1 | Pʋʋsgã “Sik-y y yɩɩrã fãa n bas ne-a”

BIIBLÃ YETAME: “Sik-y y yɩɩrã fãa n bas [ne Wẽnnaam], bala a geta yãmb yelle.”—1 PƖYƐƐR 5:7.

Rẽ sẽn dat n yɛɛlga

Wẽnnaam a Zeova ratame tɩ d togs-a bũmb nins fãa sẽn namsd tõndo, rat n yeel tɩ bũmb ning fãa sẽn be d sũurẽ la d yamẽ wã. (Yɩɩn-sõamyã 55:22) Yell kae n yaa kãseng wʋsgo, wall n yaa bilf wʋsg tɩ d pa tõe n pʋʋs a yĩng ye. Yellã sã n namsd tõndo, sãamda a Zeova me sũuri. D sã n togs-a d yellã, na n sõng-d lame tɩ d yamã gãand bãane.—Filip rãmbã 4:6, 7.

Rẽ sẽn tõe n sõng-y to-to

D sã n wa bẽed bãag sẽn kɩt tɩ d sũur pa noom ne d menga, d tõe n wa getame tɩ d yaa d yembre. Neb a taabã pa wae n wʋmd d zu-loɛɛgã võor sõma ye. (Yel-bũnã 14:10) La d sã n pelg d pʋg n togs Wẽnnaam bũmb ning sẽn namsd tõndã, a na n kelg-d-la neere, la a wʋm d yellã võore. A Zeova ne-d lame, n mi d zu-loeesã sẽn namsd tõnd to-to wã, la a rat tɩ d pʋʋs-a n togs-a bũmb ning fãa sẽn namsd tõndã.—2 Kibayã 6:29, 30.

D sã n pʋʋsd a Zeova n gomd ne-a, kɩtdame tɩ d maneg n kɩs sɩd t’a geta d yelle. D na n tagsa wa yɩɩn-gʋlsdã sẽn yeelã. A yeelame yaa: “Yãmb yãa mam namsgã. Yãmb mii mam sũ-sãangã sẽn yaa wʋsg to-to wã.” (Yɩɩn-sõamyã 31:7) D sẽn mi tɩ d sẽn namsdã sãamda a Zeova sũurã, tõe n sõng-d lame tɩ d kell n mao n da koms raood n bas ye. A nee d zu-loeesã yaa sɩda, la pa rẽ bal ye. A wʋmda d zu-loɛɛgã võor n yɩɩd ned buud fãa, la a sõngd tõnd tɩ d paamd belsg la raood kengr ne Biiblã maasem.

Biiblã sõngda a Ziliyẽ

Yɩɩrã sẽn namsd maam to-to

“Mam maooda ne yɩɩre, la bãag b sẽn boond tɩ trouble obsessionnel compulsif (TOC). M mi n wa tiig n maanda yɩɩre. Wakat ninga m tara laafɩ, la pa yãt n kaoos la m sɩng n maand yɩɩr wʋsgo, n yaool n pa mi sẽn yaa bʋʋm ning yĩng ye. Sẽn yɩɩd fãa, yaa m sã n wa be neb sʋk la m maand yɩɩre. M nong n sokda m meng nebã sẽn tar tagsg ning mam zugu.

“Neb nins sẽn mi zu-loees nins m sẽn maood ne wã teend-m-la wʋsgo. Togs sɩdã, wakat ninga, b mi n wa salg n togsa gomd sẽn pa noom-m wʋsg ye. La m sũur nooma ne b sẽn modgd n dat n sõng-mã.

“M sẽn maood ne yɩɩrã la bãag ning b sẽn boond tɩ trouble obsessionnel compulsif (TOC) yĩnga, kɩtame tɩ mi n yaa toog tɩ m pʋʋs a Zeova. Baoodame tɩ m modg wʋsg tɩ m yamã gãande, tɩ m tõog n pʋʋs a Zeova. M tagsda wʋsgo, tɩ m yamã yuusdẽ, hal tɩ yaa toogo. Sã n wa yaa woto, yaa toog tɩ m paam gom-biis n togs a Zeova bũmb ning sẽn namsd maamã.”

Biiblã sẽn songd maam to-to

“Mam sẽn zãms Biiblã, m bãngame tɩ pa tɩlɛ tɩ m pʋʋs n wogle, wall n gom ne minim tɩ Wẽnnaam yaool n deeg m pʋʋsg ye. Wakat ninga, sã n wa yaa toog tɩ m paam gom-biis n wilg bũmb ning sẽn namsd-mã, m yetame bal yaa: ‘Zeova, m kotame tɩ f sõng-ma.’ Baa m sã n mi n pʋʋs koɛɛg woto, m neeme t’a Zeova wʋmda m yɛlã võore, la a sõngd-m tɩ m paamd bũmb ning m sẽn dat wakat kãnga. Pʋʋsgã sẽn yãk a toogo, m baoo tɩbsg logtoɛɛmb nengẽ. Pʋʋsgã ne logtoɛɛmbã sõnga maam sõma. Kɩtame tɩ m zu-loɛɛgã boog wʋsgo, hal tɩ m sũur noome. Baa sẽn mi n pa nana ne-m tɩ m pʋʋs m Ba sẽn be saasẽ wã, m modgd n maanda woto, bala m miime t’a nong-m lame, la t’a tʋll n sõng-m lame.”