Sɛb lebgr biru-rãmb sẽn nafd neb milyõ-rãmba

D tẽed-n-taas nins sẽn lebgd d sɛbã sʋka, sẽn yɩɩd pʋɩ-sʋkã pa tʋmd filiyall-dãmbẽ ye. Yaa sɛb lebgr biru-rãmbẽ. Rẽ nafa yaa bõe? Sẽ na yɩl tɩ sẽn tʋmd-b sɛbã lebgr biru-rãmbẽ wã tõog n tʋm sõma, tʋʋm-te-bʋs n yaa tɩlɛ? Wãn to la biru wã sẽn be zĩig ningã tõe n sõng tʋʋmdã?

Sɛb lebgr biru kɩtdame tɩ sẽn lebgd-b sɛbã zĩnd zĩig nebã sẽn gomd buud-gomd ning b sẽn lebgd sɛbã ne wã. Ad a Karin sẽn lebgd sɛbã ba-alema buud-gomdã pʋgẽ wã sẽn yeele: “Tõnd sẽn yik n kẽng d sɛbã lebgr biru-rãmb sẽn be Kuatemok ne Siwawa Megsiko soolmẽ wã tɛka, wakat fãa, d gomda ba-alema wã ne d tʋmd-n-taasã, koe-moonegã zĩigẽ, la raasẽ. Tõnd tolg n bee neb sẽn gomd tõnd buud-gomdã sʋka. Tõnd wʋmda goam kẽer d sẽn kaoos n wʋme. Sẽn paase, d bãngda nebã sẽn gomd buud-gomdã to-to masã wã sõma.”

A Gɛms sẽn tʋmd biru ning sẽn lebgd sɛbã ne frafra wã sak n deegame t’a sẽn pa le tõe n paam a tʋmd-n-taas nins a sẽn da be ne filiyallẽ wã pa noom-a ye. La a paasame: “Mam sẽn tʋmd sɛbã lebgr biruẽ wã noom-m lame. M sẽn moond koɛɛgã buud-gomdã pʋgẽ n ne nebã manesem sẽn yaa to-to b sã n wʋm koɛɛgã, m sũur nooma hal wʋsgo.”

D saam-biisã maanda wãn n bãng b sẽn na n lugl sɛb lebgr biru zĩig ninga? A Zozɛf sẽn yaa sull ning sẽn get siglgã rot meeb yell dũniyã gill zug neda, n be Warwik, Niuyork, Etazĩni soolmẽ wã yeelame: “Zu-loɛɛg a yembr yaa tɩ kʋʋrã wã ne koomã yell yaa toogo. Yɩl n paam ẽntɛrnet sẽn na n yɩl n tõogd n deegd sɛbã d sẽn segd n lebgã b sẽn toond tõnd ne ẽntɛrnetã maasmã me pa nana ye. Woto yĩnga, d sã n na n lugl sɛb lebgr biru, d yãkda zĩis wʋsg b sẽn gomd buud-gomdã, n ges zĩig ning sẽn zemse.”

Naoor wʋsgo, yɩl n tõog n lugl sɛb lebgr biru nana-nana n pa yiis ligd wʋsgo, d yãkda Rĩungã roog ninga, pa rẽ bɩ tigis-kãseng roogo, wall misioneer-dãmb roogo, tɩ lɛbgdbã segd taab be. Zĩis a woto sã n kaẽ, b kõta saam-biisã sor tɩ b ra rot la biru-rãmb sẽn yalmẽ, tɩ lɛbgdbã tõe n tʋmd be la b gãe be. B sã n wa bas sɛbã lebgr be, b tõe n koosa rotã faag-faaga, n dɩk ligdã n kẽes raab sẽn beẽ.

