Sak piig la a naase
Wãn to la a Zeova wilgd a siglgã sore?
1. Biiblã wilgda tõnd bõe a Zeova siglgã wɛɛngẽ, la bõe yĩng tɩ rẽ tar yõod ne tõndo?
WẼNNAAM tara siglg bɩ? Gʋlsg Sõamyã vʋʋsem sõng sẽn vẽneg tɩ b gʋlsã wilgdame tɩ Wẽnnaam tara siglga. A Gomdã pʋgẽ, a vẽnegda tõnd saasẽ sigl-kãseng kãng zug bilfu. (Ezekɩɛll 1:1, 4-14; Daniɛll 7:9, 10, 13, 14) Baa ne tõnd sẽn pa tõe n yã Wẽnnaam saasẽ siglgã, a sõngda Wẽnd balemdb hakɩkã wʋsg rũndã-rũndã. (2 Rĩm dãmba 6:15-17) A Zeova siglgã babg a yembr n be tẽng zug me. Biiblã sõngda tõnd tɩ d bãng a sẽn ya a soaba, la a Zeova sẽn wilgd-a sor to-to.
Wẽnnaam tẽng zug siglgã sẽn ya a soaba
2. Tiging paalg bʋg la Wẽnnaam lugl-yã?
2 Israɛll buudã yɩɩ Wẽnnaam tiging yʋʋm 1545 pʋgẽ. (Tʋʋma 7:38) La Israɛll pa tũ Wẽnnaam noyã ye, a leb n zãgsa Wẽnnaam meng Biriblã. Rẽ kɩtame t’a Zeova zãgs tiging kãngã n bas-a zãnga. A Zezi yeela Zʋɩf rãmbã tɩ: “Gese, b na n basa fo roog ne foo zaalem.” (Matɩe 23:38) Rẽ, Wẽnnaam lugla tiging paalg a sẽn maan kaool paalg ne. Tiging kãng ra na n wa talla neb 144 000 Wẽnnaam sẽn yãk n na n lagem-b ne a Biriblã saasẽ.—Wilgri 14:1-4.
3. Bõe n zĩnd yʋʋmd 33 Pãntekotã, tɩ wilgd vẽeneg tɩ Wẽnnaam da tʋmda ne tiging paalg masã?
3 Tiging paalg kãng pipi rãmbã ra paama a Zeova vʋʋsem sõngã zaeeb yʋʋmd 33 Pãntekotã. D karemda woto yel-kãseng kãng wɛɛngẽ: “Pãntekot daar sẽn ta, bãmb fãa bee zĩig a yembre. La vugr bala bʋrg sẽn wẽnd seb-kãseng yii [saasẽ] n wa n pid roog ninga bãmb sẽn be wã. La bãmb yãa zɛlma sẽn wẽnd bug-witim sẽn welg taab n zĩnd ned kam fãa zugu. Bãmb fãa pida ne [vʋʋsem sõngo].” (Tʋʋma 2:1-4) Woto, Wẽnnaam vʋʋsem sõngã wilga vẽeneg tɩ ra yaa nin-kãensã la Wẽnnaam da na n dɩk n pids a raabã a Zezi Kirist sor-wilgr pʋgẽ saasẽ.
4. Ãnd dãmb n ya a Zeova tẽng zug siglgã neba?
4 Rũndã-rũndã, yaa neb 144 000 kell bal n be tẽng zugu. La ‘piis a taabã’ ‘kʋʋn-kãseng’ sẽn yaa neb milyõ rãmb la b lagem ne kiris-neb nins sẽn paam vʋʋsem sõng zaeebã kelle, tɩ pidsd Biiblã bãngr-gomde. A Zezi sẽn yaa Pekɩɩm Sõngã lagma piis a taab kãens ne kellã sẽn zae ne vʋʋsem sõngã, sẽn na yɩl tɩ b yɩ bãgr a yembr tɩ yẽ yaa b fãa Pekɩɩma. (Wilgri 7:9; Zã 10:11, 16) Bãmb fãa lagma taab tiging a yembr pʋgẽ, n ya a Zeova tẽng zug siglgã.
Siglg Wẽnnaam sẽn wilgd sore
5. Ãnd n wilgd Wẽnnaam siglgã sore, la yaa wãn to?
5 Gʋlsg Sõamyã gomd ning sẽn yaa “Wẽnnaam sẽn vɩ” tigingã kɩtdame tɩ d bãng ned ning sẽn wilgd siglgã sorã. Yaa Wẽnnaam n wilgd siglgã sore, bɩ yaa yẽ n so-a. A Zeova wilgda a nin-buiidã sor ne a Zezi maasem, Wẽnnaam sẽn yãk a soab t’a yaa tigingã Zusoab ninsaal nif sẽn pa ne wã. A wilgd-b-la sor me ne a Gomdã sẽn yaa Biiblã vʋʋsem sõng sẽn vẽneg tɩ b gʋlsã maasem.—1 Tɩmote 3:14, 15; Efɛɛz rãmba 1:22, 23; 2 Tɩmote 3:16, 17.
