Kiris-nebã vɩɩm la b tʋʋma tigissã na-kẽndr not-rãmbã

SẼOOG RASEM A 6-12

D SẼN BÃNG BIIBLÃ KARENG PƲGẼ | YIKRI 6-7

‘Moasã, fo na n yãnda bũmb ning mam sẽn na n maan a Farawõ’

Yikri 6:1, 6, 7; it-2 309 5

A Moyiiz

Sẽn paase, toeeng sẽn yɩ kãseng n zĩnd Israyɛll nebã sʋka. Sɩngrẽ wã, b sak n deega a Moyiiz sẽn da yeelã. La a Farawõ sẽn kõ noor tɩ b paas b tʋʋmã tɛkã, b yẽgma ne a Moyiiz, hal t’a Moyiiz sũur sãame, t’a pʋʋs a Zeova n kos sõngre. (Yik. 4:29-31; 5:19-23) Wakat kãnga, Wẽnnaam kenga a Moyiiz raoodo, n yeel-a t’a na n pidsa bũmb ning a Abrahaam ne a Izaak la a Zakoob sẽn da gũudã, rat n yeel tɩ n fãag Israyɛll nebã, la a tall-b n kẽng kãabg tẽngẽ wã tɩ b tɩ lebg bu-kãsenga, tɩ wilg Wẽnnaam yʋʋrã võor meng-menga. (Yik. 6:1-8) Baa rẽ poore, Israyɛll nebã pa kelg a Moyiiz ye. La toog a wɛ soabã poore, b saka a Moyiiz goamã, n teel-a sõma, hal tɩ rẽ sõng t’a tõog n tigim-b toog piigã poore, tɩ b ‘tong taab tãb-bi-sull-sulli,’ t’a Moyiiz lʋɩ b taoor tɩ b yi tẽngã.—Yik. 13:18.

Yikri 7:4, 5; it-2 309 3-4

A Moyiiz

B bee Ezɩpt Farawõ wã taoore. Masã, yaa a Moyiiz ne a Aarõ yʋyã n be taoor ‘wẽnnaam-dãmbã zabrã pʋgẽ.’ A Farawõ kosa Ezɩpt wẽnnaam-dãmbã fãa sõngre, n na n zab ne a Zeova. Rẽ t’a tɩtã rãmb fãa bee be. Tɩtã rãmb taoor dãmb ra yaa a Zanɛɛs ne a Zãmbrɛɛse. (2 Tɩm. 3:8) Pipi yel-solemdã a Moyiiz sẽn yeel a Aarõ t’a maan a Farawõ taoorã wilgame t’a Zeova yɩɩda Ezɩpt wẽnnaam-dãmbã. Baa ne rẽ, a Farawõ sũurã riglim n paasame. (Yik. 7:8-13) Rẽ poore, toog a tãab-n-soabã sẽn ta wã, yɩɩ tɩlɛ ne tɩtã rãmb meng tɩ b sak n deeg tɩ yaa “Wẽnnaam nug n maane.” Rũm-pigli wã sɩd nams-b lame, hal tɩ b baa a ye pa tõog n wa a Farawõ taoor toogã sasa, n na n kɩɩs a Moyiiz ye.—Yik. 8:12-15; 9:10-12.

Tood sẽn kɩt tɩ sãnda toeeme, tɩ kẽer sũy riglme. Yaa a Moyiiz ne a Aarõ n togs tood piigã yembr-yembre. Toog fãa waa wa b sẽn togsã, tɩ ra yaa kaset tɩ yaa a Zeova n tʋm a Moyiiz. A Zeova yʋʋrã yiime. B ra gomda a yell wʋsg Ezɩpti. Kɩtame tɩ sãnda toeeme, tɩ kẽer me sũy riglme. Israyɛll nebã ne Ezɩpt neb kẽer toeemame, la a Farawõ ne a poorẽ dãmbã sũy riglmame. (Yik. 9:16; 11:10; 12:29-39) Ezɩpt nebã pa tags tɩ yaa bãmb n maan bũmb n beeg b wẽnnaam-dãmbã ye. B bãngame tɩ yaa a Zeova n da sɩbgd b wẽnnaam-dãmbã. Toog a wɛ soabã poore, a ‘Farawõ nebã ne Ezɩpt nebã rag n waoogda a Moyiiz hal wʋsgo.’—Yik. 11:3.

