Kiris-nebã vɩɩm la b tʋʋma tigissã na-kẽndr sebr not-rãmbã
© 2025 Watch Tower Bible and Tract Society of Pennsylvania
BÕN-BƖƲƲNG RASEM A 1-7
D SẼN BÃNG BIIBLÃ KARENG PƲGẼ YEL-BŨNÃ 29
Zãag-y y meng ne rog-n-migs la yel-maandɩ Wẽnnaam sẽn kisi
w16.11 5, zĩ-gũbrã
Biiblã sẽn yet sẽn be-b saasẽ wã wɛɛngẽ
Neb milyõ-rãmb n zoet zĩn-dãmbã hal wʋsgo, tɩ rẽ kɩt tɩ b vɩ rabeem pʋgẽ. B baooda bũmb toor-toor sẽn na yɩl n kogl b mense. Wala makre, nug-bĩnsi, zũy la se-gãna. La pa tɩlɛ tɩ yãmb me maan woto ye. Ad gomd Biiblã sẽn togs tɩ kengd raoodo: “Sẽn-Ka-Saab geta dũniyã fãa gilli, n na n sõng neb nins sẽn nong bãmb ne b sũyã fãa wã.” (2 Kibayã 16:9) A Zeova sẽn yaa Wẽnnaam sɩd-sɩdã pãng yɩɩda a Sʋɩtãan hal zĩig sẽn zãre. Y sã n teeg-a, a na n kogl-y lame.
Y sã n dat n paam a Zeova koglgo, yaa tɩlɛ tɩ y reng n bao n bãng sẽn tat a yam, la y maan a raabã. Pĩnd wẽndẽ, neb sẽn lebg kiris-neb Efɛɛz soolmẽ wã wʋka b bag-bʋgendã sɛb gill n yõog bugum. (Tʋʋmã 19:19, 20) Woto me, y sã n dat n paam tɩ Wẽnnaam kogl-yã, yaa tɩlɛ tɩ y lob wall y sãam teed nins fãa y sẽn da teeg n baood koglgã, wala nug-bĩnsi, zũya, kĩndi, sɛba, zʋy la bũmb a taaba.
D wilgd tɩ d tũuda Biiblã sẽn yet sẽn ki-bã wɛɛngẽ wã
13 Y yamã sã n yooda ne yel-maandɩ la minimd kẽer nebã sẽn tar sẽn ki-bã wɛɛngẽ, bɩ y pʋʋs a Zeova ne tẽebo, n kos-a t’a kõ-y yam. (Karm-y Zak 1:5.) Rẽ poor bɩ y maan vaeesg siglgã sɛb pʋgẽ. Sã n ket n pa vẽeneg y yamẽ, bɩ y kos y tigingã kãsem-dãmbã sõngre. B pa na n togs-y y sẽn tog n maanegã takɩ ye. B na n sõng-y lame tɩ y tẽeg Biiblã noy la a sagls sẽn tõe n sõng-yã, wala makre, noy la sagls nins yell d sẽn gom sõs-kãngã pʋgẽ wã. Y sã n maand woto, na n kɩtame tɩ y “minim n tagsdẽ,” tɩ rẽ sõng-y tɩ y wa ‘mi sõma ne wẽng n bake.’—Ebre. 5:14.
“Mam na n kẽna yãmb sɩdã pʋga”
12 Rog-n-mik la minimd sẽn pa tat Wẽnnaam yam. D roagdba, d tʋmd-n-taase, wall d karen-bi-taas tõe n wa ratame tɩ d naag-b n maan kibs kẽere. Bõe n na n sõng-do, tɩ baa b pẽdgd tõnd bɩ d ra naag-b n maan rog-n-migs la kibs-rãmb sẽn pa tat a Zeova yam? Wakat fãa, d segd n tẽegda bũmb ning sẽn kɩt tɩ kibs la rog-n-migs sãnda pa tat a Zeova yamã. D tõe n maana vaeesg siglgã sɛb pʋsẽ, n lebg n tẽeg sẽn sɩng to-to tɩ nebã wa maand kibs kẽerã, tɩ sõng-do. D sã n bʋgs bũmb ning Biiblã sẽn yete, tɩ kɩt tɩ d pa naagd n maan kibs-kãensa wã, na n sõng-d lame tɩ d bas d yam tɩ d maanda sẽn “tat Zu-soabã yam.” (Efɛ. 5:10) D sã n teeg a Zeova la d kɩs sɩd t’a Gomdã yaa sɩda, d pa na n zoe ninsaal ye.—Yel. 29:25.
D bʋgs Wẽnnaam Gomdã zug neere
Bɩ tõnd nonglmã yɩ ne tʋʋma la ne sɩda
11 D pẽgd d tẽed-n-taasã ne pʋ-peelem. Yɩta sõma tɩ d gũusd n get d taabã tʋʋm-sõma wã, n pẽgd-ba. Bala, pẽgr ‘sõngda ned t’a bɩ,’ rat n yeel tɩ kengda a raoodo. (Efɛ. 4:29) La d sã n wa pẽgd neda, segd n yɩɩ ne pʋ-peelem. Pa segd n yɩ no-noom wall belgr ye. Sã n yaa tɩlɛ tɩ d sagl a soabã, d pa segd n gom no-noom goama, d sẽn yɛɛsd n pa rat n togs-a sɩd yĩng ye. (Yel. 29:5) D sã n pẽg neda, t’a loog tɩ d yõd n wɩd-a, d pa maan pʋ-peelem ye. Tʋm-tʋmd a Poll kõo mak-sõng rẽ wɛɛngẽ. A ra pẽgda a taabã ne pʋ-peelem. Wala makre, a pẽga Korẽnt tigingã neba, bũmb kẽer b sẽn maan yĩnga. (1 Kor. 11:2) La sẽn wa n segd t’a sagl-bã, a goma ne bʋgsem, n wilg-b a sẽn sagend-bã võore.—1 Kor. 11:20-22.
BÕN-BƖƲƲNG RASEM A 8-14
D SẼN BÃNG BIIBLÃ KARENG PƲGẼ YEL-BŨNÃ 30
“Ra n kɩt-y tɩ m yɩ naong soab wall arzɛk soab me ye”
Nonglem bʋg buud n wat ne sũ-noog hakɩɩka?
10 Yaa sɩd tɩ ligd yaa tɩlɛ ne d fãa. A sõngda tõnd bũmb wʋsg pʋgẽ. (Koɛ. 7:12) La rẽ yĩnga, ned sã n tar sẽn sek a na paam sẽn yaa tɩlɛ ne-a wã bala, a tõe n paama sũ-noog bɩ? N-ye! (Karm-y Koɛɛg soab 5:11) A Yake biig a Agʋʋr da pʋʋsa Wẽnnaam n yeele: “Da bas-y tɩ m yɩ naong soaba, la y ra bas tɩ m yɩ arzɛk soab me ye. Bɩ y kõ maam sẽn sekd m dɩɩbo.” D tõe n wʋma a sẽn pa rat n yɩ naong soabã võore. A wilgame t’a pa rat tɩ wa kɩt t’a zu, tɩ sãam Wẽnnaam yʋʋr ye. La bõe yĩng t’a pa rat n yɩ arzɛk soaba? A yeelame t’a pa rat tɩ ‘rɩ-n-tɩkã pʋgẽ, bɩ a wa yeel t’a ka mi’ a Zeova ye. (Yel. 30:8, 9) Sãmbg kae tɩ y mii neb sẽn bas Wẽnnaam teegre, n teeg ligdã.
11 Sẽn nong-b ligdã pa tõe n ta Wẽnnaam yam ye. A Zeezi ra yeelame yaa: “Ned ba a yembr ka tõe n sak zu-soben-dãmb a yiib ye. Bala, a na n kisga a yembr la a nong a to wã, wala a loe a meng ne a yembr la a paoog a to wã. Yãmb ka tõe n sak Wẽnnaam la y sak arzegs me ye.” Nand t’a yeel woto, a ra yeelame yaa: “Da bĩng-y paoong yãmb yĩng dũniyã zug ka tɩ mogd bɩ tẽngempiisim sãamd-b lame, la wagda kẽed n wʋkdame. Bĩng-y yãmb paoongã arzãna, tɩ mogd bɩ tẽngempiisim ka saamd-a be ye, la wagda ka kẽed be n wʋk-a ye.”—Mat. 6:19, 20, 24.
