ZÃMSGÃ YĨNGA 21
A Zeova sẽn leokd d pʋʋsgã to-to
“D miime me tɩ d na n paama bũmb nins d sẽn kotã, d sẽn kos bõn-kãensã yĩnga.”—1 ZÃ 5:15.
YƖƖLL 41 Zeova, reeg mam pʋʋsgo
D SẼN NA N YÃ WÃa
1-2. Pʋʋsgã wɛɛngẽ, d tõe n wa sãmbda bõe?
YÃMB zoe n maana sãmbs a Zeova sã n leokda y pʋʋsg bɩ? Sã n yaa woto, bɩ y bãng tɩ y pa y yembr ye. Saam-biis la saam-bi-pogs wʋsg me tagsda woto, sẽn yɩɩd fãa, b sã n wa maood ne zu-loeese. D sã n wa namsdẽ, tõe n yɩɩ toog ne tõnd me tɩ d bãng a Zeova sẽn leokd d pʋʋsgã to-to.
2 Bɩ d ges bũmb nins sẽn kɩt tɩ d tõe n kɩs sɩda, t’a Zeova leokda a nin-buiidã pʋʋsgã. (1 Zã 5:15) D leb n na n paama sogsg kẽer leoore. Wala makre, bõe yĩng tɩ wakat ninga yaa wa a Zeova pa leokd d pʋʋsgã? Wãn to la a Zeova leokd d pʋʋsgã rũndã-rũndã?
A ZEOVA TÕE N LEOKA D PƲƲSGÃ TƖ PA YƖ WA D SẼN DA TẼEDÃ YE
3. Bõe yĩng t’a Zeova rat tɩ d pʋʋsd-a?
3 Biiblã wilgdame t’a Zeova nonga tõnd hal wʋsgo, la tɩ d tara yõod wʋsg a nifẽ. (Aaze 2:7; 1 Zã 4:10) Yaa rẽ n so t’a yet tõnd tɩ d pʋʋs-a n kos a sõngre. (1 Pɩy. 5:6, 7) A tʋll n sõng-d lame tɩ d kell n yɩ a zo-rãmba, la d tõog n mao ne d zu-loeesã.
A Zeova leoka a Davɩɩd pʋʋsgã n fãag-a a bɛɛbã nugẽ (Ges-y sull a 4)
4. Bõe n kɩt tɩ d miẽ t’a Zeova leokda a nin-buiidã pʋʋsgo? (Ges-y fotã me.)
4 Biiblã pʋgẽ, d wae n yãtame t’a Zeova leoka neb sẽn da tũud-a pʋʋsgo. Ãnda yell n wat y yamẽ? D tõe n goma rĩm a Davɩɩd yelle. A vɩɩmã tõre, a zaba ne bɛɛb sẽn da yaa nin-toose. La a ra nong n pʋʋsd a Zeova n kot sõngre. Vugri, a yeela a Zeova yaa: “Zeova, kelg-y mam pʋʋsgã. Kelg-y mam sẽn pʋʋsd n kot sõngrã. Yãmb kɩs-sɩdã ne y tɩrlmã yĩng bɩ y leok-ma.” (Yɩɩn. 143:1) A Zeova leoka a Davɩɩd sẽn pʋʋs n kos fãagrã. (1 Sãm. 19:10, 18-20; 2 Sãm. 5:17-25) A Davɩɩd basa a yam n yeel yaa: “A Zeova pẽe neb nins fãa sẽn boond-a wã.” Tõnd me tõe n basa d yam ne rẽ.—Yɩɩn. 145:18.
A Zeova leoka a Poll pʋʋsgã n kõ-a pãng sẽn seke, t’a tõog toogo (Ges-y sull a 5)
5. Pĩnd wẽndẽ wã, a Zeova ra leokda a nin-buiidã pʋʋsg fãa tɩ yɩ wa b sẽn da tẽedã bɩ? Kõ-y makre. (Ges-y fotã me.)
5 A Zeova tõe n leoka d pʋʋsgo, tɩ pa yɩ wa d sẽn da tẽedã ye. Yɩɩ woto ne tẽn-tʋmd a Polle. A kosa a Zeova t’a yãk a “gõaag yĩngã pʋgẽ.” Yaa hal naoor a tãab la a Poll pʋʋs zu-loe-kãng yĩnga. A Zeova leoka a pʋʋsgã bɩ? N-ye. La pa yɩ wa a Poll sẽn da tẽedã ye. A Zeova pa kɩt tɩ zu-loɛɛgã loog n bas-a ye. La a kõ-a-la pãng sẽn sek a na tõog n kell n maan sɩd ne-a.—2 Kor. 12:7-10.
