Sak 74

A Zezi sagla a Mart, la a kõ sagls pʋʋsgã wɛɛngẽ

AZEZI sẽn da wa n moond Zide wã, a kẽe Betani sẽn yaa tẽn-bilã. Yaa tẽn-kãng la a Marte, a Maari, la b tão a Lazaar da be. Tõe t’a Zezi ra seg-b-la pĩnd a moonegã pʋgẽ, tɩ b zoe n ya a zo-nongdse. Sẽn ya a soab fãa, a Zezi kẽnga a Mart zakẽ wã t’a reeg-a.

A Mart ra tʋllame n deeg a Zezi sãand hal sõma. Sɩda, paam tɩ Mesi ning b sẽn kãabã wa f zakẽ yaa waoogr sẽn yaa kãsenga! Dẽ, a Mart sɩngame n segend rɩɩb buud toor-toor la a manesd yel-bõones toɛy-toɛy sẽn na yɩl t’a Zezi be zĩndgã yɩ-a noogo.

La a Mart yao a Maari yẽ ra zĩi a Zezi taoor n kelgd-a. Sẽn yɩ bilfu, a Mart kolga a Zezi n yeel-a: “Zusoaba, a ka yell ne yãmba mam yao wã sẽn bas maam m yembre tɩ m tʋmdẽ wã bɩ? Bɩ y yeel-a t’a wa sõng-ma.”

La a Zezi zãgsame t’a kõn yeel a Maari tɩ bũmb ye. A yeela a Mart t’a ya n maanda yɩɩr tɩ loog ne yĩngã yɛla. Ne bʋgsem a yeela a Marte: “Mart, Mart, fo maanda yɩɩre, n sidgd ne bũmb wʋsgo. La bũmb [a wãna, bɩ] a yembre n yaa tɩlae.” Sã n yaa ne a Zezi, ka tɩlae t’a Mart rɩk sẽk wʋsg n segl rɩɩb buud toor-toor ye. Rɩbd a wãn bɩ a yembr bal ra sekame.

A Mart tʋlsma ra yaa sõma. A ra ratame n deeg a Zezi sãand sõma. Baasg zãnga, a sẽn da maand yɩɩr ne yĩngã yɛlã kɩtame t’a ra kongd zu-noog ning a sẽn da tar n tõe n paam tɩ Wẽnnaam meng Biriblã zãms-a wã! Rẽ n so t’a Zezi yeel woto: “La a Maari yãka bõn-neer kãnga sẽn na n pa ne-a wã.”

Wakat a to, karen-biig n kos a Zezi woto: “Zusoaba, bɩ y zãms tõnd pʋʋsgo wa a Zã sẽn da zãms a karen-biisã.” Yʋʋmd la pʋɩ-sʋk la woto a Zezi wilga pʋʋsg sẽn segd n maan to-to a Tãng zug Zãmsgẽ wã. Tõe tɩ karen-bi-kãngã ra ka be be ye. Rẽ n so t’a Zezi leb n kõ saglsã pʋʋsgã wɛɛngẽ n yɩlem, la a kõ makr sẽn wilgd vẽeneg tɩ d segd n pẽdga ne pʋʋsgo.

A Zezi yeelame: “Yãmb ned a yembr sã n tar a zoa n kẽng a zoa wã nengẽ yʋʋn-sʋka n yeel-a: M zoa, peng maam bur a tãabo, tɩ bõe, m zoa n yi sor n wa n sig mam yirã, la mam ka tar bũmb sẽn na n kõ-a ye. La a zoa wã sã n zĩnd a roogẽ n leoke: Da nams maam ye. Kʋɩlengã pagame, la maam ne m kamba gãandame. Mam ka tõe n yik n kõ foo bur ye. Mam yeta yãmba tɩ baa yẽ sã n ka yik n kõ-a a sẽn ya a zoa wã yĩnga, a na yik n kõ-a a sẽn data fãa a pẽdgra yĩnga.”

A Zezi pa rɩk mak kãngã n na n wilg tɩ wala a kɩbarã pʋgẽ zoa wã, Wẽnnaam a Zeova ka rat n sak kosg ye. Ayo, a rɩka makrã n na n wilg tɩ zoa sẽn ka rat n sak kosg sã n baas n saka kosg b sẽn maan ne pẽdgre, yaa vẽeneg tɩ saasẽ Ba sẽn tar nonglmã na n maana rẽ n yɩɩda. Dẽ a Zezi paasa woto: “Dẽ, mam yeta yãmba, ket-y n kotẽ, la b na n kõo yãmba, ket-y n baoodẽ, la y na n yãame, ket-y n wẽedẽ, la b na n paka yãmba. Bala ned ning fãa sẽn kota paamdame, sẽn baooda yãtame, la sẽn wẽeda, b na n pakame.”—NW.

A Zezi goma Ba rãmb sẽn yaa ninsaalb sẽn ka zems zãng n yaa yel-wẽn-maandbã yell n yeele: “Ãnda n be yãmb sʋka, a biig . . . sã n kos-a zĩifu, a na rɩk waafo n kõ-a n ka kõ-a zĩif bɩ? Walla a sã n kos-a gelle, a na rɩk nang n kõ-a bɩ? A sã n yaa woto tɩ yãmb nin-wẽnsã bãng tɩ kõ yãmb kamba kũun sẽn yaa sõama, dẽ, sẽn yɩɩda, yãmb [saasẽ] Ba kõn kõ neb nins sẽn kot bãmba [vʋʋsem sõng] bɩ?” Ad sɩd yaa goam sẽn kengd pɛlg la a Zezi sẽn togs n wilg tɩ d segd n pẽdga pʋʋsg pʋgẽ wã! Luk 10:38–11:13.

▪ Bõe yĩng t’a Mart maand segls wʋsg a woto a Zezi yĩnga?

▪ Bõe la a Maari maan-yã, la bõe yĩng t’a Zezi pẽg-a n bas a Marte?

▪ Bõe n kɩt t’a Zezi leb n togs a saglsã pʋʋsgã wɛɛngẽ n yɩlem?

▪ Mak-bʋg la a Zezi rɩk n wilg tɩ d segd n pẽdga ne pʋʋsgo?