12 Sẽn tũud-b Wẽnnaam a Zeova wã wʋsg maoodame n pa baood bɛd ye. B mikame tɩ rẽ kɩtame tɩ b paamd weer n tõe n tʋm a Zeova tʋʋmã n paase, tɩ b sũ-noogã me paasdẽ. A Zak yaa saam-biig sẽn be Etazĩni. A ra tara ro-bedre, la tʋʋm zĩig a sẽn so. A wa n dɩka rẽ fãa n koose, sẽn na yɩl n paam n lebg so-pakd wa a pagã. Ad a sẽn yeele: “Yɩl n bas d zag-neerã la d zĩigã pa yɩ nana ye. La na maan yʋʋm wʋsgo, m da mi n lebg n waa yir ne sũ-sãamse, tʋʋmã zu-loees yĩnga. M pagã sẽn yaa wakat fãa so-pakdã yaool n da tara sũ-noog daar fãa. A ra nong n yetame yaa: ‘Mam patrõ wã ka to ye!’ Ma-me sẽn yaa so-pakd masã wã, d yiibã fãa tʋmd n kõta patrõ-yɛnga, a Zeova.”
“Fo nonga maam n yɩɩd bãmba bɩ?”
15 Rũndã-rũndã, neb wʋsg tagsdame tɩ yaa tɩlɛ tɩ b paam te-paall sẽn yi fãa. Wala makre, fu-paala, telefõn wall ordinatɛɛr sẽn nan yi. Yaa ligdã la teedã baoob n pak-b n yɩɩd bũmb fãa. Rẽ n so tɩ kiris-ned fãa segd n mi n tags n ges sẽn yaa bũmb ning n pak-a n tɩ yɩɩda. D tõe n soka d meng yaa: ‘Mam dɩkda sẽk n baood n na n bãng mobil-paal wall fu-paal sẽn nan yi, hal tɩ yɩɩd sẽk ning m sẽn dɩkd n segend tigissã bɩ? Yaa beoog fãa yɛlã n pak maam n tɩ yɩɩda, tɩ m pa tar sẽk n pʋʋsd a Zeova la m karemd Biiblã bɩ?’ D sã n mik tɩ ligdã la teedã baoob kɩtame tɩ d pa le nong Kiristã wa pĩndã, yɩta sõma tɩ d tẽeg gomd a sẽn da yeele. A ra yeelame: “Gũus-y y mens ne rat wʋsgã.” (Luk 12:15) Bõe yĩng t’a Zeezi keoog tõnd woto?
16 A Zeezi yeelame tɩ “ned ba a yembr ka tõe n sak zu-soben-dãmb a yiib ye.” A paasame: “Yãmb ka tõe n sak Wẽnnaam la y sak arzegs me ye.” Ned pa tõe n dat n tũ a Zeova ne a sũur fãa la a rat me n bao ligdã la teedã ne a sũur fãa ye. A Zeezi wilgame t’a soab “na n kisga a yembr la a nong a to wã, wala a loe a meng ne a yembr la a paoog a to wã.” (Mat. 6:24) D fãa sẽn yaa neb sẽn pa zems zãngã, d segd n ket n maooda sẽn na yɩl tɩ ligdã bɩ teedã la “yĩngã datem” a taabã ra soog-d ye.—Efɛ. 2:3.
17 Neb wʋsg basame tɩ yaa b yĩngã ratmã n so-ba. Kɩtame tɩ ligdã la teedã baoob wɛɛngẽ, yaa toog ne-b tɩ b maan n zemse. (Karm-y 1 Korẽnt-rãmb 2:14.) B sẽn pa mi Wẽnnaam daabã kɩtame tɩ yaa toog tɩ b tags n bãng sõma ne wẽng n bake. (Ebre. 5:11-14) Kɩtame tɩ b baood ligdã la teedã n samdẽ, tɩ baas n pa sekd-b ye. (Koɛ. 5:9) La bũmb n be n tõe n sõng-d tɩ d ra maan wa nin-kãensã ye. Yaa d sẽn na n karemd Wẽnnaam Gomdã daar fãa. (1 Pɩy. 2:2) A Zeezi ra wae n bʋgsda Wẽnnaam goamã zugu. Rẽ sõng-a lame t’a kɩɩs a Sʋɩtãan sẽn da rat t’a maan bũmb ninsã. Tõnd me sã n bʋgsd Biiblã saglsã zug la d tũudẽ, d na n tõogame tɩ ligdã la teedã baoob ra soog-d ye. (Mat. 4:8-10) Rẽ, d wilgdame tɩ Kiristã la d nong n yɩɩda.
w11 1/6 10 s. a 4
Wãn to la y tõe vɩɩmd tɩ zems ne y sẽn tarã?
Nand tɩ y ra bũmbu, reng-y n kẽgs-y ligdi. Baa ne sẽn wõnd kẽgs ligd n yaool n da bũmbã pa tar yõodã, rẽ yaool n tõe n sõng-d lame tɩ d gil ligdã zu-loeese. Neb wʋsg sẽn maan woto wã, sõng-b lame tɩ b tõog n gil sama, la zu-loees nins samã sẽn wat ne wã. Wala makre sẽn pengd-b nebã ligdã rogenda yõodã wʋsgo, tɩ kɩt tɩ bũmba ligd lebg toog n yɩɩd f sẽn na n da vẽenega. Biiblã pʋgẽ b yeelame tɩ gũur tara “yam,” bala ‘a baooda rɩɩb tigsg wakat’ n bĩngd beoog yĩnga.—Yel-bũnã 6:6-8; 30:24, 25.
Kell n pa-y-yã a Zeova fu-roogẽ wã wakat fãa yĩnga
18 Yɩta sõma tɩ d fees d meng n ges d tagsg sẽn yaa a soab ne ligdã. Sok-y meng yaa: ‘Mam wae n tagsda ligdã yelle, la bũmb nins m sẽn tõe n da wã yell bɩ? M sã n peng ligdi, m pa yãgd ne yaoobo, n yetẽ t’a soabã pa tar a raab bɩ? M sã n tar ligdi, m getame tɩ m sãoo m taabã bɩ? M getame tɩ yaa toog tɩ m kõ ned bũmb bɩ? M tagsdame tɩ m tẽed-n-taag sã n tar ligd wʋsgo, yaa a sẽn nong ligdã n yɩɩd a Zeova yĩng bɩ? Mam baooda sẽn tar-b ligdã zoodo, la m maand m toog kae ne naong rãmbã bɩ?’ D sẽn paam n sig sãand a Zeova fu-roogẽ wã yaa zu-zẽkr tɛkẽ! La yaa d sã n zãag d mens ne ligdã nonglem bal la d na n kell n yɩ a Zeova zo-rãmba. D sã n maan woto, a Zeova pa na n tol n daag-d n bas ye.—Karm-y Ebre-rãmb 13:5.
D bʋgs Wẽnnaam Gomdã zug neere
Bũmb nins a Zeova sẽn naanã wilgda a yamã sẽn ka koakã
11 Rũng a ye n be n paoodẽ tɩ b boond-a tɩ seere. D tõe n dɩka yam wʋsg yẽ me nengẽ. (Karm-y Yelbũn 30:26.) A ra na n wõnegẽ-la soaamba, la a tʋbã yaa koees la gilsi, t’a naoã me yaa koeese. Rũn-kãngã sẽn paoodã tuuda a bokã kug-bɛd sẽn beẽ. A ninã sẽn ne yɩɩgã n paas a sẽn tuud a bokã kugr tẽngrã kogend-a lame. Sẽn paase, a pa wae n vɩ a yembr ye. Waoodã sasa, b sũuda taab bog-yend pʋgẽ, la woto kɩtdame tɩ b paamd koglg me.