D bʋgs Wẽnnaam Gomdã zug neere:

Yikri 6:3; it-2 1091 4-5

Pãng-soaba

A Zeova sẽn wa n pʋlemd a Abrahaam t’a na n doga a Izaakã, a gomame n wilg t’a yaa “Pãng-Soab a Wẽnnaam.” (ʼEl Shaddaiʹ). Ra yaa tɩlɛ t’a Abrahaam tẽ ne a sũur fãa tɩ Wẽnnaam tara pãng n na n kɩt tɩ pʋlengã pidsi. Sẽn paase, b sẽn wa n wilgd tɩ yaa Wẽnnaam n na n ning a Izaak ne a Zakoob bark wa a sẽn pʋlem kaool ning a sẽn maan ne a Abrahaamã pʋgẽ wã, b yeelame t’a yaa Pãng-Soab a Wẽnnaam.—Sɩng. 17:1; 28:3; 35:11; 48:3.

Sɩd me, a Zeova wa n yeela a Moyiiz yaa: ‘Mam vẽnega m meng ne a Abrahaam la a Izak ne a Zakoob n wilg bãmb tɩ mam yaa Pãng-Soab a Wẽnnaam [beʼElʹ Shaddaiʹ]. La mam ka kɩt tɩ b bãng tɩ mam yʋʋr la a Zeova ye.’ (Yik. 6:3) Woto pa rat n yeel t’a Abrahaam ne a Izaak la a Zakoob ra pa mi a Zeova yʋʋrã ye. Bala bãmb la neb a taab sẽn deng bãmb ra wae n pʋta a Zeova yʋʋrã. (Sɩng. 4:1, 26; 14:22; 27:27; 28:16) Sɩd me, yaa noor a yoob bal la d yãt gom-bil ning sẽn yaa “Pãng soabã” Sɩngr sebrã pʋgẽ. La seb-kãngã b sẽn da gʋls ne Ebre wã pʋgẽ, yaool n yaa noor 172 la d yãt yʋʋr ning sẽn yaa Zeova wã. B gomda a Abrahaam, a Izaak, a Zakoob n paas neb a taab yell beenẽ. Yaa sɩd tɩ nin-kãensã yãa yɛl sẽn wilgd tɩ Wẽnnaam sɩd yaa “Pãng soaba,” la b pa paam n bãng a yʋʋrã sẽn dat n yɛɛlgã zãng-zãng ye. Rẽ wɛɛngẽ, sebr a yembr pʋgẽ [The Illustrated Bible Dictionary (Vol. 1, p. 572)] b yeelame yaa: “Bũmb ning a Zeova sẽn togs a Abrahaam, a Izaak, a Zakoob n paas neb a taabã ra yaa bũmb sẽn na n wa pids kaoosg zugẽ. Wilgdame tɩ b ra tog n kɩsa sɩd tɩ yẽ a Yahweh yaa Wẽnnaam (ʼel) sẽn tõe n pids a sẽn pʋlem bũmb ninsã (tõe tɩ yaa sadday wã võor a to). Yɩɩ nin-yend bal n yã bũmb ning sẽn maan tuugã pʋgẽ wã, la yɩɩ bõn-kãsenga. Bala wilga Wẽnnaam pãngã, la wilg t’a na n zĩnda ne-ba, la a kell n pa ne-ba. Yaa Yahweh wã võor la woto.”—Par J. Douglas, 1980.

