingã pʋgẽ. Wẽnnaam sẽn pʋdg a vʋʋsem sõngã tʋm-tʋmdbã zug Pãntekotã daarã sɩd kenga b raoodo. Tʋʋm sak a 1-5 wã gomda tʋm-tʋmdbã raoodã yelle, b sẽn moon koɛɛgã ne yẽesem to-to, la b gom a Zeezi vʋʋgrã yell baa nanambsã sẽn yõg-b n kẽes bãens roogo, n pãb-ba, la b ra rat n kʋ-bã. Pãntekotã poore, ne vʋʋsem sõngã sõngre, tʋm-tʋmdbã sẽn lʋɩ tigingã taoor ne yẽesmã kɩtame t’a nebã sõor paas wʋsgo. (Tʋʋ. 2:41; 4:4) B sɩnga koɛɛgã mooneg Zerizalɛm, n wa kẽng Samaari. La b wa n moon-a-la dũniyã tɛk fãa bãmb wakatẽ wã.—Tʋʋ. 5:42; 6:7; 8:5-17, 25; 1:8.
D bʋgs Wẽnnaam Gomdã zug neere
Tʋʋ. 4:11, it-2 591 s. a 2
Pãng kugri
Yɩɩn-sõamyã 118:22 wã yetame tɩ tãn-metbã sẽn zãgs kugr ningã na n wa lebga “roogã pãng zĩigẽ kugri.” (Ne Ebre, rosh pinnah) A Zeezi lebs n togsa bãngr-gom-kãngã, la a wilg t’a pidsda yẽ mengã zugu. A yeelame tɩ yaa yẽ la “roogã pãng kugri.” (Ne Gɛrke, kephale gonias, roogã pãng zĩigẽ kugri.) (Mat. 21:42; Mark 12:10, 11; Luk 20:17) Kugr ning b sẽn ne n tɩ yɩɩd roog zug yaa a baasgẽ kugrã. Woto me, a Zeezi Kirist n yaa kiris-neb nins sẽn paam vʋʋsem sõng zaeebã tigingã Zu-soaba. Sɩd me, b maka tigingã ne wẽnd-doog sẽn pa ninsaalb nus n me. A Pɩyɛɛr me wilgame tɩ Yɩɩn-sõamyã 118:22 wã pidsa a Zeezi zugu. A yeelame t’a Zeezi yaa “kugr ning” nebã sẽn zãgsã, la tɩ Wẽnnaam yãk-a lame t’a na n lebg “roogã pãng kugri.”—Tʋʋ. 4:8-12; Ges-y 1 Pɩy. 2:4-7 me.
Tʋʋ. 5:1, w13 1/3 15 s. a 4
A Pɩyɛɛr ne a Hananiyaas yaga ziri: Rẽ wilgda tõnd bõe?
A Hananiyaas ne a pagã koosa b pʋʋg n na n paam ligd n sõng sẽn nan deeg-b lisg paalmã. A Hananiyaas sẽn tall ligdã n tɩ kõ tʋm-tʋmdbã, a yeelame tɩ yaa pʋʋgã ligd fãa. La ra pa sɩd ye! A wedga ligdã n na n talle! Wẽnnaam vẽnega yellã a Pɩyɛɛre, t’a yeel a Hananiyaas yaa: “Fo ka yag zĩrẽ wã ne ninsaalb ye, la yaa ne Wẽnnaam la f yag-yã.” A Hananiyaas lʋɩɩ zĩig pʋgẽ n ki! Na maan lɛɛr a tãab poore, a pagã waame. A sẽn da pa mi bũmb ning sẽn paam a sɩdã, yẽ me yaga ziri, n lʋɩ n ki.
SƖPAOLG RASEM 26–YƲƲM-SAR RASEM A 2
D SẼN BÃNG BIIBLÃ KARENG PƲGẼ | TƲƲMA 6-8
“Tigingã sẽn nan lugl paalmã paama makre”
Tʋʋ. 6:1, 2-7, bt 41 s. 17
“Tõnd tog n saka Wẽnnaam n yɩɩda”
Masã, tigingã sẽn nan lugl paalmã sega zu-loɛɛg sẽn yit a pʋgẽ wã, n tõe n wa ne yell meng-menga. Yaa zu-loe-bʋgo? Karen-biisã sẽn deeg lisgã wʋsg ra yaa sãamb sẽn yi tẽns a taab n wa Zerizalɛm, n da rat n kell n pa be n bãng bũmb wʋsg la b yaool n kuli. Karen-biis nins sẽn da yaa Zerizalɛm nebã sak n kõo ligdi, tɩ b na n sõng sãambã ne rɩɩb la bũmb a taaba. (Tʋʋ. 2:44-46; 4:34-37) Wakat-kãnga, zu-loɛɛg n puk tigingã pʋgẽ. Rɩɩbã pʋɩɩb wɛɛngẽ, b wa n pa le kõt pʋg-kõap nins sẽn gomd Gɛrkã “b daar fãa pʋɩɩrã wa sẽn zems” ye. (Tʋʋ. 6:1) La b yaool n da geta pʋg-kõap nins sẽn gomd Ebre wã yell sõma. Dẽnd wõnda zu-loɛɛgã ra yaa bak-n-sõnge. Bũmb paood sẽn tõe n welg neb ne taab n ta yãoã.
