Sɩɩg pa kiidã: Zãmsgã sɩngre

“Gom-zug sẽn tɩ loe ne a vɩɩm nif sẽn ka ne wã zɩ n yãmb ninsaal tagsa wã zãng woto wala a soab ning sẽn tɩ loe ne a sẽn yaa to-to kũum poorã ye.”—“ENCYCLOPÆDIA OF RELIGION AND ETHICS.”

1-3. Wãn-wãn la a Sokrat la a Platõ togs tagsg ning sẽn yaa tɩ sɩɩg pa kiidã?

B NINGA yʋʋm 70 bãngd sẽn yaa karen-saamb taal t’a yaa wẽn-kɩɩs la t’a sãamda kom-bɩɩs tagsa ne a mengã zãmsgo. Ba a sẽn gom n sõng a meng hal n bãng goam a bʋʋdẽ wã, bʋ-kaoodb sẽn wilg bak-n-kisg ning-a-la taal n kao a bʋʋd tɩ zems ne kũum. Lɛɛr dãmb a wãn bal sẽn deng a kʋʋbã, karen-saambã sẽn kʋʋlã wilga a karen-biisã sẽn gũbg-a wã bʋʋm bugs toɛ-toɛ sẽn na yɩl n wilg tɩ sɩɩg pa kiid ye, la tɩ b ka segd n zoe kũum ye.

² Rao ning bʋʋd b sẽn kao tɩ zems ne taalã ka ned a to n zʋʋg a Sokrate, sẽn yaa yʋʋm kob-gĩnd a nu soab S.D.T.W. Gerɛs filozof yʋʋr sẽn yi wã ye.a A karen-biig a Platõ gʋlsa yel-kãensã a tagsg-wilgr sɛb nins sẽn yaa Apologie la Phédon wã pʋsẽ. B wilgame t’a Sokrat ne a Platõ zĩnda pipi neb nins sẽn togs tagsg ning sẽn yaa tɩ sɩɩg pa kiidã sʋka. La b ka zãms-kãngã sɩngdb ye.

³ Wala d sẽn na n yã wã, ninsaal pa kiidã zãmsg sɩnga hal pĩnd wʋsg n yɩɩda. La a Sokrat ne a Platõ bɩɩsa tagsgã n toeem-a t’a lebg filozofi zãmsgo, tɩ ne woto bɩ b kɩt t’a tar yamleoog n yɩɩd ne neb sul sẽn tar zug bãngrã bãmb wakatã la rẽ poorã.

A Pythagore tɛk n tɩ ta Piramiid rãmbã wẽndẽ

4. Sẽn deng a Sokrate, Gerɛs rãmbã tagsg ne Laasrã ra yaa bõe?

⁴ Gerɛs rãmb nins sẽn deng a Sokrat la a Platõ wã me ra tẽedame tɩ sɩɩgã ket n vɩɩ kũumã poore. A Pythagore sẽn yɩ yʋʋm kob-gĩnd a yoob soab S.D.T.W. Gerɛs matematisiẽ yʋʋr sẽn yi wã ra tagsame tɩ sɩɩgã pa kiid ye, la t’a ra kẽeda yĩn-toeeng pʋgẽ (transmigration). Sẽn deng yẽ, a Thalès sẽn yi Milet, b sẽn tagsd tɩ yaa Gerɛs dẽenem filozof sẽn zĩnd b sẽn mi wã, ra yeelame tɩ sɩɩg sẽn pa kiid ka be ninsaalba, rũmsi, la tɩɩs pʋsẽ bal ye, la t’a ra bee teed wala kʋʋrã rãmb (aimants) pʋsẽ me, b sẽn tõe n tak kutã yĩngã. Pĩnd Gerɛs rãmbã ra yetame tɩ b tallda sẽn ki-bã sɩɩs n dʋʋg Stiks kʋɩlgã rʋʋnd ne koom-koglg n kẽng ne-b soolem sẽn yaa yaleng sẽn be tẽn-gãongã tẽngr b sẽn boond tɩ kɩɩm-kulgu. Beenẽ, bʋ-kaoodb n kaood sɩɩsã bʋʋd tɩ zems ne namsg pirzõ sẽn tar lal-zãnts pʋsẽ bɩ ne sũ-noog sẽn pidẽ zãng Eliize pʋgẽ.

5, 6. Wãn to la Pɛrs rãmbã ra get sɩɩgã?

⁵ Irã, bɩ Pɛrse, sẽn be yaang sẽnẽ wã pʋgẽ, no-rɛɛs yʋʋr sẽn boond t’a Zoroastre n zĩnd yʋʋm kob-gĩnd a yopoe soab S.D.T.W. pʋgẽ. A waa ne baleng buud b sẽn da wa n boond tɩ Zoroastrisme. Dẽ ra yaa Pɛrs Soolmã sẽn soog dũniyã tɩ Gerɛs nan ka lebg pãn-soaad sẽn yaa kãsengã tũudum. A Zoroastre gʋlsgã yetame: “Pa-kiid halhaal pʋgẽ la Nin-tɩrg sɩɩg na n zĩnd Sũ-noog pʋgẽ wakat fãa, la sãmbg sẽn ka be Zɩlem-be-ned sɩɩg na n paama namsgo. La tõod kãens la a Ahura Mazda [võor sẽn yaa, “wẽnnaam sẽn yaa yam soabã”] yiis A zu-sobend sẽn ka to wã maasem yĩnga.”