12 Yam bʋg la d tõe n dɩk seerã nengẽ? Tẽeg-y tɩ rũn-kãngã kogenda a meng sẽn na yɩl tɩ b ra paam-a n kʋ ye. A sẽn ne yɩɩgã n paas a sẽn pa zãagd ne bogdã yĩnga, sõngd-a lame t’a sã n yã bũmb sẽn dat n dɩ-a bɩ a zoet n solgd tao-tao. Wala seere, tõnd me segd n modgdame n tõogd n dengd n yãt bẽds nins a Sʋɩtãan dũniyã sẽn bẽt-dã. Tʋm-tʋmd a Pɩɛɛr sagla kiris-nebã woto: “Yõk-y y mens n gũusi; tɩ bõe, yãmb bɛyã sẽn yaa Sʋɩtãana gõoda wa gɩgemd sẽn kelemda, n baood a sẽn tõe n paam a soab n sãame.” (1 Pɩɛ. 5:8) A Zezi sẽn da wa n be tẽng zugã, a ra gũusda wakat fãa sẽn na yɩl t’a Sʋɩtãan da wa tõog n kɩt t’a beeg Wẽnnaam ye. (Mat. 4:1-11) Ad a Zezi sɩd kõ a karen-biisã mak-sõngo!
13 Bũmb sẽn na n sõng-d tɩ d kell n yɩ gũusdba, yaa d sẽn na n sakd segls nins fãa a Zeova sẽn dɩkd n na n kogl-dã. Wala makre, d segd n zãmsda Wẽnnaam Gomdã la kẽnd tigissã wakat fãa. (Luk 4:4; Heb. 10:24, 25) Wala seer sẽn pa vɩ a yembr tɩ kɩtdẽ t’a paamd koglg a taabã sʋkã, tõnd me segd n nonga d tẽed-n-taasã zĩigẽ. Rẽ, d fãa na n ‘lagemda taab n paamd raoodo.’ (Rom 1:12) D sã n sakd koglg ning a Zeova sẽn kõt-dã, d wilgdame tɩ d sak n deega bũmb ning yɩɩl-gʋlsd a Davɩɩd sẽn da yeelã. A yeela woto: “Zusoabã yaa mam pĩiga, la mam pãng zĩiga, la mam fãagda. Mam Wẽnnaam yaa mam kugri, mam baooda zĩig bãmb nengẽ n na n soonde.”—Yɩɩl 18:3.
BÕN-BƖƲƲNG RASEM 15-21
D SẼN BÃNG BIIBLÃ KARENG PƲGẼ YEL-BŨNÃ 31
Yam ning d sẽn tõe n dɩk ma sẽn zãmsd a biig ne nonglem pʋgẽ
Wilgd-y y kambã noy sẽn yaa sõma
Sõng-y-b tɩ b bãng sɩdã lagengã zugu: Yaa sɩd tɩ kambã segda ne keoogre. (1 Korẽnt dãmba 6:18; Zak 1:14, 15) La Biiblã pẽgda pag ne rao lagengã n wilgdẽ t’a yaa wẽnd-kũun lakae, pa a Sʋɩtãan bẽdg ye. (Yelbũna 5:18, 19; A Salomo Yɩɩllã 1:2) Y sã n gomd ne y kom-bɩɩsã yɛl nins lagengã sẽn tõe n wa ne wã yell bala, tõe n kɩtame tɩ b wa tar tags-kɛga, tagsg sẽn pa zems ne Biiblã sẽn yetã. Wala makre, a Corrina sẽn yaa pʋg-bɩɩg sẽn yit Fãrensã yeela woto: “Mam doagdbã sẽn da wae n gomd yoobã sẽn wat ne zu-loees ninsã yell bal ne maamã, kɩtame tɩ m da get pag ne rao lageng buudã fãa wa bũmb sẽn pa sõma.”
Modg-y n sõng-y y kambã tɩ b bãng sɩdã lagengã zugu. Rẽ wɛɛngẽ, pag sẽn yit Megsik t’a yʋʋr boond t’a Nadia yeela woto: “Mam wilgda m kambã tɩ lagengã yaa bũmb sẽn yaa sõma la sẽn segde, la tɩ yaa Wẽnnaam a Zeova n kõ ninsaalbã tõog tɩ b tõe n maan rẽ. Mam wilgd-b lame tɩ baasgo, yaa kãadem pʋgẽ bal la lagengã segda. A na kõ-d sũ-noog bɩ sũ-sãamsã bee ne tõnd sẽn na n tʋm ne-a to-to wã.”
Gom-y rãamã yũub yell ne y kambã
Sõs-y ne y kambã rãamã yũub wɛɛngẽ. “A Mark sẽn yaa roagd sẽn yit Gãrãnd Bertayn wã yeelame: “Kom-bõonegã tõeeme n pa mi rãamã yũub sã n yaa sõma bɩ pa sõma ye. Mam soka m biigã sẽn tar yʋʋm a nii wã n na n bãng rãamã yũub sã n yaa sõma bɩ pa sõma. Mam maaname tɩ sõsgã tall yamleoogo, tɩ rẽ sõng m biigã t’a togs a tagsg n pa yɛɛs ye.”
Y sã n gom rãamã yũub yell ne y kambã naoor wʋsgo, y sẽn yetã na n kẽ b sũurã sõma tɩ b bãng tɩ pa reem yell ye. Y tõeeme me n gom bũmb kẽer yell y sõsgã sasa. Wala makre, y tõe n goma sorã zug kẽndã la pag ne rao lagengã yelle. La rẽ tog n zemsa ne y biigã yʋʋm sẽn yaa to-to wã.
Kõ-y y kambã mak-sõngo. Kambã yaa wa sɩfõ sẽn fõogd koom buud fãa wã. B nong n dɩkda b roagdbã, b yagsã bɩ neb taab togs-n-taare. Bãngdbã me wilgame tɩ yaa b roagdbã togs-n-taar la b rɩkd n yɩɩda. Dẽnd y sã n wae n yũud rãam sẽn na yɩl n sigs y sũur wall n boog y yɩɩre, y biigã na n tagsame tɩ rãamã yaa zu-loeesã tɩɩm. Woto wã, kõ-y y kambã mak-sõngo. Modg-y tɩ b yã tɩ y tara manesem sẽn zems rãamã yũub wɛɛngẽ.
g17.6 9 s. 5
Zãms-y y kambã tɩ b yɩ sik-m-mens rãmba
Zãms-y-b tɩ b yɩ kõatba. Sõng-y y kambã tɩ b bãng tɩ “kũun wata ne sũ-noog n yɩɩd reegre.” (Tʋʋ. 20:35) Wãn to? Naag-y y kambã n gʋls neb sẽn dat sõngr yʋy sebr zugu. Wala makre neb sẽn dat tɩ y tɩ ra teed n wa kõ-ba, tɩ y rɩk-b n kẽng zĩiga, bɩ n maneg b bũmb sẽn sãame. Rẽ poor bɩ y tũ taab n tɩ sõng-ba. Kɩt-y tɩ y kambã yã tɩ y sẽn paam n sõngd neb a taabã kõt-y-la sũ-noogo. Woto yaa manesem sõngo, sẽn na n sõng y kambã tɩ b yɩ sik-m-mens rãmba.—Luk 6:38.
D bʋgs Wẽnnaam Gomdã zug neere
Saam-bi-pogs sẽn yaa kom-bɩɩse, modg-y n wa n lebg-y pagb tẽeb sẽn bɩ
12 Zãms kelgr la goama. Kiris-ned segd n maagda a yĩng n kelgdẽ, la a gomd ne bʋgsem. Zĩ-kãng wɛɛngẽ, karen-biig a Zak kõ-d-la sagl-sõngo. A yeelame: “Ned buud fãa segd n wɩnga ne kelgre, la a maag ne goama.” (Zak 1:19) F sã n maagd f yĩng n kelgd f taabã f wilgdame tɩ f ‘kʋmd-b lame.’ (1 Pɩy. 3:8) F sã n pa wʋmd bũmb ned sẽn yeel võore, wall a tagsg sẽn yaa a soab bũmb ning wɛɛngẽ, bɩ f sok-a sogsg sẽn zemse. Rẽ poore, bɩ f tags n yaool n leoke. (Yel. 15:28, notã.) Sok f meng yaa: ‘Bũmb ning m sẽn na n togsã yaa sɩda, la kengd raood bɩ? Na n yɩɩ ne bʋgsem, la wilgdẽ tɩ m waoogda a soabã bɩ?’ Rɩk yam saam-bi-pogs nins sẽn wɩngd ne kelgr la sẽn gomd ne bʋgsmã nengẽ. (Karm-y Yel-bũn 31:26.) Gũusd n get b sẽn gomd to-to wã. F sã n zãms goam la kelgre, foo ne neb a taabã moor na n noomame.
