3 | Biiblã kibayã sẽn tõe n sõng-y to-to

BIIBLÃ YETAME . . . Pĩnd wẽnd-sakdbã ra yaa ‘ninsaalb wa tõndo.’ —ZAK 5:17.

Rẽ sẽn dat n yɛɛlga

Biiblã gomda pagb la rap sẽn sɩd zĩnd yelle, sẽn mao ne sũ-sãams buud toor-toore. Y sã n wa karemd b kibayã, y na n yãame tɩ nina maoo ne zu-loɛɛg sẽn wõnd yãmb dẽndã.

Rẽ sẽn tõe n sõng-y to-to

Ned kam fãa ratame t’a taabã wʋmd a yɛlã võore. La yaa y sã n wa bẽed bãag sẽn kɩt tɩ y sũur pa noom ne y menga, la y rat rẽ n yɩɩda. D sã n karem Biiblã, d yãta neb manesem la b tagsa sẽn da yaa wa tõndo. Rẽ na n kɩtame tɩ d sã n wa maood ne yɩɩr la sũ-sãamse, bɩ d ra getẽ tɩ d yaa d yembr ye.

Biiblã pʋgẽ, neb sẽn da koms raood zãng la b tagsdẽ tɩ b pa tar sõangd goam wʋsg n be be. Yãmb zoe n yeela y meng yaa: ‘M yaa n yaame. M pa le tõe’ bɩ? A Moyiizi, a Eli ne a Davɩɩd me yeela woto.—Sõdbo 11:14; 1 Rĩm-dãmbã 19:4; Yɩɩn-sõamyã 55:4.
Biiblã gomda pag a ye yʋʋr sẽn boond t’a Ann yelle. A ra tara “sũ-toog wʋsg” a sẽn da pa tar rogem yĩnga, la a pʋg-to wã me sẽn da yaand-a wã yĩnga.—1 Sãmwɛll 1:6, 10.
Biiblã gomda rao a ye yʋʋr sẽn da boond t’a Zoob yelle. A ra maooda ne zu-loees wa tõndo. Baa ne a sẽn da tẽed a Zeova ne a sũur fãa wã, a maoo ne sũ-sãan-kãsenga, hal n yeel daar a ye yaa: “Mam kisa m vɩɩmã. M pa rat n le vɩɩmd ye.”—Zoob 7:16.

D sã n bao n bãng nin-kãensã Biiblã sẽn gomd b yellã sẽn mao ne tags-kɛg to-to n tõogã, d na n paama pãng n tõog n mao ne d sũ-sãamsã.

Biiblã sõngda a Kevin

Bãag b sẽn boond tɩ trouble bipolaire sẽn namsd maam to-to

“Mam sẽn wa n kolg yʋʋm 50, daar a ye, logtoɛɛmbã yeela maam tɩ m bẽeda bãag b sẽn boond tɩ trouble bipolaire. Bãagã kɩtame tɩ wakat ninga, m tagsd tɩ m tõe n maoo ne zu-loɛɛg buud fãa n tõoge. La wakat sãnda, m tagsdame tɩ m vɩɩmã ka yõod ye.”

Biiblã sẽn sõngd maam to-to

“Ned a ye manesem sẽn da yaa wa maam tɩ Biiblã gomd a yell yaa tẽn-tʋmd a Pɩyɛɛre. A tudga naoor wʋsgo, tɩ kɩt t’a ra getẽ t’a ka võor ye. La a Pɩyɛɛr pa kell n tall tags-kɛgr a woto ye. A baoo zo-rãmb sẽn da nong a zĩigẽ, n paam tɩ b sõng-a. M sã n wa yik daar ning tɩ m yɛlã pa lebd be bãagã yĩnga, m pãn-komsmã kɩtdame tɩ m tagsd tɩ m ka võor ye. Wa a Pɩyɛɛre, m modgdame n na n nong n be ne m zo-rãmbã sẽn tʋll n sõng-m tɩ m mao ne m zu-loɛɛgã.

“Ned a to me kibar sẽn belsd maam wʋsg yaa rĩm a Davɩɩde. A sũur da mi n sãamda ne a yɛlã sẽn yaa to-to wã, la a maand a bãngẽ bũmb kẽer a sẽn da maan pĩnd yĩnga. Ma-me yaa wa yẽnda, bala wakat ninga m mi n togsa gomd wall m maan bũmb n wa maand m bãngẽ. A Davɩɩd goam nins sẽn be Yɩɩn-sõamyã 51 pʋgẽ wã kengda m daood wʋsgo. Vɛrse a 3 wã pʋgẽ, a yeelame: ‘Mam mii m beegrã tiiri. Mam yel-wẽndã bee m taoor wakat fãa.’ Sɩd-sɩda, m sũurã sã n wa sãam wʋsgo, ma-me tagsda wa a Davɩɩde. Yaa toog wʋsg tɩ m tall tagsg sẽn yaa sõma m mengã zugu. La m mi n yeela wa a Davɩɩd sẽn yeel vɛrse 10 pʋgẽ wã. A yeelame yaa: “Mam Wẽnnaam, naan sũur sẽn yaa yɩlemd n ning mam pʋgẽ, la f ning yam-paalg sẽn pa yuusd mam pʋgẽ.” M mi n kosa Wẽnnaam t’a sõng-m tɩ m tall tagsg sẽn yaa sõma m mengã zugu. Sẽn na n baase, vɛrse 17 wã kengda m daoodo. A yeelame: ‘Mam Wẽnnaam, fo pa na n zãgs sũur sẽn maand a bãngẽ la sẽn sik a meng ye.’ Vɛrse-kãngã sõngda maam tɩ m bãng tɩ Wẽnnaam nong-m lame.

“M sã n tagsd Biiblã kibay zugu, la bũmb nins Wẽnnaam sẽn maan n kõ maamã yelle, sõngda maam tɩ m maneg n tẽ tɩ manegr n wate. Bũmb ning Wẽnnaam sẽn pʋlem tɩ be Biiblã pʋgẽ wã yaa vẽeneg m yamẽ, la sõngd-m tɩ m pa komsd raood ye.”