Sak pisi la a yembre
A Zeova pidsda a raabã ziir pʋgẽ
1, 2. a) A Zeova raab ne malɛgsã la ne ninsaalbã yaa bõe? b) Ãnd dãmb n da be Wẽnnaamã zak neb sẽn da lagem taab n balemd-a wã pʋgẽ?
A ZEOVA raabã sẽn pid ne nonglmã la woto: tɩ malɛgsã ne ninsaalbã fãa lagem taab sɩd Wẽnnaam yɛngã baleng pʋgẽ, tɩ b fãa tar Wẽnnaam kambã paam-m-meng sẽn tar ziirã. Yaa woto me la sẽn nong-b tɩrlmã tʋll ne b sũy fãa.
2 A Zeova sɩnga raab kãng sẽn yaa kãsengã pidsg wakat ning a sẽn sɩng naanegã. A pipi bõn-naandg yɩɩ Biribla. A Zeova sẽn vʋʋg-a wã tɛka, Biribl kãng yaa ‘Wẽnnaam waoogr yãgbo, n wõnd Wẽnnaam zãng fasɩ.’ (Hebre dãmba 1:1-3) Biribl kãng pa wõnd a taabã ye, bala yaa Wẽnnaam a ye bal n naan-a. Rẽ poore, yɩɩ ne Biribl kãng maasem la b naan bũmb a taabã fãa tɩ b beẽ. Pipi yaa malɛgsã sẽn be saasẽ wã, rẽ poore, yaa ninsaalbã sẽn be tẽng zugã. (Zoob 38:7; Luk 3:38) Bãmb fãa ra lagem n yaa zag-yɛng neba. A Zeova n da yaa bãmb fãa Wẽnnaam, b Naab sẽn ka to yĩngr la tẽnga, la b Ba sẽn tar nonglem.
3. a) Bõe la tõnd pipi yaab rãmbã bẽeg tõnd fãa? b) Segls-bʋs la a Zeova maan ne nonglem a Ãdem kambã la a yagensã yĩnga?
3 Tõnd pipi yaab rãmbã sẽn maan yel-wẽndã ne yamleoogã yĩnga, Wẽnnaam kaoa b bʋʋd tɩ b segd ne kũum, la a rig-b lame n yiis Edɛn, n daag-b n base. Rẽ tɛka, b pa leb n be a ãndũni gill zakã neb sʋk ye. (Sɩngre 3:22-24; Tõodo 32:4, 5) Tõnd fãa yaa bãmb yagense, rẽ n so tɩ tõnd dog ne yel-wẽna tʋlsem. La a Zeova ra miime t’a Ãdem ne a Hawa kambã la b yagensã kẽer da na n nonga tɩrlem. Yaa rẽ n so t’a segl yɛlã ne nonglem tɩ b tõe n wa paam “Wẽnnaam kamba [paam-m-mengã] ne b ziira.”—Rom dãmba 8:20, 21.
Israɛll konga zu-no-kãsenga
4. Zu-no-bʋg la a Zeova ra kõ tẽn-kʋdem wẽndẽ Israɛllã?
4 Yʋʋm 2 500 a Ãdem naanegã poore, a Zeova kõo ninsaalb kẽer zu-noog tɩ b paam zems-n-taar sẽn pa wõnd a taab ne-a. A yãka tẽn-kʋdem wẽndẽ Israɛllã n maan a nin-buiidu, n kõ-b a Tõogã. (Sɩngre 12:1, 2) A kɩtame tɩ b lebg tẽng toore, n tũnug ne-b a raabã pidsg yĩnga. (Tõodo 14:1, 2; Ezai 43:1) Baasg zãnga, b ra ket n bee yel-wẽnã la kũumã yembdẽ, rẽ n kɩt tɩ b ra pa tar paam-m-meng sẽn tar ziir ning a Ãdem ne a Hawa sẽn da tar sɩngrẽ wã ye.