BÕN-BƖƲƲNG RASEM 22-28
D SẼN BÃNG BIIBLÃ KARENG PƲGẼ KOƐƐG SOABA 1-2
Ket-y n sõngd-y kom-bɩɩsã tɩ b paamd minim
Rɩk-y y sẽn wʋmã n zãms ‘neb nins sẽn maand sɩdã’
3 Tõnd fãa la bal nonga tʋʋm nins d sẽn tar a Zeova tũudmã pʋgẽ wã. D nongẽ lame n kell n tʋm tʋʋm-kãens wakat fãa. Bʋko, a Ãdem yel-wẽndã tɛka, zãmaan fãa neb kʋʋndame n loog t’a to wa. (Koɛ. 1:4) Yaa bũmb sẽn kɩt tɩ yɛl kẽer toeemd kiris-neb hakɩɩkã sʋka. La yʋʋmã noorã, toeeng kẽer pa nana ne-d ye. A Zeova Kaset rãmbã tʋʋmdã pãng tara paasgo, tɩ d tʋmd ne tʋʋm-te-paal wʋsg masã sẽn na yɩl tɩ koe-noogã ta zĩig zãnga. La wakat ninga, yaa toog ne d tẽed-n-taas kẽer sẽn kʋʋl tɩ b zãms tʋʋm-te-paalã tall-n-tʋme. (Luk 5:39) Baa pa rẽ me, b keelmã la b pãngã pa wa saam-biis nins yʋʋm sẽn pa ta bãmbã ye. (Yel. 20:29) Woto yĩnga, saam-biis nins yʋʋm sẽn vẽsgã sã n zãmsd sẽn pa ta-b bãmbã tigingã tʋʋmã, yaa bũmb sẽn zemse, la wilgdẽ tɩ b rata tigingã neere.—Karm-y Yɩɩn-sõamyã 71:18.
4 Pa wakat fãa la yaa nana ne saam-biis nins sẽn get tigingã yellã tɩ b boog b tʋʋmã n kõ b tẽed-n-taas yʋʋm sẽn pa ta bãmb ye. Kẽer yɛɛsda b na n wa reeg tʋʋmd b sẽn nong wʋsgo. Sãnda tagsdame tɩ na n wa kɩtame tɩ pa le yaa wa bãmb n get tʋʋmdã yell ye. B getame tɩ sẽn pa ta-b bãmbã pa na n tõog tʋʋmdã ye. Kẽer me yetame tɩ b pa tar sẽk n na n zãms ned a to tʋʋmdã ye. La saam-biis nins me yʋʋm sẽn nan zemsã segd n maana sũ-mare, sã n wõnd kaoosdame tɩ b pa kõt-b tʋʋm a taaba.
D bʋgs Wẽnnaam Gomdã zug neere
Koɛɛg Soab sebrã tags-kãsemse
Koɛ. 2:1, 2: B sẽn yet ka tɩ laad yaa “gãeemdã” võor yaa bõe? Laad tõe n sõng-d lame tɩ d yĩm zu-loees wakat bilf la kɩt tɩ d ra tags wʋsg d yɛlã zut ye. La laad pa tõe n kɩt tɩ d zu-loeesã sa ye. Rẽ n so tɩ ned sã n dat n tũnug ne laad n bao sũ-noogo yaa “gãeemdo.”
BÕN-BƖƲƲNG RASEM 29–ZĨ-LIKR RASEM A 5
D SẼN BÃNG BIIBLÃ KARENG PƲGẼ KOƐƐG SOABA 3-4
Modg-y tɩ y kãadmã tall pãnga
Bõe la d tõe n maan tɩ tɛknolozi wã ra wa ne zu-loees d kãadmã pʋgẽ?
● Y sã n tʋmd ne tɛknolozi wã sõma, tõe n paasa y zĩnd-n-taarã yamleoogo. Wala makre, pag ne a sɩd tõe n tũnuga ne rẽ n sõsd ne taaba, b sã n wa pa be zĩ-yɛnga.
“Y sã n gʋls mesaaz koɛɛg n tool y to wã n yeel-a yaa: ‘M nonga foo’ wall ‘m tagsda f yelle,’ tõe n nooga sũur wʋsgo.”—A Zonatã.
● D sã n pa tʋmd ne tɛknolozi wã sõma, tõe n waa ne zu-loees d kãadmã pʋgẽ. Wala makre, neb kẽer nong n tõgda b telefõn-dãmbã wall b tablɛtã, tɩ kɩt tɩ b pa le tar sẽk n na n sõs ne b pagã wall b sɩdã ye.
“M kɩsa sɩd tɩ m sã n da pa rɩkd m sẽkã n tõgd m portaablã, m sɩdã ra na n mi n paamd n sõsda ne maam.”—A Zulissa.
● Neb kẽer tagsdame tɩ b tõe n sõsda ne b pagã wall b sɩdã sõma-sõma la b tõgd b portaablã. La bãngd a ye yʋʋr sẽ boond t’a Sherry Turkle yeelame tɩ woto pa tõe ye. Neb sãnda tagsdame tɩ b tõe n tʋmda tʋʋm wʋsg wakat-yɛng pʋgẽ tɩ yɩ sõma. Yaool n yaa bũmb sẽn pa tõe. A Sherry yeelame tɩ “togs sɩdã, f sã n maand bũmbu, n dat n maan bũmb a taab n paase, pa yɩt sõma wa sẽn da segdã ye.”
“M sɩdã sã n pa maand bũmb a to la sõsd ne maam, noom-m lame. La a sã n sõsd ne maam la a tõgd a portaablã, kɩtdame tɩ m tagsd tɩ yaa portaablã tõgbã n noom-a n yɩɩda.”—A Saara.
Y sẽn segd n bãnge: Y sẽn tʋmd ne tɛknolozi wã to-to wã tõe n nafa y kãadmã wall wa ne zu-loeese.
Ra bas-y t’a “Zah bug-witmã” ki ye
12 Wãn to la sẽn kẽ-b kãadmã tõe n dɩk a Akila ne a Pirsill togs-n-taare? Tags-y bũmb nins yãmb ned kam fãa sẽn tog n maanã yelle. Y tõe n naaga taab n maand bõn-kãens kẽer bɩ? Wala makre, a Akila ne a Pirsill ra naagda taab n moond koɛɛgã. Yãmb me wae n naagda taab n moond koɛɛgã bɩ? A Akila ne a Pirsill ra naagda taab n tʋmdẽ me. Tõe tɩ yãmb ne y pagã wall y sɩdã pa tʋmd tʋʋm-yɛng ye. La y tõe n naagda taab n tʋmd zakã tʋʋm bɩ? (Koɛ. 4:9) Y sã n naagd taab n tʋmd tʋʋm kẽere, y paamdame n sõngd taaba, la y paamd weer n sõsda. A Robert ne a Linda sẽn kẽ kãadem yʋʋm 50 la zak la woto. A Robert yeelame: “Togs sɩda, d pa tar sẽk wʋsg n tõe n naagd taab n kokd pemsem ye. La m sã n wa pegd laasã tɩ m pagã waasdẽ, wall m sã n wa yi n manegd fɩlɛɛr-dãmbã tɩ m pagã sõngd maam, noom-m-la wʋsgo. D sã n naagd taab n tʋmdẽ, d paamdame n be ne taaba, tɩ d nonglmã me paasdẽ.”
13 Tẽeg-y tɩ y sã n be roog a ye ne taab bal pa rat n yeel tɩ y pẽe taab ye. Saam-bi-poak a ye sẽn be Berzill yeelame: “Rũndã-rũndã, bũmb wʋsg n be d sẽn tõe n maan n kok pemsem. M yãame tɩ lebga nana tɩ d tags tɩ d sẽn be ro-yɛng ne taabã bala, d pẽe taaba. La m bãngame tɩ d sã n be ro-yɛng ne taab bal pa sek ye. M segdame me n wilg m sɩdã t’a yell pak-m lame.” D ges a Bruno ne a pag a Tays, sẽn wilg to-to tɩ b ned kam fãa yell paka a to. A Bruno yeelame: “D sã n wa paam sẽk n be ne taaba, ned kam fãa rɩgenda a portaabl kɛɛnga, tɩ d paam n dɩ wakat kãng yõodã sõma.”