6. a) Wãn to la yɩ vẽeneg tɩ Wẽnnaam da wilgda tigingã sor pipi kiris-nebã wakate? b) Bõe n wilgd t’a Zezi ket n yaa tigingã Zusoaba?
6 Sor-wilgr kãng ra yɩɩ vẽeneg wʋsg Pãntekotã daare. (Tʋʋma 2:14-18, 32, 33) Rẽ sɩd yɩɩ vẽeneg wakat ning a Zeova malɛkã sẽn kõ sor-wilgr tɩ koe-noogã ta Afiriki, sasa ning me b sẽn wʋm a Zezi koɛɛg sẽn wa n kõ noy a Soll sẽn yit Tarsã tuubg wakatã, la wakat ning a Pɩɛɛr sẽn sɩng a moonegã bu-zẽmsã sʋkã. (Tʋʋma 8:26, 27; 9:3-7; 10:9-16, 19-22) La tarẽ-n-tarẽ, b wa n ye pa leb n wʋmd koees sẽn yit saasẽ, b pa leb n yãt malɛgse, la b pa leb n paamd vʋʋsem sõng kũun me sẽn na yɩl n maan yel-soalem ye. Ne rẽ fãa, a Zezi ra kãaba woto: “Gese, mam bee ne yãmb wakat fãa hal tɩ ta wakat sɛɛbo.” (Matɩe 28:20; 1 Korẽnt dãmba 13:8) Rũndã-rũndã, a Zeova Kaset rãmbã sakda a Zezi sor-wilgrã. Sor-wilgr kãng sã n da kaẽ, Rĩungã koɛɛg ra pa na n moonẽ bɛɛbã kɩɩs-toaag taoor ye.
7. a) Ãnd dãmb n yaa ‘tʋm-tʋmd sẽn tũud sɩd la sẽn tar yamã,’ la bõe yĩnga? b) Tʋʋm-bʋg la b kõ ‘tʋm-tʋmd’ kãngã?
7 A Zezi kũumã ket tɩ bilfu, a goma ne a karen-biisã ‘tʋm-tʋmd sẽn tũud sɩd la sẽn tar yamã’ yelle, n wilg tɩ yẽ sẽn yaa Zusoabã ra na n bobla tʋm-tʋmd kãng tʋʋm-kãsenga. ‘Tʋm-tʋmdã’ ra na n zĩnda sasa ning Soaalã sẽn na n kẽng saasẽ wã, la a ra na n ket n tʋmda wʋsgo, Kirist sã n wa lebg n wa a Rĩungã naam pʋgẽ tɩ ninsaal nif pa tõe n yã-a wã. Bilg-kãngã ra pa tõe n tɩ loe ne nin-yɛng ye, la a zemsa ne Kirist tigingã sẽn paam vʋʋsem sõng zaeebã. A Zezi sẽn da tigingã ne a zɩɩmã yĩnga, a ra tõe n yeelame t’a yaa yẽ ‘tʋm-tʋmda.’ A tʋma a tigingã neb tɩ b tɩ maan karen-biis la b rɩlgd-ba, n kõt-b tẽebã rɩɩb ‘wakat ninga sẽn zemse.’—Matɩe 24:45-47; 28:19; Ezai 43:10; Luk 12:42; 1 Pɩɛɛr 4:10.
8. a) Tʋʋm-bʋs la tʋm-tʋmdã sull tar masã? b) Bõe yĩng tɩ manesem ning tõnd sẽn tar ne zãmsg ning Wẽnnaam siglgã sẽn kõtã tar yõodo?
8 Sẽn mik tɩ tʋm-tʋmdã sul-kãngã ra tʋmda Zusoabã tʋʋmd ne a sũur fãa a lebgrã yʋʋmd 1914 sasa wã, yaa vẽeneg t’a bobl-a-la tʋʋm n paas yʋʋmd 1919. La yʋʋm nins sen pʋglã, b kõo kaset Rĩungã wɛɛngẽ dũniyã gill zugu, tɩ rẽ kɩt tɩ b tigimd a Zeova balemdb kʋʋn-kãseng sẽn na yɩl tɩ b paam koglg to-kãsengã sasa. (Matɩe 24:14, 21, 22; Wilgri 7:9, 10) Bãmb me rata tẽeb rɩɩbo, la yaa tʋm-tʋmdã sull n kõt-b rɩ-kãngã. Rẽnd sẽn na yɩl n ta a Zeova yam, d segd n saka zãmsg ning a sẽn kõt ne sul-kãng maasmã, la d tũ rẽ.