6. Wakat ninga, bõe yĩng tɩ tõe n yɩ wa a Zeova pa leokd d pʋʋsgo?
6 Wakat ninga, a Zeova tõe n leoka tõnd me pʋʋsgo, tɩ pa yɩ wa d sẽn da tẽedã ye. D tõe n basa d yam t’a Zeova mii a sẽn tõe n sõng-d to-to, tɩ naf-d n yɩɩda. A tõeeme meng n “maan tɩ yɩɩg bũmb nins fãa tõnd sẽn kot wall d sẽn tagsdã hal zĩig sẽn zãre.” (Efɛɛ. 3:20) Rẽ n kɩt tɩ wakat ning a sẽn na n leok d pʋʋsgã, wall a sẽn na n leok to-to wã tõe n pa yɩ wa d sẽn da tẽedã ye.
7. Bõe yĩng tɩ wakat ninga, d segd toeem bũmb ning d sẽn pʋʋsd n kotã? Togs-y kibare.
7 D sã n bãngd a Zeova raabã n paasdẽ, d tõe n gesame tɩ d segd n toeema bũmb nins d sẽn togsd-a d pʋʋsg pʋgẽ wã. D gom a Martin Poetzinger yelle. Saam-biig a Poetzinger kãadmã poor bala, b yõk-a lame n kẽes bãens roog Nazi kã de kõnsãntrasiyõ pʋgẽ. Sɩngrẽ wã, a kosa a Zeova t’a sõng-a t’a tõog n yi kã de kõnsãntrasiyõ wã pʋgẽ, sẽn na yɩl n tõog n ges a pagã yelle, la a le sɩng koɛɛgã moonego. La semen a yiib poore, a pa yã bũmb sẽn wilgd t’a Zeova ratame t’a yi zĩ-kãng ye. Rẽ n so t’a pʋʋs n yeel yaa: “Zeova, m kotame tɩ f wilg-m bũmb ning f sẽn dat tɩ m maanã.” Rẽ tɛka, a sɩngame n tagsd saam-biis a taabã me sẽn namsd to-to kã wã pʋgẽ wã yelle. B wʋsgã ra maanda yɩɩr b pagbã la b kambã yĩnga. Saam-biig a Poetzinger pʋʋsa a Zeova n yeel yaa: “Zeova, bark ne f sẽn sõng-m tɩ m bãng m sẽn tõe n maan bũmb ningã. Sõng-m tɩ m keng m saam-biisã raoodo.” A maana yʋʋm a wɛ kã de kõnsãntrasiyõ wã pʋgẽ, n da sõngd a saam-biisã.
8. D sã n wa pʋʋsdẽ, bõe la d pa segd n yĩmi?
8 D tẽeg t’a Zeova na n pidsa a raabã, la tɩ na n zemsa wakat ning a sẽn yãkã bal kɛpɩ. A raab yaa a menes bũmb nins fãa sẽn kɩt tɩ ninsaalbã namsd rũndã-rũndã wã. Wala makre, sabab-wẽnsã, bãasã la kũumã. A Zeova na n tũnuga ne a Rĩungã n pids a raabã. (Dãn. 2:44; Vẽn. 21:3, 4) La nananda, a basame t’a Sʋɩtãan so dũniyã.b (Zã 12:31; Vẽn. 12:9) A Zeova sã n kɩt tɩ ninsaalbã zu-loeesã sa masã, yaa wa a Sʋɩtãan rɩta a naamã sõma dũniyã zugu. Dẽnd baa d sẽn gũud a Zeova sẽn na n wa pids a pʋlemsã, pa rat n yeel t’a pa maand bũmb n sõngd-d ye. Bɩ d ges bũmb kẽer a sẽn maand n sõngd tõndo.
