Zãmsg 14

A Zeova Kaset rãmbã sẽn sigl to-to

A Zeova Kaset rãmbã sẽn be rũndã-rũndã wã siglg sɩnga wakat bʋgo? (1)

Wãn-wãn la a Zeova Kaset rãmbã maand b tigissã? (2)

Wãn to la b paamd ligd n get b tʋʋmdã depãens rãmb yelle? (3)

Ãnd dãmb n lʋɩt taoor tiging fãa pʋgẽ? (4)

Tigis-kãsems bʋs la b maand yʋʋmd fãa? (5)

Tʋʋm-bʋg la b maand b tʋʋmdã biru kãsengẽ wã la b tʋʋm wilẽ wã? (6)

1. A Zeova Kaset rãmb nins sẽn be rũndã-rũndã wã siglg sɩnga yʋʋmd 1870 poor bilfu. Sɩngrẽ wã, b ra boond-b lame tɩ Biiblã Zãmsdba. La yʋʋmd 1931 wã, b tika Gʋlsg Sõamyã zug n yãk yʋʋr sẽn yaa: a Zeova Kaset rãmbã. (Ezai 43:10, NW) B sɩngrẽ wã tɩ b sõorã ra pa zem baa fɩ ye. La masã b sõorã fɩɩgame n lebg neb milyõ rãmb sẽn moond koe-noogã ne yẽesem, sẽn yɩɩd tẽns 230 pʋsẽ.

2. A Zeova Kaset rãmbã tigims wʋsg tigimda taab naoor a tãab semen fãa. B boonda y fãa tɩ y wa tigis-kãensã. (Hebre dãmba 10:24, 25) Bũmb nins b sẽn zãmsd b tigissẽ wã tika Biiblã zugu. B tigisg fãa sɩngrẽ la a baasgẽ, b pʋʋsdame. B tigiss wʋsg sasa, b yɩɩndame n pẽgd Wẽnnaam. (Efɛɛz rãmba 5:18, 19) B tigissẽ wã kõom yaa zaalem, la b pa maand ligd-lobr me ye.—Matɩe 10:8.

3. Tigims wʋsg neb tigimda taab Rĩungã Rotẽ. Naoor wʋsgo, ro-kãens yaa rot sẽn zems bala. Yaa Kaset rãmb n kõ b mens ne yamleoog n me-ba. Yãmb pa na n yã pigs la pʋʋsg bõn-naands b Rĩungã Rotẽ ye. Yaa ligd nebã sẽn kõt ne yamleoog la b tar n maand depãens rãmbã. Kũun kogend n be Rĩungã Rotẽ tɩ sẽn tar-b kũun n dat n kõ wã tõe n ning be.—2 Korẽnt dãmba 9:7.

4. Kãsem dãmb bɩ yel-gɛtb n be tiging fãa pʋgẽ. Yaa bãmb n lʋɩt taoor n zãmsd nebã. (1 Tɩmote 3:1-7, Sebr Sõngo; 5:17) Kãsemb sõngdb n be, n sõngd kãsem dãmbã b tʋʋmdã pʋgẽ. (1 Tɩmote 3:8-10, 12, 13, Sebr Sõngo) Nin-kãensã pa yɩɩd tigingã neb a taabã ye. (2 Korẽnt dãmba 1:24) B pa kõt-b naam yʋy ye. (Matɩe 23:8-10) B pa tar fu-yerdɩ sẽn welgd-b ne neb a taabã ye. B pa yaood-b b tʋʋmdã yĩng me ye. Kãsem dãmbã geta tigingã neb tẽeb ratem yell ne yamleoogo. Yel-pakr wakate, b tõe n kõo tigingã neb belsg la saglse.—Zak 5:14-16; 1 Pɩɛɛr 5:2, 3.

5. Yʋʋmd fãa, a Zeova Kaset rãmbã maanda tigis-kãsems me. Sasa kãense, tigims wʋsg tigimda taab n paamd zãmsg b sẽn tik Biiblã zug n segl tɩ yaa toor zalle. Tigis-kãsengẽ fãa, karen-bi-paals n deegd lisgu.—Matɩe 3:13-17; 28:19, 20.

6. A Zeova Kaset rãmbã siglgã biru kãseng bee Niu Yorke. Yaa be la Siglgã taoor lʋɩtb Sull sẽn yaa kãsem dãmb sẽn tar minimã be, n get tigimsã sẽn be dũniyã gill zugã yelle. Tʋʋm wil sõor sẽn yɩɩd bãmb 100 me n be dũniyã gill zugu. Zĩ-kãense, yamleoog tʋm-tʋmdb n sõngd n yiisd sɛb sẽn tik Biiblã zugu, la b toond-b tigimsã. Siglgã taoor lʋɩtb leb n wilgda b sẽn segd n sigl la b moon koɛɛgã to-to. Bõe yĩng tɩ y pa na n yãk wakat n tɩ ges tʋʋmd will ning sẽn be yãmb tẽngẽ wã?