Sʋgsg neb nins sẽn dat n bãng sɩdã sẽn nong n maandẽ

Wẽnnaam sã n yaa nonglem, bõe yĩng t’a bas tɩ wẽnemã beẽ?

WẼNNAAM basa wẽnemã tɩ beẽ tɩ neb milyõ rãmb sẽn be tẽngã zugã minim n maand wẽngã ne yamleoogo. Wala makre, b yikda zaba, n lobd bõmb rãmb kamb zutu, n sãamd tẽngã la b wat ne kom. Neb milyõ rãmb yũuda sɩgaar n paamd fulfuud bãag b sẽn boond tɩ kãnsɛɛre, n yood tɩ taoor bãas yõkd-ba, n yũud rãam tɩ loog n paamd sãoor bãaga, n paas yɛl a taaba. Nin-kãensã sɩd pa rat tɩ wẽnemã fãa sa ye. B ratame bal tɩ b yiis wẽnemã biisi. B sã n wa kẽebd b sẽn bʋdã b kaasda woto: “Bõe yĩng tɩ yaa mam zug la yel-kãngã wa-yã?” La b ningd Wẽnnaam taal zaalem. Rẽ wɛɛngẽ Yelbũna 19:3 yetame: “Ned yalemd n sãamd a yell t’a sũur yaool n sãamd ne Zusoabã.” La Wẽnnaam sã n gɩdg b wẽngã maanego, b na n kɩɩsame n yeel tɩ b weoogd-b lame!

Bʋʋm-kãseng ning sẽn kɩt t’a Zeova bas tɩ wẽngã beẽ wã yaa sẽn na yɩl n leok a Sʋɩtãan no-baoodmã. A Sʋɩtãan Munaafɩɩk yetame tɩ Wẽnnaam pa tõe n ning ninsaalb tẽng zug sẽn na n kell n sak-A makr pʋgẽ ye. (Zoob 1:6-12; 2:1-10) A Zeova basa a Sʋɩtãan t’a ket n beẽ, sẽn na yɩl t’a paam sor n wilg a sẽn yetã sã n yaa sɩd bɩ pa sɩda. (Yikri 9:16) Masã wã, a Sʋɩtãan ket n wata ne toodo, n tusd nebã tɩ b kɩɩsd Wẽnnaam, n modgd n na n wilg t’a sẽn yetã yaa sɩda. (Wilgri 12:12) Baasg zãnga a Zoob kell n talla a burkĩndã. Yɩɩ woto me ne a Zezi. Kiris-neb hakɩkã me maanda woto rũndã-rũndã.—Zoob 27:5, Sebr Sõngo; 31:6; Matɩe 4:1-11; 1 Pɩɛɛr 1:6, 7.

M nongẽ lame n tẽ tẽng zug arzãn tɩ nebã vɩ be wakat sẽn pa sate, la woto pa neer wʋsg ne a na tõog n yɩ sɩda?

Sã n yaa ne Biiblã pa woto ye. Tõe n sɩd wõnda bõn-kãngã yaa neer wʋsg ne a na tõog n yɩ sɩda, ãdem-biisã sẽn nams yʋʋm tusa wã yĩnga. A Zeova sẽn naan tẽngã a yeelame tɩ ninsaalbã pids-a ne rap la pagb sẽn yaa nin-tɩrse, sẽn da na n ges tɩɩsã la rũmsã yelle, la b zã tẽngã t’a kell n yɩ neer la b ra sãam-a ye. (Ges-y seb-neng 12 la 17.) Arzãn kãngã b sẽn kãabã pa neer wʋsg ne a na tõog n yɩ sɩd ye, la yaa masã sũ-sãamsã n yaa wẽns wʋsg ne b na ket n beẽ. Yaa Arzãnã n na n ledg sũ-sãamsã.

Wãn to la m tõe n leok neb nins sẽn gomd gom-yaals n yetẽ tɩ Biiblã yaa soalma, la t’a pa zems ne bãngr hakɩkã?