Yikri 7:1; it-2 308 6

A Moyiiz

A Zeova pa yãk ned a to n ledg a Moyiiz a sẽn yaa nin-sĩndrã yĩng ye. A Zeova sẽn wa n dat n tʋm a Moyiizã, a wilgame t’a yaa nin-sĩndri, t’a pa gom-minim soab ye. Ad a sɩd toeemane. A lebga toor fasɩ ne a sẽn da yaa a soab yʋʋm 40 sẽn looge, a sẽn wa n yãk a toorẽ yam n na n fãag Israyɛll nebã. A kell n baoo padems a Zeova taoore, sẽn na yɩl n da sak tʋʋmdã, hal n wa baas n kos a Zeova t’a tʋm ned a to. La rẽ pa kɩt tɩ Wẽnnaam sũur yik ye. Wẽnnaam pa bas a Moyiiz n yãk ned a to ye. A kɩtame t’a Aarõ sẽn yaa a Moyiiz kẽemã na n sõng-a, n yɩ a koe-taasda. Sẽn mik tɩ yaa Wẽnnaam n tʋm a Moyiizã, a Moyiiz lebga wa “Wẽnnaam” a Aarõ nifẽ, t’a Aarõ taasd a koeesã. A Moyiiz ne a Aarõ sẽn wa n tigim ne Israyɛll kãsem-dãmbã, la ne a Farawõ wã, wõnda Wẽnnaam kõo a Moyiiz noy la a wilg-a a sẽn segd n maanã, t’a Moyiiz me rɩk n togs a Aarõ, t’a Aarõ taas koeesã a Farawõ (yaa sẽn ledg-a Farawõ ning sẽn da be yʋʋm 40 sẽn loogã, sẽn da kɩt-a t’a Moyiiz zoe wã). (Yik. 2:23; 4:10-17) A Zeova wa n goma a Aarõ yelle, n bool-a t’a Moyiiz “no-rɛɛsã,” n na n wilg tɩ wa a Moyiiz sẽn yaa a Zeova no-rɛɛs t’a wilgd-a sorã, a Aarõ me segd n sakame t’a Moyiiz wilgd-a sore. Sẽn paase, Wẽnnaam wa n yeela a Moyiiz t’a na n kɩtame t’a yɩ wa “Wẽnnaam a Farawõ nifẽ,” rat n yeel t’a na n kõ-a-la pãng la tõog sẽn yɩɩd a Farawõ. Rẽ na n kɩtame t’a pa le tar bʋʋm n na n zoe Ezɩpt rĩmã ye.—Yik. 7:1, 2.

SẼOOG RASEM 13-19

D SẼN BÃNG BIIBLÃ KARENG PƲGẼ | YIKRI 8-9

“Wuk-m-meng soab a Farawõ sõngame tɩ Wẽnnaam raabã pidsi, la a ra pa mi ye”

Yikri 8:11; it-2 431

Ned sũur sẽn riglme

A Zeova maana sũ-mar ne neb kẽere, la tẽns sãnda neba, n bas-b tɩ b ket n vɩ baa ne b sẽn da segd ne kũumã. (Sɩng. 15:16; 2 Pɩy. 3:9) Neb kẽer talla manesem sẽn zemse, n maan b sẽn da segd n maan n paam Wẽnnaam sugrã (Zoz. 2:8-14; 6:22, 23; 9:3-15). La sãnda riglma b sũy n kɩɩs a Zeova la b zab ne a nin-buiidã. (Tõo. 2:30-33; Zoz. 11:19, 20) Sẽn mik t’a Zeova pa maand bũmb n na n gɩdg nebã tɩ b sũyã ra rilgmã, b yetame t’a ‘basdame tɩ b sũyã riglme,’ bɩ ‘t’a kɩtdame tɩ b sũyã riglme.’ La a sã n wa baas n sãam neb nins sũy sẽn riglmã, wilgda a pãn-kãsengã, la kɩt me t’a yʋʋrã yi.—Ges-y Yik. 4:21; Zã 12:40; Rom. 9:14-18.

