B siglgã sẽn be dũniyã gill zugã la b tʋʋmdã
B TŨNUGDA ne yɛl buud toor-toor n get kasetã kũun yell sẽn yɩɩd tẽns 230 pʋsẽ. Sor-wilgrã fãa yita Siglgã Taoor lʋɩtb sullẽ sẽn be dũni gill yẽgrẽ wã Bruklin sẽn be Niu Yorkã. Siglgã Taoor lʋɩtb sull tʋmda neb yʋʋmd fãa dũniyã gill babs toɛy-toɛyẽ. B kẽngda be n tɩ ges Lagem Taabã tʋʋm wil taoor dãmb sẽn be bab-kãens pʋsẽ wã. Lagem Taabã tʋʋm wilẽ, tʋʋm wil sul sẽn zems neb a tãab n digd a yopoe n be be, n get tʋʋmdã yell tẽns nins b sẽn bobl-bã pʋsẽ. Tʋʋm-wil kẽer tara sɛb yiisg roto, tɩ kẽer tar sɛb yiisg masĩn dãmb sẽn tʋʋl wʋsgo. B welgda tẽngã bɩ tẽn-kãens tɩ yaa tigims gĩn sula, tɩ b welg tigims gĩn sulã tɩ yaa tigims gĩna. Tigims gĩnd fãa tara sẽn zems tigims 20. Tigims gĩnd sull yel-gɛtã kaagda tigims gĩnã sẽn be a tigims gĩnd sullã pʋgẽ n pʋgd taaba. Tigis-kãsems a yiib la b maand yʋʋmd fãa, tigims gĩnd fãa yĩnga. Tigims gĩnd yel-gɛt me n be. A kaagda tiging fãa sẽn be tigims gĩndã pʋgẽ wã naoor a yiib yʋʋmd pʋgẽ. A sõngda Kaset rãmbã n sigl koe-noogã mooneg tʋʋmd tɩ b moon koɛɛgã mooneg zĩig ning b sẽn kõ tiging kãngã wã pʋgẽ.
Yaa tiging fãa ne a Rĩung Roogo. Yaa be la b koe-noogã mooneg yẽgr yãmb sakã pʋgẽ. Tiging fãa tara a mooneg zĩig a sẽn so. B pasda zĩ-kãng tɩ lebg mooneg zĩ-kɩdse. B rɩkda zĩ-kãens n kõ Kaset rãmba, tɩ b modgd n na n tɩ kaag zak fãa pʋgẽ neba, n sõs ne-ba. Tiging fãa tara kaset rãmb a wãn n digd bãmb 200, la a tar kãsem dãmb sẽn get tʋʋm toɛy-toɛy yelle. Koe-moond fãa tara yõod wʋsg a Zeova Kaset rãmbã siglg pʋgẽ. Kaset rãmba fãa moonda Wẽnnaam Rĩungã koe-noogo. B bee dũni gill tʋʋmdã yẽgrẽ wã woo, b bee tʋʋm-willẽ wã tɩ yaa tigimsã pʋsẽ me, b fãa moondame.
B wat n baasame n taas moonegã tʋʋm-kãng kɩbarã dũni gill tʋʋmdã yẽgrẽ, la Annuaire sẽn yit yʋʋmd-yʋʋmdã pʋgẽ la b yiisd kɩba-kãngã. Sẽn paase, b yiisda kɩbarã yʋʋmd fãa yʋʋm-vẽkr kiuug pipi daar Gũusg Gasgã pʋgẽ. Seb-kãensã b yiibã togsda tʋʋm nins b sẽn maan yʋʋmd fãa wã. Tʋʋm-kãng yaa kasetã b sẽn kõ a Zeova la a Rĩungã Kirist sẽn dɩt naam a pʋgẽ wã zugã. Yʋʋm sẽn pa kaoosã pʋgẽ, yaa sẽn zems Kaset rãmb la neb sẽn nong sɩdã 14 000 000 n wa a Zezi kũumã Tẽegr b sẽn maand yʋʋmd fãa wã. Yaa lɛɛr dãmb sẽn yɩɩd 1 000 000 000 la a Zeova Kaset rãmbã rɩkd yʋʋmd fãa n moond koe-noogã, tɩ sẽn yɩɩd neb 300 000 reegd lisgu. Sɛb b sẽn basd ne nebã yaa bãmb milyõ kobse.