Kãab kãensã tẽebã pa tẽeb sẽn ka tikr ye. “Kelgr wata ne tẽebo.” D sã n zãmsd Wẽnnaam Gomdã, yam ning sẽn be be wã lebgda vẽeneg ne-do tɩ d tẽebã bɩtẽ.—Rom dãmba 10:17; Hebre dãmba 11:1.

Biiblã gʋlsg wẽndẽ dabood vaeesg wilgda sõma-sõma tɩ yɛl nins yell Biiblã sẽn goma yaa sɩd takɩ. Bãngr hakɩkã pa kɩɩsd Biiblã ye. Yel-nins sẽn pʋgda ra bee Biiblã pʋgẽ sẽn kaoos wʋsg tɩ dũniyã bãngdb nan pa bãng-b ye: Tẽngã naaneg yɛl toɛy-toɛy sẽn pʋg taab to-to wã, tẽngã sẽn yaa gilgã, a sẽn be vɩʋʋgẽ wã n pa zao bũmb zugã, la liuuli wã so-toakã.—Sɩngr sak a 1; Ezai 40:22; Zoob 26:7; Zeremi 8:7.

Bãngr-goamã pidsg wilgdame tɩ tũu ne Wẽnnaam vʋʋsem sõngã vẽnegr tɩ b gʋls Biiblã. A Daniɛll reng n togsa dũniyã pãn-soaadb yikr la b lʋɩɩse, n paas wakat ning Mesi wã sen da na n wa, la b sẽn na n kʋ-a wã. (Daniɛll sak a 2, a 8; 9:24-27) Rũndã-rũndã, bãngr-goam a taab n ket n pidsdẽ, n wilgdẽ tɩ yaa ‘yaoolem wakatã’ la woto. (2 Tɩmote 3:1-5; Matɩe sak 24) Ninsaal pa tõe n deng n togs yɛl woto ye. (Ezai 41:23) Sẽn na yɩl n sɩd bãng n paas tɩ yaa woto, ges-y seb-kãensã: La Bible : Parole de Dieu ou des hommes ? la Y a-t-il un Créateur qui se soucie de vous ?, a Zeova Kaset rãmbã sẽn yiisi.

Wãn to la m tõe n bãng n leok sʋgsg nins b sẽn maand Biiblã zugã?

Y segd n zãmsa Biiblã la y tags a zug sõma, la y kot Wẽnnaam vʋʋsem sõngã sor-wilgri. (Yelbũna 15:28; Luk 11:9-13) Biiblã yetame: “Ned sã n be yãmb sʋk t’a yam paoodẽ, bɩ a kos Wẽnnaam sẽn kõt neba fãa ne yamleoog n ka lengdẽ wã, la a na paam.” (Zak 1:5) Sẽn paase, sɛb sẽn sõngd ne Biiblã zãmsg n be sẽn zems ne vaeesgo. Naoor wʋsgo, sõngr sẽn yit neb a taabã nengẽ yaa tɩlae wa a Filip sẽn zãms Etiopi raoã. (Tʋʋma 8:26-35) A Zeova Kaset rãmbã zãmsda Biiblã zaalem ne neb nins sẽn datã b yiya. Yãmb me sã n dat bɩ y kos tɩ b wa zãms ne-yã.

Bõe yĩng tɩ neb wʋsg kɩɩsd a Zeova Kaset rãmbã la b yet maam tɩ m da zãms Biiblã ne-ba?

A Zezi sega gɩdgr a koɛɛga mooneg pʋgẽ, la a yeelame t’a karen-biisã me na n sega gɩdgre. Neb kẽer sũy sẽn yɩ noog ne a Zezi zãmsgã, tũudmã taoor dãmb yeel-b-la woto: “Yãmb me saka belgr la? Ned bee kãsem dãmba bɩ Fariziẽ dãmba sʋk n tẽed bãmb bɩ?” (Zã 7:46-48; 15:20) Neb nins sẽn sagend yãmb tɩ y ra zãms Biiblã ne Kaset rãmbã yaa neb sẽn pa rɩ kɩbar sõma, bɩ neb sẽn yãgd n sãbsd tõndo. Zãms-y Biiblã ne Kaset rãmbã n ges y toore, y Biiblã bãngr sã n na n paasame bɩ a sã n pa na n paase.—Matɩe 7:17-20.