A ZEOVA SẼN LEOKD PƲƲSGÃ TO-TO RŨNDÃ-RŨNDÃ
9. D sã n wa rat n yãk yam bũmb wɛɛngẽ, wãn to la a Zeova tõe n sõng-do? Rɩk-y makre.
9 A kõt-d-la yam. A Zeova pʋlmame t’a na n kõo tõnd yam, tɩ d bãng n yãk yam bũmb toor-toor wɛɛngẽ. Sẽn yɩɩd fãa, d sã n wa na n yãk yam d vɩɩmã wɛɛngẽ, wala makre, d sã n na n kẽe kãadem wall d pa na n kẽ kãadem, yaa tɩlɛ tɩ d paam yam sẽn yit Wẽnnaam nengẽ. (Zak 1:5) D gom saam-bi-poak a ye yʋʋr sẽn boond t’a Mariya sẽn pa kẽ kãadem yelle.c A ra yaa wakat fãa so-pakd hal t’a sũur noomẽ. La a wa n yõga zood ne saam-biig a ye. A yeelame: “D zoodã pãng sẽn wa n paasdẽ wã, d wa n maneg n nonga taab me. M da miime tɩ m segd n yãka yam rẽ wɛɛngẽ. M pʋʋsa a Zeova naoor wʋsg rẽ yĩnga. M da ratame t’a Zeova wilg-m sore, la m da miime tɩ pa yẽ n na n yãk yam n kõ-m ye.” Saam-bi-poakã yãame t’a Zeova leoka a pʋʋsgã n kõ-a yam. Wãn to? A maana vaeesg d sɛbã pʋsẽ, n yã sõss toor-toor sẽn sõng-a t’a paam a sogsgã leoore. Sẽn paase, a kelga a ma wã sẽn maand sɩd ne a Zeova wã saglse. Sagl-kãensã sõnga a Mariya t’a bãng bũmb ning yĩng sẽn kɩt t’a nong saam-biigã. Woto sõng-a lame t’a bãng n yãk yam-sõngo.
Wãn to la a Zeova kõt-d pãng tɩ d tõogd toogo? (Ges-y sull 10)
10. Wa Filip rãmb 4:13 sẽn wilgdã, bõe la a Zeova na n maan n sõng a nin-buiidã? Togs-y kibare. (Ges-y fotã me.)
10 A kõt-d-la pãng tɩ d tõog toogo. Wa a Zeova sẽn maan to-to ne tẽn-tʋmd a Pollã, a na n kõo tõnd pãng tɩ d tõog n mao ne d zu-loeesã. (Karm-y Filip rãmb 4:13.) D ges a Zeova sẽn sõng saam-biig a ye yʋʋr sẽn boond t’a Bẽnzame to-to, t’a tõog n mao ne a zu-loeese. A sẽn wa n yaa yãagã, yẽ ne b zakã rãmb zĩnda Afrik tẽng a ye kãderefiziye pʋgẽ n kaoos yʋʋma. A Bẽnzame yeelame: “M da pʋʋda a Zeova wakat fãa, n kot-a t’a kõ-m pãnga, tɩ m tõog n maan sẽn yaa sõma a nifẽ. A Zeova leoka m pʋʋsgã, n sõng-m tɩ m yamã gãande. A kõ-m-la raood tɩ m kell n moon koɛɛgã, la a sõng-m tɩ m paam siglgã sɛb sẽn keng m tẽebã.” A paasame yaa: “M karma a Zeova Kaset rãmb kibaya, la m bãng a Zeova sẽn sõng-b to-to tɩ b tõog toogo, tɩ kɩt tɩ m yãk yam n na n kell n maan sɩd ne-a.”
A Zeova zoe n tũnuga ne y tẽed-n-taag n sõng-y bɩ? (Ges-y sull 11-12)d
11-12. Wãn to la a Zeova tõe n tũnug ne d tẽed-n-taasã, n leok d pʋʋsgo? (Ges-y fotã me.)
11 A tũnugda ne d tẽed-n-taasã n sõngd tõndo. Yʋng ning b sẽn yõk a Zeezi wã, a pʋʋsa ne a sũur fãa. A kosa a Zeova t’a ra bas tɩ nebã tags t’a yaa wẽn-tʋʋsa, la b ning-a taal rẽ yĩng ye. La a Zeova pa maan wa a Zeezi sẽn kosã ye. A tʋma malɛk sẽn da be saasẽ, t’a wa keng a raoodo. (Luk 22:42, 43) A Zeova me tõe n tũnuga ne d tẽed-n-taag sẽn na n bool tõndo, wall sẽn na n wa kaag tõndo, n keng d raoodo. D ned kam fãa tõe n baoo segb n gom “gom-noog” ne d tẽed-n-taaga.—Yel. 12:25.
