Sak 27

A Zezi boola a Matɩe

KI-BOGR soabã sãoogr poore, a Zezi yii Kapɛrnawom n kẽng Galile Mogrẽ wã. Be yɛsa, neb kʋʋng n bʋʋg-a, t’a sɩng b zãmsgo. A Zezi sẽn da wa n loogdẽ, a yãa a Matɩe, b sẽn boond me t’a Levi wã, t’a zĩ lampo wã reesg zĩigẽ. A yeel-a lame: “Tũ maam.”

A Pɩɛɛre, a Ãndere, a Zake, la a Zã ra zoe n mii a Zezi zãmsgã sõma b boolgã wakate. Wõnda ra yaa woto ne a Matɩe me. A Matɩe me saka boollã zĩig pʋgẽ, wala bãmb me sẽn da maan to-to wã. A yikame n bas a lampo wã reesg tʋʋmd n sɩng a Zezi tũubu.

Rẽ poore, a Matɩe maana kibs-kãseng a zakẽ wã sẽn na yɩl n wilg a sũ-noog ne a boolgã. A Zezi ne a karen-biisã n paas a Matɩe pĩnd tʋmd-n-taas me n da be kibsẽ wã. Zʋɩf rãmb a taabã ra kisa nin-kãensã, b sẽn da reesd lampo wã n kɩt Rom pãn-soaadbã b sẽn kisã yĩnga. Sẽn paase, b ra zãmbda nebã n kɩtdẽ tɩ b yaood tɩ yɩɩgd b sẽn da segd n yao to-to wã.

Fariziẽ rãmbã sẽn yã t’a Zezi rɩt ne neb a woto wã, b soka a karen-biisã: “Yaa bõe tɩ yãmb karen-saamba rɩt ne yõor-yaood dɛɛgdba la yel-wẽna rãmba?” A Zezi wʋma sokrã, n leok Fariziẽ rãmbã woto: ‘Neb sẽn tar laafɩ ka baood tɩp ye, yaa bãad dãmba n baood tɩpa. Bɩ y kẽng n zãms koe-kãng võore: Mam sũur nooma ne nimbãan-zoeere, la ka ne maand ye. Tɩ bõe, mam ka wa n na n bool nin-tɩrs ye, la yaa yel-wẽna rãmba.’

Wõnda a Matɩe boola lampo rɛɛsdb kãensã a zakẽ wã sẽn na yɩl tɩ b kelg a Zezi n paam sãoogr tẽebã wɛɛngẽ. Rẽ n so t’a Zezi maand tũud-n-taar ne-b sẽn na yɩl n sõng-b tɩ b paam zems-n-taar ne Wẽnnaam. Fariziẽ rãmbã sẽn yaa tɩrs b mens nifẽ wã ra kisa nin-kãensã, la ra ka woto ne a Zezi ye. Yẽ ra zoeta b nimbãanega, n tɩp-b tẽebã wɛɛngẽ.

Woto, a Zezi sẽn zoe yel-wẽn-maandbã nimbãanegã ka rat n yeel t’a sakda b yel-wẽnã ye. La yaa nimbãan-zoeer ning a sẽn tall ne neb nins a sẽn sãoog yĩngã wɛɛngẽ wã buud la a wilgd ka me. Wala makre, tẽeg-y nimbãanegã sẽn da kɩt t’a sɩɩs wãoorã n yeel-a woto wã: “Mam datame, bɩ f paam f menga n yɩ yɩlemde.” Bɩ tõnd me yɩ nimbãan-zoɛtb woto n sõng neb nins sẽn be raab pʋgẽ wã, sẽn yɩɩd fãa tẽebã wɛɛngẽ. Matɩe 8:3; 9:9-13; Mark 2:13-17; Luk 5:27-32.

▪ A Zezi sẽn da wa n yã a Matɩe wã t’a ra bee yɛ?

▪ A Matɩe tʋʋmd ra yaa bõe, la bõe yĩng tɩ Zʋɩf rãmb a taabã ra kis neb nins sẽn tʋmd tʋʋm-kãngã wã?

▪ Yel-bʋg yĩng la b ning a Zezi taale, la a Zezi leokame tɩ bõe?

▪ Bõe yĩng t’a Zezi tɩ naagd ne yel-wẽn-maandba?