Bõe la Biiblã yet nagmã la nag-teedã wɛɛngẽ?

Biiblã sẽn yete

Yaa sɩd tɩ Biiblã pa gomd rẽ yell ball-ball ye. La a pa yet tɩ nagmã, nengã rẽesgã la nag-teedã ningr yaa wẽng ye. La Biiblã wilgdame tɩ yaa “nagem teed sẽn pa sãamde, sẽn yaa laafɩ la bʋgsem yamã” n tar yõod n yɩɩd nagmã.—1 Pɩyɛɛr 3:3, 4.

Nag-teedã ningr pa wẽng ye

• Pagb sẽn maan sɩd ne a Zeova tɩ Biiblã gom b yeel ra ningda nag-teedo. A Rebeka sẽn da yaa a Izaak pagã ninga sãnem tʋb-long a yõore, n paas sãnem zũy ne nag-teed a taab ligd sẽn yaa toogo, a sɩda ba a Abrahaam sẽn da kõ-a. (Sɩngre 24:22, 30, 53) A Ɛstɛɛr me sakame tɩ b ra “kõt-a ka-zɛɛdem toor-toor” t’a maneg a menga, a sẽn da tõe n wa lebg Pɛrs rĩmã pagã yĩnga. (Ɛstɛɛr 2:7, 9, 12) Wõnda “ka-zɛɛdem” bɩ bũmb a taab b sẽn tar n rẽesd nengã ra naaga bũmb nins a sẽn tall n maneg a mengã sʋka.

• Biiblã pʋgẽ, b maka nag-teed ne bõn-sõma. Wala makre, b rɩka ned sẽn kõt sagl-sõma n mak ne “sãnem tʋb-longo, . . . tʋbr ning sẽn kelgd-a wã yĩnga.” (Yel-bũnã 25:12) Wẽnnaam me maka a sẽn ges Israyɛll nin-buiidã yell to-to wã ne rao sẽn ning a pʋg-paal fan-teedo, n pid a nusã zũya, n pid a kokorã yãndo, la a ning a tʋbã tʋb-londo. B sẽn nags Israyɛll buudã woto wã kɩtame t’a “lebg neer wʋsgo.”—Ezekɩyɛll 16:11-13

Tags-kɛg nagmã la nag-teedã wɛɛngẽ

Tags-kɛgre: Na-pag a Zezabɛll sẽn da yaa nin-wẽngã sẽn “dẽes a ninã ne kɩrʋ” wã wilgdame tɩ nengã rẽesg yaa wẽnga.—2 Rĩm-dãmbã 9:30.

Sẽn yaa sɩdã: B sẽn ning a Zezabɛll taalã yaa a sẽn maan tɩt wʋsg la a kʋ nebã yĩnga, pa a nagmã yĩng ye.—2 Rĩm-dãmbã 9:7, 22, 36, 37.