Bõe yĩng tɩ Wẽnnaam sigl a nin-buiidã?

1. Bõe yĩng tɩ Wẽnnaam da sigl pĩnd Israyɛll buudã?

Wẽnnaam da yãka a Abrahaam yagensã tɩ b lebg buud a sẽn sigli, n kõ-b noy la a bool-b tɩ Israyɛlle. Bãmb n da segd n ges tɩ tũudum hakɩkã ra sãame, la tɩ ned ra tek Wẽnnaam goamã ye. (Yɩɩl Sõamyã 147:19, 20) Woto, ne Israyɛll maasem, dũniyã buud fãa neb ra tõe n paama barka.​—Karm-y Sɩngr 22:18.

Wẽnnaam da yãka Israyɛll buudã n dat tɩ b yɩ a kaset rãmba. B kibarã sõngda tõnd tɩ d bãng Wẽnnaam noyã tũub sẽn nafd ned to-to. (Tõodo 4:6) Dẽnd ne Israyɛll maasem, buud a taabã neb ra tõe n bãnga Wẽnnaam sɩd-sɩdã.​—Karm-y Ezai 43:10, 12.

2. Bõe yĩng tɩ Wẽnnaam sigl kiris-neb hakɩkã?

Sẽn wa n beẽ, Israyɛll kɩɩsa Wẽnnaam n kong a lohormã, t’a kɩt tɩ kiris-neb tigingã ledg-ba. (Matɩe 21:43; 23:37, 38) Lebga kiris-neb hakɩkã n deeg pĩnd Israyɛllã zĩigẽ, n yaa a Zeova kaset rãmba.​—Karm-y Tʋʋm 15:14, 17.

A Zezi sigla a karen-biisã sẽn na yɩl tɩ b moon koɛɛgã, la b sõng buud fãa neb tɩ b lebg a karen-biisi. (Matɩe 10:7, 11; 24:14; 28:19, 20) D sẽn vɩ dũniyã yaoolem wakatã, tʋʋm-kãngã kolga saabo. A Zeova kɩtame tɩ buud toor-toor neb milyõ rãmb naag taab tũudum hakɩkã pʋgẽ. A buud zɩ n zĩnd ye. (Wilgri 7:9, 10) Wẽnnaam sigla kiris-neb hakɩkã sẽn na yɩl tɩ b sõngd taab la b kengd taab raoodo. Dũniyã gill zugu, b sẽn zãmsd bũmb nins b tigimsã pʋsẽ wã fãa yaa a ye.​—Karm-y Hebre dãmb 10:24, 25.

3. A Zeova Kaset rãmbã rũndã-rũndã siglgã sɩnga wãn to?

Yʋʋmd 1870 wã sẽnese, neb sul-bil sẽn da tigimd taab n zãmsd Biiblã wa n bãnga bũmb kẽer Biiblã sẽn yete, tɩ nebã yaool n da bas rẽ tẽeb daar zãra. B bãngame t’a Zezi lugla kiris-nebã tigingã koɛɛgã mooneg yĩnga. Woto kɩtame tɩ b sigl koɛɛgã moonego, n na n moon-a dũniyã gill zugu. Yʋʋmd 1931 wã tɛka, b pʋda b mens t’a Zeova Kaset rãmba.​—Karm-y Tʋʋm 1:8; 2:1, 4, 11; 5:42.

4. A Zeova Kaset rãmbã sigla wãn-wãna?

Pipi kiris-nebã wakatẽ, b ra tara tʋm-tʋmdb la kãsem-dãmb sẽn da be Zerizalɛm n get tigimsã sẽn be zĩis toor-toorã yelle. B sullã ra sak n deegame tɩ yaa a Zezi n yaa tigingã taoor soaba. (Tʋʋma 16:4, 5) Rũndã-rũndã me, a Zeova Kaset rãmbã tara taoor-lʋɩtb sulli, sẽn yaa yel-gɛtb sẽn tar minim. Sul-kãngã n get a Zeova Kaset rãmbã biru rãmbã yelle, n kɩtdẽ tɩ b yiisd sɛb Biiblã zãmsg yĩnga, la b lebgd seb-kãens buud-goam sõor sẽn yɩɩd 600 pʋsẽ n kõt nebã. Woto kɩtame tɩ b tõogd n wilgd tigimsã sẽn yɩɩd 100 000 sor Wẽnnaam tũubã pʋgẽ, la b kengd b tẽebã. Tiging fãa pʋgẽ, b yãkda rap sẽn kõt mak-sõng tɩ b yaa kãsem-dãmb bɩ yel-gɛtba, n get Wẽnnaam nebã yell ne nonglem.​—Karm-y 1 Pɩɛɛr 5:2, 3.

A Zeova Kaset rãmbã sigla sõma n moond koe-noogã la b sõngd neb tɩ b lebgd a Zezi karen-biisi. D moonda zak-zak wa tʋm-tʋmdbã. (Tʋʋma 20:20) Ned ning fãa sẽn date, d zãmsd-a-la Biiblã. La d pa nin-buiid sẽn sigl sõma bal ye. D yaa wa zak a ye neba, t’a Zeova yaa d Ba sẽn nong-do. D fãa yaa saam-biisi, n dat taab neere. (2 Tesalonik rãmba 1:3) A Zeova nin-buiidã tara sũ-noogo, b sẽn sigl sõma n maand a raabã la b sõngd neb a taabã yĩnga.​—Karm-y Yɩɩl Sõamyã 33:12; Tʋʋm 20:35.