5. Wãn to la Israɛll nebã kong b zu-no-kãsengã Wẽnnaam taoore?
5 Baasg zãnga Israɛll nebã ra tara zu-no-kãseng Wẽnnaam taoore. B ra leb n segdame n waoog a Zeova sẽn yaa b Ba wã la b tʋm tɩ zems ne a raabã. A Zezi wilga vẽeneg tɩ tara yõod tɩ b maan bũmb nins Wẽnnaam sẽn da baood tɩ b maanã. (Matɩe 5:43-48) La Israɛll buudã pa maan woto ye. Zʋɩf rãmbã yeela raar a ye tɩ: “Tõnd tara ba a yembre sẽn yaa Wẽnnaamã,” la a Zezi yeelame tɩ b tʋʋmã la b sẽn da tagsg to-to wã wilgdame tɩ pa sɩd ye. (Zã 8:41, 44, 47) Yʋʋmd 33, Wẽnnaam kɩtame tɩ Tõogã sa, tɩ zems-n-taar ning Israɛll sẽn da tar ne-a wã me sa. La rẽ rat n yeelame tɩ nebã ye pa tõe n paam zems-n-taar ne Wẽnnaam abada bɩ?
‘Bũmb fãa sẽn be yĩngrã’ tigisgu
6. “Yɛl-gesgã” yell a Poll sẽn gom Efɛɛz rãmba 1:9, 10 (NW ) pʋgẽ wã yaa bõe?
6 Tʋm-tʋmd a Poll wilgame tɩ ãdem-biisã sʋka, kẽer da tõe n paama zems-n-taar ne Wẽnnaam. Wala makre, a Zeova sẽn maan segls tɩ neb nins sẽn tar tẽebã tõe n lebg a zakã nebã wɛɛngẽ, a Poll gʋlsame: “Tɩ tõnd tõe n bãng [Wẽnnaam] daab sãmbg wa sẽn zems bũmb ninga bãmb sẽn pĩnd n yãk yam n na n maana. Bãmb tagsame n dat [tɩ yɛl-gesgã] wakat sã n ta tɩ bũmb fãa sẽn be yĩngri la sẽn be dũniyã sak Kirist.” (Efɛɛz rãmba 1:9, 10) ‘Yɛl-gesg’ kãng tika a Zezi Kirist zugu. Yẽ maasem yĩnga, ninsaalbã tõe n taa Wẽnnaam yam. Bãmb sõor bilf tara saagr n na n vɩɩmd saasẽ. Bãmb wʋsg na n vɩɩmda wakat sẽn kõn sa tẽng zugu.
7. Ãnd dãmb n yaa ‘bũmb nins sẽn be yĩngrã’?
7 Pipi, sẽn sɩng ne yʋʋmd 33 Pãntekotã, b ra baooda ‘bũmb nins fãa sẽn be yĩngrã,’ sẽn dat n yeel tɩ sẽn da na n wa yɩ-b na-rɩt-n-taas ne Kirist saasẽ Rĩungã pʋgẽ wã. Tẽeb ning b sẽn tar ne a Zezi maoongã yõodã maasem yĩnga, Wẽnnaam yetame tɩ b yaa tɩrse. (Rom dãmba 5:1, 2) Bilf-bilfu, b tigma Zʋɩf rãmb la bu-zẽms neb n wa paase, tɩ ‘bũmb nins sẽn be yĩngrã’ neb sõor na n wa yɩ 144 000. (Galat dãmba 3:26-29; Wilgri 14:1) Yaa bãmb bilf bal n ket tẽng zugu.
‘Bũmb nins sẽn be dũniyã zugã’ tigisgu
8. Ãnd dãmb la ‘bũmb nins sẽn be dũniyã zugã,’ la zems-n-taar bʋg la b tar ne a Zeova?
8 Yɛl-gesg kãngã me tigimda ‘bũmb nins sẽn be dũniyã zugã.’ Neb milyõ rãmb la b tigimd masã tɩ b tar saagr n na n vɩɩmd wakat sẽn kõn sa tẽng zugu. B lagma Rĩungã na-rɩt-n-taas sẽn ket tẽng zugã n pẽgd a Zeova yʋʋrã la b zẽkd a balengã. (Ezai 2:2, 3; Sofoni 3:9) Bãmb me gomda ne a Zeova n yetẽ t’a yaa b “Ba,” bala b sakame tɩ b vɩɩmã yita yẽ nengẽ. La b leb n tata a yam, tẽeb ning b sẽn tar ne zɩɩm ning a Zezi sẽn daagã maasem yĩnga. (Wilgri 7:9, 14) La b sẽn ket n pa zems zãngã yĩnga, yaa beoog-daar la Wẽnnaam na n wa sak-b zãng-zãng tɩ b ya a kamba.
