Nefilim-dãmbã ra yaa ãnd dãmba?
Biiblã sẽn yete
Nefilim-dãmbã yaa malɛg-wẽnsã sẽn dog kamb nins ne pagb a Nowe wakatẽ wã. B ra yaa nin-wobd la nen-kɛglem dãmba.a
Biiblã yeelame tɩ “Wẽnnaam kom-dibli wã gesame tɩ ninsaalbã kom-pugli wã yaa neeba.” (Sɩngre 6:2) Sɩd-sɩda, ‘Wẽnnaam kom-dibli-kãens’ yaa malɛgs nins sẽn kɩɩs Wẽnnaam n “yi n bas b mens zĩigã” saasẽ, n tedg b mens n lebg ninsaalb n bao kom-pugli ninsaalbã kamb ‘sʋk n maan b pagbã.’—Zʋʋd 6; Sɩngre 6:2.
Kamb nins malɛgsã ne ninsaalbã kom-pugli wã sẽn dogã ra pa wa kamb a taabã ye. (Sɩngre 6:4) Nefilim-dãmbã ra yaa nin-wobd sẽn maand b taab pãnga, la nin-toos sẽn kɩt tɩ tẽngã pid ne nen-kɛglem. (Sɩngre 6:13) Biiblã yeelame tɩ b “dag n yaa kʋdem-wẽndẽ gãndaado,” la tɩ b ra yaa “neb yʋʋr sẽn yi.” (Sɩngre 6:4) Kaoosg zugẽ, neb n dɩk b togs-n-taar n lebg nen-kɛglem dãmba.—Sɩngre 6:5; Sõdbo 13:33.b
Tags-kɛg neb kẽer sẽn tar nefilim-dãmbã zugu
Tags-kɛgre: Nefilim-dãmbã ket n bee tẽngã zug rũndã-rũndã.
Biiblã sẽn yete: A Zeova kɩtame tɩ sa-kãseng ni dũniyã gill zug n sãam pĩnd dũni wã sẽn da pid ne nen-kɛglmã. Nefilim-dãmbã naaga nin-wẽnsã fãa n sãame. Yɩɩ a Nowe ne a zakã rãmb bal sẽn da tat a Zeova yamã n põs wakat kãnga.—Sɩngre 6:9; 7:12, 13, 23; 2 Pɩyɛɛr 2:5.
Tags-kɛgre: Nefilim-dãmbã ba-rãmbã yɩɩ ninsaalba.
Biiblã sẽn yete: B boonda b ba-rãmbã tɩ “Wẽnnaam kom-dibli.” (Sɩngre 6:2) Biiblã pʋgẽ, b boonda malɛgsã woto. (Zoob 1:6; 2:1; 38:7) Malɛgsã tõe n tedga b mens n lebg ninsaalba. (Sɩngre 19:1-5; Zozoe 5:13-15) Tʋm-tʋmd a Pɩyɛɛr goma “malɛgs nins sẽn be bãens roogẽ wã” yelle, n yeel tɩ b “yaa malɛgs nins sẽn lebg kɩɩsdb wakat ning Wẽnnaam sẽn wa n maand sũ-mar a Nowe wakatẽ wã.” (1 Pɩyɛɛr 3:19, 20, MN) Biibl-gʋlsd a Zʋʋd me goma rẽ yelle, n yeel tɩ malɛgs kẽer “ka pa zĩig ning sẽn zems ne bãmbã,” la tɩ ‘b yiime n bas b mens zĩigã.’—Zʋʋd 6.
Tags-kɛgre: Nefilim-dãmbã yaa malɛgs sẽn kɩɩs Wẽnnaam.
Biiblã sẽn yete: Vɛrse-rãmb nins sẽn deng Sɩngr 6:4 wilgdame tɩ nefilim-dãmbã ra pa malɛgs ye. B ra yaa malɛgs nins sẽn tedg b mens n lebg ninsaalbã sẽn kẽ ne pagbã n dog kamb ninsã. Malɛgsã sẽn sɩng n na n bao kom-pugli ninsaalbã kamb ‘sʋk n maan b pagbã,’ a Zeova yeelame tɩ yʋʋm 120 poore, yẽ na n maana bũmb n sãam wakat kãng nin-wẽnsã. (Sɩngre 6:1-3) Kibarã paasame tɩ “wakat kãnga,” malɛgs nins sẽn tedg b mens n lebg ninsaalbã ra ket n ‘dɩgsda ninsaalbã kom-pugli wã n maand b pagba,’ la tɩ b kẽe ne-b n dog “kʋdem-wẽndẽ gãndaadã,” rat n yeel tɩ nefilim-dãmbã.—Sɩngre 6:4.
a Tõe tɩ ebre wã gom-bil ning sẽn yaa “nefilim-dãmbã” rat n yeelame tɩ “lubdba.” Sebr a yembr (Wilson’s Old Testament Word Studies) yeelame tɩ gom-bilã bilgda “neb sẽn maand b taab pãng n fãad-ba, la b kɩtdẽ tɩ b lʋɩtẽ.”
b Yaa vẽeneg tɩ Israyɛll tẽn-gũusdb nins goam sẽn be Sõdb 13:33 wã yãa neb woglem sẽn kɩt tɩ b tẽeg nefilim-dãmbã kibaya, tɩ nefilim-dãmbã yaool n da ki yʋʋm kobs sẽn looge.—Sɩngre 7:21-23.