Yikri 8:18, 19, 9:15-17; it-2 240-241

Wẽnga

Sẽn paas me, a Zeova kɩtame tɩ yɛlã toeem wa a sẽn date, hal tɩ nin-wẽnsã sõng t’a raabã pidsi, n pa bãng meng ye. Baa ne nin-wẽnsã sẽn kɩɩsd Wẽnnaamã, a tõe n kɩtame tɩ b sẽn dat n maan bũmb ningã ra tõoge, sẽn na yɩl n sõng a nin-buiidã tɩ b kell n maan sɩd ne-a, la a kɩt tɩ nin-wẽnsã tʋʋm-tʋmdɩ wã wẽneg n sõng t’a tɩrlmã puki. (Rom. 3:3-5, 23-26; 8:35-39; Yɩɩn. 76:11) B gomda bõn-kãng yell Yel-bũn 16:4 pʋgẽ: “Sẽn-Ka-Saab ka maan bũmb ba a yembr zaalem yĩng ye, la b naana nin-wẽng me toog daar yĩnga.”

Bũmb sẽn wilgd rẽ, yaa a Zeova sẽn tũnug ne a Moyiiz la a Aarõ n kɩt t’a Farawõ maan yẽ raabã, rat n yeel tɩ n yiis Israyɛll nebã yembdẽ wã. Wẽnnaam pa kɩt tɩ Ezɩpt rĩmã lebg nin-wẽng ye. La a bas-a lame t’a kell n vɩɩmde, la a kɩt tɩ bũmb toor-toor maane, tɩ wilg t’a Farawõ mengã ra yaa nin-wẽnga, la t’a segda ne kũum. A Zeova wilga a sẽn maan woto wã võor Yikr 9:16. A yeelame yaa: “La mam basa foom tɩ f vɩɩmde, sẽn na n yɩlẽ tɩ fo yãnd mam pãngã, la tɩ mam yʋʋr saag dũniyã fãa pʋgẽ.”

Tood piigã sẽn paam Ezɩptã, n paas a Farawõ ne a sodaasã sãoongã mog-miuugã pʋgẽ wã yɩɩ bõn-kãsems sẽn wilg a Zeova pãngã. (Yik. 7:14–12:30; Yɩɩn. 78:43-51; 136:15) Yʋʋm wʋsg loogr poore, tẽn-yagsã ra ket n gomda bõn-kãens yelle. Wẽnnaam yʋʋrã me saaga dũniyã gill zugu. (Zoz. 2:10, 11; 1 Sãm. 4:8) A Zeova sã n da kʋ a Farawõ zĩig pʋgẽ, bõn-kãsems nins sẽn maan t’a yʋʋrã paam waoogrã ra pa na n maane, a nin-buiidã fãagrã me ra pa na n tõog ye.

D bʋgs Wẽnnaam Gomdã zug neere:

Yikri 8:17; it-2 1039

Kɛooda

Ebre gom-bil ning b sẽn lebg tɩ “kɛooda” wã, pa sõngd tõnd tɩ d bãng sẽn yaa bõn-yɩgdɩ nins takɩ n wãb Ezɩpt nebã toog a naas-n-soabã sasa wã ye. To-kãng n yɩ pipi toog sẽn pa paam Israyɛll nebã sẽn da be Gosɛnnã. (Yik. 8:17, 18, 20, 25, 27; Yɩɩn. 78:45; 105:31)

Bõn-yɩgdɩ nins sẽn wãb Ezɩpt nebã toog a naas-n-soabã sasa wã tõe n yaa bõn-yɩgdɩ nins sẽn dũmd rũng wall ninsaal yĩngã, n fõog a zɩɩmã. B sã n dũm rũng wall ninsaala, b sẽn ningd bũmb ning a yĩngẽ wã wata ne bã-kɛgemse. Bõn-yɩgdɩ wã waa ne namsg wʋsg Ezɩpt nebã la b rũmsã zugu, la wa ne kũum menga.

