Sak 71

Fariziẽ rãmbã zãgsa fasɩ tɩ b kõn tẽ ye

FARIZIẼ rãmbã sẽn bool sẽn yɩ-a zoangã roagdbã, b maana rabeem. B miimi tɩ b rɩka sard tɩ ned ning sẽn na n wilg t’a tẽeda a Zezi, b na n dig-a lame n yiis karen-doogã neb sʋka. Buudẽ yiisg a woto tõe n waa ne far sẽn yaa kãsenga, sẽn yɩɩd fãa n kõ zak neb sẽn yaa naong rãmba. Dẽ kɩtame tɩ roagdbã ra maand gũusgu.

Fariziẽ rãmbã sokame: “Yaa yãmb biig ninga yãmb sẽn yeel t’a roga ne zõnda la woto bɩ? A yɩɩ wãn n yãtẽ masã?”

Roagdbã wilgame tɩ yaa sɩda, n yeele: “Tõnd miimi t’a yaa tõnd biiga la a roga ne zõndo. La tõnd ka bãng a sẽn yɩ to-to n neẽ masã, walla ned ninga sẽn puk a nina ye.” Yaa vẽeneg tɩ b biigã ra togs-b-la bũmb ning sẽn maanã, la yaa ne gũusg la b sẽn yeel tɩ: “Bɩ y sok-a t’a ka le yaa biig ye. Yẽ na togs a toore.”

Woto, Fariziẽ rãmbã leb n boola rao wã. La so-kãngã b makame n na n yɛɛs-a, n wilg tɩ b tara kaset sẽn wilgd t’a Zezi tara taale. B yeela rao wã: “Kõ Wẽnnaam waoogre tɩ tõnd miimi tɩ dao kãngã yaa yel-wẽna soaba.”

Rao wã sẽn da yaa zoangã pa kɩɩs ye, n yeele: “Mam ka mi bãmb sã n yaa yel-wẽna soab ye.” La a paase: “La bũmb a yembre la mam mi, yaa tɩ mam da yaa zõanga, la masã mam neeme.”

Fariziẽ rãmbã baoome n na n yã tudgr rao wã kaset pʋgẽ, n leb n sok-a: “Bãmb maana foo bõe? Bãmb yɩɩ wãn n puk fo nini?”

Rao wã wilga a sũ-pa-noaanga, n yeele: “Mam da togsa yãmb pĩnd tɩ yãmb ka reeg ye. Yaa bõe tɩ yãmb dat n le sok maam?” Dẽ la rao wã sok-b woto n na n gese: “Yãmb me rat n lebga bãmb karen-biis la?”

Sok kãngã puuga Fariziẽ rãmbã sũyã. Tɩ b ning rao wã taal n yetẽ: “Foo la bãmb karen-biiga. Tõnd ya a Moiiz karen-biisi. Tõnd mi tɩ Wẽnnaam da goma ne a Moiiz. La tõnd ka mi dao kãngã sẽn yi zĩig ninga ye.”

Woto linga bõaasã sẽn yaa sik-m-meng soabã t’a yeele: “A yaa bõn-bãnde tɩ yãmb ka bãng bãmb sẽn yi zĩig ninga ye, la baasgo, bãmb puka mam nini.” Woto wilgda bõe? Bõaasã wilga tags-kãngã neb wʋsg sẽn sak tɩ yaa sɩdã: “Tõnd miimi tɩ Wẽnnaam ka kelgd yel-wẽna rãmb ye. La ned sã n waoogd bãmb la a maand bãmb datem, yaa yẽ soab la bãmb kelgda. Hal dũniyã sɩngre, b nan ka wʋm tɩ ned n puk ned sẽn dog ne zõnd nin ye.” Rẽ kɩtame t’a kʋmb n yeel woto vẽenega: “Dao kãng sã n da ka yi Wẽnnaam nengẽ, bãmb da ka tõe n maan baa fɩ ye.”

Fariziẽ rãmbã ra ka tõe n kɩɩs gomd sẽn yaa sɩd la vẽeneg woto ye. B sẽn da pa rat n sak sɩdã yĩnga, b kãasa rao wã raado: “Fo roga ne yel-wẽna, fo ka tõe n zãms tõnd ye.” Dẽ, b riga rao wã n yiisi, tɩ wõnd b yiis-a-la karen-doogã neb sʋka.

A Zezi bãnga bũmb ning sẽn maanã, n tɩ yã rao wã n yeel-a: “Fo tẽeda Wẽnnaam Biiga bɩ?”

Tɩ rao wã sẽn da yaa zoang la bõaasã me sok a Zezi: “Bãmb la ãnda tɩ mam tõe n tẽ bãmba, Zusoaba?”

T’a Zezi leoke: “Yaa bãmb n gomd ne foomã.”

Zĩig pʋgẽ, rao wã wõgemda a Zezi taoor n yeele: “Zusoaba, mam tẽedame.”

Rẽ poore a Zezi wilgame: “Mam waa dũniyã ka n na n bʋ bʋʋdo, tɩ neb nins sẽn ka ne wã yã, tɩ neb nins sẽn ne wã lebg zõense.”

Fariziẽ rãmb kẽer sẽn wʋm dẽ wã, b sokame: “Tõnd me yaa zõens bɩ?” B sã n da sakẽ tɩ b yamã ra ludame, b ra tõeeme n ka paam taal b sẽn kɩɩsd a Zezi wã yĩng ye. La wa a Zezi sẽn yeel-bã: “Yãmb sã n da yaa zõense, yãmb da ka tarẽ yel-wẽn ye.” Baasg zãnga, b ra gãdame bal tɩ b ka zoense, la tɩ b ka baood vẽnegr ye. Rẽ n so t’a Zezi yeel woto: “La masã yãmb yetame tɩ yãmb yaa nin dãmba. Yaa woto yĩng n kɩt tɩ yãmb yel-wẽna ketẽ.” Zã 9:19-41.

▪ Bõaasã sẽn da yaa zoangã roagdb b sẽn bool Fariziẽ rãmbã nengẽ wã, bõe yĩng tɩ b ra maand rabeem, la wãn-wãn la b leok ne gũusgu?

▪ Wãn to la Fariziẽ rãmbã mak n na n yɛɛs rao wã sẽn da yaa zoangã.

▪ Gom-bʋg sẽn yaa sɩd la sẽn ka tõe n kɩɩs la rao wã togs-yã, tɩ puug Fariziẽ rãmbã sũyã?

▪ Bõe yĩng tɩ Fariziẽ rãmbã ka bʋʋm b sẽn kɩɩsd a Zezi wã?