14 La yãmb ne y pagã wall y sɩdã sã n mi n be ne taab tɩ pa yãkd nenga? Tõe tɩ y sẽn get yɛlã to-to wã pa yembre, wall y mi n wa yika taab sũuri. Bõe la y tõe n maan tɩ sõng-yã. Tẽeg-y raadã bugmã yell d sẽn gom tɩ loogã. Bugmã pa tiigd n yãng a toor ye. D segd n deng n ninga ra-zeremse, n yaool n wa paasd ra-giisi. Woto me, daar fãa y tõe n baoo sẽk bilf n zĩnd ne taaba. Modg-y n maand-y bũmb yãmb y yiibã fãa sẽn nonge, la pa bũmb sẽn na n wa ne no-koɛɛm ye. (Zak 3:18) Y sã n sɩng bilf-bilfu, y nonglmã pãng me na n paasdame.
Ra bas-y t’a “Zah bug-witmã” ki ye
3 Pag ne a sɩd segd n paasda bãmb ne a Zeova zoodã pãnga, sẽn na yɩl t’a “Zah bug-witmã” ket n wit b kãadmã pʋgẽ. Wãn to la rẽ tõe n sõng-b b kãadmã pʋgẽ? Pag ne a sɩd sã n modgd n paasd bãmb ne b saasẽ Ba wã zoodã pãnga, b na n tũuda a saglsã. Rẽ na n sõng-b lame tɩ b tõog n mao ne zu-loeese, wall b gil zu-loees sẽn tõe n boog b nonglmã. (Karm-y Koɛɛg soab 4:12.) Neb tẽeb sẽn tar pãng modgdame n dɩkd a Zeova togs-n-taare, n bɩɩsd zʋg-sõma toor-toor wala sõmblem, sũ-mare, la b yaa sug-kõatba. (Efɛɛ. 4:32–5:1) Pag ne a sɩd sã n bɩɩsd zʋg-sõma kãensã, kɩtdame tɩ yaa nana tɩ b nonglmã pãng paasdẽ. Saam-bi-poak a ye yʋʋr sẽn boond t’a Lena sẽn kẽ kãadem sẽn yɩɩd yʋʋm 25 masã wã yeelame: “Yaa nana tɩ f nong ned tẽeb sẽn tar pãnga, la f waoog-a.”
D bʋgs Wẽnnaam Gomdã zug neere
D tõe n vɩɩmda wakat sẽn kõn sa
7 A Zeova naan-d lame tɩ d rat ne d sũur fãa n vɩɩmd wakat sẽn kõn sa. Biiblã yeelame tɩ Wẽnnaam “ninga wakat sẽn ka sɛt tagsg ninsaal sũur pʋgẽ.” (Koɛ. 3:11) Rẽ n so tɩ d get kũumã wa d bɛ wã. (1 Kor. 15:26) D sã n wa bẽed bã-kɛgenga, rẽ yĩnga d kanda d nus n zĩẽ n gũud kũumã bɩ? Ayo. Naoor wʋsgo, d kẽngda logto-yiri, wall d tɩ ra tɩɩm n tɩp d menga. Sɩd me, d maanda d sẽn tõe fãa sẽn na yɩl n da ki ye. Sẽn paase, d ned sã n maan kaalem, a yaa bi-bilf t’a yʋʋmã vẽsgame, d sũur sãamdame hal n kaoose. (Zã 11:32, 33) D sẽn tõe n zãms bũmb wakat sẽn kõn sa wã, la d sẽn tʋll n vɩɩmd wakat sẽn kõn sa wã yaa d Naandã sẽn nong-dã n naan tõnd woto. Woto wilgda vẽeneg t’a na n wa kɩtame tɩ d vɩɩmd wakat sẽn kõn sa. Bũmb a taab me n kɩt tɩ d kɩs sɩd tɩ d na n wa vɩɩmda wakat sẽn kõn sa. D ges bũmb kẽer a Zeova sẽn maan pĩndã, la a sẽn maand masã menga, tɩ wilgdẽ t’a sẽn da rat tɩ ninsaalbã vɩɩm yɩ toto sɩngrẽ wã pa toeem ye.—Yɩɩn. 21:8, 9; Koɛ. 3:1, 8.
ZĨ-LIKR RASEM A 6-12
D SẼN BÃNG BIIBLÃ KARENG PƲGẼ KOƐƐG SOABA 5-6
D sẽn tõe n wilg to-to tɩ d waoogda d Wẽnnaamã sẽn ka to wã
Zã-y y mens ne waoogre, a Zeova ziirã yĩnga
17 Biiblã wilgdame tɩ sẽn yɩɩd fãa, d tigissã sasa, d segd n gũusame. Koɛɛg Soab 4:17 yeta woto: “Fo sã n dabd Wẽnnaam doogẽ, bɩ f gũus f naoore.” A Moiiz sẽn da wa n kolg zĩig sẽn yaa sõngã, b yeel-a lame t’a pidg a neooda wã. Yɩɩ woto me ne a Zozue. (Yik. 3:5; Zoz. 5:15) B ra segd n maana rẽ n wilg tɩ b nanda zĩigã. Ra yaa tɩlae ne Israɛll maan-kʋʋdbã me tɩ b tão põg-rãmba, n lud “sẽn sɩng ne b seesã tɩ ta b kɩgba.” (Yik. 28:42, 43) Woto ra yaa sẽn na yɩl tɩ b sã n wa tʋmd sɛk-zĩigã tʋʋm tẽn-kugrã sɛɛga, bɩ bũmb da wa maan tɩ b yã b yãndã ye. Maan-kʋʋd buudã fãa ra segd n tũu no-kãngã sẽn waoogd a Zeova wã.
18 Woto wilgdame tɩ d sã n dat n waoog Wẽnnaam, rẽndame tɩ d wilg tɩ d mii waoogre. D sã n dat tɩ nebã waoogd-do, d segd n waoogd-b lame. Waoog-kãng pa segd n yɩ zugẽ-zugẽ bɩ sẽn na yɩl tɩ nebã yãtẽ bal ye. Tog n yɩɩ ne d sũur fãa, bala yaa sũurã la Wẽnnaam feesda. (1 Sãm. 16:7; Yel. 21:2) Wakat fãa la zĩig fãa, d no-goamã la d tʋʋmã fãa pʋsẽ, d tog n yɩɩ neb sẽn mi waoogre. D manesmã ne d taabã la d sẽn get d meng to-to wã segd n wilgda rẽ. D yel-manesmã, d fu-yerdi wã la d sẽn manegd d mensã to-to wã pʋgẽ, d segd n maanda wa tʋm-tʋmd a Poll sẽn yeelã. A yeela woto: “Tõnd maoodame n ka rat n lub ned baa sẽn yaa ne bũmb ninga ye, tɩ ned da gom Wẽnnaam tʋʋmdã wẽng ye. La ne bũmb fãa tõnd maanda sẽn zems Wẽnnaam tʋm-tʋmdba.” (2 Kor. 6:3, 4) D maanda d sẽn tõe fãa sẽn na yɩl tɩ “Wẽnnaam sẽn yaa tõnd Fãagdã kareng paam waoogr ne bũmb fãa.”—Tɩt 2:10.
Zãmsd-y Biiblã, n paasd y pʋʋsgã sõmblem
21 A Zezi me ra pʋʋsda ne wẽn-zoeer la ne tẽebo. Wala makre, a sẽn na n vʋʋg a Lazaarã, a “nakame n yeel yaa: ‘M Ba, mam pʋʋsda yãmb barka, yãmb sẽn leok maamã yĩnga. Mam yẽ miime tɩ yãmb leokda maam daar fãa.’” (Zã 11:41, 42) Rẽ yĩnga yãmb me pʋʋsgã wilgda wẽn-zoeer la tẽeb bɩ? Y sã n karem a Zezi sẽn yeel bũmb ning n wilg a karem-biisã b sẽn tõe n pʋʋs to-to wã, y mikdame tɩ yaa a Zeova yʋʋrã na paam pẽgre, a Rĩungã na wa, la a raabã na maanã la a lʋɩɩs taoore. (Mat. 6:9, 10) La yãmb yẽ? Bõe la y lʋɩɩsd taoor y pʋʋsgã pʋgẽ? Rẽ yĩnga b wilgdame tɩ y tʋlla ne y sũurã fãa n teel a Zeova Rĩungã, la y rat t’a raabã maane, la t’a yʋʋrã paam pẽgr bɩ? Segdame tɩ yɩ woto.