Yikri 8:25-27; w04 4/1 9 s. a 9

Yikr sebrã tags-kãsemse

8:22, 23—Bõe yĩng t’a Moiiz yeel tɩ Israɛll nebã maand “yaa kisg ne Ezipt nebã”? Rũms buud toor-toor la b ra balemd Ezipti. Rẽnd a Moiiz sẽn gom maand yell n wilg tɩ Israɛll neba segd n tɩ maana maand n kõ a Zeova wã paasa a goamã pãnga.

SẼOOG RASEM 20-26

D SẼN BÃNG BIIBLÃ KARENG PƲGẼ | YIKRI 10-11

“A Moyiiz ne a Aarõ wilgame tɩ b tara raood meng-menga”

Yikri 10:3-6; w09 7/1 22 s. a 6

Moon-y koɛɛgã ne raood wa a Zezi

⁶ Tags-y n ges-y-yã a Moiiz me sẽn tall raood ning n gom ne a Faraõ wã. Tẽeg-y tɩ rĩm a Faraõ tẽngã neb ra get-a-la wa wẽnde. B ra boond-a lame tɩ b wẽnd a Ra sẽn da so wĩntoogã biiga. Tõe tɩ yẽ me ra kɩtame tɩ b mams-a n naane, t’a ra pʋʋsd a naandã wa Faraõ rãmb a taabã sẽn da maandã. A Faraõ gomd ra pa kɩɩsd ye. A sẽn da rat n maande. Ra yaa na-toaaga, wuk-m-meng soab la tɩta-neda. Yaool n yaa nin-kãngã nengẽ la a Moiiz sẽn da yaa pe-kɩɩm balã kẽng naoor wʋsg n tɩ taas koees sẽn pa noome. Bõe la a Moiiz kẽng n tɩ yeel-a? A tɩ togs-a lame tɩ tood n na n paam a tẽngã. La a Moiiz koɛɛgã teka woto bɩ? Ayo. A kosa a Faraõ t’a bas a yembsã neb milyõ rãmbã tɩ b yi tẽngã. Rẽ yĩnga koe-kãensã taasg ra pa baood raood sɩda? Vẽenega!—Sõd. 12:3; Heb. 11:27.

Yikri 10:24-26, 28, 11:4-8; it-2 309 6

A Moyiiz

B talla raood la tẽeb n tõog n tɩ gom ne a Farawõ. Yaa a Zeova sẽn kõ a Moyiiz ne a Aarõ pãng la vʋʋsem sõngã la b sẽn tõog n tʋm tʋʋmd ning a sẽn kõ-bã. D mams a Farawõ zakã sẽn da yaa to-to wã d yamẽ. Wakat kãng tɩ Ezɩpt n yaa dũni gill pãn-soaadã, t’a Farawõ yaa rĩmã. Zĩigã neerem sẽn yaa to-to wã pa tar mak-n-taar ye. A Farawõ ra yaa wuk-m-meng soaba. Sẽn paase, nebã ra get-a-la wa wẽnnaam. A ra bee ne a sagendbã, a sodaasã taoor dãmbã, a gũudbã, la a yembsã. Tũudmã taoor dãmb la tɩtã rãmb sẽn da yaa a Moyiiz bɛɛbã me ra bee be. A Farawõ sẽn yãk a toogo, tẽngã pʋgẽ, yaa nin-kãensã n da yaa nin-kãsems n tɩ yɩɩda. B ra bee a Farawõ poorẽ, n na n sõng-a t’a kos Ezɩpt wẽnnaam-dãmbã sõngre. La a Moyiiz ne a Aarõ pa kẽng a Farawõ taoor vugr bal ye. Yaa naoor wʋsgo. B sã n da kẽng a Farawõ taoor fãa, a kengda a sũurã, bala a ra rata ne a sũur fãa n kell n soog zʋɩf-rãmbã tɩ b yɩ a yembse. A Moyiiz ne a Aarõ sẽn togs toog a nii soabã poore, a Farawõ kɩtame tɩ b rig-b tɩ b yi a taoore. Toog a wɛ soabã poore, a Farawõ yeel-b lame tɩ b ra le bao n na n wa a taoore, sã n pa rẽ a na n kʋ-b lame.—Yik. 10:11, 28.

