Sak 66

Zãn Kibsẽ wã

A ZEZI sẽn deeg lisg sẽn pẽneg yʋʋm a tãabã tɛka, a yʋʋrã yii wʋsgo. Neb wʋsg yãa a yel-soalmã, sẽn paase a tʋʋma kɩbar saaga tẽngã fãa. Dẽ neba sẽn da tigim taab Zãn Kibsẽ wã Zerizalɛmã, b ra gẽesd-a-la be. B ra sokda woto: “Bãmb bee yɛ?”

Neb wʋsg ra wẽeda no-koeemd a Zezi poorẽ. Neb kẽer da yeta woto: “Bãmb yaa nin-sõngo.” Tɩ neb a taab ra yetẽ: “Ayo, bãmb belgda neba.” Neb wʋsg ra tara vũn-vũn woto kibsã sɩngrẽ. Baasg zãnga, ned ba a yembr da ka tar daood n na n gom n sõng a Zezi zãma wã sʋk ye, bala b ra zoeta b na n wa paam yell ne Zʋɩf rãmbã taoor dãmba.

Yaa kibsã sẽn wa n ta a pʋɩ-sʋkã la a Zezi wa-yã. A kẽnga wẽnd-doogẽ wã, la a sẽn zãmsd nebã ne tõog kãseng ningã, yɛɛs-b lame. Sẽn mik t’a zɩ n karem Zʋɩf rãmbã karen-saam dãmb lekoll dãmbẽ wã, Zʋɩf rãmbã ra sokda b mens yaa: “Dao kãng yɩɩ wãn n bãng sɛb tɩ b yaool n [ka karem lekoll dãmbẽ wã]?”

A Zezi wilgame: “Mam karengã ka mam dẽnd ye, yaa sẽn tʋm-a maama rẽnda. Ned sã n dat n maan bãmb daabo, yẽ na bãng mam kareng sã n yaa Wẽnnaam dẽnda, [bɩ m sẽn gomdã sã n yita mam meng nengẽ].” A Zezi zãmsgã zemsa sõma ne Wẽnnaam tõogã. Dẽ ra segd n yaa vẽeneg tɩ yaa Wẽnnaam ziir la a baooda, la ka a meng ziir ye. A Zezi sokame: ‘A Moiiz ka kõ yãmb tõog sɩda?’ La a zab-b n yeele: “Yãmb ned ba a ye ka sakd tõoga ye.”

Rẽ poore, a Zezi sok-b lame: “Yaa bõe tɩ yãmb baood maam n na n kʋ?”

Sãnda sẽn be kʋʋngã sʋkã ra ka mi tɩ b rat n kʋ-a lame ye. Tõe tɩ ra yaa sãamb sẽn wa kibsẽ wã. B ra pʋd n ka tagsd tɩ ned na rat n kʋ karen-saam sõng woto ye. Rẽ n kɩt tɩ b ra tẽed t’a Zezi zʋbsdame, n yeele: “Zĩn n tar yãmba. Ãnda n baood yãmb n na n kʋ?”

Baa kʋʋngã ka mi rẽ tiiri, Zʋɩf rãmbã taoor dãmb rat n kʋʋ a Zezi. Yʋʋmd la pʋɩ-sʋk la woto, a Zezi sãooga rao vʋʋsg daar tɩ tũudmã taoor dãmb ra baood-a n na n kʋ. Dẽ, masã a wilgame tɩ b manesmã yaa yalemdo, n sok-ba: “Ned sã n kẽ bãong vʋʋsg raare t’a Moiiz tõog ka sãame, dẽ, yaa bõe tɩ yãmb sũyã puug ne maam mam sẽn maag rao wã zãng vʋʋsg daarã yĩnga? Bɩ y ra bʋ nin sẽn ne bal bʋʋd ye, bɩ y bʋ ne sɩda.”

Zerizalɛm neba sẽn mi tɩ b ra baood-a lame n na n kʋ wã yeelame masã: “Ka rao kãnga la b sẽn baood n na n kʋ wã bɩ? Ad a sẽn gomd yɩng tɩ neb fãa wʋmdẽ, la ned ba a ye ka yet tɩ bũmbu ye. Sãnd tẽngã kãsem-dãmb ka yik n tẽed masã tɩ yẽ sɩd yaa Krista?” (Sebr Sõngo) Zerizalɛm nin-kãensã togsa b sẽn da ka tẽed t’a Zezi yaa Kiristã võore, n yeele: “Tõnd mii rao kãng sẽn yi zĩig ninga. La Kirist sã n na n wa, ned ka be sẽn na n bãng bãmb sẽn yi zĩig ninga ye.”

A Zezi leok-b lame: “Yãmb mii maam, la yãmb mii mam sẽn yi zĩig ninga. Mam ka wa m toor ye. La sẽn tʋm-a maama yaa sɩda soaba. La yãmb ka mi bãmb ye. Mam mii bãmba, tɩ bõe, mam yii bãmb nengẽ, la bãmb n tʋm maam.” Dẽ, b baoome n na n yõk-a, tõe tɩ yaa sẽn na yɩl n kẽes-a bãens roog bɩ n kɩt tɩ b kʋ-a. La b ka tõog n yõk a Zezi, a kũuma wakat sẽn ka ta wã yĩnga.

Ne rẽ fãa, neb wʋsg n tẽ a Zezi, wa sẽn segdã. Ges-y koe, a kẽna koom zugu, a kɩtame tɩ sebd yõke, a kɩtame tɩ mogr koom sebg sẽn gudg gãande, a rɩlga neb tusa ne bur la zĩm a wãn ne yel-solemde, a sãooga bãad dãmba, a kɩtame tɩ wobs kẽne, a pugsa zoens nini, a sãooga wãooba, la a tol n vʋʋg kũum menga. Rẽ n so tɩ neba soke: “Kirist sã n wa, b na n maana bõn-bãn n yɩɩd dao-kãngã sẽn maanda bɩ?”

Fariziẽ rãmbã sẽn wʋm tɩ kʋʋngã tara yel-kãensã goam vũn-vũnã, bãmb ne maan-kʋʋdbã kãsem dãmb tʋma sodaas tɩ b tɩ yõk a Zezi. Zã 7:11-32.

▪ Wakat bʋg la a Zezi ta kibsẽ wã, la bõe la neba ra yet a Zezi wɛɛngẽ?

▪ Tõeeme tɩ yaa bõe n kɩt tɩ neb kẽer da yetẽ tɩ zĩn n tar a Zezi?

▪ Zerizalɛm neba ra tagsda bõe ne a Zezi?

▪ Bõe yĩng tɩ neb wʋsg tẽ a Zezi?