Sak 65
A Zezi solg n kẽnga Zerizalɛm
RA YAA yʋʋmd 32 bõn-bɩʋʋng bɩ zĩ-likr kiuugu, tɩ Zãn Kibsã ra kolge. Yʋʋmd 31 Pakã Zʋɩf rãmbã sẽn da mak n na n kʋ a Zezi wã tɛka, a maana a tʋʋmdã Galile soolmẽ wã n tɩ yɩɩda. Wõnda rẽ tɛka, a Zezi pa le wa Zerizalɛm n zʋʋg Zʋɩf rãmbã yʋʋmd fãa kibs rãmb a tãabẽ wã ye.
Masã, a Zezi ma-biisã sagl-a-la woto: “Bɩ y yi ka n kẽng Zide.” Zerizalɛm n yaa Zide galʋ-tẽn-kãsenga, la yaa be la tẽngã gill tũudum nifu. A ma-biisã ra yeta woto: “Ned sã n dat tɩ neb bãng-a a ka na n soos n maan bũmb ye.”
A Zak, a Sɩmo, a Zozɛf, la a Zida ra nan ka tẽed tɩ b kẽem a Zezi yaa Mesi wã ye. Baa ne rẽ, b ra ratame t’a tɩ wilg neb nins fãa sẽn na n tigim kibsẽ wã t’a tõe n maana yel-soalma. La a Zezi ra miime tɩ woto yaa yelle. A yeel-b lame: “Dũniyã ka tõe n kisg yãmb ye, la a kisgda maam, mam sẽn kɩt kaset t’a tʋʋma yaa wẽnsa yĩnga.” Rẽ n so t’a Zezi yeel a ma-biisã: “Bɩ y kẽng kibsã. Mam yẽ [nan] ka na n kẽng kibs kãng ye.”
Yaa rasem a yopoe la b maand Zãn Kibsã. Rasem a nii raarã b baasda kibsã ne tũudum yel-kãsemse. Kibs-kãng wilgdame tɩ kooda tigisg saame, tɩ yaa kɩdeng la bark pʋʋsg wakate. A Zezi ma-biisã reng n looga ne so-togdb a taabã. Rasem a wãn poore, a Zezi ne a karen-biisã solgame n kẽng Zerizalɛm. B ka rɩk sor ning neba wʋsg sẽn tũudã, sẽn yɛgd Zʋrdẽ Kʋɩlgã ye. B rɩka sor ning sẽn yit Samari wã.
A Zezi ne a tũud-n-taasã ra segd n gãanda Samari tẽn-bil a yembrẽ. Rẽ n so t’a Zezi tʋm neb tɩ b reng taoor n maan segls rẽ yĩnga. La tẽn-kãng nebã sẽn bãng t’a Zezi rebda Zerizalɛmã, b zãgsame tɩ b kõn deeg-a ye. A Zak ne a Zã sũy yikame tɩ b sok woto: “Zusoaba, d kɩt tɩ bugum yi yĩngri n dɩ bãmb bɩ?” A Zezi zab-b-la b sẽn yeel woto wã. Rẽ poore, b kẽnga tẽn-bil a to.
B sẽn da wa n kẽnd sorã zugu, gʋlsd a yembr n yeel a Zezi: “Karen-saamba, mam na n tũu yãmb n kẽng y sẽn na n kẽng zĩig ninga fãa.”
T’a Zezi leoke: “Waas tara bogdo, la liuuli tara tʋgdo, la Ninsaal Biiga ka tar zĩig n na n gãneg b zug ye.” A Zezi ra wilgda gʋlsdã t’a sã n lebg a karen-biiga a na n yãa toogo. La wõnda gʋlsdã yaa tɩta-ned tɩ looge, ne a na sak vɩɩm a woto buudu.
A Zezi yeela rao a to woto: “Tũ maam.”
Tɩ rao wã leoke: “Bɩ y bas maam tɩ m deng n kẽng n tɩ mum m ba.”
Dẽ la a Zezi leok-a yaa: “Bas kũuma tɩ b mum b kũum, la bɩ f kẽng n moon Wẽnnaam [Rĩungã] koɛɛga.” Yaa vẽeneg tɩ rao wã ba nan pa ki ye, ka rẽ a ra ka na n beẽ be n kelgd a Zezi ye. Yaa wala a ra kotame t’a Zezi bas t’a tɩ gũ hal t’a ba wã ki t’a yaool n wa. A rag n ka segl n sa n na n lʋɩɩs Wẽnnaam Rĩungã taoor a vɩɩmã pʋgẽ ye.
B sẽn da wa n ket n kẽnd sorã zug n debd Zerizalɛmã, rao a to n yeel a Zezi: “Zusoaba mam na n tũu yãmba, la bɩ y bas maam tɩ m deng n kẽng n tɩ pʋʋs m yir dãmba Wẽnd-na-taase la m wa.”
T’a Zezi leok-a: “Ned sã n zãad wãk n kood la a rat n wẽnemd n ges a poorẽ, a ka zems tɩ kẽ Wẽnnaam [Rĩungẽ] ye.” Neb nins sẽn dat n yɩ a Zezi karen-biisã tog n tika b yamã Rĩungã tʋʋmd zugu. Ned sã n kood ne wãk n pa get a taoore, a rulgã na n yɩɩ goalenga. Woto me ned ning fãa sẽn get poorẽ zãmaan kʋdg kãngã pʋgẽ, a tõeeme n lak n yi sor ning sẽn tar n debd vɩɩm sẽn-kõn-saẽ wã zugu. Zã 7:2-10; Luk 9:51-62; Matɩe 8:19-22.
▪ Ãnda rãmb la a Zezi ma-biisã, la bõe la b tagsd a Zezi wɛɛngẽ?
▪ Bõe yĩng tɩ Samari neba ka sak n deeg a Zezi sãando, la bõe la a Zak ne a Zã ra rat n maane?
▪ Sõss a tãab bʋs la a Zezi tall sorã zugu, la wãn to la a wilg vẽeneg tɩ d segdame n tʋm ne modgr la mong-m-meng yam?