Sak 75
Sũ-noogã yẽgre
A ZEZI sẽn da wa n moond Galile wã wakate a maana yel-soalma. La masã, a ra leb n maanda yel-solem kãens Zide. Wala makre a riga zĩn sẽn da kɩt tɩ rao lebg muka, tɩ zĩna yi n bas-a. Woto yɛɛsa kʋʋngã. La sãbsdb n leb n yik n kɩɩs a Zezi ne goam nins neb sẽn da togs Galile wã, n yetẽ t’a “rigda zĩn dãmba ne zĩn dãmba naaba a Beelzebub pãnga.” Neb a taab ra ratame t’a Zezi kõ kaset sẽn yaa kãseng n yɩɩd sẽn wilgd a sẽn ya a soaba. Dẽ b baoome n na n mak-a, n kos-a t’a kõ bãnd sẽn yit saasẽ.
A Zezi bãnga b tagsgã. Rẽ n so t’a leok a sãbsdbã Zide wã wala a sẽn da leok Galile rãmbã. A wilgame tɩ Rĩung ning fãa sẽn welg ne a meng na n lʋɩɩme. A sokame: “Sʋɩtãana sã n welg ne a menga, a soolem na n yɩɩ wãn n yalse?” A wilgame t’a sãbsdbã bee yell pʋgẽ, n yeele: “La mam [sã n] digda zĩn dãmba ne Wẽnnaam [nugu], yaa Wẽnnaam [Rĩung] n wa yãmb nengẽ.”
Neb nins sẽn da get a Zezi yel-soalmã segd n maana wa b rãmb nins sẽn yã t’a Moiiz maan yel-solemd yʋʋm kob-gĩn sẽn loogã. Bãmb da zẽka b koees n yeele: ‘Yaa Wẽnnaam nug n maane.’ Ra yaa ‘Wẽnnaam nug’ n gʋls Noy Piigã kug walsã zutu. La ra yaa ‘Wẽnnaam nugu,’ sẽn ya a vʋʋsem sõngã bɩ a pãng sẽn tʋmdã, n kɩt t’a Zezi ra tõe n dig zĩn dãmb la a sãoog bãad dãmbã. Dẽnd Wẽnnaam Rĩungã sɩd waa sãbsdb kãensã nengẽ, bala ned ning b sẽn yãk t’a yɩ Rĩungã rĩma ra bee bãmb sʋk be.
Rẽ poore, a Zezi rɩka makr n wilg t’a sẽn tõe n dig zĩn dãmbã yaa kaset sẽn wilgd t’a tõee a Sʋɩtãana. Rẽ yaa wala gãndaoog sẽn na n wa tõog rao sẽn daool ne zab-teed sõma n gũud a zag-kãsenga. A leb n togsa makr ning a sẽn da togs Galile wã zĩn dẽgdã wɛɛngẽ. Zĩnã yit n basa nedã, la nedã sã n ka pids vɩʋʋgã a sẽn basã ne bõn-sõma, zĩna lebgd n waa ne zĩn dãmb a yopoe n paase. Rẽ kɩtdame tɩ nin-kãng yaoolem toogã wẽnem yɩɩg pĩnda.
Pag a yembr sẽn da be kʋʋngã sʋk n kelgd a Zezi zãms-kãensã wã zẽka a koɛɛg n yeele: “Sũ-noog soaba la pag ning sẽn dog-a yãmba tɩ y yẽsem a bĩisim!” (Sebr Sõngo) Zʋɩf poak fãa sẽn da tʋll yaa yɩ Wẽnnaam no-rɛɛs ma roaka, sẽn yɩɩd fãa Mesi wã ma. Woto yĩnga, pa lingr la pagã sẽn yeel woto wã ye. Wõnda a ra tagsdame t’a Maari tog n tara sũ-noog sẽn yaa kãsenga, a sẽn ya a Zezi ma wã yĩnga.
La tao-tao bala a Zezi remsa pagã tagsgo, n wilg-a sũ-noog hakɩkã yẽgr sẽn ya a soabã, n yeel-a: “Yeel-y tɩ sũ-noog rãmba n yɩɩda la sẽn kelgd-b Wẽnnaam gomde la b reegd-a.” (Sebr Sõngo) A Zezi zɩ n wilg tɩ b segd n waooga a ma a Maari ne waoogr sẽn ka wõnd a taab ye. A wilgame tɩ ned paamda sũ-noog hakɩk a sã n yaa Wẽnnaam sõgen sẽn yaa sakda, la ka ne rogem bɩ ne tʋʋmd a sẽn tõog n pids ye.
Zide nebã sẽn kos bãnd sẽn yit saasẽ wã a Zezi zab-b lame, wa a sẽn da zab Galile rãmbã rẽ yĩngã. A yeel-b lame tɩ b kõn paam bãnd n zʋʋg a Zonas bãndã ye. A Zonas yɩɩ bãnde, ne a sẽn maan rasem a tãab zĩifã pʋgẽ la ne a sẽn moon ne raood hal tɩ rẽ kɩt tɩ Niniiv nebã tek yam n kos sugrã. A Zezi yeelame: “La gese, sẽn yɩɩd a Zonas bee ka.” Woto me, a Salomo yamã yɛɛsa Seba rĩm poakã. “La gese, sẽn yɩɩd a Salomo bee ka.” Woto la a Zezi leb n yeele.
A Zezi wilgame tɩ ned sã n yõgen fɩtla, a ka fõgend-a ne peoog ye, a ningd-a-la fɩtl doagendg zugu, tɩ neba yã vẽenemã. Tõeeme t’a ra wilgdame tɩ neb zãmsg la yel-soalem maaneg nin-tõts nins sẽn be a kɛlgdbã sʋkã taoor yaa wa f sẽn na n solg fɩtl vẽenem. Neb a woto nin ka sõma, bɩ ka get tɩrg ye. Rẽ kɩtame tɩ yel-soalmã a sẽn maandã bõn-datlã ka pids ye.
A Zezi ra nan diga zĩn sẽn kɩt tɩ rao lebg muk t’a yi n bas-a. Woto ra segd n kɩtame tɩ neb nin sẽn yaa sõma, n get tɩrgã pẽg tʋʋmd sẽn be ziir a woto la b moon koe-noogã! A Zezi sãbsdbã ka maan woto ye. Rẽ n so t’a Zezi baas a goamã n yeele: “Dẽ yĩnga, bɩ f gũus neere tɩ vẽenem ninga sẽn be fo pʋgẽ wã ra wa lebg lik ye. Fo yĩnga tõr sã n tar vẽenem tɩ lik baa bilf ka beẽ, a na n pida ne vẽenem zãng wa fɩtl sẽn pɩnd n kõt foom vẽenem.” Luk 11:14-36; Yikri 8:14, 15; 31:18; Matɩe 12:22, 28.
▪ A Zezi sẽn sãoog rao wã, neba manesem yɩɩ wãn-wãna?
▪ ‘Wẽnnaam nugã’ yaa bõe, la wãn-wãn to la Wẽnnaam Rĩungã wa a Zezi kɛlgdbã nengẽ?
▪ Sũ-noog hakɩka yẽgr yaa bõe?
▪ Wãn-wãn la ned tõe n tall nifr sẽn yaa sõma?