Zãmsg a 3
A Zezi Kirist yaa ãnda?
Bõe yĩng tɩ b boond a Zezi tɩ Wẽnnaam “Bi-kãsenga”? (1)
Bõe yĩng tɩ b boond-a tɩ “Gomdã”? (1)
Bõe yĩng t’a Zezi wa tẽng zug n yɩ ninsaala? (2-4)
Bõe yĩng t’a maan yel-soalma? (5)
Bõe la a Zezi na n maan ka la bilfu? (6)
1. Sẽn deng t’a Zezi wa tẽng zugu, a ra bee saasẽ n yaa malɛka. Yaa yẽ la Wẽnnaam naan pipi, rẽ n so tɩ b boond-a tɩ Wẽnnaam “Bi-kãsenga.” (Kolos rãmba 1:15; Wilgri 3:14, Sebr Sõngo) A Zezi bal n yaa Wẽnnaam Biribl ning a sẽn naan a toore. A Zezi sẽn da wa n nan pa wa tẽng zugã, a ra bee saasẽ n da yaa “tʋʋm-mita.” Yaa ne yẽ maasem la a Zeova maan bõn-yood a taabã sẽn be saasẽ la tẽngã zugã. (Yelbũna 8:22-31; Kolos rãmba 1:16, 17, Sebr Sõngo) A leb n yɩɩ Wẽnnaam koe-taasd sẽn yaa kãsenga. Yaa rẽ yĩng la b sẽn boond a Zezi tɩ “Gomdã.”—Zã 1:1-3; Wilgri 19:13.
2. Wẽnnaam sẽn wa n na n tʋm a Biriblã tẽngã zugã, a rɩka a vɩɩmã n tɩ ning a Maari pʋgẽ wã. Rẽ n so t’a Zezi pa tall ba sẽn yaa ninsaal ye. Yaa rẽ la sẽn kɩt t’a pa rog ne yel-wẽndã. Bʋʋm a tãab yĩng n kɩt tɩ Wẽnnaam tʋm a Zezi tẽngã zugu: 1) Yaa sẽn na yɩl n zãms tõnd sɩdã Wẽnnaam zugu (Zã 18:37), 2) yaa sẽn na yɩl n tall burkĩnd hakɩk Wẽnnaam taoore, tɩ yɩ mak-sõng tõnd sẽn segd n tũ (1 Pɩɛɛr 2:21), la 3) yaa sẽn na yɩl n kõ a vɩɩmã tɩ yɩ maoong n yiis tõnd yel-wẽndã ne kũumã yembd pʋgẽ. Bõe yĩng tɩ woto ra yaa tɩlae?—Matɩe 20:28.
3. Pipi rao a Ãdem sẽn pa sak Wẽnnaam noorã yĩnga, a maana “yel-wẽnde.” Rẽ n so tɩ Wẽnnaam kao a bʋʋd n wilg t’a segd n kiime. (Sɩngre 3:17-19) A ra pa ye tõe n vɩɩmd tɩ zems ne Wẽnnaam noyã ye. Rẽnd a ra pa le zems zãng ye. Bilf-bilfã a wa n kʋʋlame n ki. A Ãdem yel-wẽndã longa a kamba fãa. Yaa rẽ yĩng la tõnd me sẽn lʋɩt bãase, n kʋʋndẽ, la d kiidẽ wã. Wãn to la b ra tõe n fãag ninsaalbã ne yel-kãensã?—Rom dãmba 3:23; 5:12.
4. A Zezi ra yaa ninsaal sẽn zems zãng wala a Ãdem kɛpɩ. La a Zezi pa maan wala a Ãdem sẽn kɩɩsã ye. A ra sakda a Zeova noyã kɛpɩ, baa ne makr ning sẽn yɩ kãseng n yɩɩgã pʋgẽ. Rẽ n kɩt t’a Zezi tõog n dɩk a ninsaal vɩɩmã sẽn zems zãngã n kõ tɩ yɩ maoong n yao a Ãdem yel-wẽndã yĩnga. Yaa rẽ la b sẽn boond Biiblã pʋgẽ tɩ ‘yaood’ bɩ ‘rondã.’ A Ãdem kambã ra tõeeme masã n paam b mens ne yel-wẽnã taal sẽn wat ne kũumã. Neb nins fãa sẽn na n tẽ a Zezi wã tõe n paama b yel-wẽnã sugri, la b paam vɩɩm sẽn-kõn-sa wã.—1 Tɩmote 2:5, 6; Zã 3:16; Rom dãmba 5:18, 19.
5. A Zezi sẽn da wa n be tẽng zugu a maana yel-soalma. A sãooga bãad dãmba, n dɩlg kom sẽn tar-b rãmba, la a sigs seb-kãsemse. A vʋʋga kũum menga. Bõe yĩng t’a maan yel-soalma? 1) Nebã sẽn da namsdã nimbãaneg yõk-a lame, t’a ra tʋll n sõng-ba. 2) A yel-soalmã kõo kaset t’a yaa Wẽnnaam Biribla. 3) Yel-soalem kãens leb n wilga a sẽn na n maan bũmb ning n kõ sakdbã, a sã n wa lebg tẽngã gill Rĩmã.—Matɩe 14:14; Mark 2:10-12; Zã 5:28, 29.
6. A Zezi kiime la Wẽnnaam vʋʋg-a lame t’a lebg malɛka, n leb saasẽ. (1 Pɩɛɛr 3:18, NW) Rẽ poore, Wẽnnaam wa n kɩtame t’a lebg Rĩmã. Ka la bilfu a Zezi na n kɩtame tɩ namsg la wẽng buud fãa sa tẽngã zugu.—Yɩɩl Sõamyã 37:9-11; Yelbũna 2:21, 22.
[Foto rãmba, seb-neng a 7]
A Zezi sẽn wa tẽng zugã, a zãmsa nebã, a maana yel-soalma, la a rɩk a vɩɩmã n kõ tõnd yĩnga