Sak 90

Kũum vʋʋgrã saagre

A ZEZI wa n baas n taa Betani noore. Betani yaa tẽn-bil t’a zãrem ne Zerizalɛm zems kɩlometr a tãabo. Ra ya a Lazaar sẽn da ki tɩ b mum-a wã yɩ tɩ rasem a wãna. A tãop a Maari la a Mart ra ket n bee sũ-sãang pʋgẽ, tɩ neb wʋsg wa b yirã n na n bels-ba.

B sẽn da ket n maand sũ-sãangã wakate, ned n wa n togs a Mart t’a Zezi bee sorẽ n watẽ. Dẽ a yii tao-tao n na n tɩ seg-a, la wõnda a ka togs a Maari ye. A Mart sega a Zezi, n leb n togs-a yẽ ne a Maari sẽn da zoe n yeel naoor wʋsg rasem a naasã sẽn loogã pʋgẽ wã: “Yãmb sã n da beẽ ka, mam tão wã ra kõn ki ye.”

Baasg zãnga, a Mart ra ket n saagdame t’a Zezi na maan bũmb n sõng b tão wã. A yeela woto: “Mam miimi tɩ bũmb ninga fãa yãmb sẽn kos Wẽnnaam, Wẽnnaam na n kõo yãmba.”

“Fo tão wã na n vʋʋgame,” woto la a Zezi kãab-yã.

A Mart ra tagsdame t’a Zezi ra gomda beoog-daar vʋʋgrã sẽn na n zĩnd tẽng zugã yelle. Yaa vʋʋg-kãng la a Abrahaam la Wẽnnaam sõgen dãmb a taabã sẽn da gũudã. Rẽ n so t’a Mart leoke: “Mam miime tɩ yẽ na n vʋʋga kũum vʋʋgr wakate sẽn yaa yaoolem daarã.”

La a Zezi kõ-a-la saagr n wilg tɩ yolsg tõe n paama zĩig pʋgẽ, n leoke: “Mam yaa vʋʋgre la vɩɩm.” A Zezi tẽega a Mart tɩ Wẽnnaam kõ-a-la tõog kũum zugu, n yeele: “Ned ninga sẽn tẽed maam, baa yẽ sã n ki, a na paam vɩɩm. La ned ninga fãa sẽn vɩ n tẽed maam, a kõn ki abada ye.”

A Zezi ra ka yet a Mart tɩ wẽn-sakdb nins sẽn da be wakat kãngã ka na n tol n ki ye. Ayo, a ra rat n yeelame tɩ ned sã n wilg t’a tẽed-a lame, a tõe n paama vɩɩm sẽn ka sɛta. Neb wʋsg na n vʋʋga yaoolem daarã n yaool n paam vɩɩm sẽn ka satã. La neb a taab sẽn yaa kɩs-sɩd dãmb na n põsa zãmaan kãngã saab n pa tẽng zugu. A Zezi sẽn yeelã yaa goam sẽn na n sɩd pids sɩd-sɩd nin-kãensã zutu. B ka na n tol n ki abada! A sẽn togs gom-kãngã sẽn tar pãngã poore, a Zezi soka a Mart: “Fo tẽeda woto bɩ?”

T’a Mart leoke: “N-ye Zusoaba, mam tẽedame tɩ yãmb yaa Kirist Wẽnnaam Biiga sẽn tog n wa dũniyã zugã.”

A Mart lebg n zoee tao-tao n tɩ bool a Maari, n wɩdg-a woto: “Karensaamb waame n boond foom.” Tao-tao bala a Maari yiimi. Neb a taabã sẽn yã t’a loogdã, b pʋgl-a lame n tagsdẽ t’a ra rebda yaoogẽ wã.

A Maari waa a Zezi nengẽ n wõgemd a taoor n yãbda. A yeela a Zezi: “Zusoaba, yãmb sã n da beẽ ka, mam tão wã ra ka na n ki ye.” A Zezi sẽn yã t’a Maari ne kʋʋngã sẽn da pʋgd-a wã ra yãbdame wã, sãama a sũur wʋsgo. T’a soke: “Yãmb muma yẽ yɛɛnẽ?”

B leokame: “Zusoaba, wa n ges-y-yã.”

A Zezi me ninga nintãm, tɩ rẽ kɩt tɩ Zʋɩf rãmbã yeele: “Gese, bãmb nonga yẽ wʋsgo.”

Neb kẽer tẽegame tɩ Zãn Kibsẽ wã kiis a wãn sẽn looge, a Zezi ra sãooga bi-bɩɩg sẽn dog ne zondo, tɩ b soke: “Dao kãng sẽn da puk zõanga nina, b ra ka tõe n kɩt tɩ rao kãngã me ra ki bɩ?” Zã 5:21; 6:40; 9:1-7; 11:17-37.

▪ Wakat bʋg la a Zezi wa n baas n ta Betani noorã, la yel-bʋg la a yã be?

▪ A Mart sẽn tẽed vʋʋgrã tika bõe zugu?

▪ A Lazaar kũumã kɩtame t’a Zezi tall manesem bʋgo?