Sak 115

No-koeemd n yiki

ZAAB kãngã a Zezi rag n waasa a tʋm-tʋmdbã nao wã, tɩ yaa zãmsg tɩ b segd n sõnga neb a taabã ne sik-m-menga. Rẽ poore a lugla a kũumã sẽn da kolgdã Tẽegre. Masã, yel-lingdem n maane. Sɩd yaa lingri, d sã n tẽeg bũmb ning a Zezi sẽn maan paalmã. A Zezi tʋm-tʋmdbã yikame n wẽed no-koeemd n dat n bãng ned ning sẽn wõnd a yaa kãseng n yɩɩd bãmb sʋka! Wõnda b ra wẽeda no-koeem-kãng wakat fãa.

Tẽeg-y t’a Zezi tedgrã tãngã zug poore, tʋm-tʋmdbã ra wẽe no-koeemd n dat n bãng ned ning sẽn yaa kãseng n yɩɩd bãmb sʋka. Sẽn paase, a Zak ne a Zã rag n kosa naam zĩis Rĩungã pʋgẽ, tɩ rẽ me ra wa ne mo-yõsr tʋm-tʋmdbã sʋka. Masã ad a Zezi sũur ra segd n sãamame, a sẽn yã tɩ b ra leb n tar taab a yaoolem yʋngã! Bõe la a maan-yã?

A ka zab a tʋm-tʋmdbã b sẽn maan woto wã yĩng ye. Ka yɛsa, a leb n maaga a yĩng n yẽs ne-ba, n yeele: “Soolem wʋsg rĩm dãmba soo bãmb neba ne pãnga, la b boonda neb nins sẽn so pãnga tɩ yel-manegdba. Bɩ a ra yɩ woto yãmb sʋk ye. . . . Tɩ bõe, ãnda n yaa kãseng n yɩɩda, ned ninga sẽn zĩ n dɩtẽ wã bɩ, bɩ ned ninga sẽn kɩt rɩɩbã? A ka ned ninga sẽn zĩ n dɩtẽ wã la?” Rẽ poore a tẽeg-b-la makr ning yẽ sẽn basã, n yeele: “La baasgo, mam bee yãmb sʋk wa rɩ-kɩta.”

Baa ne tʋm-tʋmdbã sẽn pa zems zãngã, b paa ne a Zezi a makrã pʋgẽ. Rẽ n so t’a Zezi yeele: “Mam maanda kaool ne yãmba, wala m Ba sẽn maan kaool ne maama, rĩung yĩnga.” (NW ) Kaool kãngã a Zezi mengã sẽn maan ne a karen-biis sẽn yaa sakdbã kɩtdame tɩ b tõe n naag-a n dɩ naam a Rĩungã pʋgẽ. Yaa neb 144 000 bal la b wa n baas n sak kaool kãngã Rĩungã yĩngã pʋgẽ.

Baa b sẽn kõ tʋm-tʋmdbã saagr sẽn be yamleoog sẽn yaa rɩ naam ne Kiristã Rĩungã pʋgẽ wã, b tẽebã ra nan ket n yaa kom-kom. A Zezi yeelame: “Yʋnga bala yãmb fãa na n zoe n basa maam.” Baasg zãnga, a Zezi togsa a Pɩɛɛr t’a pʋʋsa a yĩnga, n yeel-a: “F tẽebã sã n lɛɛg n wa a zĩigẽ, bɩ f keng f saam-biisa pɛlga.”—Sebr Sõngo.

A Zezi wilgame: “Mam kom-bõonego, mam na n zĩnda ne yãmb wakat bilf bala. Yãmb na n baoo maam, la a wa mam sẽn da yeel Zʋɩf rãmbã tɩ b ka tõe n kẽng mam sẽn dabdẽ wã, mam yeta yãmb me woto masã. Mam kõta yãmb tõog paalga. Bɩ yãmb nong taaba. Bɩ y nong taab wa mam sẽn nong yãmbã, yãmb sã n nong taaba, neba fãa na n bãngame tɩ yãmb yaa mam karen-biisi.”