D bʋgs Wẽnnaam Gomdã zug neere:

Yikri 10:1, 2; w95 1/1 11 11

Neb b sẽn tʋm tɩ b na n tɩ zab ne wẽn-faado

¹¹ Israyɛll nebã sẽn wa n ket n be Ezɩptã, a Zeova tʋma a Moyiiz a Farawõ nengẽ, n yeel-a yaa: “Kẽng Faarõ nengẽ, bala, yaa maam n kɩt tɩ yẽnda ne a tʋmtʋmdbã sũy kenge, sẽn na n yɩlẽ tɩ mam bõn-yɛɛsdsã puk bãmb sʋka. Leb n yaa sẽn na n yɩlẽ tɩ fo togs f kambã ne f yagensã mam sẽn maan Ezɩpt nebã bũmb ninga, la bõn-yɛɛsds nins mam sẽn maan bãmb sʋkã. Woto, yãmb na bãng tɩ mam yaa Sẽn-Ka-Saabo.” (Yikri 10:1, 2) Israyɛll neb nins sẽn yɩ sakdbã ra na n wa togsa b kambã a Zeova tʋʋm-kãsemsã. Kambã me ra na n wa togsa b kambã, tɩ kell n yɩ woto zãmaan woo zãmaane. Woto, b ra pa na n yĩm a Zeova tʋʋm-kãsemsã ye. Rũndã-rũndã me, yaa roagdbã n segd n togs b kambã a Zeova tʋʋm-kãsemsã.—Tõodo 6:4-7; Yel-bũnã 22:6.

Yikri 11:7; it-1 849 6

Israyɛll nebã sẽn yi Ezɩptã tɛka

A Zeova maana bõn-kãseng n fãag Israyɛll nebã, tɩ wilg a pãngã, la kɩt t’a yʋʋrã paam waoogre. A Zeova sẽn sõng Israyɛll nebã tɩ b tõog n pasg mog-miuugã poore, a Moyiiz lʋɩɩ Israyɛll rapã taoore, tɩ b sɩng yɩɩla. A Miryam sẽn yaa a tão wã, la no-rɛɛs-poakã rɩka sɩlsãka, la a lʋɩ pagbã fãa taoore, tɩ b wẽed silsãgs n saoodẽ, la b reesd rapã yɩɩlã. (Yik. 15:1, 20, 21) Israyɛll nebã ra paama b mens zãng-zãng ne b bɛɛbã. B sẽn yi Ezɩptã poore, ned wall we-rũng pa maan-b bũmbu, baag meng pa wes-b ye. (Yik. 11:7) Yaa sɩd tɩ kibarã pʋgẽ, b pa wilg t’a Farawõ mengã tũu a tãb-biisã n kẽ mogrẽ wã, n paam sãoong ye. La Yɩɩn-sõamyã 136:15 wã yetame t’a Zeova ‘luba a Farawõ ne a tãb-biisã rudum ko-kãsengã pʋgẽ.’

SẼOOG RASEM 27–SA-SIK RASEM A 2

D SẼN BÃNG BIIBLÃ KARENG PƲGẼ | YIKRI 12

“Pakã yõod ne kiris-nebã yaa bõe?”

