D tog n pʋʋsa bõn-naands bɩ?

Biiblã sẽn yete

Ayo. D pa tog n pʋʋs bõn-naands ye. Sebr a ye (the New Catholic Encyclopedia) goma tõogã Wẽnnaam sẽn da kõ Israyɛll nebã yelle, n yeele: “Biiblã kibay toor-toor n wilgd vẽeneg tɩ sẽn tũud-b Wẽnnaam sɩd-sɩdã ra pa pʋʋsd bõn-naansd ye.” Ges-y Biiblã vɛrse-rãmb sẽn yete:

• ‘Ra maan bõn-naandg sẽn wẽnd bũmb sẽn be saasẽ, wall sẽn be tẽngã zugu, wall sẽn be koom pʋsẽ dũniyã tẽngr ye. Ra wõgemd bõn-kãens taoor n waoog-b ye. Bala, mam yaa a Zeova sẽn yaa yãmb Wẽnnaam. Mam yaa Wẽnnaam sẽn yaa sũ-kiir soaba.’ (Yikri 20:4, 5) Sẽn mik tɩ Wẽnnaam ratame tɩ b waoog yẽ a ye balã, tõnd sã n pʋʋsd imaaz-rãmba, bõn-naands la bũmb a taaba, pa noom-a ye.

• “M kõn dɩk m waoogrã n kõ wẽn-naands ye.” (Ezayi 42:8) D sã n tũnug ne imaaz-rãmb n pʋʋs Wẽnnaam, a pa reegd ye. Pĩnd wẽndẽ, Israyɛll nebã sẽn tũnug ne bõn-naandg sẽn wẽnd nag-bil n pʋʋs Wẽnnaamã, a yeelame tɩ b “maana wɩɩbdo.”—Yikri 32:7-9, Sebr Sõngo.

• “D ka tog n tags tɩ Wẽnnaam wẽnda sãnem, wala wanzuri, wala kugr sẽn peese wa sẽn zems ninsaalb minim la b tagsg ye.” (Tʋʋma 17:29) Neb nins sẽn pa tẽed Wẽnnaamã tũnugda ne bõn-naands b sẽn ‘pees wa sẽn zems ninsaalb minim la b tagsgo.’ La kiris-nebã “kẽnda ne tẽebo,” n “pa get bũmb nins nin sẽn ne wã n kẽnd ye.”—2 Korẽnt-rãmbã 5:7, MN.

• “Lak-y y mens ne wẽn-naandsã.” (1 Zã 5:21) Noy nins Wẽnnaam sẽn kõ Israyɛll nebã la kiris-nebã pʋgẽ, a twilga vẽeneg t’a kisa bõn-naands pʋʋsgo.