12 D gom saam-bi-poak a ye yʋʋr sẽn boond t’a Miryam yelle. A sɩdã sẽn maan kaalem semen a wãn poore, a Miryam ra bee zakẽ a yembr t’a sũurã saam wʋsgo, t’a pa mi a sẽn maand ye. A ra yãbda wʋsgo, n dat ned n gom ne. A yeelame: “M da pa tar pãng n na n bool ned ye. Rẽ n so tɩ m pʋʋs a Zeova. M sẽn wa n pʋʋsdẽ la m yãbdã, m wʋma m pogtaablã sẽn sɩng yãbre. Ra yaa kãsem-soab a ye sẽn yaa m zoa n da boonde.” A Miryam paamame tɩ kãsem-soabã ne a pagã bels-a. A ra kɩsa sɩd tɩ yaa a Zeova n kɩt tɩ saam-biigã boole.
Bõe la a Zeova tõe n kɩt tɩ neb a taabã maan n sõng-do? (Ges-y sull 13-14)
13. Rɩk-y makre, n wilg a Zeova sẽn tõe n maan to-to n tũnug ne neb sẽn pa tũud-a, n leok d pʋʋsgo.
13 A tõe n tũnuga ne neb sẽn pa tũud-a n sõng-do. (Yel. 21:1) Wakat ninga, a Zeova tõe n leoka d pʋʋsgo, n kɩt tɩ neb sẽn pa tũud-a maan bũmb tɩ sõng-do. Wala makre, a kɩtame tɩ rĩm a Artazɛgzɛs kõ a Neemi sore, t’a leb Zerizalɛm n tɩ sõng tɩ b lebs n me tẽngã. (Nee. 2:3-6) Rũndã-rũndã me, a Zeova tõe n kɩtame tɩ neb sẽn pa tũud-a sõng-do, d sã n wa be raab pʋgẽ.
14. Bõe n yɩ yãmb noog saam-bi-poak a Hing kibarã pʋgẽ? (Ges-y fotã me.)
14 Saam-bi-poak a ye yʋʋr sẽn boond t’a Soo Hing yãame t’a Zeova tũnuga ne logtor n sõng-a. A bi-riblã ra bẽeda bãag sẽn kɩt t’a sũur pa noom ne a meng ye. Biigã wa n yii zĩ-zãntgẽ n lʋɩ n pogl wʋsgo, tɩ yɩ tɩlɛ tɩ saam-bi-poakã ne a sɩdã bas b tʋʋmã n na n ges a yelle. Rẽ kɩtame tɩ b paam ligd zu-loeese. A Hing yeelame tɩ yẽ ra getame t’a yaa wa sũud b sẽn yãag tɩ ta a tɛka, t’a ra pa le tar pãng n tõe n mao ne zu-loɛɛgã ye. A pelga a pʋg n pʋʋs a Zeova n kos sõngre. Logtor ning sẽn da get biigã yellã, yãka yam n na n sõng-ba. Kɩtame tɩ b paam goosneema sõngre, la roog ligd sẽn pa toog n luwaase. Rẽ poore, a Hing yeelame: “D yãa a Zeova nug yellã pʋgẽ. A sɩd yaa ‘Soab ning sẽn wʋmd pʋʋsgã.’”—Yɩɩn. 65:2.
YAA TƖLƐ TƖ D TALL TẼEBO, N TÕOG N SAK N DEEG T’A ZEOVA LEOKA D PƲƲSGO
15. Bõe n sõng saam-bi-poak a ye, t’a bãng t’a Zeova ra leokda a pʋʋsgo?
15 Pa wakat fãa la a Zeova leokd d pʋʋsg tɩ yaa vẽeneg ye. La d saasẽ Ba wã sẽn leokd to-to wã kell n yaa bũmb ning d sẽn datã bal kɛpɩ sẽn na yɩl n kell n maan sɩd ne-a. Woto wã, bɩ y gũusd n get a Zeova sẽn leokd y pʋʋsg to-to. Saam-bi-poak a ye yʋʋr sẽn boond t’a Yoko wa n tagsdame t’a Zeova pa leokd a pʋʋsgã ye. Rẽ n so t’a sɩng n gʋlsd bũmb nins a sẽn kot a Zeova wã sebr pʋgẽ. Kaoosg zugẽ, a wa n dɩka a sebrã n gese, n yã t’a Zeova leoka a pʋʋsgã fãa la bala, baa b rãmb nins a sẽn da yĩm b yellã. D segd n mi n baoo sẽk wakat-wakate, n tags n ges a Zeova sẽn leokd d pʋʋsg to-to.—Yɩɩn. 66:19, 20.