Yikri 12:5-7; w07 1/1 24 s. a 4

“Yãmb sũyã segd n yɩɩ noog hal wʋsgo”

⁴ A Zezi kii yʋʋmd 33 Nizã kiuug rasem 14. Israɛll tẽngẽ wã, Nizã rasem 14 ra yaa Pakã raare. Ra-kãng ra yaa sũ-noog wʋsg raare. Yʋʋmdã pʋga, ra-kãng sã n da ta, zagsã rãmb ra rʋgda rɩɩb sẽn naag ne pe-bil sẽn yaa sõma zãng fasɩ. B ra maanda woto n tẽegdẽ tɩ yʋʋmd 1513 sẽn deng a Zezi rogmã, Nizã rasem 14 raare, malɛkã sẽn wa n pɩʋʋg Ezipt tẽngã pʋgẽ n kʋ Ezipt nebã kom-dẽemsã, tũu ne pe-bil zɩɩm tɩ Israɛll kom-dẽemsã paam fãagre. (Yikri 12:1-14) Pakã pe-bilã ra makda a Zezi. Tʋm-tʋmd a Poll goma a Zezi yell n yeel tɩ “Kirist sẽn yaa tõnd Pakã, b kʋʋ bãmb tõnd yĩnga.” (1 Korẽnt dãmba 5:7) Wa pe-bilã zɩɩmã sẽn fãag Israɛll kom-dẽemsã, a Zezi zɩɩmã me sẽn daagã fãagda neb wʋsgo.—Zã 3:16, 36.

Yikri 12:12, 13; it-2 485 7

Pakã

Bũmb kẽer b sẽn da maand Pakã kibsã sasa la a Zeezi pids-yã. Wala makre, zɩɩmã b sẽn da ning rotã zut Ezɩpt n na n fãag kom-dẽemsã, tɩ malɛkã b sẽn tʋmã ra kʋ-bã yaa bũmb a yembr sẽn paam pidsgu. A Poll goma kiris-neb nins sẽn paam vʋʋsem sõngã zaeebã yelle, n yeel tɩ bãmb n yaa kom-dẽems tigingã (Ebre. 12:23), la tɩ ne Kirist zɩɩmã maasem, b paamame tɩ b yao n fãag-ba. (1 Tes. 1:10; Efɛ. 1:7) Bũmb a to me yaa tɩ b ra pa tog n kaoog Pakã pe-bilã kõbr baa a yembr ye. B ra pĩnd n togsame t’a Zeezi kõbr baa a ye pa na n kaoog ye. Rẽ paama pidsg a kũumã sasa. (Yɩɩn. 34:21; Zã 19:36) Pakã kibsã zʋɩf-rãmbã sẽn maan yʋʋm wʋsgã ra yaa bũmb a ye sẽn naag Tõogã bõn-sõma nins sẽn watã. Pidsa a Zeezi Kirist sẽn yaa “Wẽnnaam Pe-bilã” zugu.—Ebre. 10:1; Zã 1:29.

Yikri 12:24-27; w13 12/1 20-21 s. 13-14

“Bɩ yãmb tẽeg da-kãngã”

¹³ Roagdbã ra zãmsda kambã bũmb wʋsg sẽn tar yõodo. Kom-kãens sã n wa bɩ n paam kamba, bãmb me segd n zãmsa b kambã. Bũmb a ye b sẽn da zãmsd b kambã yaa t’a Zeova tõe n kogla a nin-buiidã. Woto, kambã na n bãngame t’a Zeova sɩd beeme, t’a nin-buiidã yell pak-a lame, la t’a kogend-b lame. A sẽn kogl Israyɛll nebã kom-dẽemsã tɩ Ezipt kom-dẽemsã yaool n ki wã sɩd wilgdame t’a tõe n kogla a nin-buiidã.

