A Zeezi yaa “vʋʋgre, la vɩɩm”

A Zeezi yii Peere n kẽed Betani. A nan bee tẽngã noore. Betani bee Zeruzalɛm yaanga, sẽn zems kilo a tãabo. A Maari ne a Mart sẽn yaa a Lazaar tãopã ra ket n yãbda a Lazaar kũumã. Neb wʋsg waa me n na n bels-ba.

Ned n tɩ togs a Mart t’a Zeezi bee sorẽ. A Mart yika tao-tao n tɩ seg-a. Bũmb la a yeel a Zeezi, la wõnda yẽ ne a yao wã ra tagsda rẽ yell sẽn ta rasem a naase. A yeela a Zeezi yaa: “Zu-soaba, yãmb sã n dag n beẽ ka, mam tão wã dag n ka na n ki ye.” Pa rat n yeel t’a tagsdame tɩ tɩɩm le kae ye. A yeelame: “Baa ne moasã, mam miime tɩ yãmb sẽn na kos Wẽnnaam bũmb ning fãa, bãmb na n kõo yãmba.” (Zã 11:21, 22) A ra mii a yamẽ t’a Zeezi tõe n maana bũmbu.

A Zeezi yeel-a lame: “Fo tão wã na n vʋʋgame.” A Mart tagsame t’a gomda Wẽnnaam sẽn na n wa vʋʋg sẽn ki-bã tẽngã zugã yelle. A Abrahaam ne wẽn-sakdb a taab me ra tẽeda rẽ. A Mart wilgame tɩ yẽ me tẽeda woto. A yeelame: “Mam miime t’a na n vʋʋga vʋʋgrã wakate, yaoolem daarã.”—Zã 11:23, 24.

La rẽ yĩnga, a Zeezi sɩd tõe n maana bũmb zĩig pʋgẽ n bels a Lazaar tãopã bɩ? A tẽega a Mart tɩ Wẽnnaam kõo yẽ tõog t’a tõe n vʋʋg kũum. A yeel-a lame yaa: “Ned ning fãa sẽn tẽed maam baa a sã n ki a na paam vɩɩm. La ned ning fãa sẽn vɩ n tẽed maam kõn tol n ki ye.”—Zã 11:25, 26.

A Zeezi pa rat n yeel t’a karen-biisã pa na n tol n ki ye. A ra togsa a tʋm-tʋmdbã tɩ yẽ mengã tog n kiime. (Matye 16:21; 17:22, 23) A ra ratame bal tɩ b bãng tɩ sẽn tẽed-b yẽ wã na n wa paam n vɩɩmda wakat sẽn kõn sa. Neb wʋsg nengẽ na n tũu ne kũum vʋʋgrã. La wẽn-sakdb nins sẽn na n ket n vɩ dũniyã saab wakatã tõeeme n pa tol n ki ye. Sẽn yaa a soab fãa, ned ning sẽn tẽed a Zeezi tõe n kɩsa sɩd tɩ baa a sã n ki, a na n vʋʋgame.

A Zeezi sẽn yeel tɩ yẽ yaa vʋʋgr la vɩɩmã, rẽ yĩnga a tõe n vʋʋga a Lazaar sẽn ki na maan rasem a naasã bɩ? A Zeezi soka a Mart a sã n tẽeda yẽ goamã. A Mart leoka woto: “N-yẽe, Zu-soaba, mam tẽedame tɩ yãmb yaa Kirisi, Wẽnnaam bi-riblã, soab ning sẽn tog n wa-a dũniyã zugu.” A Mart sẽn kɩs sɩd tɩ baraar bala a Zeezi tõe n maana bũmb n sõng-bã, a zoeeme n kuli, n tɩ soos n yeel a Maari tɩ “karen-saamb waame la b boond-a lame.” (Zã 11:25-28) A Maari yiime n dɩk sore. Neb a taabã sẽn da tẽed t’a rebda yaoogẽ wã, b pʋg-a lame.

Mik a Maari ra rebda a Zeezi nengẽ. A ta n wõgemda a taoor la a yãbda. Yẽ me yeela a Zeezi gomd ning a Mart sẽn da zoe n togsã. A yeelame yaa: “Zu-soaba, yãmb sã n dag n zĩndẽ ka, mam tão wã dag n ka na n ki ye.” A Zeezi sẽn yã a Maari la kʋʋngã sẽn yãbdã, b nimbãaneg kẽ-a lame, t’a sũurã sãame, hal t’a yãbe. Nebã sẽn yã rẽ wã, b bãngame t’a ra nonga a Lazaar wʋsgo. La neb kẽer yeelame: “Bãmb sẽn puk zoangã ninã, bãmb dag n ka tõe n maan tɩ rao-kãngã ka ki la?”—Zã 11:32, 37.