“Pids pʋleng ning fo sẽn pʋlmã”
12 D sẽn deeg lisgã, d pʋlma a Zeova tɩ d na n maana a raabã d vɩɩmã tõre, la tɩ d na n maana d sẽn tõe fãa n tũ a noyã. La nan yaa sɩngr bala. Rẽ n so tɩ d ned kam fãa segd n mi n fees a menga. D tõe n soka d meng yaa: ‘Mam sẽn deeg lisgã tɛka, mam ne a Zeova zoodã pãng paasame bɩ? Mam ket n tũuda a Zeova ne m sũur fãa bɩ? (Kol. 3:23) Mam wae n pʋʋsdame bɩ? Mam karemda Biiblã daar fãa, la m kẽnd tigissã n pa vaandẽ bɩ? Mam wae n yita koɛɛgã mooneg bɩ? Bɩ m pa le tar yẽesem bõn-kãensã pʋgẽ wa pĩndã?’ Tʋm-tʋmd a Pɩyɛɛr yeelame tɩ d sã n modg n paas d tẽebã, d bãngrã, d sũ-marã, la d wẽn-sakrã, na n sõng-d lame tɩ d ra wa bas Wẽnnaam tʋʋmdã n pa le tʋmdẽ ye.—Karm-y 2 Pɩyɛɛr 1:5-8.
D bʋgs Wẽnnaam Gomdã zug neere
Karemdbã sogsgo
Koɛɛg soab 5:8 wã gomda nin-naab sẽn maand naong soab pãnga, n kaood a bʋʋd kɛgre. La a segd n tẽegame tɩ ned n get-a, t’a soabã naam bɩ a zu-sobend yɩɩd yẽ hal zĩig sẽn zãre. La neb a taab n be tɩ b naamã yɩɩd bãmb fãa. Bʋko, ninsaalbã goosneema rãmbã pʋgẽ, nanambsã tõe n yaa zãmb-dãmba, tɩ rẽ kɩt tɩ nin-buiidã sẽn yaa naong rãmbã namsd wʋsgo.
Baa ne rẽ, sã n wa wõnd sẽn maand kae, d sẽn mi t’a Zeova geta baa nanambs nins sẽn be ninsaalbã goosneemã rãmbã pʋgẽ wã, belsda tõndo. D tõe n yõka Wẽnnaam sɛɛga, n bas d yɛlã ne-a. (Yɩɩn. 55:23; Fili. 4:6, 7) D miime t’a Zeova “geta dũniyã fãa gilli, n na n sõng neb nins sẽn nong bãmb ne b sũyã fãa wã.”—2 Kib. 16:9.
Dẽnd Koɛɛg soab 5:8 tẽegda tõnd bũmb ning sẽn maand ninsaalbã goosneemã rãmbã pʋsẽ. La tɩ wakat fãa ned n be t’a naam yɩɩd a taaba. Sẽn yɩɩd fãa, vɛrse wã tõe n sõnga tõnd tɩ d tẽeg t’a Zeova naam n yɩɩd nebã fãa rẽnda. Sɩd me, a naamã ka to ye. Masã menga, a tũnugda ne a Bi-ribl a Zeezi Kirist sẽn yaa a Rĩungã rĩmã n dɩt naam. Sẽn-tõe-a-fãa wã sẽn ne bũmba fãa wã kaooda bʋʋd ne tɩrlem. A Biigã me maanda woto.
ZĨ-LIKR RASEM 13-19
D SẼN BÃNG BIIBLÃ KARENG PƲGẼ KOƐƐG SOABA 7-8
“Fo sẽn kẽngd kʋ-yir n são”
Yãb-y ne neb nins sẽn yãbdã
12 Sũ-sãang rãmbã tõe n paama belsg tigingã pʋgẽ. (Karm-y 1 Tesalonik-rãmb 5:11.) Bõe la d tõe n maan n keng “sũ-sãang” rãmbã raood la d bels-ba? (Yel. 17:22) D ra yĩm tɩ “sĩndim wakat beeme, la goam wakat me beeme” ye. (Koɛ. 3:7) A Delinn yaa pʋg-kõore. A yeelame: “Sũ-sãang rãmbã raab yaa b togs yellã sẽn namsd-b to-to, la sẽn be b sũurẽ wã. Rẽ wã, y sẽn tõe n maan tɩ sõng sũ-sãang soab n tɩ yɩɩda, yaa y maag y yĩng n kelg-a, n da kʋʋg a goamã ye.” A Yuniya ma-biig n yãk a mengã yõore. A Yuniya yeelame: “Tõe tɩ d pa wʋmd sẽn be-b sũ-sãang pʋgẽ wã toogã zãng ye. La sẽn tar yõod n yɩɩdã yaa d manesmã sẽn na n wilgdẽ tɩ d rat n bãnga yellã sẽn namsd-b to-to wã.”
D sõng d taabã, b sã n wa maand yɩɩr wʋsg b zu-loees yĩnga
15 A Wilyam pagã maana kaalem sẽn zems yʋʋm a wãna. Ad a sẽn yeele: “Nebã sã n lebg n togsd bũmb kẽer m pagã sẽn maane, noom-m lame. Kɩtdame tɩ m maneg n bas m yam tɩ b ra nong-a lame la b nand-a. Goam a woto sõngda maam wʋsgo. Belsd-m lame, bala, m da nonga m pagã wʋsgo. A ra yaa m fãa-fãa.” A Biyãnka yaa pʋg-kõore. A yeelame yaa: “Ned sã n naag-m tɩ d pʋʋse, la a karem vɛrse a ye bɩ a yiib tɩ m kelge, belsd-m lame. B sã n gomd m sɩdã yelle, wall yaa maam n gomd a yell tɩ b kelgd neere, sõngda maam.”
Yãb-y ne neb nins sẽn yãbdã
16 D ra yĩm me tɩ ned sã n be sũ-sãang pʋgẽ tɩ d pʋʋs a yĩng wall d naag-a n pʋʋse, sõngda wʋsg ye. Yaa sɩd tɩ sũ-sãangã tõe n kɩtame tɩ goamã yaa toogo, wall kɩt tɩ y gomd la y yãbda. La y goamã na n talla pãng la bels sũ-sãangã soab wʋsgo, bala yaa goam sẽn yit y sũurẽ. A Delinn yeelame: “Saam-bi-pogsã sã n da wa n na n bels-ma, m mi n kosame tɩ d naag taab n pʋʋse. Naoor wʋsgo, sẽn na n pʋʋs-a wã sã n sɩnge, goamã pa wat nana ye. La pa yãt n kaoos la a koɛɛgã pãng paase, t’a goamã kẽed sũur ye. B tẽebã la b nonglmã, n paas b sẽn da wilgd tɩ m yellã pak-b lame wã kenga m tẽebã wʋsgo.”
“Yãb-y ne neb nins sẽn yãbdã”
17 Ned fãa sũ-sãang sẽn kaoosd to-to wã pa yembr ye. Ned sã n maan kaalem, zo-rãmbã la mitinsã wata wʋsgo, n na n bels a nebã. La rasem a wãn poore, b wɩlgdame n bas-ba, tɩ b yaool n ket n dat belsgo. Yɩta sõma tɩ sã n tõe bɩ y sõng-b wakat kãnga. Biiblã yetame tɩ ned zoa hakɩɩk nong-a-la “wakat fãa.” (Yel. 17:17) Baa kaoosda, segdame tɩ d bels d tẽed-n-taas nins sẽn be sũ-sãang pʋgẽ wã, hal tɩ b sũyã wa sigi.—Karm-y 1 Tesalonik-rãmb 3:7.