9. Kãab bʋg n be Rom dãmba 8:21 ãdem-biisã yĩnga?
9 Nin-kãensã sẽn tar saagr n na n vɩɩmd tẽng zugã gũuda ne b sũy fãa wakat ning ninsaalbã fãa sẽn na n ‘paam yolsg ne faoolem yembdã.’ (Rom dãmba 8:21) Paam-m-meng kãng na n sɩngame, Kirist ne a saasẽ tãb-biisã sã n wa tall to-kãsengã n ta a baasg zĩigẽ Armagedõ poore. Rẽ na n waa ne a Sʋɩtãan dũni wẽngã gill sãoongo. Rẽ poore, yaa Kirist sẽn na wa rɩt a yʋʋm tusr naamã a Rĩungã pʋgẽ wã sẽn na n wa ne bark ninsã n na n pʋgle.—Wilgri 19:17-21; 20:6.
10. A Zeova sõgen dãmbã na n yɩɩla pẽgr yɩɩn-bʋgo?
10 Ad sɩd na n yɩɩ kɩdeng menga, a Zeova sõgen dãmb nins sẽn be tẽng zugã sã n wa lagem taab n togs wa a saasẽ sõgen dãmbã sẽn moon woto ne sũ-noogã: “Wẽnnaam [a Zeova] Sẽn-tõe-fãa wã, yãmb tʋʋma yaa kãsemse, la b seka yɛɛsgo. Buud fãa Rĩma, yãmb sẽn maanda fãa yaa tɩrga la sɩda. Zusoaba, ãnda n ka na n zoe yãmba la a waoog yãmb yʋʋre? Tɩ bõe, yãmb bal n yaa sõngo. La buuda fãa na n waa yãmb taoore n wa waoog yãmba, yãmb bʋʋda kaoob sẽn yɩ vẽeneg ne neba fãa wã yĩnga.” (Wilgri 15:3, 4) N-ye, a Zeova sõgen dãmbã fãa na n lagma taab sɩd Wẽnnaam yɛngã baleng pʋgẽ. Sẽn ki-bã meng na n vʋʋgame n tõog n zẽk b koees n naag n pẽg a Zeova.—Tʋʋma 24:15.
Paam-m-meng hakɩk sẽn wate
11. Paam-m-meng hakɩk bʋg la sẽn na n põs-b to-kãsengã wakatã na n paame?
11 To-kãsengã zug tẽn-sʋk sẽn na n yɩ Armagedõ wã sã n wa yɩlg tẽngã n yiis wẽngã poore, a Sʋɩtãan munaafɩɩk pa na n le yɩ ‘dũni kãngã wẽnnaam’ ye. A Zeova balemdbã pa na n le mao ne a Sʋɩtãan pãn-tusd-wẽngã ye. (2 Korẽnt dãmba 4:4; Wilgri 20:1, 2) Ziri tũudmã pa na n leb n zãms nebã ziri a Zeova zugu, la a wa ne welgr ãdem-biisã sʋk ye. Sɩd Wẽnnaamã sõgen dãmb pa na n leb n nams yel-kɛgã la wẽgbã yĩng ninsaalbã nanambs nusẽ ye. Ad b sɩd na paam b mense!
12. Wãn to la nebã fãa na n paam b mens ne yel-wẽnã la ne a biisã?
12 A Zezi sẽn yaa “Wẽnnaam Pebila sẽn yiisd dũniyã yel-wẽnã,” a na n tika a maoongã zug n yẽes ãdem-biisã yel-wẽnã. (Zã 1:29) A Zezi sẽn da wa n be tẽng zugã, a kõo ned yel-wẽn sugri, la a sãoog-a lame tɩ kõ kaset t’a sɩd paama a yel-wẽnã sugri. (Matɩe 9:1-7; 15:30, 31) Kirist Zezi sẽn yaa Wẽnnaam Rĩungã Rĩm sẽn be saasẽ wã na n sãooga zoensã, mugsã, wʋmsã, koms rãmbã, sẽn tar-b zu-lɛbg bãagã, la neb nins sẽn tar bãas a taabã fãa me ne yel-solemde. (Wilgri 21:3, 4) “Yel-wẽnã tõog” na n saa neb nins sẽn yaa sakdbã fãa nengẽ, tɩ b tagsa wã la b tʋʋmã na n tall yamleoog ne bãmb mens la ne Wẽnnaam. (Rom dãmba 7:21-23) Yʋʋm tusr naamã saabẽ, b na n wa zemsa zãnga, n “wẽneg” sɩd Wẽnnaam yɛngã.—Sɩngre 1:26.
