D tigimda taab n waoogd a Zeova

1. A Zezi karen-biisã sẽn tigim taabã, bõe la b paam-yã? Bõe yĩng tɩ rẽ ra yaa tɩlae ne-ba?

A ZEZI vʋʋgrã poor bilfu, a karen-biisã tigma taab daar a ye n na n keng taab raoodo. B ra soga roogã kʋɩlensã. Baa ne rẽ b ra ket n yɛɛsdame, b sẽn zoet b bɛɛbã yĩnga. La b rabeemã wa n saa zĩig pʋgẽ. Bõe yĩnga? Bala a Zezi puka b sʋka, n yeel-b yaa: “Bɩ y reeg Sɩɩg Sõngo.” (Karm-y Zã 20:19-22.) Karen-biisã le wa n tigmame, t’a Zeova kɩt tɩ vʋʋsem sõngã sig-ba. Ad b sɩd paama pãnga, n na n tʋm tʋʋmd ning b sẽn da bobl-bã, rat n yeel tɩ koɛɛgã moonego.—Tʋʋ. 2:1-7.

2. a) A Zeova maanda wãn n kõt tõnd pãnga, la bõe yĩng tɩ d sɩd rat pãnga? b) Bõe yĩng tɩ zak pʋgẽ Biibl zãmsgã tar yõod wʋsgo? (Ges-y vẽnegrã, la seb-neng 175 zĩ-gũbrã sẽn yet tɩ “Zak pʋgẽ Biibl zãmsgã.”)

² Wa pipi kiris-nebã, rabeem bɩ zu-loees a taab mi n namsda tõndo. (1 Pɩɛ. 5:9) Wakat ninga, yaa nin-saal zoeese. Sẽn na yɩl n paam daood n ket n moond koɛɛgã, yaa tɩlae tɩ d paam pãng ning a Zeova sẽn kõtã. (Ef. 6:10) Sẽn yɩɩd fãa, yaa ne tigissã maasem la a Zeova kõt tõnd pãnga. Rũndã-rũndã, d tara tigiss a yiib semen fãa: Zãma taoor sõsgã ne Gũusg Gasgã zãmsgo, la Kiris-nebã vɩɩm la b tʋʋma tigsgã.a Yʋʋmdã pʋgẽ me, d tara daar a ye tigis-kãseng naoor a yiibu, la rasem a tãab tigis-kãsenga, n paas Kiristã kũumã tẽegre. Bõe yĩng tɩ tigis-kãensã fãa kẽnd tar yõodo? Hal n tãag rũndã, bõe la d toeem d tigissã pʋgẽ? Yãmb tagsg sẽn yaa to-to tigissã zugã wilgda bõe?

Bõe yĩng tɩ d tigimd taaba?

3, 4. Bõe la a Zeova rat t’a nin-buiidã maandẽ, la bõe n wilgd rẽ?

³ Hal pĩnd wẽndẽ, a Zeova ra yeela a nin-buiidã tɩ b tigimd taab n waoogd yẽ. Yʋʋmd 1513 sẽn deng a Zezi rogmã, a Zeova kõo Israyɛll nebã tõogo. Tõogã pʋgẽ, a yeelame tɩ rasem a yopoe soabã yaa vʋʋsg daare, tɩ zak fãa tog n tigmi, n waoog Wẽnnaam la b zãms tõogã. (Tõo. 5:12; 6:4-9) Israyɛll nebã sã n da tũud no-kãnga, zagsã rãmb zems-n-taar paasdame, tɩ nin-buiidã tẽebã la b zoodã ne Wẽnnaam paamd pãnga. La b sã n da maan b toog kae, n pa tigimd taab wa tõogã sẽn yeelã, a Zeova sũur da puugda ne-ba.—Maan. 10:11; 26:31-35; 2 Kib. 36:20, 21.

⁴ D gom a Zezi me yelle. A kõo tõnd mak-sõngo. A ra minim n kẽnda Zʋɩf rãmbã karen-doogẽ vʋʋsg daar fãa. (Luk 4:16) A Zezi vʋʋgrã poore, baa ne vʋʋsg daarã tõogã tũub sẽn da pa le yaa tɩlae wã, a karen-biisã ra ket n tigimda taaba. (Tʋʋ. 1:6, 12-14; 2:1-4; Rom 14:5; Kol. 2:13, 14) Pipi kiris-nebã ra paamda zãmsg la raood kengr b tigissã sasa. La pa rẽ bal ye. Ne b no-goamã, b yɩɩlã la pʋʋsgã maasem, b ra kõta Wẽnnaam maand sẽn yaa pẽgre.—Kol. 3:16; Heb. 13:15.

5. Bõe yĩng tɩ d tar tigiss semen fãa, la tigis-kãsems yʋʋmd fãa? (Ges-y seb-neng 176 zĩ-gũbrã sẽn yet tɩ “Tigis-kãsems Wẽnnaam nin-buiidã sẽn maand yʋʋmd fãa.”)

⁵ Tõnd me sã n kẽnd tigissã la tigis-kãsemsã, d wilgdame tɩ d bee Wẽnnaam Rĩungã poorẽ, d paamdame t’a Zeova kõt-d pãng ne a vʋʋsem sõngã maasem, la d paamd n gomd goam sẽn kengd d taabã raoodo. La sẽn tar yõod n yɩɩda, ne yɩɩlã, pʋʋsgã la d no-goamã maasem, d paamd n waooga a Zeova. Tõe tɩ tõnd tigissã pa wõnd Israyɛll nebã bɩ pipi kiris-nebã sẽn da maand to-to wã ye. La b tara yõodo. Hal n tãag rũndã, bõe la d toeem d tigissã pʋgẽ?