bt 42 s. 18
“Tõnd tog n saka Wẽnnaam n yɩɩda”
Tʋm-tʋmdbã sẽn da yaa tigingã taoor lʋɩtbã gesame tɩ pa zems tɩ bãmb “bas Wẽnnaam koɛɛgã mooneg n pʋɩt neb rɩɩb ye.” (Tʋʋ. 6:2) Sẽn na yɩl n welg zu-loɛɛgã, b sagla karen-biisã tɩ b yãk rap a yopoe ‘sẽn pid ne sɩɩg-sõng la yam’ tɩ b kõ-b “tʋʋm-kãngã” sẽn tar yõodã. (Tʋʋ. 6:3) Ra segd n yɩɩ rap sẽn tar minim, bala rɩɩbã pʋɩɩb toor sẽn ka be, bãmb n da segd n zã ligdã, n daad bũmb toor-toore, la b maagd b yĩng n gʋlsd ligd sẽn kẽ fãa la sẽn yi. Rap nins b sẽn yãkã fãa yʋy ra yaa ne Gɛrke. Tõe tɩ rẽ kɩtame tɩ pʋg-kõap nins sũy sẽn da pa noomã yam gãande. B sẽn tall rap a yopoe wã n kẽng tʋm-tʋmdbã nengẽ wã, b pʋʋsame la b rɩk tʋʋmdã n kõ-ba.
D bʋgs Wẽnnaam Gomdã zug neere
Tʋʋ. 6:15, bt 45 s. a 2
A Etɩɛn ra ‘pida ne bark la pãnga’
Wakat-kãnga, a Etɩɛn nengã sẽn da yaa to-to wã linga nebã. Bʋ-kaoodbã ges-a lame, la “b yãame tɩ yẽnda nengã wẽnda wa malɛk nenga.” (Tʋʋ. 6:15) Malɛk sã n wa n na n taas neb Wẽnnaam a Zeova koɛɛga, f sã n ges a nengã, f miime t’a yamã gãee bãane, tɩ rabeem pa tar-a ye. Ra yaa woto me ne a Etɩɛn nengã. Baa bʋ-kaoodbã sẽn da kis-a wã yãa rẽ. Bõe n kɩt tɩ rabeem da pa tar-a baa bilfu?
Tʋʋ. 8:26-30, bt 58 s. 16
B ra moonda “a Zeezi koe-noogã”
Rũndã-rũndã, kiris-nebã paam n tʋmda a Filip tʋʋmdã buudu. B wae n taasda neb Wẽnnaam Rĩungã koɛɛg segb b sẽn paam fãa sasa. Wala makre, b sẽn wat n togd sore. B sã n seg pʋ-peelem soaba, naoor wʋsgo, wõnda b sẽn seg taab to-to wã pa yɩ yaar ye. Rẽ pa lingr ye. Bala, Biiblã wilga vẽeneg tɩ malɛgs n lʋɩt koe-moonegã taoore, sẽn na yɩl tɩ koɛɛgã ta “soolem fãa, buud fãa, goam buud fãa nebã, la tẽng fãa nebã.” (Vẽn. 14:6) Sɩd me, a Zeezi ra pĩnd n togsame tɩ malɛgs n na n lʋɩ tʋʋmdã taoore. A yel-bũnd ning sẽn gomd ki ne nadens yellã pʋgẽ, a yeelame tɩ tigsgã wakat sẽn yaa dũniyã saabẽ wã, “tigsdbã yaa malɛgsã.” A paasame tɩ malɛgsã na n “yãgsa kug-lakdsã fãa ne neb nins sẽn maand wẽngã n yiis-b bãmb soolmẽ wã.” (Mat. 13:37-41) Wakat-kãng me, malɛgsã na n tigsa neb nins sẽn na n wa yɩ saasẽ Rĩungã rĩm-dãmbã, la b tigs “neb kʋʋng” sẽn yaa a Zeezi “piis a taaba,” a Zeova sẽn dat n tak n wa a siglgã pʋgẽ.—Vẽn. 7:9; Zã 6:44, 65; 10:16.