⁶ Sɩɩg pa kiidã zãmsg ra yaa Irã tũudmã sẽn deng a Zoroastre wakatã babg a ye me. Wala makre, Irã pĩnd buud sul gesa sẽn ki-bã sɩɩs yelle, n kõ-b rɩɩb la fut sẽn na n naf-b kɩɩm-kulgu.

7, 8. Pĩnd Ezipt nebã tẽeb ra yaa bõe sã n yaa ne sɩɩg ket n bee yĩngã kũum poorã wɛɛngẽ?

⁷ Tẽeb ne vɩɩm kũum poorã ra yaa bõn-kãseng Ezipt tũudmã pʋgẽ. Ezipt nebã ra zãmsdame tɩ yaa a Osiris, sẽn yaa kɩɩm-kulg wẽn-naabã, n da na n bʋ neb nins sẽn ki-bã sɩɩse. Wala makre, papirus sebr b sẽn mamsd tɩ yaa yʋʋm kob-gĩnd 14 soab S.D.T.W. rẽndã wilgda a Anubis, sẽn yaa sẽn ki-bã wẽnnaamã, sẽn talld gʋlsd a Hunefer sɩɩgã n debd a Osiris taoore. Kɩlo zugu, b rogla gʋlsdã sũuri, sẽn makd a sũur-kasetã, n pees-a n mak ne no-kõbgã sɩd la tɩrlem wẽn-poakã sẽn da ning a zugẽ wã. A Thot, sẽn yaa wẽnnaam a to wã, n gʋlsd rezilta rãmbã. Sẽn mik t’a Hunefer sũurã ka zɩsg ne taalã yĩngã, a yaa faag n yɩɩd no-kõbgã, tɩ b kõ a Hunefer sor t’a kẽ a Osiris soolmẽ wã n deeg pa-kiid halhaale. Papirusã le wilgda bõn-bãnd poak sẽn yas kɩlo wã sɛɛga, sẽn segl n sa n na n vel kiidã, sã n mik tɩ sũurã rezilta ka sõma. Ezipt nebã ra zaeeda b kũ-rãmbã ne tɩt sẽn na yɩl tɩ ra põoge, la b ra kogend Faraõ rãmbã kũum piramiid dãmb sẽn yaa parwẽn pʋsẽ, bala b ra tagsdame tɩ sɩɩgã põsb ra bee ne kũumã yĩng koglgo.

⁸ Dẽ, tẽn-kʋdem-wẽndẽ buud vɩɩm halhaal toɛ-toɛ ra tara zãmsg a ye b sẽn zems taab a zugu: sɩɩg pa kiidã. Bãmb paama zãms-kãngã zĩ-yɛng bɩ?

Sɩngrã zĩiga

9. Tũudum bʋg n tall pãn-tusdg tẽn-kʋdem-wẽndẽ Eziptã, Pɛrsã, la Gerɛsã zugu?

⁹ The Religion of Babylonia and Assyria sebrã yetame: “Tẽn-kʋdem-wẽndẽ dũniyã pʋgẽ Ezipti, Pɛrse, la Gerɛs paama Babilon tũudmã pãn-tusdga.” Seb-kãng kẽnga taoor n wilg woto: “D sã n ges lagem-n-taar ning sẽn sɩng n zĩnd Ezipt ne Babilon sʋkã, wala El-Amarna walsã sẽn wilgã, sãmbg kae tɩ segb wʋsg ra zĩnda sẽn kɩt tɩ Babilon tagsa wã la a minundã kẽ Ezipt tũudum soya pʋsẽ ye. Pɛrse, Mithra balengã pukda Babilon tagsa wã pãn-tusdg tɩ tudgr kaẽ ye . . . Gẽdeng kãseng ning sẽn be Sem buudã zãmsgẽ wã la pĩnd Gerɛs soalmẽ wã n paas Gerɛs tũudmã sʋkã yaa bũmb bãngdbã sẽn nong n sakd n deegd sõma masã hal tɩ ka le be goam ye. A Sem buud zãms-kãensã wʋsg sẽn yɩɩd yaa Babilon rẽnd n yɩɩda.”b

10, 11. Babilon nebã ra tagsda bõe vɩɩm kũum poorã zugu?

