A Zeezi sagla neb a sẽn wa n debd Zeruzalɛm

A Zeezi moona koɛɛgã Galɩle n yɩɩd Zʋʋde, bala nebã ra kelgd-a-la sõma Galɩle. A pʋd n kaoosa be. A sẽn da wa n kẽng Zeruzalɛmmã, a sãooga rao vʋʋsg daare, tɩ zʋɩf-rãmbã yik n baood-a n yɩɩd pĩndã, n dat n kʋ.—Zã 5:18; 7:1.

Yaa yʋʋmd 32 pʋgẽ. A Zeezi zĩnda Galɩle n tãag bõn-bɩʋʋng bɩ zĩ-likr kiuugã. Zãn kibsã sẽn kaoosd rasem a yopoe wã ra kolgame masã. Kibsã sã n sa, vẽkembeoogã b maanda tigis-kãsenga. Yaa koodã tigsg poor la b maand zãn kibsã, n na n kɩdem sũ-noog la b pʋʋs Wẽnnaam barka.

A Zak ne a Sɩmo la a Zozɛf ne a Zuud sẽn yaa a Zeezi ma-biisã yeel-a lame yaa: “Yi ka n kẽng Zʋʋde.” Zeruzalɛm la tũudmã yɛl wʋsg ra maanda. Nebã ra kẽnda be naoor a tãab yʋʋmd fãa n waoogd Wẽnnaam, tɩ tẽngã pit ne neba. Rẽ n so t’a Zeezi ma-biisã yeel-a yaa: “Ned sã n dat tɩ nebã yãnd-a, a ka soosd n tʋmd a tʋʋmã ye. Fo sẽn maand bõn-kãensã, maan tɩ dũni neb bãng-fo.”—Zã 7:3, 4.

A Zeezi ma-biis a naasã ra “ka tẽed” tɩ yẽ la Mesi wã ye. La b ra ratame t’a Zeezi maan yel-soalem tɩ neb nins sẽn na n wa kibsã yã. A Zeezi sẽn mi tɩ rẽ tõe n waa ne yellã, a yeel-b lame yaa: “Dũni wã ka tõe n kisg yãmb ye. B kisa maam, bala, mam kɩta kaset tɩ b tʋʋmã yaa wẽnse. Kẽng-y tigrã. Mam nan ka na n kẽng tig-kãngã ye, bala, mam wakatã nan ka pid ye.”—Zã 7:5-8.

A Zeezi ma-biisã sɩd tũu nebã n looge. Rasem a wãn poore, a Zeezi ne a karen-biisã me kẽngame, la b pa maan tɩ nebã bãng ye. B pa tũ sor ning sẽn yɛgd Zʋrdẽ kʋɩlgã, nebã sẽn nong n tũudẽ wã ye. B tũu sor sẽn pasgd Samaari soolmã. So-kãng yaa tɩrg n yɩɩda. A Zeezi ra ratame tɩ yẽ ne a karen-biisã gãand Samaari tẽng a ye pʋgẽ. Rẽ n so t’a kɩt tɩ neb reng taoor n na n tɩ maneg zĩiga. La tẽngã nebã sẽn bãng t’a Zeezi rabda Zeruzalɛm n na n tɩ maan zʋɩf-rãmbã kibsã, b zãgsame tɩ b ka na n deeg-b ye. A Zak ne a Zã sũy yikame, tɩ b sok a Zeezi yaa: “Zu-soaba, yãmb datame tɩ d kɩt tɩ bugum yi yĩngr n sig n dɩ-b bɩ?” (Luk 9:54) A Zeezi zab-b-la b sẽn yeel woto wã. La b fãa kell n dɩka sor n looge.

Sorã zugu, tõog karen-saamb a ye n wa n yeel a Zeezi yaa: “Mam na n tũuda yãmb n kẽnd zĩig ning fãa yãmb sẽn na n kẽnge.” La a Zeezi yeel-a lame: “Waas tara bogdo, tɩ liuuli sẽn yɩgd yĩngrã tar tʋgdo, la Ninsaal Bi-riblã ka tar zĩig n na n gãneg a zug ye.” (Matye 8:19, 20) A ratame tɩ tõog karen-saambã bãng t’a sã n lebg yẽ karen-biiga, a na n yãa namsg a vɩɩmã pʋgẽ. La wõnda raoã yaa wuk-m-meng soaba, n pa tõe n sak rẽndã ye. Tõnd ned kam fãa tog n soka a meng woto: ‘M na n sak n tũu a Zeezi baa sẽn yaa a soab bɩ?’

A Zeezi yeela rao a to woto: “Tũ maam.” La a leokame: “Bas-y-m nand tɩ m tɩ mum m ba la m wa.” A Zeezi sẽn mi raoã vɩɩmã fãa wã, a yeel-a lame yaa: “Bas kũumã tɩ b mum b kũum, la foom, kẽng n moon Wẽnnaam soolem koɛɛgã.” (Luk 9:59, 60) Yaa vẽeneg tɩ raoã ba ra nan pa ki ye. Sã n pa rẽ, a ra pa na n yas be n gomd ne a Zeezi ye. Dẽnd yaa a sẽn da pa segl a meng n na n lʋɩɩs Wẽnnaam Rĩungã taoore.

B sẽn da ket sorẽ, rao a to n wa n yeel a Zeezi yaa: “Zu-soaba mam na n tũu yãmba, la, sak-y tɩ m deng n tɩ pʋʋs m zakã rãmb wẽnd-na-taas la m wa.” A Zeezi leoka yẽnda yaa: “Ned sã n gãd wãk rũng sẽn tata, la a rat n wẽnemd n ges a poorẽ, yẽnda ka zems ne Wẽnnaam soolmã ye.”—Luk 9:61, 62.

Neb nins sẽn dat n yɩ a Zeezi karen-biis hakɩɩkã segd n lʋɩɩsa Rĩungã yɛl taoor b vɩɩmã pʋgẽ. Ka-koaad sã n kood ne niig n yaool n pa get a taoore, rulsã na n yɩɩ goalma. A sã n tolg n wẽnemd n get a poorẽ, tʋʋmdã pa na n baas ye. Woto me, kiris-ned sã n bas tɩ yaa dũniyã yɛl n pak-a, yaa wa a sẽn wẽnemd n get poorẽ. Rẽ tõe n kɩtame t’a bʋdg n bas vɩɩm sẽn kõn sa wã sore.