18 D ra yĩm me tɩ bũmb kẽer tõe n tẽega nina a ned kaalem, t’a sũur le sãame. Wala makre, daar ning a nedã sẽn maan kalmã sã n wa kolgdẽ, b kãadmã tẽegr daare, reem kẽere, foto-rãmba, bũmb kẽer b sẽn da naag taab n maane, bʋrgo, la bũmb ning yũugu. Ned pag wall a sɩd kaalem poore, pipi tigis-kãseng a sẽn na n kẽng tõe n yɩɩ toog wʋsg ne-a, a sẽn lebg a yembrã yĩnga. A Zeezi kũumã tẽegr la bũmb a taab me b sẽn da naagd taab n maandẽ wã tõe n yɩɩ toogo. Ad saam-biig a ye sẽn yeele: “M pagã kaalmã poore, m da miime tɩ d kãadmã tẽegr ning sẽn na n pʋglã na n yɩɩ toog wʋsgo. Sɩd me, pa yɩ nana ye. La sẽn na yɩl tɩ m da yɩ m yembre, m tẽed-n-taas a wãn n yã taaba, n bool m zo-rãmb kẽer tɩ d naag taab n sõs baraarã.”
19 Yɩta sõma tɩ d tẽeg me tɩ pa wakat kẽer bal la sẽn be-b sũ-sãang pʋgẽ wã rat raood kengr ye. A Yuniya yeelame: “Naoor wʋsgo, f sã n paam tɩ nina maan bũmb n kõ-fo, wall f paam tɩ f zoa wa be ne-fo, baa yaa sasa sẽn pa seg ne yell sẽn tẽegd f nedã kaalmã, sõngda wʋsgo. Sõngr a woto buud kengda ned sõma, la belsd-a hal wʋsgo.” Yaa sɩd tɩ ned sã n be sũ-sãang pʋgẽ, tõnd pa tõe t’a nedã kaalem ra nams-a, d pa tõe me t’a sũ-sãangã sa fasɩ ye. La d tõe n maana bũmb kẽer n bels-a. (1 Zã 3:18) A Gabi yeelame: “M pʋʋsda a Zeova bark wʋsgo, kãsem-dãmbã sẽn sõng-m ne nonglem m sũ-sãangã wakate, n teel-m zu-loɛɛg buud fãa pʋgẽ wã. Kɩtame tɩ m yamẽ, ra yaa wa a Zeova meng n mobg-m ne a nusi.”
D bʋgs Wẽnnaam Gomdã zug neere
“Nebã fãa na n bãngame tɩ yãmb yaa mam karen-biisi”
18 Wakat ninga, d tõe n getame tɩ d segd n tɩ goma ne d saam-biig a sẽn maan bũmb n sãam d sũur yĩnga. Pipi, yɩta sõma tɩ d sok d meng yaa: ‘Mam wʋmda yɛlã vɩʋʋg sõma bɩ?’ (Yel. 18:13) ‘A sẽn maan bũmb ning n sãam m sũurã yɩɩ ne pʋ-toog bɩ?’ (Koɛ. 7:20) ‘Ma-me pa zoe n maan a buud sɩda?’ (Koɛ. 7:21, 22) ‘M sã n tɩ gom ne-a, pa na n maneg n keng yellã sɩda?’ (Karm-y Yel-bũn 26:20.) D sã n maag d yĩng n bʋgs sogs-kãensã zugu, d sẽn nong d tẽed-n-taagã tõe n kɩtame tɩ d kell n bas yellã tɩ sa.
ZĨ-LIKR RASEM 20-26
D SẼN BÃNG BIIBLÃ KARENG PƲGẼ KOƐƐG SOABA 9-10
Tall-y tagsg sẽn zemse, y zu-loeesã wɛɛngẽ
Ra tol-y n bas-y tɩ y ‘sũur sãam ne a Zeova’ ye
20 Bao-y n bãng-y y zu-loɛɛgã sẽn yitẽ. Bõe yĩng tɩ d segd n maan woto? Bala, na n kɩtame tɩ d bãng tɩ yaa tõnd n mi n bao d zu-loees kẽere. (Gal. 6:7) D pa segd n ning a Zeova taal rẽ yĩng ye. Bõe yĩnga? D rɩk makre: Ned sã n zoet ne mobill wʋsg n ta gõdgr zĩigẽ n pa boog a zoeesã, tõe n baasa wãna? A tõe n lʋɩɩme. La rẽ yĩnga y tõe n tagsame tɩ yaa sẽn maan-a mobillã yell sɩda? Ayo. Woto me, a Zeova naana tõnd tɩ d tõe n yãk d toorẽ yam. Sẽn paase, a wilgd-d-la d sẽn tõe n bãng n yãk yam to-to tɩ zemse. Rẽnd d sã n tudg n yãk yam tɩ pa zemse, d pa segd n ning d Naandã taal ye.
21 La pa d zu-loeesã fãa n yaa tõnd yell ye. Kẽer yaa ‘yel-lingdem sẽn paam-d’ yĩnga. (Koɛ. 9:11, MN) D pa segd n yĩm me tɩ yel-kɛg nins sẽn maand dũniyã zugã wʋsg yaa a Sʋɩtãan n wat ne ye. (1 Zã 5:19; Wil. 12:9) Yaa yẽ la d bɛ wã. Pa a Zeova ye.—1 Pɩɛ. 5:8.
A Zeova nanda a nin-buiidã sẽn yaa sik-m-mens rãmbã
10 Sik-m-mengã sõngdame me tɩ d maan sũ-noog ne vɩɩmã. Togs sɩdã, d mi n nee yɛl sẽn wõnd yaa yel-kɛga. Yam soab a Salomo ra yeelame: “Mam yãnda yembs sẽn zao wiidi, tɩ nanambs kẽnd ne nao wa yembse.” (Koɛ. 10:7) Pa sẽn tar-b minim bɩ bãngr n yɩɩdã n paamd waoogr wakat fãa ye. Sasa ninga, yaa sẽn pa tar-b minim la bãngr wʋsgã n paamd pẽgr n yɩɩda. La a Salomo sak n deegame tɩ sẽn são yaa d maan sũ-noog ne yɛlã sẽn yaa to-to wã, la d ra bas tɩ sẽn wõnd yaa yel-kɛgã yikd d sũur ye. (Koɛ. 6:9) D sã n yaa sik-m-meng soaba, na n yɩɩ nana ne-d tɩ d maan sũ-noog ne vɩɩmã, la d ra baoodẽ tɩ yɛlã yɩ wa d sẽn tagsd tɩ segd n yɩɩ to-to wã ye.
Bũmb nins y sẽn maand n deemdẽ wã nafd-y lame bɩ?
BIIBLÃ pʋgẽ, b wilgda vẽeneg t’a Zeova ratame tɩ d vɩɩmã yɩ-d noogo. Wala makre, Yɩɩl Sõamyã 104:14, 15 wã yeelame t’a Zeova kɩtdame tɩ ‘kood bɩt ninsaalbã sõngr yĩnga,’ tɩ kɩtdẽ tɩ d tõe n paamd “rãam sẽn kõt nebã sũ-noogo, la kaam sẽn salemd bãmb nense, la rɩɩb sẽn kengd nebã sũyã.” Sɩd me, yaa a Zeova n kɩtd tɩ koodã buud toor-toorã yit la b womda, tɩ kɩtdẽ tɩ d tõe n paam dɩɩbo, kaam la rãamã. Baa rãam sẽn pa tɩlae ne ninsaalã, a ‘kõta sũ-noogo.’ (Koɛ. 9:7; 10:19) Woto fãa wilgdame t’a Zeova ratame tɩ d vɩɩmã noom-do. A ratame tɩ d “pid ne sũ-noogo.”—Tʋʋ. 14:16, 17.
2 Dẽnd d pa segd n tags tɩ d sã n mi n dɩk sẽk n “ges bõn-yɩgds” wall mood buud toor-toor sẽn yaa neere, pa zems ye. Bũmb a woto maaneg tõe n bels-d lame la paas d vɩɩmã noom. (Mat. 6:26, 28; Yɩɩl 8:4, 5) Sɩd me, sũ-noogã yaa “Wẽnnaam kũuni.” (Koɛ. 3:12, 13) Rẽnd sẽk ning d sẽn dɩkd n deemdẽ wall d noogd d yõorã naaga bũmb nins Wẽnnaam sẽn kõt-dã sʋka. Woto kɩtame tɩ d segd n tʋmd ne-a tɩ zemsd ne Wẽnnaam daabo.