¹⁰ La Babilon dãmbã tagsg ne bũmb ning sẽn maand kũum poorã ka toor wʋsg ne Ezipt rãmbã, Pɛrs rãmbã, la Gerɛs rãmbã rẽnd sɩda? Wala makre, ges-y L’Épopée de Gilgamesh sẽn yaa Babilon rẽndã. A gãndaoog a Gilgamesh sẽn kʋʋle, tɩ kũumã sẽn yaa yel-sɩd sẽn da namsd-a wã yĩngã, a yika pa-kiid halhaal baoob la a ka tõog n paam-a ye. Pag sẽn yaa rã-koaas a sẽn sɛg a so-toakã wakat raool-a lame meng t’a noog a yõor ne rũndã-rũndã vɩɩmã, tɩ bala a ka na n paam vɩɩm sẽn ka sɛt ning a sẽn baoodã ye. Kɩba-soeesdmã tõr zãmsg yaa tɩ kũum yaa bũmb b sẽn ka tõe n gɩdge, la saag n paam pa-kiid halhaal yaa belgre. Woto ra rat n wilgame tɩ Babilon nebã ra ka tẽed Laasr bɩ?

¹¹ Profɛsɛɛr a Morris Jastrow, Jr., sẽn be Pennsylvani Inivɛrsite, Etazĩni wã, gʋlsame: “Yaa nin-buiidã tɩ yaa [Babiloni] tũudum zãmsgã taoor dãmb me, b zɩ n saag tɩ bũmb ning b sẽn zoe n wa ne belem pʋgẽ tõe n paama menesg zãng-zãng ye. [Bãmb tagsgã pʋgẽ] kũumã ra yaa toeeng sẽn na yɩl n kẽ vɩɩm buud a to pʋgẽ, la pa-kiid halhaalã kɩɩsgã wilga vẽeneg bal tɩ b ka tõe n põs toeengã vɩɩmã pʋgẽ kũumã sẽn wat ne wã ye.” N-ye, Babilon nebã ra tẽedame me tɩ vɩɩm buudu, sẽn be yagr ning pʋgẽ, n ket n be kũum poore. B wilga rẽ n lagem teed ne sẽn ki-bã n mum sẽn na yɩl tɩ b rɩk n tʋm Laasre.

12-14. a) Sa-kãsengã poore, sɩɩg pa kiidã zãmsg sɩngr zĩig ra yaa yɛ? b) Wãn to la zãmsgã yelg n pid tẽngã?

¹² Vẽenega, sɩɩg pa kiidã zãmsg yita pĩnd Babilon pʋgẽ. Sã n yaa ne Biiblã, sẽn yaa sebr sẽn tar kʋdemd kɩbay sẽn yaa takɩ wã, Babɛll galʋ-tẽngã, bɩ Babilon, yaa a Nimrood sẽn yaa a Nowe yagen-tʋbrakẽegã n lugl-a.c A Nowe wakatẽ dũni gill Sa-kãsengã poore, buud-gomd a ye la tũudum a ye bal n da be. A sẽn lugl galʋ-tẽngã la a me gasg be wã yĩnga, a Nimrood sɩnga tũudum a to. Biiblã kɩbar wilgdame tɩ buud-goamã gẽdeng Babɛllã poore, gas-metbã sẽn ka tõogã sãeegame la b n sɩng vɩɩm na-kẽnd-paalse, n kell n zɩ b tũudmã. (Sɩngre 10:6-10; 11:4-9) Woto la Babilon tũudmã zãmsg yelg n pid tẽngã.

¹³ Sã n yaa ne rog-n-mikã a Nimrood kii kũ-miiga. A kũuma poore, wala sẽn zemse Babilon nebã tʋlgame n na n ges-a ne waoogr sẽn yaa kãseng wala b galʋ-tẽngã lugenda, meta, la pipi rĩma. Sẽn mik tɩ b ra geta wẽnnaam a Marduk (Merodak) wala Babilon lugendã yĩngã, bãngdb kẽer tagsame t’a Marduk makda a Nimrood b sẽn maan tɩ yaa wẽnnaam. Sã n yaa woto, dẽnd tagsg ning sẽn yaa tɩ ned tara sɩɩg sẽn ket n vɩ kũum poorã ra tog n zoe n yaa zãmsg sẽn wɛ a Nimrood kũumã wakate. Sẽn ya a soab fãa, kʋdemdã yɛl b sẽn gʋlsã wilgdame tɩ Sa-kãsengã poore, sɩɩg pa kiidã zãmsg sɩngr zĩig ra yaa Babɛlle, bɩ Babilone.

¹⁴ Maana wãn masã tɩ zãms-kãngã lebg tõnd wakatã tũudum wʋsg sẽn yɩɩd zãms-kãsenga? Babg ning sẽn pʋgdã na n vaeesa a kõomã Yaang tũudmã pʋsẽ.

[Tẽngr not rãmbã]

[Foto rãmba, seb-neng 6]

Ezipt nebã sẽn da tagsd to-to ne sɩɩs nins sẽn be kɩɩm-kulgã

[Foto , seb-neng 7]

A Sokrat gom n wilgame tɩ sɩɩg pa kiid ye