Tʋʋm-teed sẽn sõngd tɩ tʋʋmdã kẽngd taoore

Yʋʋmd 2019 bõn-bɩʋʋng kiuugã n tãag yʋʋmd 2020 sa-sik kiuugã baasgo, yaa sẽn yɩɩd milyaar a yoob la pʋɩ-sʋk la d yiis n ges sɛbã lebgr biru-rãmbã yelle. Tʋm-tʋmdb nins sẽn be tõnd sɛbã lebgr biru-rãmbẽ wã rata ordinatɛɛr-dãmba, ẽnformatikã te-bõoneg toor-toore, teed b sẽn tõe n tall n dɩk goama, ẽntɛrnet la teed a taaba. Wala makre, ordinatɛɛr a ye fãa b sẽn maneg sõma tɩ b tõe n tall n tʋm yɩɩda tus pis-yopoe la a nu. Ordinatɛɛr-dãmbã tara program-dãmb b sẽn daade, la program b sẽn boond tɩ Watchtower Translation System. Yẽ soabã yaa program sẽn sõngd lɛbgdbã tɩ b sigind b tʋʋmã la b paamd sɛbã b sẽn lebgdã nana.

Lɛbgdbã paamda teed a taab me sẽn sõngd-b tɩ b rɩkd goamã b biru-rãmbẽ wã. KOVID-19 bã-loangdgã sɩngr tɛka, sõnga lɛbgdbã hal wʋsgo. Bala, lɛbgdb wʋsg tall-b lame n kuil n tɩ ket n dɩkd goamã la b manesd video-rãmbã.

Yamleoog tʋm-tʋmdb mi n wat n sõngdame n karemd sɛbã b sẽn lebgdã la b get biru-rãmbã yelle. A Kirstin sẽn tʋmd afirikãans buud-gomdã lebgr biru sẽn be Kep Tãwõn, Afirikdisiid soolmẽ wã yeelame: “Koe-moondb ne wakat fãa so-pakdb wʋsg paamda sor n wat n tʋmd kaanẽ.”

Yamleoog tʋm-tʋmdb kãensã sũur nooma b sẽn paam n wat n sõngdẽ wã. Saam-bi-poak a ye sẽn kẽnd n sõngd n tʋmd sɛb lebgr biruẽ yeelame tɩ beenẽ tʋʋm kengda raoodo. A Juana sẽn be Verakruz Megsiko soolmẽ wã n lebgd sɛbã ne totonak buud-gomdã yeelame: “Tõnd sẽn pẽ tẽns nins sẽn gomd d buud-gomdã masã wã, yaa nana ne saam-biis la saam-bi-pogs wʋsg tɩ b wat n sõngd ne sɛbã la video-rãmbã goamã d sẽn lebgdã rɩkre.”

La rẽ yĩnga, sɛbã lebgr biru-rãmb sõngame tɩ sɛbã lebgr maneg n lebg sõma n paas bɩ? Tõnd karemdb milyõ-rãmb leokdame tɩ n-ye. Ad a Sedrik sẽn be Repiblik Demokartik di Kõngo n lebgd sɛbã ne kõngo buud-gomdã sẽn yeele: “Pĩndã, saam-biis la saam-bi-pogs kẽer da boonda tõnd sẽn da gomd kõngo wã to-to d sɛbã pʋgẽ wã tɩ Wats Tawa kõngo wã. Bala ra pa wa nebã sẽn gomd kõngo wã to-to wã ye. La masã, b yeelame tɩ tõnd sẽn gomd kõngo wã to-to d sɛbã pʋsẽ wã zemsa ne nebã sẽn gomd-a to-to rũndã-rũndã wã.”

A Andile sẽn be Afirikdisiid n lebgd sɛbã ne soza buud-gomdã me wʋma goam a woto buudu. Ad sẽn yeele: “Neb wʋsg yetame tɩ bãmb gũus n gesame tɩ tõnd sẽn gomd buud-gomdã to-to d sɛbã pʋsẽ wã toeemame. Baa kamb nins sẽn da karemd Gũusg Gasgã ne ãngilindã karemd-a-la masã ne soza. Sẽn yɩɩd fãa, b nonga d sẽn gomd soza wã to-to Dũni-paalgã lebgrã d sẽn sẽn lebs n manegã pʋgẽ wã.”

Ligd ning fãa b sẽn yiisd sɛbã lebgr biru-rãmbã luglg yĩnga, n paas tʋm-tʋmbã la rotã yell gesgã yĩngã yita kũunã nebã sẽn kõt ne yamleoog ne donate.jw.org maasmã, la ne manesem a taab n teend tʋʋmdã d sẽn tʋmd dũniyã gill zugã pʋgẽ.