¹⁴ Yãmb sã n yaa kiris-ned sẽn tar kamba, y miime tɩ Wẽnnaam pa yeel-y tɩ yʋʋmd fãa y segd n goma Pakã yell ne-b ye. La rẽ yĩnga yãmb sõngda y kambã tɩ b bãng tɩ Wẽnnaam kogenda a nin-buiidã bɩ? Yãmb kambã nee vẽeneg tɩ y kɩsa sɩd t’a Zeova ket n kogenda a nin-buiidã bɩ? (Yɩɩl 27:11; Ezai 12:2) Y sã n wa sõsd ne y kambã n na n sõng-b tɩ b kɩs sɩd t’a Zeova kogenda tõndo, y kɩtdame tɩ sõsgã be yamleoog bɩ? Y sã n maand woto, na n sõnga y zakã rãmb fãa tɩ b maneg n kɩs a Zeova sɩda.

D bʋgs Wẽnnaam Gomdã zug neere:

Yikri 12:12; it-2 484 2

Pakã

Tood piigã sẽn paam Ezɩptã, sẽn yɩɩd fãa toog piig soabã sẽn kʋ kom-dẽemsã, yɩɩ kaset t’a Zeova sɩbga Ezɩpt wẽn-faadã. (Yik. 12:12) Pesg (pe-raoogo) ra yaa rũng sẽn tar yõod wʋsg ne wẽn-naandg a Ra. Dẽnd b sẽn mes Pakã pe-bilã zɩɩmã rignoyã zutã, Ezɩpt nebã nifẽ, b paooga b wẽnnaamã. Lolsã me ra yaa rũms sẽn tar yõod wʋsgo. B sẽn kʋ lolsã kom-dẽemsã, sãama b wẽn-naandg a Oziris yʋʋre. Nebã ra pʋʋsda a Farawõ mengã, n yetẽ t’a yaa wẽn-naandg a Ra biiga. A Farawõ bi-kãsengã sẽn ki wã, wilgame tɩ b wẽnnaam a Ra, n paas a Farawõ mengã ka võor ye.

Yikri 12:14-16; it-1 207 1

Tigsga

Bũmb n da yaa toor zall ‘tigiss nins sẽn welg toorã’ b sẽn da maandã pʋgẽ: Nebã ra pa tog n tʋm tʋʋmd baa a ye tigis-kãens sasa ye. Wala makre, bur sẽn ka ning rã-bɩllã kibs pipi daarã ne a rasem a yopoe daarã, b ra maanda tigiss sẽn welg toore. Rẽ wɛɛngẽ, a Zeova yeelame yaa: “La ned ka tog n tʋm dasem-kãens daarã, sã n ka tɩ segl rɩɩb n kõ yãmb ned kam fãa bala.” (Yik. 12:15, 16) La ‘tigiss sẽn welg toorã’ sasa, maan-kʋʋdbã ra yõogda maand n kõt a Zeova (Maan. 23:37, 38). Yaa vẽeneg tɩ rẽ maaneg ra pa kɩɩsd noor baa a ye b sẽn kõ daar fãa tʋʋmã wɛɛngẽ wã ye. Tigiss sẽn welg toorã sasa, nebã ra pa yeebd b sẽn pa tar b sẽn na n maan yĩng ye. B ra paamda tẽeb kengr sõma. Vʋʋsg daar fãa, nebã fãa ra tigimda taaba, sẽn na yɩl n pʋʋs a Zeova, la b paam zãmsgo. B ra karemda Wẽnnaam Gomdã, la b bilgd a võorã, tɩ kengd b raoodo. Yaa woto la b wa n maand zʋɩf-rãmbã karen-dotã pʋsẽ. (Tʋʋ. 15:21) Sẽn mik tɩ nebã ra pa tʋmd b daar fãa tʋʋmã vʋʋsg daarã, bɩ ‘tigiss sẽn welg toorã’ sasa wã, b ra pʋʋsdame, la b bʋgsd bũmb nins b Naandã sẽn maanã zugu, la a raabã zugu.