Bõe la Biiblã yet d sẽn tõe n yãk d toorẽ yamã wɛɛngẽ? Wẽnnaam pʋlma yãmb vɩɩmã sẽn na n yɩ to-to wã bɩ?

Biiblã sẽn yete

Wẽnnaam pa pʋlem tõnd vɩɩmã sẽn na n yɩ a soab ye. A kõo tõnd sor tɩ d tõe n yãk d toorẽ yam, tɩ rẽ yaa zu-zẽkre. Ad Biiblã sẽn yete:

• Wẽnnaam naana ninsaalbã a meng wõnego. (Sɩngre 1:26) Tõnd pa wa rũmsã sẽn pa tagsde, la sẽn maand wa sẽn zems yam ning b sẽn dogd ne wã ye. Tõnd wõnda d Naandã, bala d tõe n talla zʋg-sõma wala nonglem la tɩrlem. Tõnd leb n tõe n yaka d toorẽ yam wa d Naandã.

• Tõnd vɩɩmã sẽn na n yɩ a soabã bee ne tõnd n yɩɩda. Biiblã sagenda tõnd tɩ d ‘yãk vɩɩmã . . . n sak [Wẽnnaam] koɛɛgã,’ rat n yeel tɩ d sak a noyã. (Tõodo 30:19, 20) Tõnd sã n da pa tõe n yãk d toorẽ yam, b sẽn yeel woto wã ra pa na n tall võor ye. Ra na n yɩɩ pʋ-toog menga. Wẽnnaam pa modgd tõnd tɩ d maan a raabã ye. A pʋd n yeta tõnd ned kam fãa yaa: “Fo sã n dag n sakẽ-la mam noyã, fo vɩ-bãanã rag n na n yɩɩ wa kʋɩlg koom!”—Ezayi 48:18.

• Tõnd sã n tõog n maana bũmb tɩ d pa tõog n maan me, pa Wẽnd pʋlemd ye. Y sã n tar tʋʋmd n dat tɩ yãk nenga, rẽnda y wɩsg y meng n tʋme. Biiblã yeelame: “Bũmb ning fo nug sẽn tõe n maan ne fo pãngã, bɩ f maan-a.” (Koɛɛg-soaba 9:10) A paasame: “Ned sã n mag n yaool n tʋme, a paamda yõodo.”—Yel-bũnã 21:5.

Wẽnnaam sẽn naan tõnd tɩ d tõe n yãk d toorẽ yamã yaa bõn-sõngo. Bala kɩtame tɩ d tõe n nong-a ne d “sũur fãa,” d sẽn dat rẽ yĩnga.—Matye 22:37.

Wẽnnaam pa kɩtd tɩ bũmb fãa yaa wa a sẽn datã sɩda?

Biiblã wilgame tɩ Wẽnnaam tõee fãa, la t’a pãngã ka koak ye. (Zoob 37:23; Ezayi 40:26) La a pa tar a pãngã n kɩtdẽ tɩ bũmb fãa yɩ wa a sẽn datã ye. Wala makre, Biiblã yeelame tɩ Wẽnnaam ra ‘yõkda a menga,’ n pa maand Babilon nebã sẽn da yaa a nin-buiidã bɛɛbã bũmb ye. (Ezayi 42:14) Woto me, a yãka yam n bas neb nins sẽn namsd b taabã ne pʋ-toogã, n pa maand-b bũmb nand ye. La Wẽnnaam pa na n bas tɩ yɩ woto wakat fãa yĩng ye.—Yɩɩn-sõamyã 37:10, 11.