T’a Pɩɛɛr soke: “Zusoaba, yãmb dabda yɛɛnẽ?”

Dẽ a Zezi leokame: “Mam sẽn dabd zĩig ninga, fo ka tõe n tũ maam masã ye, la a sã n yɩ bilfu fo na yaool n tũ maam.”

T’a Pɩɛɛr le soke: “Zusoaba, yaa bõe tɩ mam ka tõe n tũ yãmb masã?” La a paase: “Mam na n kõo m vɩɩm yãmb yĩnga.”

T’a Zezi sok-a: “Fo sɩd na kõ f vɩɩm mam yĩnga?” La a paas woto: “Mam yeta foo sɩd-sɩda tɩ no-raoog kõn kelem [naoor a yiib] hal tɩ fo kɩɩs naoor a tãab tɩ fo ka mi maam ye.”

Dẽ a Pɩɛɛr kɩɩsame n yeele: “Ba a sã n yaa tɩlae tɩ [m] ki ne yãmba, mam kõn kɩɩs yãmb ye.” Sẽn paase, tʋm-tʋmdb a taabã me naagame n da yet woto. La a Pɩɛɛr yeela woto ne wuk-m-menga: “Baa neba fãa sã n na n zoe n bas yãmba mam ka na n zoe n bas yãmb abada ye.”

A Zezi goma sasa ning a sẽn da tʋm tʋm-tʋmdbã tɩ b tɩ gilg n moon Galile n da zɩ rɩɩb ne waoog la potmaanã yelle, n soke: “Bũmb paooga yãmb bɩ?”

Tɩ b leok tɩ “ayo.”

Dẽ a yeelame: “La masã a kõn yɩ woto ye. Sẽn tar-a potmaane, bɩ a zɩ, sẽn tar-a korgo, bɩ a zɩ, la sẽn ka tar-a sʋʋga, bɩ a koos a fuug n da. Tɩ bõe, mam yeta yãmba tɩ yaa tɩlae tɩ gom-kãng sẽn gʋlsa paam pidsg ne maam, sẽn yeta: B lagma bãmb ne wẽns maandba. La bũmb ninga sẽn gʋls mam yĩnga kolga pidsgu.”

A Zezi ra gomda wakat ning b sẽn na n ka-a ra-luk zug wa wẽng maanda, bɩ noy kɩɩsdã yelle. A leb n wilgame tɩ rẽ poore, b na n namsa a karen-biisã wʋsgo. Tɩ karen-biisã yeele: “Zusoaba, ad sʋʋs a yiibu.”

T’a Zezi leok tɩ: “Yõ wã sekame.” Wa d sẽn na n yã wã, sʋʋs a yiibã tallg na n kõo a Zezi sor rẽ poor bilf t’a zãms a karen-biisã bũmb a to sẽn tar yõod wʋsgo. Matɩe 26:31-35; Mark 14:27-31; Luk 22:24-38; Zã 13:31-38; Wilgri 14:1-3.

▪ Bõe yĩng tɩ tʋm-tʋmdbã no-koeemd sɩd yaa yel-lingdem?

▪ No-koeemdã sẽn wa n yikã, wãn to la a Zezi welg yellã?

▪ Kaoolã a Zezi sẽn maan ne a karen-biisã pidsda bõe?

▪ Tõog paalg bʋg la a Zezi kõ-yã la a yõod taa zĩ-bʋgo?

▪ Bas-yard sẽn loog bʋg la a Pɩɛɛr tall-yã, la a Zezi yeelame tɩ bõe?

▪ Bõe yĩng tɩ noy nins a Zezi sẽn kõ potmaan la rɩɩb ne waoog zãabã wɛɛngẽ wã pa yembr ne b rãmb nins a sẽn da kõ pĩndã?