A Zeezi goma pʋʋsgã la sãan-deegrã yelle

A Zeezi kẽnga Betani. Yaa tẽn-bil sẽn be Oliiv tɩɩs tãngã yaanga. A zãrmã ne Zeruzalɛm zemsa kilo a tãabo. (Zã 11:18) A Zeezi tɩ siga a Mart ne a Maari yirã. Bãmb ne b ba-biig a Lazaar yaa a zo-rãmba. B reeg-a-la sõma.

Paam tɩ Mesi wã sig f yir yaa zu-zẽkr tɛkẽ. A Mart ra rata ne a sũur fãa n ges a Zeezi yell sõma. Rẽ kɩtame t’a tʋmd wʋsg n na n segl rɩɩbo. La a yao a Maari yẽ tɩ zĩime n kelgd a Zeezi. A Mart wa n yeela a Zeezi yaa: “Zu-soaba, mam ma-bi-poakã sẽn bas maam m yembr tɩ m get seglgã yellã ka namsd yãmba? Dẽ wã yaa, yeel-y-yã-a t’a sõng-ma.”—Luk 10:40.

La a Zeezi pa zab a Maari ye. A Mart la a wẽneg n sagle, a sẽn maand yɩɩr wʋsg ne rɩɩbã seglgã. A yeel-a lame: “Marte! Marte! Fo maanda yɩɩre, n sidgd ne bũmb wʋsgo. Bũmb a yembr tãa n yaa tɩlɛ. A Maari yãka pʋɩ-sõng b sẽn kõn deeg n bas-a ye.” (Luk 10:41, 42) A Zeezi wilgame tɩ pa tɩlɛ t’a rɩk sẽk wʋsg n segl rɩbd ka tɛk ye. Rɩɩb bilf bal ra sekame.

A Mart sẽn maanã pa wẽng ye. A ratame n ges a Zeezi yell sõma. La a sẽn maand yɩɩr wʋsg rɩɩbã seglg yĩngã kɩtame t’a pa paam n sõs ne Wẽnnaam Biigã ye. A Zeezi wilgame t’a Maari sẽn yãk yam ningã yaa sõma. A sẽn maanã na n naf-a-la wakat fãa, leb n yaa mak-sõng d sẽn pa segd n yĩmi.

Daar a to me, a Zeezi sõnga a karen-biisã tɩ b bãng bũmb a to sẽn tar yõod wʋsgo. A karen-biig a ye n kos-a yaa: “Zu-soaba, zãms-y tõnd pʋʋsgo, wa a Zã sẽn zãms b karen-biisã.” (Luk 11:1) Sẽn zems yʋʋmd la pʋɩ-sʋka, a Zeezi sẽn wa n zãmsd nebã tãngã zugã, a wilg-b-la b sẽn segd n pʋʋs to-to. (Matye 6:9-13) La tõeeme tɩ karen-biig ning sẽn sok sokrã ra pa be be ye. Rẽ n so t’a Zeezi le wilg-b bũmb nins b sẽn tog n kos b pʋʋsg pʋgẽ wã. Rẽ poor la a rɩk makre, n wilg tɩ d segd n pẽdga ne pʋʋsgo.

A Zeezi yeela woto: “Ãnda yãmb sʋkã n na n tar a zoa, t’a wa a nengẽ yʋn-sʋka, n yeel-a tɩ ‘m zoa, peng-m bur a tãab tɩ m zoa n yi sor n wa n sig-m tɩ m ka tar bũmb sẽn na kõ-a t’a rɩ ye.’ A zoa wã sã n pa pʋgẽ n leok-a n yeele: ‘Ra nams maam tɩ rignoorã zoe n pagame, maam ne m kambã zoee n kẽe gãaga, mam ka leb n tõe n yik n kõ foom bur ye.’ Mam yeta yãmb tɩ baa a sã n ka na n yik n kõ-a burã, a sẽn yaa yẽnda zoa wã yĩnga, a na yik n kõ-a bũmb nins fãa a sẽn datã, a pẽdgrã yĩnga.”—Luk 11:5-8.

A Zeezi makrã pa sẽn na n wilg t’a Zeova pa tʋll n kelg d pʋʋsgo, wa raoã zoa sẽn maanã ye. A ra rat n wilgame tɩ raoã sã n baas n sak n sõng a zoa wã a sẽn pẽdgã yĩnga, a Zeova sẽn yaa tõnd Ba sẽn be saasẽ wã na n deega neb nins sẽn tũud-a ne b sũy fãa wã kosgo. A Zeezi paasame: “Mam yeta yãmb tɩ y kose la b na kõ yãmba, tɩ y bao la y na yã, tɩ y kabse, la b na pak tɩ y kẽ. Bala, ned ning fãa sẽn kot deegdame. Ned ning sẽn baood yãtame, la b pakdame tɩ sẽn kabsd-a kẽ.”—Luk 11:9, 10.

A Zeezi rɩka makr ne ba-rãmbã sẽn maand to-to wã, sẽn wilgd t’a gomdã yaa sɩda. A yeelame: “Yãmb sẽn yaa ba-rãmbã, ãndã yãmb sʋkã bi-ribl n na n kos-a bur t’a kõ-a kugri, wall a kos-a zĩnf t’a kõ-a waaf tɩ ka zĩnfu, wall a kos-a gell t’a kõ-a nanga? Sã n yaa tɩ yãmb sẽn yaa nin-wẽnsã miime tɩ kõ y kambã bõn-sõamyã, yãmb ba sẽn be arzãnã [“saasẽ,” MN] n mi n yɩɩda, n na n kõ neb nins sẽn kot bãmbã Sɩɩg-sõngo.” (Luk 11:11-13) Ad d sẽn mi tɩ d Ba wã reegda d kosgã sɩd kengda raoodo.