9, 10. a) Pipi kiris-nebã wakatẽ, segl-bʋg la b maan sẽn na yɩl n welg yɛl nins sẽn tɩ loe ne tẽebã zãmsgã, la b wilg koe-noogã mooneg sẽn segd n maan to-to wã? b) Segl-bʋg la b maan sẽn na yɩl n ges a Zeova nin-buiidã tʋʋm yell rũndã-rũndã?
9 Wakat-wakate, sogsg la b maand tẽebã zãmsg la yɛlã sẽn segd n maan to-to wã wɛɛngẽ. Bõe la d segd n maane? Tʋʋma sak 15 wilgda b sẽn welg yell sẽn tɩ loe ne bu-zẽms neb sẽn tuubã to-to. B rɩka yellã n taas tʋm-tʋmdbã la kãsem dãmbã taoor Zerizalɛm. Bãmb n da yaa siglgã taoor lʋɩtb sulli. Ra-kãensã ra pa neb sẽn pa tudgd ye, la Wẽnnaam yãk-b lame tɩ b maan tʋʋm-kãngã. B tagsa Gʋlsg Sõamyã sẽn yet bũmb ning yellã zugã, n paas kaset ning sẽn da wilgd tɩ Wẽnnaam vʋʋsem sõngã ra paka sor sẽn na yɩl tɩ b moon bu-zẽmsã, n yaool n na n dɩk sard yellã zugu, tɩ Wẽnnaam ning barka. (Tʋʋma 15:1-29; 16:4, 5) Taoor lʋɩtb sul-kãng tʋma neb tɩ b tɩ moon Rĩungã koɛɛg n paase.
10 Rũndã-rũndã, a Zeova tẽng zug Siglgã Taoor lʋɩtb sull neb yaa saam-biis sẽn zae ne vʋʋsem sõngo, sẽn yit tẽns toɛy-toɛya. Sul-kãng bee a Zeova Kaset rãmbã dũni gill siglgã yẽgrẽ. A Zezi Kirist wilgda Siglgã Taoor lʋɩtb sull sor tɩ b tʋmd baleng sẽn yaa yɩlemdã taoor kẽngr yĩng tẽnsã fãa pʋsẽ. Sul-kãng leb n geta a Zeova Kaset rãmbã mooneg tʋʋm yell b tigims tus pi-gĩnã pʋsẽ. Siglgã Taoor lʋɩtb sull neb tagsda wa tʋm-tʋmd a Poll sẽn gʋls a kiris-nin-taasã woto wã: “A ka tɩ tõnd dat n maana yãmb pãng tẽeba pʋgẽ ye, la tõnd yaa yãmb sũ-noog sõangdba, tɩ bõe, yãmb yalsda ne tẽebo.”—2 Korẽnt dãmba 1:24.
11. a) Wãn to la b yãkd kãsem dãmbã la kãsemb sõngdbã? b) Bõe yĩng tɩ d segd n lagem n tʋm sõma ne rap nins b sẽn yãkã?
11 Dũniyã gill zugu, a Zeova Kaset rãmbã baooda Siglgã Taoor lʋɩtb sull sor-wilgr sẽn na yɩl n yãk saam-biis nins sẽn tar zʋg-sõma nins sẽn zemsã, tɩ bãmb me tõe n yãk kãsem dãmb la kãsemb sõngdb tɩ b ges tigimsã yelle. Yɛl nins b sẽn baood tɩ neb nins b sẽn yãkdã pidsã bee Biiblã pʋgẽ, la b pa yĩmd me tɩ ra-kãensã pa zems zãnga, la tɩ b tudgdame ye. Kãsem dãmb nins sẽn wilgd tɩ neb zemsa yãkrã, la neb nins sẽn maand yãkrã meng-mengã segd n kolg n togsa Wẽnnaam taoore. (1 Tɩmote 3:1-10, 12, 13; Tɩt 1:5-9) Woto yĩnga, b pʋʋsdame n kot Wẽnnaam vʋʋsem sõngã sõngr la b baood a Gomdã a sẽn vẽneg tɩ b gʋlsã sor-wilgri. (Tʋʋma 6:2-4, 6; 14:23) Bɩ d wilg tɩ d tara mi-beoog ‘rap kãensã sẽn yaa Wẽnd kũunã,’ (NW ) sẽn sõngd tõnd fãa tɩ d ‘paam tẽeb a yembrã’ yĩnga.—Efɛɛz rãmba 4:8, 11-16.
