A Zeezi bee zãn kibsẽ wã Zeruzalɛm

A Zeezi lisgã tɛka, neb wʋsg mi-a-la sõma. Zʋɩf-rãmb ka tɛk n yã a yel-soalmã, hal t’a kibarã ta zĩig fãa. Neb wʋsg sẽn wa zãn kibsã Zeruzalɛmmã baood n na n yã-a lame.

Nebã tagsg ra yaa toor-toore, bala kẽer da yetame t’a “yaa nin-sõngo,” tɩ sãnda yetẽ t’a “kẽesda nebã moogo.” (Zã 7:12) Yaa kibsã sɩngrẽ bal la nin-buiidã ra tar vũn-vũn woto. La ned baa a ye pa saag n gom n sõng a Zeezi ye. Bala nebã fãa ra zoeta zʋɩf-rãmbã tũudmã taoor dãmba.

Kibsã sasa, a Zeezi kẽnga wẽnd-doogẽ wã. A sẽn tar minim to-to n zãmsd nebã linga wʋsg sẽn da be beenẽ. A yaool n ka paam zãmsg rabẽ rãmbã lekollẽ ye. Rẽ kɩtame tɩ zʋɩf-rãmbã ra sokd b mens yaa: “Yẽnda yɩɩ wãn n mi Wẽnnaam gʋls-sõamy wã n yaool n ka paam zãmsgo?”—Zã 7:15.

A Zeezi leoka bãmb yaa: “Zãmsg ning mam sẽn zãms nebã ka yit mam nengẽ ye, a yita sẽn tʋm-a maamã nengẽ. Ned ning fãa sẽn dat n tũ Wẽnnaam daabã na bãng zãms-kãng sã n yita bãmb nengẽ, wall mam goamã sã n yita mam meng nengẽ.” (Zã 7:16, 17) A Zeezi zãmsgã ka kɩɩsd Wẽnnaam tõogã ye. Dẽnd nebã ra segd n yãa vẽeneg tɩ yaa Wẽnnaam waoogr la a ra baooda, pa yẽ meng waoogr ye.

A Zeezi leb n yeela nebã yaa: “A Moyiis ka kõ yãmb tõogã sɩda? La yãmb ned baa a yembr ka maand tõogã sẽn yetã ye. Yaa bõe tɩ yãmb baood n na n kʋ maam?” Neb n da be kʋʋngã sʋk n pa wʋmd a gomdã võor ye. Tog n yaa sãamb sẽn yi tẽns a taab n wa. Ne bãmb tagsgo, ned pa na n saag n kʋ karen-saamb sẽn tar minim woto ye. Rẽ n so tɩ b tẽed t’a Zeezi zʋbsdame. B yeelame: “Zĩn n tar yãmba, ãnda n baood n na n kʋ yãmba?”—Zã 7:19, 20.

Sẽn kolg yʋʋm a yiib woto, zʋɩf-rãmbã taoor dãmb baoome n na n kʋ a Zeezi, bala a sãooga rao vʋʋsg raare. A Zeezi togs-b-la gomd sẽn kɩt tɩ b bãng vẽeneg tɩ b sẽn tik bũmb ning n dat n kʋ-a wã yaa yalemdo. A tẽeg-b lame tɩ tõogã pʋgẽ, b yeelame tɩ b tog n kẽesa biig bãong a rasem a nii daare, baa baraar yaa vʋʋsg daare. A sok-b lame: “Yãmb sã n tõe n kẽes ned bãong vʋʋsg daare, n ka kɩɩs a Moyiis tõogã, bõe tɩ yãmb sũyã yĩigd ne maam, mam sẽn kõ yĩn-tõr laafɩ vʋʋsg daarã yĩnga. Da bʋ-y bʋʋdã tɩ zems ne nin sẽn yãtã ye, bʋ-y bʋ-tɩrga.”—Zã 7:23, 24.

Zeruzalɛm neb kẽer sẽn da mi tɩ b baooda a Zeezi n na n kʋ wã sokame yaa: “Ka rao-kãngã la b sẽn baood n na n kʋ wã wɛ? Ad a sẽn yɛs nebã sʋk n gomd tɩ b ka yet-a tɩ bũmbu!” B ra sokdame yaa: “Rẽ yĩnga, kãsem-dãmbã sɩd reegame tɩ yaa bãmb la Kirisã la?” Bõe n kɩt tɩ nebã pa tẽ t’a Zeezi n yaa Kirisã? B ra yeta woto: “Tõnd yaool n mii rao-kãngã sẽn yitẽ. La Kiris sã n wa, ned baa a yembr ka na n bãng b sẽn yitẽ ye.”—Zã 7:25-27.

Dẽ, a Zeezi zẽka a koɛɛg wẽnd-doogẽ wã n yeele: “Yãmb mii maam, la y mii mam sẽn yitẽ. Baoosgo, mam ka wa m toor ye. La sẽn tʋm-a maamã yaa sɩd soaba, la yãmb ka mi-b ye. Mam mii bãmba, bala, yaa bãmb yʋʋr yĩng la mam sẽn be ka wã, la yaa bãmb n tʋm maam.” (Zã 7:28, 29) A Zeezi sẽn togs woto wã, b baoome n na n yõk-a. Tõe tɩ b ra rat n kẽes-a-la bãens-roogo, wall b kʋ-a. La b pa tõoge, bala a kũumã wakat ra nan ka ta ye.

Neb wʋsg yaool n tẽe a Zeezi, la b bee bʋʋm. Bala a kẽna koom zugu, a kɩtame tɩ sobg yõke, a maana yel-solemd tɩ bur a wãn la zĩm bilf lebg wʋsg tɩ neb tusa rɩ, a sãooga bãad-dãmba, a kɩtame tɩ wobs kẽne, n puk zoens nini, n sãoog wãooba, la a vʋʋg kũum menga. Rẽ n so tɩ nebã sok woto: “Dẽ yĩnga, Kiris sã n wa, b na n maana bõn-bãn n yɩɩd dao kãngã sẽn maandã sɩda?”—Zã 7:31.

Fariizẽ-rãmbã sẽn wʋm neb kʋʋngã sẽn yet woto wã, bãmb ne maan-kʋʋdbã kãsem-dãmb tʋma neb tɩ b na n tɩ yõk a Zeezi.