16. Pʋʋsgã wɛɛngẽ, wãn to la d tõe n wilg tɩ d tara tẽebo? (Ebre-rãmbã 11:6)
16 Pa d sẽn na n pʋʋsd a Zeova wã bal n wilgd tɩ d tara tẽeb ye. D segdame me n sak a sẽn leokd d pʋʋsgã to-to wã, baa pa yɩ wa d sẽn da ratã. (Karm-y Ebre-rãmb 11:6.) D gom a Mike ne a pag a Krissi yelle. B ra rata ne b sũur fãa n tɩ tʋm Betɛllẽ wã. A Mike yeelame: “D gʋlsa naoor wʋsgo, n kos n na n tɩ tʋm Betɛllẽ wã, la d pʋʋs a Zeova n yɩlem rẽ yĩnga. La b zɩ n bool-d ye.” A Mike ne a Krissi kell n basa b yam, t’a Zeova mii a sẽn tõe n tall-b n tʋm to-to tɩ yɩ sõma n yɩɩda. B ra ket n wɩngda ne a Zeova tũubu. B ra yaa wakat fãa so-pakdba, n moond koɛɛgã zĩig koe-moondb sẽn pa waooge, la b sõngd ne siglgã rot meebo. Rũndã-rũndã, yẽ ne a pagã gilgdame n kaagd tigimsã. A Mike yeelame: “Pa wakat fãa la a Zeova leok d pʋʋsgã tɩ yɩ wa d sẽn da tẽedã ye. La a sẽn leok d pʋʋsgã to-to wã, yɩɩ sõma wʋsg n yɩɩd d sẽn da tẽedã.”
17-18. Wa Yɩɩn-sõamyã 86:6, 7 sẽn wilgdã, d tõe n basa d yam ne bõe?
17 Karm-y Yɩɩn-sõamyã 86:6, 7. Yɩɩn-gʋlsd a Davɩɩd ra kɩsa sɩd t’a Zeova kelgda a pʋʋsgo, la a leokdẽ. Yãmb me tõe n kɩsa sɩd woto. Kibay nins yell d sẽn gom sõs-kãngã pʋgẽ wã, wilgdame tɩ d tõe n kɩsa sɩda, t’a Zeova tõe n kõ-d-la yam la pãng sẽn sek d na tõog toog zu-loees sasa. A tõe n tũnuga ne d tẽed-n-taasã, wall neb sẽn nan pa tũud-a, tɩ b maan bũmb ning n sõng tõndo.
18 Baa sẽn pa wakat fãa la a Zeova leokd d pʋʋsg tɩ yɩ wa d sẽn tẽedã, d kɩsa sɩd t’a leokdame. A na n kõ-d-la bũmb nins sẽn yaa tɩlɛ ne-dã, la tɩ zems a wakat me. Rẽ wã, bɩ y ket n pʋʋsdẽ, n tall tẽebo, la y kɩs sɩd t’a Zeova na n gesa y yell rũndã-rũndã, la t’a na n ‘kõo bõn-vɩɩg buudã fãa a sẽn dat tɩ seke,’ dũni-paalgã sẽn watã pʋgẽ.—Yɩɩn. 145:16.
YƖƖLL 46 Zeova, tõnd pʋʋsda foo barka
a A Zeova yeelame tɩ d pʋʋsgã sã n zems ne a raabã, a na n leok-d lame. D sã n wa maood ne zu-loeese, d tõe n basa d yam t’a na n sõng-d lame tɩ d kell n maan sɩd ne-a. Bɩ d ges bũmb kẽer a Zeova sẽn maand n leokd d pʋʋsgã.
b Y sã n dat n bãng bũmb ning sẽn kɩt t’a Zeova bas t’a Sʋɩtãan so dũniyã, bɩ y ges sõsg ning gom-zug sẽn yaa: “D tẽegdẽ tɩ sẽn pak n yɩɩdã yaa a Zeova naamã yellã.” Bee yʋʋmd 2017 sigr kiuug Gũusg Gasgã pʋgẽ.
c D toeema yʋy kẽere.
d FOTÃ BILGRI: Pag ne a bi-pugl sẽn yi n bas b tẽng n kẽng tẽn-zẽnga, b tẽngã sẽn wɩng yĩnga. A tẽed-n-taasã sẽn deegd-b sãando, la b maand bũmb toor-toor n sõngd-ba.