13. Yʋʋm tusr naamã rɩɩb saabẽ Kirist na n maana bõe, la rẽ na n waa ne bõe?
13 Kirist sã n wa kɩt tɩ ãdem-biisã zems zãnga, a na n lebsa zu-sobend ning b sẽn da kõ-a tʋʋm-kãngã yĩngã a Ba wã: “Kirist sã n tõog pãn-soaadba fãa la noyã fãa la pãens fãa, bãmb na n yaool n lebsa soolma bãmb Ba a Wẽnnaam nugẽ. . . . Tɩ bõe, a yaa tɩlae tɩ Kirist dɩ naam hal tɩ b ning b bɛɛba fãa bãmb naowã tẽngre.” (1 Korẽnt dãmba 15:24, 25) Rĩungã yʋʋm tusr naamã rɩɩb na n pidsa a raabã zãnga. Woto, pa na n leb n yɩ tɩlae tɩ goosneem kãng zĩnd a Zeova la ãdem-biisã sʋk ye. La sẽn na n mik tɩ b yiisa yel-wẽnã la kũumã zãng tɩ ãdem-biisã paam b mensã, a Zezi sẽn yaa Fãagdã tʋʋmd na n saame. Biiblã wilgdame: “La bũmb fãa sã n wa sak bãmba, dẽ, Biiga meng na sak sẽn kɩta tɩ bũmb fãa sak bãmbã, tɩ Wẽnnaam yɩ fãa ne fãa.”—1 Korẽnt dãmba 15:28.
14. B na n kɩtame tɩ bõe paam ãdem-biisã fãa sẽn zems zãngã, la bõe yĩnga?
14 Rẽ poore, ãdem-biisã sẽn zems zãngã na n paama sor n wilg tɩ b yãka yam n na n maan sɩd Wẽnnaam yɛngã raab wakat fãa yĩnga. Woto yĩnga, nand t’a Zeova sak tɩ b ya a kamb zãng-zãnga, a na n kɩtame tɩ ninsaalbã sẽn zems zãngã fãa paam baasg makre. B na n basa a Sʋɩtãan ne a zĩn dãmbã tɩ b yi bog-zulungẽ wã. Rẽ pa na n maan neb nins sẽn sɩd nong a Zeova wã wẽng sẽn kaoosd ye. La neb nins fãa sẽn na n bas tɩ b tus-b tɩ b kɩɩs a Zeova wã, b na n naaga bãmb ne pipi tõatã la a zĩn dãmbã n sãam wakat fãa yĩnga.—Wilgri 20:7-10.
15. Bõe n na n leb n zĩnd malɛgsã la ninsaalbã fãa sʋka?
15 Rẽ poore, ninsaalb nins fãa sẽn sak a Zeova naam sẽn ka to wã yaoolem mak-kãngã sasa wã, a na n sakame tɩ b yɩ a kamba. Rẽ tɛka, b na n paama paam-m-meng sẽn be ziirã Wẽnd sẽn kõt a kambã, n yɩ Wẽnnaam ãndũni gill zakã neba. Malɛgsã ne ninsaalbã fãa na n leb n naaga taab n balem sɩd Wẽnnaam yɛngã. Rẽ t’a Zeova raabã pidsa ne ziiri! Yãmb rat n yɩɩ ãndũni gill zag-kãng sẽn tar sũ-noogã ned bɩ? Sã n yaa woto, bɩ y tũ Biiblã sẽn yet 1 Zã 2:17 pʋgẽ wã: “Dũniyã ne a ratem wẽnga me loogdame, la ned ninga sẽn maand Wẽnnaam daab paada wakat sẽn ka sɛta.”
Lebg-n-gese
• Sẽn deng tõdgrã Edɛn zẽedẽ wã, zems-n-taar bʋg la a Zeova balemdbã fãa ra tar ne-a?
• Bõe la Wẽnnaam sõgen dãmbã fãa segd n maane?
• Ãnd dãmb me n na n yɩ Wẽnnaam kamba, la wãn to la rẽ tɩ loe ne a Zeova sẽn dat tɩ zems-n-taar zĩnd balengã pʋgẽ wã?
[Foto, seb-neng 190]
Sakdbã na n paama vɩɩm tẽng zug arzãnã pʋgẽ