Zãmsg a 2
Wẽnnaam yaa ãnda?
Wẽnnaam sɩd-sɩdã yaa ãnda, la a yʋʋr la a bõe? (1, 2)
Yĩn-bʋg buud la a tara? (3)
Bõe ne bõe n yaa kãsems a nengẽ? (4)
Tõnd segd n tũnuga ne bõn-naands bɩ yimaas rãmb la pigs n balem Wẽnnaam bɩ? (5)
Bõe ne bõe n tõe n sõng-d tɩ d bãng Wẽnnaam? (6)
1. Nebã pʋʋsda bõn-yood wʋsgo, la Biiblã yetame tɩ Wẽnnaam sɩd-sɩdã yaa a ye bala. Yaa yẽ n naan bũmb nins fãa sẽn be saasẽ la sẽn be tẽngã zugã. Sẽn yaa yẽ n kõ tõnd vɩɩmã yĩnga, yẽ a ye bal la d segd n balme.—1 Korẽnt dãmba 8:5, 6; Wilgri 4:11.
2. Wẽnnaam tara naam yʋy wʋsgo, la a tara yʋ-peell a ye bala. Yʋ-peell kãng yaa ZEOVA. Biibl dãmb wʋsg pʋsẽ, b ledga Wẽnnaam yʋʋrã ne naam yʋy wala ZUSOABA bɩ WẼNNAAM. La bãng-y tɩ b sẽn da wa n gʋls Biiblã n sa wã, yʋʋr ning sẽn yaa Zeova wã ra bee a pʋgẽ sẽn dat n ta naoor 7000!—Yikri 3:15, NW; Yɩɩl Sõamyã 83:18, NW; Wilgri 19:1.
3. A Zeova tara yĩnga, la a yĩngã pa wõnd tõnd rẽndã ye. Tõnd pa tõe n yã Wẽnnaam ye. (Zã 4:24) A yĩngã sẽn yaa to-to wã yɩɩda tõnd rẽndã zĩig sẽn zãre. Ninsaal baa a ye zɩ n yã Wẽnnaam ye. A Zeova bee saasẽ, la a nee bũmba fãa. (Yɩɩl Sõamyã 11:4, 5; Zã 1:18) La vʋʋsem sõngã yẽ yaa bõe? Pa ned ye. Yaa pãng ning Wẽnnaam sẽn tar n tʋmdẽ wã.—Yɩɩl Sõamyã 104:30.
4. Biiblã wilgda tõnd a Zeova sẽn yaa a soaba. A wilgdame t’a Zeova yaa nonglem, tɩrlem la yam soaba, la a paasdẽ t’a tara pãnga. Bõn-kãensã a naasã n yaa kãsems a nengẽ. (Tõodo 32:4; Zoob 12:13; Ezai 40:26; 1 Zã 4:8) Biiblã yetame t’a le yaa nimbãan-zoɛta, sõmblem soaba, sugr soaba, kõata, la sũ-mar soaba. Tõnd segd n dɩka a togs-n-taar wa kom-sakdse.—Efɛɛz rãmba 5:1, 2.
5. Tõnd segd n wõgemdame n pʋʋs bõn-naandse, yimaas rãmb bɩ pigs bɩ? Ayo! (Yikri 20:4, 5) A Zeova yeelame tɩ yaa yẽ bal la tõnd tog n balme. A pa na n dɩk a ziirã n kõ ned bɩ bũmb a to ye. Bõn-naandsã pa tõe n sõng tõnd ye.—Yɩɩl Sõamyã 115:4-8; Ezai 42:8.
6. Bõe la d tõe n maan n bãng Wẽnnaam n paase? Pipi, yaa d sẽn na n get bũmb nins a sẽn naanã, la d tagsd n get bõn-kãens sẽn zãmsd tõnd bũmb ning Wẽnnaam zugã. Bũmb nins Wẽnnaam sẽn naanã wilgda tõnd t’a tara pãng la yam wʋsgo. D sã n ges bũmb nins fãa a sẽn naanã, d nee a nonglmã. (Yɩɩl Sõamyã 19:2-7; Rom dãmba 1:20) Bũmb a yiib-n-soab d sẽn tõe n maan n bãng Wẽnnaam, yaa Biiblã zãmsgo. Yaa Biiblã pʋgẽ la d tõe n bãng Wẽnnaam sẽn yaa a soabã sõma n yɩɩda. Ye yaa Biiblã pʋgẽ la Wẽnnaam wilgd tõnd a sẽn na n maan bũmb ning beoog-daarã, la a sẽn dat tɩ tõnd maan bũmb ninga.—Amos 3:7; 2 Tɩmote 3:16, 17.
[Foto rãmba, seb-neng a 5]
Wẽnnaam sẽn naan bũmb ninsã, n paas Biiblã sõngda tõnd tɩ d bãng-a