Fariizẽ-rãmbã namsa rao ning nin sẽn pukã

Fariizẽ-rãmbã pa sak n deeg t’a Zeezi puka rao ning sẽn dog ne zondã nin ye. Rẽ n so tɩ b bool raoã roagdbã n na n soke. A roagdbã yaool n miime tɩ Fariizẽ-rãmbã tõe n yiis-b-la karen-doogẽ wã, tɩ b pa le tar sor n wat be ye. (Zã 9:22) B sã n dig-b n yiis tɩ b pa tõe n le naag zʋɩf-rãmb a taabã n maan baa fʋɩ, b zakã rãmb vɩɩm na n lebga toogo.

Fariizẽ-rãmbã soka raoã roagdb woto: “Yaa yãmb bi-ribl la woto, yãmb yet t’a roga ne zondã bɩ? Maana a wãn t’a yãtẽ moasã?” A ba-rãmba leokame yaa: “Tõnd miime t’a yaa tõnd bi-ribla, la t’a roga ne zondo. La sẽn yɩ to-to t’a yãt moasa wã, tõnd ka mi ye. Tõnd ka mi ned ning sẽn puk-a a nina me ye.” Baa biigã sã n da togsa a roagdbã sẽn yɩ to-to t’a neẽ masã, b ra gũusda ne b goamã. B pʋd n yeelame yaa: “Sok-y-yã-a t’a yʋʋmã seka a sẽn na gom a mengã yelle.”—Zã 9:19-21.

Fariizẽ-rãmbã leb n boola sẽn dag n yaa-a zoangã n soke, la b sẽn dat n yɛɛs-a wã, b yeel-a lame tɩ bãmb tara kaset t’a Zeezi tara taale. B paasame: “Togs sɩd Wẽnnaam waoogr yĩnga. Tõnd yẽ miime tɩ rao-kãnga yaa yel-wẽn-maanda.” La raoã leokame yaa: “A sã n yaa yel-wẽn-maanda, mam ka mi ye. Bũmb a yembr la mam mi: Yaa tɩ mam dag n yaa zoanga, la tɩ moasã mam neeme.”—Zã 9:24, 25.

Fariizẽ-rãmbã ra pa rat n bas yellã tɩ sa ye. B le soka raoã yaa: “A maana foom bõe? A puka fo ninã wãn-wãna?” Raoã talla raoodo, n leok-b woto: “Mam zoe n togsa yãmba, la yãmb ka kelg maam ye. Bõe tɩ yãmb dat tɩ mam leb n togs yãmb yɛs tɩ y kelge? Yãmb me dat n lebga bãmb karen-biis la?” Fariizẽ-rãmbã sũy puugame, tɩ b yeel raoã yaa: “Foom la bãmb karen-biiga. Tõnd yẽ yaa a Moyiis karen-biisi. Tõnd miime tɩ Wẽnnaam goma ne a Moyiisi, la yõwã soabã, tõnd ka mi a sẽn yitẽ ye.”—Zã 9:26-29.

Fariizẽ-rãmbã sẽn yeel woto wã linga raoã, t’a yeel-b yaa: “Ad bõn-kãng sɩd yaa lingr ne maam tɩ yãmb ka mi a sẽn yitẽ ye. Tɩ b yaool n puka mam nini.” Rẽ poore, a togsa gomd b sẽn pa tõe n kɩɩse. A gomdã wilgda sẽn yaa ned ning pʋʋsg la Wẽnnaam reegda. A yeelame: “Tõnd miime tɩ Wẽnnaam ka leokd yel-wẽn-maandb pʋʋsg ye. La ned sã n waoogd Wẽnnaam la a tũud bãmb daabã, Wẽnnaam leokda a soaba. Ned nan ka wʋm tɩ ned n puk ned sẽn dog ne zond nin ye.” A baasa a gomdã woto: “Dao-kãngã sã n dag n ka yitẽ Wẽnnaam nengẽ, a dag n kõn tõog n maan baa fɩ ye.”—Zã 9:30-33.

Fariizẽ-rãmbã sẽn pa tõe n kɩɩs raoã gomdã, b tʋʋs-a lame. B yeel-a lame yaa: “Fo yĩngã tõr bee yel-wẽn pʋgẽ, hal f rogem wakat tɩ ta moasã, tɩ fo wa yɛs n zãms tõndo?” Rẽ poore, b rig-a lame n yiis karen-doogẽ wã.—Zã 9:34.

A Zeezi sẽn wʋm bũmb ning b sẽn maan raoã, a tɩ yã-a lame n sok-a yaa: “Dẽ yĩnga, fo tẽeda Ninsaal Bi-riblã?” Raoã yeela a Zeezi yaa: “Zu-soaba, bãmb yaa ãnda, tɩ mam na n tẽ bãmba?” A Zeezi leok-a-la vẽeneg yaa: “Fo yãnd-a lame, sẽn gomd-a ne foomã, yaa yẽnda.”—Zã 9:35-37.

Raoã yeela woto: “Zu-soaba, mam tẽedame.” A wõgemda a Zeezi taoor n waoog-a, n na n wilg t’a tẽed-a lame. A Zeezi yeel-a lame: “Mam waa dũni-kãngã pʋgẽ bʋʋd yĩnga, tɩ neb nins sẽn ka yãtã na yã, tɩ neb nins sẽn yãtã na lebg zoense.”—Zã 9:38, 39.

Fariizẽ-dãmbã ra miime tɩ b pa zoens ye. La Wẽnnaam tũubã wɛɛngẽ, b ra yaa wa zoense, n yaool n da yetẽ tɩ bãmb wilgda nebã Wẽnnaam sorã. B sẽn pa rat n sak n deegã, b sokame yaa: “Dẽ yĩnga, tõnd me yaa zoens bɩ?” A Zeezi yeel-b lame: “Yãmb sã n dag n yaẽ zoense, yãmb dag n kõn tallẽ yel-wẽn ye. La moasã, yãmb yetame: ‘Tõnd yaa nin-dãmba.’ Woto yĩng n kɩt tɩ y yel-wẽnã paad ne-yã.” (Zã 9:40, 41) B sã n da pa tũudmã karen-saam-dãmba, d tõe n wʋma b sẽn pa tẽ a Zeezi wã võore. La b sẽn mi tõogã kɩtame tɩ b sẽn kɩɩs a Zeezi wã yaa yel-wẽn-kãseng menga.