12. Tʋʋm bʋg la a Zeova kõ pagbã a siglgã pʋgẽ?
12 Gʋlsg Sõamyã wilga vẽeneg tɩ yaa rapã n segd n yɩ tigingã yel-gɛtba. Rẽ pa paoogr ne pagbã ye, bala sãnda na n dɩɩ naam saasẽ Rĩungã pʋgẽ, la b tʋmda wʋsg koe-moonegã tʋʋmdẽ. (Yɩɩl Sõamyã 68:11, NW ) Pagbã sẽn get b zagsa yell neerã me sõngdame n paasd tigingã yʋ-noogo. (Tɩt 2:3-5) La yaa rap nins b sẽn yãkã bal n zãmsd nebã tigingã pʋgẽ.—1 Tɩmote 2:12, 13.
13. a) Tags-bʋg la Biiblã sagend kãsem dãmbã tɩ b tall b zu-sobendã wɛɛngẽ? b) Zu-no-bʋg la d fãa tõe n paame?
13 Dũniyã pʋgẽ, b geta ned sẽn tar naam wa nin-kãsenga, la Wẽnnaam siglgã pʋgẽ pa woto ye. Biiblã yetame: “Ned ninga sẽn yaa bilf yãmb fãa sʋka, yaa yẽ n yaa kãsenga.” (Luk 9:46-48; 22:24-26) Gʋlsg Sõamyã sagenda kãsem dãmbã tɩ b gũus n da soog Wẽnnaam nebã ne pãng ye, la tɩ b yɩ mak-sõma n kõ bãgrã. (1 Pɩɛɛr 5:2, 3) D bãng tɩ ya a Zeova Kaset rãmbã fãa, rap la pagba, la pa neb bilf bala, n tar zu-noog n na n gom ãndũniyã Naab sẽn ka to wã yʋʋr yĩng ne sik-m-menga, n moond a Rĩungã koɛɛg neba zĩig fãa ye.
14. Tik-y verse rãmbã zut n leok sogsg nins sẽn be sullã baasgẽ wã.
14 D segd n soka d mens woto: ‘Mam sɩd nanda a Zeova sẽn wilgd a tẽng zug siglgã sor to-to wã bɩ? Mam tagsgã, m goamã la m tʋʋmã wilgda rẽ bɩ?’ D sã n tags yɛl nins sẽn pʋgdã zutu, tõe n sõnga tõnd ned kam fãa tɩ d leok sogs-kãensã.
Sã n yaa ne b sẽn wilg verse nins sẽn pʋgdã pʋsẽ wã, m sã n sɩd sakda Kirist wa tigingã Zusoaba, bõe la m segd n maane? (Matɩe 24:14; 28:19, 20; Zã 13:34, 35)
M sã n sak tẽeb segls nins tʋm-tʋmdã sull la Siglgã Taoor lʋɩtb sull sẽn maanã, yaa ãnd la m waoogda? (Luk 10:16)
Tigingã neb fãa, sẽn yɩɩd fãa kãsem dãmbã segd n talla manesem bʋg ne taaba? (Rom dãmba 12:10)
15. a) Tõnd manesmã ne a Zeova tẽng zug siglgã wilgda bõe? b) Bõe la d tõe n maan n wilg t’a Sʋɩtãan yagda ziri, la d noog a Zeova sũuri?
15 A Zeova wilgda tõnd sor ne a tẽng zug siglgã Kirist sẽn getã maasem. Tõnd manesem ne segl-kãngã wilgda tõnd sẽn tagsd naam sẽn ka to wã yell zug to-to. (Hebre dãmba 13:17) A Sʋɩtãan yetame tɩ sẽn pak tõnd n yɩɩd yaa d mengã. La tõnd sã n maan Wẽnnaam daabã, baa sẽn yaa to-to fãa, n pa bao yʋʋre, d wilgdame t’a Sʋɩtãan yagda ziri. Tõnd sã n nong neb nins sẽn lʋɩt taoor tõnd sʋkã la d waoogd-ba, la d pa ‘gomd no-noom goam ne nebã n tẽed tɩ d na n paama yõodo,’ d noogda a Zeova sũuri. (Ziid 16; Hebre dãmba 13:7) D sã n ket n sakd a Zeova siglgã wakat fãa, d wilgdame t’a Zeova n yaa tõnd Wẽnnaam, la tɩ d lagma taab n balemd-a.—1 Korẽnt dãmba 15:58.
Lebg-n-gese
• A Zeova tẽng zug siglgã neb yaa ãnd dãmb rũndã-rũndã? La yaa bõe yĩng t’a beẽ?
• Ãnd la b yãk t’a yɩ tigingã Zusoaba, la segl-bʋs la a maan tẽng zug ka sẽn na yɩl n wilg-d sor ne nonglem?
• Manesem sõma bʋs la d segd n tall ne a Zeova siglgã neba?
[Foto rãmba, seb-neng 133]
A Zeova wilgda tõnd sor ne a tẽng zug siglgã Kirist sẽn getã maasem