Bõe yĩng tɩ Kaset rãmbã tʋgd n moond neb nins sẽn zoe n tar b tũudmã?

B sẽn maand woto wã, b tũuda a Zezi makre. A kẽnga Zʋɩf rãmbã nengẽ. Zʋɩf rãmbã ra tara tũudum, la ne manesem wʋsgo, tũudum kãng lakame n bas Wẽnnaam Gomdã. (Matɩe 15:1-9) Tẽnsã fãa tara tũudum toor-toore. Tõe n yaa kiris-nedemd buudu, bɩ tũudum a to. Tara yõod wʋsg tɩ nebã sẽn tẽed bũmb ninsã zems ne Wẽnnaam mengã Gomde. La Kaset rãmbã sẽn maood n na n sõng-b tɩ b maan woto wã wilgdame tɩ b nonga b taabã.

Kaset rãmbã tẽedame tɩ bãmb tũudmã bal n yaa sɩd bɩ?

Ned ning fãa sẽn pa reemd ne a tũudum segd n tagsame t’a tũudmã yaa sɩda. Sã n pa rẽ, bõe yĩng t’a na n be a pʋgẽ? B sagenda kiris-nebã woto: “Bɩ y mak bũmb fãa; la sẽn yaa neere, bɩ y gãd kãn-kãe.” (1 Tesalonik rãmba 5:21) Ned fãa segdame n bãng vẽeneg t’a tẽebã tika Gʋlsg Sõamyã zugu, bala yaa tẽeb hakɩk a yembr bal n be. Efɛɛz rãmba 4:5 wilgda woto, n yetẽ tɩ yaa “Zusoab a yembr bala, la tẽeb a yembr bala la lisg a yembr bal n be.” A Zezi pa sak tagsg ning nebã sẽn tar rũndã-rũndã sẽn yet tɩ yaa soay wʋsgo, tũudum wʋsg n be, la tɩ b fãa tar n debda fãagr zĩigẽ wã ye. Sẽn yaa lebende a yeelame: “Zak noor sẽn yaa sẽka la sor sẽn yaa bãanega rabda vɩɩm zĩigẽ, la a yãtb yaa bilfu.” A Zeova Kaset rãmbã tẽedame tɩ b yãa so-kãngã. Sã n da paẽ woto, b ra na n baoa a to.—Matɩe 7:14.

B tẽedame tɩ yaa bãmb bal n na n paam fãagr bɩ?

Ayo. Neb milyõ rãmb sẽn vɩɩmd yʋʋm kob-gĩn nins sẽn loogã, n da pa a Zeova Kaset rãmb na n vʋʋgame n tõog n paam vɩɩmã. Neb wʋsg sẽn vɩ masã tõe n saka sɩdã la tɩrlmã tɩ ‘to-kãsengã’ nan pa wa, n paam fãagre. Sẽn paase, a Zezi yeelame tɩ d ra kao taab bʋʋd ye. Tõnd geta nin sẽn ne wã, la Wẽnnaam geta sũurã. A nee yɛlã tɩ zems takɩ, la a kaooda bʋʋdã ne nimbãan-zoeere. A rɩka bʋʋdã n ning a Zezi nugẽ, pa tõnd nugẽ ye.—Matɩe 7:1-5; 24:21; 25:31.

B gũudame tɩ neb nins sẽn wat a Zeova Kaset rãmbã tigissẽ maan ligd kũun bɩ?

