2 | “Gʋls-sõamyã belsgã”

BIIBLÃ YETAME: “Bala bũmb nins fãa b sẽn gʋls pĩndã gʋlsa tõnd zãmsg yĩnga, sẽn na yɩl tɩ ne tõnd sẽn tõogd toogã maasem, la ne Gʋls-sõamyã belsgã maasem, d tõe n saag tɩ manegr n wate.”—ROM DÃMBÃ 15:4.

Rẽ sẽn dat n yɛɛlga

Biiblã tara belsg goam sẽn tõe n kõ tõnd pãnga, la sõng-d tɩ d tõog toogo, n tõog n mao ne d tags-kɛgã. Sẽn paase, Biiblã sõngda tõnd tɩ d saagdẽ tɩ ka la bilfu, sũ-sãamsã fãa na n saame.

Rẽ sẽn tõe n sõng-y to-to

D ned kam fãa sũur mi n sãama wakat ninga. La neb nins sẽn bẽed bãag sẽn kɩt tɩ b yam ka b mengã, wall b maand yɩɩr wakat fãa wã tõe n maooda ne sũ-sãams daar ne a to fãa. Wãn to la Biiblã tõe n sõng ned a woto?

Biiblã tara goam sẽn kengd raoodo, n tõe n ledg d tags-kɛgã. (Filip rãmbã 4:8) Gom-kãensã sɩd tõe n bels-d lame la sõng-d tɩ d yam gãand bãane, tɩ d ra sãam d sũur wʋsg ye.—Yɩɩn-sõamyã 94:18, 19.
Biiblã tõe n sõng-d lame tɩ d ra le tags tɩ d ka võor ye.—Luk 12:6, 7.
Vɛrse-rãmb wʋsg n wilgd tɩ d pa d yembr zu-loeesã pʋgẽ, la tɩ Wẽnnaam sẽn yaa d Naandã wʋmda d yɛlã võore.—Yɩɩn-sõamyã 34:18; 1 Zã 3:19, 20.
Biiblã yetame tɩ Wẽnnaam na n wa kɩtame tɩ d pa le tẽegd bũmb nins sẽn sãamd d sũurã ye. (Ezayi 65:17; Vẽnegre 21:4) D sã n maood ne tags-kɛg la sũ-sãamse, pʋlen-kãngã tõe n kõ-d-la pãnga, tɩ d ra koms raood ye.

Biiblã sõngda a Zesika

Bãag sẽn kɩt tɩ m yam ka m mengã sẽn namsd maam to-to

“Mam sẽn wa n tar yʋʋm 25, m da maooda ne yɩɩr la sũ-sãan-kãsenga, tɩ logtoɛɛmbã wa yeel tɩ m bẽeda bãag sẽn kɩt tɩ m yam ka m menga. M da mi n tiig n tagsa yɛl sẽn loog hal pĩnd yelle, tɩ kõt-m yɩɩr la sũ-sãams wʋsgo. Logtoɛɛmbã sõnga maam tɩ m bãng tɩ yaa tags-kɛgã, la zu-loe-kɛgems nins m sẽn paam m vɩɩmã pʋgẽ wã n kɩt tɩ m bẽed bã-kãnga. Tɩtã b sẽn da kõt maamã sẽn yãk a toogo, yɩɩ tɩlɛ tɩ m paam logtor sẽn na n sõsd ne-ma, n sõng-m tɩ m bãng tags-kɛgã n welge, la m toeem-ba.”

Biiblã sẽn sõngd maam to-to

“Mam bãagã sã n wa yiki, m pɛlengã yɩgdame, tɩ m maand yɩɩr wʋsgo, la m pa tõe n gũs ye. Naoor wʋsgo, zĩigã sã n sobge, m zugã pita ne tags-kɛg hal tɩ m pa mi m sẽn maandg ye. Wa Yɩɩn-sõamyã 94:19 sẽn wilgã, yɩɩrã sã n wa loog-do, Wẽnnaam tõe n bels-d lame la a kɩt tɩ d yam gãand bãane. M gãagã sɛɛgẽ, m dɩgla Biiblã ne seb-bila, n gʋlsd vɛrse-rãmb sẽn kengd raood a pʋgẽ. M sã n wa pa tõe n gũsi, m karemda Biiblã vɛrse kẽere. Woto, m basdame tɩ Wẽnnaam tagsa wã belsd maam.”

“Biiblã sagend-d lame tɩ d bas tagsa nins fãa sẽn yaa toor fasɩ ne bũmb ning d sẽn bãng Wẽnnaam zugã. Pĩndã, m da kɩsa sɩd tɩ m ka võore, tɩ ned pa tõe n nong maam, la tɩ m vɩɩmã ka bark ye. La m bãngame tɩ tagsg a woto yaa toor fasɩ ne Biiblã sẽn yetã. Biiblã wilgame tɩ Wẽnnaam yaa Ba sẽn yaa nonglem la nimbãan-zoɛta, n get tõnd ned kam fãa yelle. Bilf-bilfã, m wa n tõogda m tagsa wã, tɩ pa le yaa rẽ n so maam ye. M bãnga m sẽn tõe n tall tagsg ning m mengã zugu, tɩ zems ne Wẽnnaam sẽn get-m to-to wã. Woto yaa bũmb sẽn tar yõod wʋsgo, bala sõnga maam tɩ m bas tags-kɛg nins m sẽn da tar m mengã zugã.

“M gũuda ne yãgb n na n yã wakat ning d sẽn pa na n tẽegd yɛl sẽn sãamd sũuri, la tags-kɛg buud fãa sẽn na n sa wã. M sẽn mi tɩ wakat n wat tɩ tags-kɛgã bãas na n sa fasɩ wã kõta maam pãng tɩ m tõogd toog masã menga, la m gũud beoog-daarã, wakat ning m sẽn na n paam m meng zãng-zãng ne m bãagã sẽn kɩt tɩ m yam ka m mengã.”