D bʋgs Wẽnnaam Gomdã zug neere
D gomd goam sẽn nafd neb a taabã
11 Wɩdga, la munaafɩglem. Nebã nong n gomda taab yelle. Yaa f sã n gom ned yell fãa la wɩdg bɩ? Ayo! Bala wakat ninga d tõe n taasa neb kibay bala. Wala makre, d sã n bãng tɩ ned n deeg lisgu, bɩ tɩ ned n dat belsg bɩ raood kengre. Pipi kiris-nebã ra baood n bãngda taab keelem, la b taasd taab kibaya. (Efɛɛz rãmba 6:21, 22; Kolos rãmb 4:8, 9) La d sã n yagd ziri bɩ n pukd neb yɛl sẽn pa pak-do, rẽ tõe n waa ne yelle. Sẽn yaa wẽng n yɩɩda, a tõe n wa lebga munaafɩglem, la rẽ wata ne yɛl wakat fãa. Munaafɩglem yaa f sẽn na n yet sẽn pa sɩd ned zugu, sẽn na yɩl n sãam a yʋʋre. Wala makre, fariziẽ rãmbã maana munaafɩglem sẽn na yɩl n sãam a Zezi yʋʋre. (Matɩe 9:32-34; 12:22-24) Naoor wʋsgo, munaafɩglem wata ne zaba.—Yelbũna 26:20.
12 A Zeova sũur pa noom ne neb nins sẽn sãamd neb a taab yʋyã, bɩ sẽn welgd neb ne taabã ye. A kisa ned sẽn “kãnegd ned ne a ba-biisi.” (Yelbũna 6:16-19) Gɛrk gom-bil ning sẽn yaa diabolos bɩ diaablã yaa a Sʋɩtãan yʋʋr a to. “Diaabl” rat n yeelame tɩ munaafɩɩka. A Sʋɩtãan sɩd yaa munaafɩɩk sẽn dõt Wẽnnaam. (Wilgri 12:9, 10) Tõnd segd n laka d mens ne goam buud fãa sẽn tõe n kɩt tɩ d wa wõneg a Sʋɩtãanã. Munaafɩglem wata ne “no-koɛɛm” la “welgre,” sẽn yaa yĩngã ratem biisã. Ned sẽn maand woto pa segd n zĩnd tigingã pʋgẽ ye. (Galat dãmba 5:19-21) Rẽnd nand tɩ y rɩk gomd y sẽn wʋm n taas ned a to, sok-y y meng woto: ‘Rẽ yĩnga yaa sɩd bɩ? Yaa sõma tɩ neb a taab wʋm bɩ? Gomdã togsg tara yõod bɩ?’—1 Pɩɛɛr 4:15.
ZĨ-LIKR RASEM 27–SƖPAOLG RASEM A 2
D SẼN BÃNG BIIBLÃ KARENG PƲGẼ KOƐƐG SOABA 11-12
Paam-y yĩns laafɩ la sũ-noogo
Tũnug-y ne bũmb nins a Zeova sẽn naanã n sõng y kambã tɩ b bãng-a
16 Bũmb nins a Zeova sẽn naanã tõe n sõnga zagsã rãmb tɩ b naagd taab n kokd pemsem, tɩ paas b zems-n-taarã pãnga. Biiblã yeelame tɩ “laad wakat” beeme, tɩ “yɩgb wakat” me beẽ. (Koɛ. 3:1, 4, notã.) A Zeova naana zĩis toor-toor tẽngã zug tɩ be rasãnde, tɩ d tõe n zĩnd be n maan bũmb sẽn kõt-d sũ-noogo. Zags wʋsg neb nong n naagda taab n kokd pemsem zĩig b sẽn nags tɩ be rasãnde, weoogẽ, tãens zut wall mogrã noore. Kamb kẽer sã n wa be parkẽ, b nong n zoetame n deemdẽ, wall b get rũmsã. Sãnda me nong n kẽnda zĩig koom sẽn beẽ, n tɩ reem koomã. A Zeova naana bũmb wʋsgo, tɩ d tõe n tũnugd ne rẽ n kokd pemsem!
Wilg-y tɩ y nanda vɩɩmã sẽn yaa Wẽnnaam kũunã
6 Yaa sɩd tɩ Biiblã pa sebr sẽn kõt sagls laafɩ wã wall rɩɩbã wɛɛngẽ ye. La a wilgda tõnd a Zeova tagsg sẽn yaa a soab rẽ wɛɛngẽ. Wala makre, a sagend-d lame tɩ d “zãag d meng ne wẽngã” sẽn tõe n wa sãam d yĩnsã laafɩ wã. (Koɛ. 11:10) Biiblã gɩdga yão-beedã la rã-tɩgrã sẽn tõe n tũ ne d yõorã. (Yel. 23:20) A Zeova ratame tɩ d sã n wa yãk yam n na n dɩ wall d yũ rãam, bɩ d tall yõk-m-menga.—1 Kor. 6:12; 9:25.
7 D sã n tagsd neere, d na n tõogd n yãkda yam sẽn wilgd tɩ d sũur nooma ne vɩɩmã sẽn yaa Wẽnnaam kũunã. (Yɩɩn 119:99, 100; karm-y Yel-bũn 2:11.) Wala makre, d na n maanda gũusg bũmb nins d sẽn dɩtã wɛɛngẽ. D sã n mi tɩ d sã n dɩ rɩɩb ninga na n kɩtame tɩ d bẽ, d na n gũusame n da rɩ rɩ-kãng ye. D wilgdame me tɩ d tara yam, d sã n gũsdẽ tɩ sekdẽ, n maand yĩn-wɩsgre, n modgd n yaa yɩlem wakat fãa, la d modg me tɩ d zakã yɩ yɩlemde.
“Bɩ y yɩ Wẽnnaam gomdã sakdba”
2 Tõnd a Zeova Kaset rãmbã tara sũ-noogo. Bõe yĩnga? Bũmb wʋsg n kõt tõnd sũ-noogo. La bũmb ning sẽn kɩt tɩ d tar sũ-noog n tɩ yɩɩdã yaa d sẽn karemd Wẽnnaam Gomdã daar fãa la d modgd n tũud bũmb nins d sẽn bãngdã.—Karm-y Zak 1:22-25.
3 D sã n yaa “Wẽnnaam gomdã sakdba,” nafda tõnd bũmb wʋsg wɛɛngẽ. Wala makre, d sã n tũud bũmb ning d sẽn bãngd Wẽnnaam Gomdã pʋgẽ wã nooma a Zeova la kõt-d sũ-noogo. (Koɛ. 12:13) D sã n tũud Wẽnnaam Gomdã saglsã kɩtdame tɩ tõnd ne d zakã rãmb zemsd taab sõma, la paasd tõnd ne tigingã neb zood pãnga. Yaa vẽeneg tɩ y tõe n kõo rẽ kaseto. Sẽn paase, sõngd-d lame tɩ d gind zu-loees wʋsg neb nins sẽn pa tũud a Zeova wã sẽn paamde. Rĩm a Davɩɩd sɩd yeela woto. A yɩɩll a ye pʋgẽ, a goma a Zeova tõogã, a noyã la a bʋ-kaoor toor-toorã yelle, n yeel yaa: “Ned sã n sak-ba, a paamda keoor wʋsgo.”—Yɩɩn. 19:7-11.
D bʋgs Wẽnnaam Gomdã zug neere
Wilg-y tɩ y nanda vɩɩmã sẽn yaa Wẽnnaam kũunã
6 Yaa sɩd tɩ Biiblã pa sebr sẽn kõt sagls laafɩ wã wall rɩɩbã wɛɛngẽ ye. La a wilgda tõnd a Zeova tagsg sẽn yaa a soab rẽ wɛɛngẽ. Wala makre, a sagend-d lame tɩ d “zãag d meng ne wẽngã” sẽn tõe n wa sãam d yĩnsã laafɩ wã. (Koɛ. 11:10) Biiblã gɩdga yão-beedã la rã-tɩgrã sẽn tõe n tũ ne d yõorã. (Yel. 23:20) A Zeova ratame tɩ d sã n wa yãk yam n na n dɩ wall d yũ rãam, bɩ d tall yõk-m-menga.—1 Kor. 6:12; 9:25.