Sã n yaa ne ligdã kũun wɛɛngẽ, tʋm-tʋmd a Poll yeelame: “Bɩ ned kam fãa kõ wa sẽn zems a sẽn da tags a sũur pʋgẽ, ka ne neng gãnengo walla modgr ye, tɩ bõe, Wẽnnaam nonga ned ninga sẽn kõt ne sũ-noogo.” (2 Korẽnt dãmba 9:7) A Zeova Kaset rãmbã Rĩung Rotẽ la b tigis-kãsems rotẽ, b zɩ n bõos ligd ye. Kogend la b ningd zĩis sẽn zemsẽ, tɩ ned ning fãa sẽn dat n kõ ligd tõe n ning be. Ned ba a yembr pa mi neb a taabã sẽn kõt bũmb ninga, bɩ b sã n kõta bũmb ye. Kẽer tõe n kõome n yɩɩg b taaba. Tõe tɩ kẽer pa tõog n kõ bũmb ye. A Zezi wilga tagsg ning sẽn zemsã, a sẽn wa n gom laogã ningr koglg sẽn be Zerizalɛm wẽn-doogẽ wã la neb nins sẽn ningd kũunã yellã: Yaa ned sẽn tõe n kõ tɛka, la yam ning sẽn tusd-a t’a kõtẽ wã n tar yõodo, la pa ligdã waooglem ye.—Luk 21:1-4.

Mam sã n lebg a Zeova Kaset soaba, mam me segd n moona koe-noogã wa bãmb bɩ?

Ned sã n tẽed tẽng zug Arzãnã kãabg Kirist Rĩungã naam wakat sõma-sõma fãa, a na n dat n togs-a-la neb a taabã. Na n yɩɩ woto me ne yãmba. Yaa koe-noogo!—Tʋʋma 5:41, 42.

Y sã n maan woto, y wilgda ne manesem sẽn tar pãng tɩ y ya a Zezi Kirist karen-biiga. Biiblã pʋgẽ, b boonda a Zezi tɩ “kaset soab sẽn yaa tɩrga la sɩda.” A sẽn da wa n be tẽng zugu, a mooname n yeele: “[Saasẽ, NW ] soolem kolgame,” la a tʋma a karen-biisã tɩ bãmb me tɩ moon woto. (Wilgri 3:14; Matɩe 4:17; 10:7) Kaoosg zugẽ, a Zezi kõo a karen-biisã noor woto: “Bɩ y kẽng n maan neba buud fãa tɩ b yɩ mam karem-biisi . . . La [y] zãms bãmb[a].” A reng n togsame me tɩ sẽn deng saabã “Wẽnnaam soolem koe-noog kãngã na n moona dũniyã tɛk fãa tɩ yɩ kaset buud fãa yĩnga.”—Matɩe 24:14; 28:19, 20.

Soay wʋsg la d tõe n tũnug ne n moon koe-no-kãngã. Sõsg ne zo-rãmb la mitins nong n pakda sor tɩ d maan woto. Kẽer gʋlsda lɛta bɩ n tũnugd ne telefõn n kõt kasetã. Neb a taab toonda sɛb n tagsdẽ tɩ b miting tõe n nonga a karengã sõma. Kaset rãmbã sẽn dat tɩ nebã fãa wʋm koɛɛgã yĩnga, b kẽnda zak-zaka.

Biiblã boonda tõnd woto ne nonglem: “Sɩɩg Sõng ne pʋg-paala yetame tɩ yaa: ‘Wayã’ la ned ninga sẽn wʋmda, bɩ yẽ yeele: ‘Wayã.’ La ko-yũud sẽn tar a soaba, bɩ a wa. La ned ninga sẽn data, bɩ a reeg vɩɩm koom zaalem.” (Wilgri 22:17) Yaa ne yamleoog la d moond koe-noog neb a taabã n yetẽ tɩ tẽng zug Arzãn n wat ne barka.

D kɩsa sɩd tɩ y tara sʋgsg a taab a Zeova Kaset rãmbã la b tẽebã wɛɛngẽ. Tõe tɩ yɛl kẽer wata ne no-koɛɛma. D nongẽ lame n leok y sʋgsgã. Vɩʋʋg pa sekd seb-kãngã pʋgẽ ye. Rẽ n so tɩ d yetẽ tɩ y sʋk kaset rãmb nins sẽn be yãmb sakẽ wã. Y tõe n sʋk-b-la tigissã b sẽn maand b Rĩungã Roogẽ wã, bɩ b sã n wa y yiri. Bɩ y tõe n toola y sʋgsgã Sosiete Watch Tower, n tũnug ne adɛrs ning sẽn zemse, sẽn be-b tẽngrã sʋka.