Bõe n wat ne sũ-noog zak pʋgẽ?

BIIBLÃ SẼN YETE

“Sũ-noog rãmb la neb nins sẽn kelgd Wẽnnaam goamã la b tũudẽ wã.”—Luk 11:28.

RẼ SẼN TÕE N NAF-Y TO-TO

Nonglem hakɩɩk na n zĩnda y zakã pʋgẽ.—Efɛɛz rãmbã 5:28, 29.

Zakã neb na n waoogda taaba.—Efɛɛz rãmbã 5:33.

Bãan sɩd-sɩd na n zĩnda zakã pʋgẽ.—Mark 10:6-9.

D TÕE N TẼE BIIBLÃ SẼN YETÃ BƖ?

N-ye. Ad bʋʋm a yiibu:

• Yaa Wẽnnaam la zak lugunda. Biiblã yeelame tɩ yaa Wẽnnaam a Zeova n lugl kãadem. (Sɩngre 2:18-24) Woto rat n yeelame tɩ yaa a Zeova n kɩt tɩ zak fãa beẽ. Rẽ bãngr yõod yaa bõe?

  Y sã n dɩt rɩ-noog n tʋll n bãng zẽ-biis nins b sẽn tall n segl-a wã, ãnda la y na n soke? Vẽenega, yaa ned ning sẽn segl rɩɩbã.

  Woto me, d sã n dat n bãng d sẽn tõe n maan to-to tɩ sũ-noog zĩnd d zakã pʋgẽ, yɩta sõma tɩ d sok a Zeova sẽn yaa zakã lugundã.—Efɛɛz rãmbã 3:14, 15.

• Yãmb yell paka Wẽnnaam. Segdame tɩ zak fãa neb tũud a Zeova saglsã sẽn be a Gomdã pʋgẽ wã. Bõe yĩnga? Bala Biiblã yeelame t’a ‘geta d yelle.’ (1 Pɩyɛɛr 5:6, 7) A Zeova rata yãmb neere. A saglsã tũub nafda ned wakat fãa.—Yel-bũnã 3:5, 6; Ezayi 48:17, 18.