Sak 85

Sẽn menem-ba baoobo

A ZEZI ra rata ne a sũur fãa n bao neb nins sẽn na n sak n balem Wẽnnaam ne sik-m-mengã. Dẽ a ra baood n na n sõsa ne neba fãa Rĩungã zugu, baa ne yel-wẽn-maandb kãsemsã. Nin-kãensã kolga a Zezi masã n na n kelg-a.

Fariziẽ rãmbã la gʋlsdbã sẽn yã rẽ wã, b gom n sãbga a Zezi, a sẽn da lagemd ne neb nins bãmb sẽn get tɩ b ka võorã yĩnga. B yẽgma woto: “Dao kãngã reegda yel-wẽna rãmba n dɩt ne bãmba.” Ne bãmba, ad wã sɩd yaa yaalgo! Sã n yaa ne Fariziẽ rãmbã la gʋlsdbã, nin-buiidã ra yaa wala tomã bãmb sẽn tabdã. Togs sɩda, b ra tũnugda ne Hebre gom-biig ning sẽn yaa amhaarɛts, sẽn dat n yeel tɩ “tẽng tom nebã,” n wilgd b paoogrã ne nin-kãensã.

La a Zezi manesmã fãa pʋgẽ, a ra waoogda neba, n yaa nin-sõng la a zoet b nimbãanega. Rẽ kɩtame tɩ nin-tals wʋsg wala neb nins b sẽn mi wala yel-wẽn-maandba ra tʋll sõma n kelg-a ne b sũur fãa. La yaa wãn to yẽ ne Fariziẽ rãmbã sẽn sãbg a Zezi, a sẽn modgd n sõngd neb nins bãmb sẽn get tɩ b ka võorã?

A Zezi tũnuga ne makr n leok-ba. Mak kãngã pʋgẽ a tika Fariziẽ rãmbã sẽn tagsd tɩ bãmb yaa nin-tɩrs sẽn tar bãan n be Wẽnnaam bãgrã pʋgẽ wã zugu, tɩ amhaarɛts rãmbã b sẽn pa nandã yaa b rãmb nins sẽn bʋdg n menemã. Kelg-y a sokrã:

“Nin-bʋg n be yãmb sʋka n tar piis koabga, t’a yembr menem, t’a ka bas pis-wɛ la a wɛ wã weoog pʋgẽ n kẽng n bao sẽn menem-a wã hal t’a yã-a? La yẽ sã n yã-a, a na n palg-a-la a bãgdẽ ne sũ-noogo. Yẽ sã n ta yiri a na n boola a zo-rãmba ne a yagsã n yeel-b yaa: Bɩ y maan sũ-noog ne maam tɩ mam yãa m pesga sẽn da menemã.”

Rẽ poore a Zezi wilga a kɩbarã võore, n yeele: “Mam yeta yãmba tɩ sũ-noog na n zĩnda [saasẽ] woto me, yel-wẽna soab a yembr yam sẽn na n tek t’a kos sugra yĩnga n yɩɩd nin-tɩrs pis-wɛ la a wɛ sẽn ka baood sugr kosgã.”

Fariziẽ rãmbã ra getame tɩ bãmb mensã yaa nin-tɩrse, tɩ woto kɩt tɩ ka tɩlae ne bãmb tɩ b tek yam n kos sugr ye. Yʋʋm a yiib sẽn looge, bãmb kẽer da sãbga a Zezi, a sẽn da rɩ ne yõor yaood dɛɛsdb la yel-wẽn-maandbã. Wakat kãnga, a ra yeel-b lame: “Mam ka wa tɩ bool nin-tɩrs ye, la yaa yel-wẽna rãmba.” Fariziẽ rãmbã sẽn yaa tɩrs b mens nifẽ wã ra ka get tɩ yaa tɩlae tɩ b tek yam n kos sugr ye. Dẽ, b ra pa kõt saasẽ dãmb sũ-noog ye. La yel-wẽn-maandb nins sẽn sɩd tek yam n kos sugrã kõta saasẽ dãmb sũ-noogo.

Sẽn na yɩl t’a tagsgã yɩ vẽeneg sõma, a Zezi rɩka makr a to sẽn wilgd tɩ yel-wẽn-maandb nins sẽn menemã sãoogr tẽebã wɛɛngẽ sɩd kõta sũ-no-kãsenga. A yeelame: “Walla pʋg-bʋg n tar wakɩ koeems piiga t’a yembr menem, t’a ka tugl bugum n pɩɩs a roog n bao neer hali n yã-a? La yẽ sã n yã-a, a na n boola a zo-rãmba ne a yagsã n yeele: Bɩ y maan sũ-noog ne maam tɩ mam yãa m wakɩ koɛɛnga sẽn da menemã.”

Rẽ poore a Zezi wilgame tɩ mak-kãngã võorã yaa yembr ne pĩnd soabã. A paasame: “Mam yeta yãmba tɩ sũ-noog bee Wẽnnaam malɛk rãmba sʋk woto me, yel-wẽna soab a yembr yam sã n tek t’a kos sugri.”

Yel-wẽn-maandb nins sẽn menemã sãoogr tẽebã wɛɛngẽ wã sẽn pak Wẽnnaam malɛgsã, sɩd yaa bũmb sẽn lingd wʋsgo! Sɩd yaa lingri, bala yaa nin-kãensã sẽn da yaa amhaarɛts sẽn yaa nin-tals tɩ b ka nand-bã, n na n wa paam n yɩ Wẽnnaam saasẽ Rĩungã nebã. Woto b na n wa paama zĩig saasẽ t’a ziirã yɩɩd malɛgsã rẽnd menga! La malɛgsã ka maand sũ-kiir ne rẽ bɩ b getẽ tɩ b paoog-b lame ye. Ayo, b miimi tɩ nin-kãensã sẽn yaa yel-wẽn-maandbã maoome n tõog yɛl b vɩɩmã pʋgẽ, tɩ na n segl-b tɩ b yɩ saasẽ rĩm dãmb la maan-kʋʋdb sẽn yaa nin-sõma la nimbãan-zoɛtba. Luk 15:1-10; Matɩe 9:13; 1 Korẽnt dãmba 6:2, 3; Wilgri 20:6.

▪ Bõe yĩng t’a Zezi ra lagemd ne yel-wẽn-maandba, la rẽ kɩtame tɩ Fariziẽ rãmbã togs gom-bʋs n sãbg-a?

▪ Wãn-wãn la Fariziẽ rãmbã ra get nin-buiidã?

▪ Mak-bʋs la a Zezi rɩk-yã, la b tõe n zãmsa tõnd bõe?

▪ Bõe yĩng tɩ malɛgsã sẽn maand sũ-noogã yaa bũmb sẽn lingd wʋsgo?