Sak 70

A Zezi sãooga rao sẽn dog ne zondo

ZƲƖF rãmbã sẽn da wa n bao n na n lob a Zezi ne kugã, a ka yi Zerizalɛm ye. Rẽ poore, a Zezi ne a karen-biisã wa n kẽnda tẽngã pʋgẽ vʋʋsg daar n yã rao sẽn dog ne zondo. Tɩ karen-biisã sok a Zezi yaa: “Karen-saamba, ãnda n maan yel-wẽna, dao-kãng bɩ, bɩ a ba ne a ma n maan yel-wẽna tɩ yẽ rog ne zõndo?”

Tõe tɩ karen-biisã ra tẽeda wala Zʋɩf rãmbã karen-saam dãmb kẽer tɩ ned tõe n maana yel-wẽnd t’a nan ket n bee a ma pʋgẽ. La a Zezi leokame: “A ka tɩ dao kãngã walla a ba ne a ma n maan yel-wẽna ye, la yaa tɩ Wẽnnaam tʋʋma na puk yẽ [nengẽ].” Ka yel-wẽnd takɩ rao wã meng bɩ a roagdb sẽn maan n kɩt t’a yaa zoang ye. Yaa pipi rao a Ãdem yel-wẽndã n kɩt tɩ ninsaalbã fãa ka zems zãnga, tɩ rẽ kɩt tɩ b tõe n dog ne zams wala zondo. Rao wã zang na n kõo a Zezi sor t’a kɩt tɩ Wẽnnaam tʋʋma puki.

A Zezi wilga vẽeneg tɩ b segd n maana tʋʋm kãens ne yãgbo. A yeelame: “Yaa tɩlae tɩ mam maan sẽn tʋm-a maama tʋʋm tɩ wĩntoog ketẽ. Yʋng watame tɩ ned ka tõe n tʋm ye. Mam sẽn be dũniyã pʋgẽ, mam yaa dũniyã vẽenem.” Ra pa na n kaoos la a Zezi kũuma kɩt t’a zĩnd lik pʋgẽ yaoogẽ wã ye. Beenẽ, a ra ka na n tõog n maan baa fɩ ye. La nananda, a kõta dũniyã vẽenem.

A Zezi sẽn yeel bõn-kãensã poore, a tʋbsa kolkood tẽng n bui tãndo, n dɩk n bɛ rao wã nini, n yeele: “Kẽng n tɩ widg f neng Siloe bãkã pʋgẽ.” Rao wã sakame. La a sẽn sɩd maan woto, a paama a nini! Ad yaa sũ-noog menga! Rao wã sẽn dog tɛka yaa pipi a sẽn ne.

Woto linga yagsã la neb a taabã sẽn da mi-a wã. “Ka ned ninga sẽn da zĩ n bõosdẽ wã la woto wɛ?” woto la b sok-yã. Tɩ neb kẽer leok tɩ “yaa yẽnda.” La neb a taab ra ka tẽed ye, n yetẽ: ‘Ka yẽ ye, ya a wẽnego.’ La rao wã yeelame: “Yaa maam.”

Dẽ neba sokame: “Fo nina maana wãn n puki?”

Tɩ rao wã yeele: “Dao ninga b sẽn boond t’a Zezi wã n bui tãnd n bɛ mam nini n yeel maam tɩ m kẽng n tɩ widg m neng Siloe bãka pʋgẽ. La mam kẽngame n tɩ widg m nenga n paam m nini.”

Tɩ neba leb n soke: “Dao kãng bee yɛ?”

Tɩ rao wã leoke: “Mam ka mi a sẽn beẽ ye.”

Neba talla rao wã sẽn da yaa zoangã n kẽng Fariziẽ rãmbã sẽn yaa b tũudum taoor dãmbã nengẽ. Bãmb me sɩng-a-la sogsg n dat n bãng a sẽn paam a nina to-to. Tɩ rao wã yeele: “Bãmb bɛɛ mam nina ne tãndo, la mam widga m nenga, la masã mam neeme.”

Sɩd-sɩda, Fariziẽ rãmbã ra segd n maana sũ-noog ne bõaasã sẽn sãoogã! La b ka maan woto ye, b ninga a Zezi taale, n yeele: “Dao kãngã ka Wẽnnaam ned ye.” Bõe yĩng tɩ b ra yet woto? “Tɩ bõe, bãmb ka nand vʋʋsg raara ye.” La Fariziẽ rãmb a taab ra baas n sokda b mens yaa: “Dao sẽn yaa yel-wẽn soab na n yɩɩ wãn n maan bõn-bãn woto?” Dẽ welgr n zĩnd bãmb ne taab sʋka.

Rẽ n so tɩ b sok rao wã: “Fo na n yeelame tɩ bõe ne bãmba, b sẽn puk fo ninã?”

T’a leoke: “Bãmb yaa Wẽnnaam no-rɛɛsa.”

Fariziẽ rãmbã zãgsame tɩ b kõn tẽ ye. B ra tara hakɩk tɩ yẽ ne a Zezi solg n zemsa taab n na n belg nebã. Dẽ, sẽn na yɩl n welg yellã, b boola bõaasã roagdb n na n sogs n bãnge. Zã 8:59; 9:1-18.

▪ Bõe n wa ne rao wã zondo, la bõe n ka wa ne-a?

▪ Yʋng ning neb sẽn ka le tõe n tʋma makda bõe?

▪ Rao wã sẽn sãoogã, a mitinsã manesem yɩɩ wãn-wãna?

▪ Rao wã sãoogr waa ne welg-bʋg Fariziẽ rãmbã sʋka?