Semen fãa tigissã zãmsda tõnd “nonglem la tʋʋm-sõmã”

6, 7. a) Bõe yĩng la b sẽn sigl tigissã? b) Bõe n wilgd tɩ sull fãa tigiss sõor la b sẽn da maand tigissã sasa wã yaa toor-toore?

⁶ Saam-biig a Charles Taze Russell sẽn da wa n karemd Wẽnnaam Gomdã sõma n baood n na n bãng sɩdã, a mikame tɩ yaa tɩlae t’a tigimd ne neb a taab me sẽn dat n bãng sɩdã. Yʋʋmd 1879 wã, a yeela a sebr a ye pʋgẽ woto: “Hat daar fãa, m da tigimda ne neb a taab sẽn be Pidisbɛrg, tɩ d naagd taab n vaeesd Biiblã n na n wʋm a goamã võore.” Wakat kãngã, b sagla neb nins sẽn da karemd Gũusg Gasgã tɩ b tigimd taaba. Yʋʋmd 1881 wã ne a ta tɩ b sigla tigiss hat la arb daar fãa Pidisbɛrg sẽn be Pɛnsilvani wã. Yʋʋmd 1895 sɩpaolg kiuug Gũusg Gasgã pʋgẽ, b yeelame tɩ tigissã yaa sẽn na yɩl tɩ “kiris-nebã yɩ zo-rãmba, n nong taaba, tɩ zems-n-taar be b sʋka,” tɩ sẽn wat-b tigissã fãa tõog n keng taab raood me.—Karm-y Hebre dãmb 10:24, 25.

⁷ Maana yʋʋma, tɩ Biiblã Zãmsdbã sull fãa tigiss sõor la b sẽn da maand bũmb nins rẽ sasa wã yaa toor-toore. Wala makre, Etazĩni sull a ye lɛtr la b yiis tõnd sɛbã pʋgẽ yʋʋmd 1911. Lɛtrã pʋgẽ, b yeelame: “Semen fãa, d tigimda taab naoor a nu.” B ra tigimda tẽne, arba, arzũma, la naoor a yiib hat daare. Afirik sull a to me lɛtr la b yiis yʋʋmd 1914. Bãmb yeelame tɩ b ra tigimda taab naoor a yiib kiuug fãa. B tigsg fãa sɩngda arzũma, n baas hato. La rũndã-rũndã, bũmb wʋsg n toeeme. Bɩ d gom tigsg fãa sẽn sɩng to-to, la a sẽn toeem n lebg to-to.

8. Togs-y sõss a wãn Biiblã Zãmsdbã sẽn da wɛgsd tigissã sasa.

⁸ Zãma taoor sõsgã: Yʋʋmd 1880, saam-biig a Russell sẽn yiis pipi Gũusg Gasgã tɩ yʋʋmde, a sɩngame n gilgd tẽns toɛy-toɛy n moond koɛɛgã wa a Zezi. (Luk 4:43) Tarẽ-n-tarẽ, a wa n sɩnga d sẽn boond masã tɩ Zãma taoor sõsgã. Gũusg Gasgã pʋgẽ, b goma saam-biig a Russell so-toakã yelle, n yeel t’a “nongẽ lame n sõs zãma wã taoore, la t’a sõsgã gom-zug yaa: ‘Wẽnnaam Rĩungã sẽn so bũmb ninsã.’” Yʋʋmd 1911 wã tɩ b lugla tigims tẽns wʋsg pʋsẽ. Rẽ poore, b yãka sõsg sẽn gomd bʋ-kaoorã yelle, sõsg sẽn gomd rondã yelle, n paas sõss a taaba, n sagl tiging fãa tɩ b bao saam-biis sẽn tõe n gom sõma zãma taoore, tɩ b kẽnd zĩis a taab n sõsd ne nebã rẽ zugu. Fãa ra yaa gom-zut a yoobe. Sõsg fãa poore, b ra togsda sõsg ning nebã sẽn na n kelg semen ning sẽn pʋgdã, la sõsdã yʋʋre.

9. Wilg-y bũmb nins sẽn toeem Zãma taoor sõssã pʋgẽ. Bõe la y tõe n maan n wilg tɩ tigis-kãngã tara yõodo?

⁹ Yʋʋmd 1945 wã, Gũusg Gasgã wilgame tɩ tigimsã fãa pʋgẽ, b na n wɛgsa zãma taoor sõss sẽn gomd “yɛl sẽn pak nebã,” la tɩ na n yɩɩ sõss a nii. Sasa kãng tɩ sõsdbã ra mi n wʋga b toorẽ sõsga. Ra pa tɩlae tɩ wakat fãa bɩ b wɛgsd gom-zut nins tʋm-tʋmdã sẽn kõ wã ye. Yɩɩ woto yʋʋm wʋsgo. La yʋʋmd 1981 wã, b wilgame tɩ yaa pãlã nins tʋm-tʋmdã sẽn kõ wã bal la sõsdbã tog n wɛgs tɩ nebã kelge.b Hal n tãag yʋʋmd 1990 wã, sõss kẽer pãlã zugu, b ra yetame tɩ b kɩt tɩ kɛlgdbã kẽesd b toogo, pa rẽ bɩ b kɩt tɩ neb maan mak-n-wilgi. La yʋʋm-kãng tɛka, b toeemame tɩ lebg sõsdã bal n sõsd tɩ nebã kelgdẽ. Yʋʋmd 2008 yʋʋm-vẽkr kiuugã, b wilgame tɩ sõsgã sẽn da kaoosd minit 45 wã na n lebga minit 30. Bũmb wʋsg la b sɩd toeem zãma taoor sõsgã pʋgẽ. Baasgo ket n sõngda tõnd tɩ d tõe n kɩs Biiblã sɩda, la d bãng Wẽnnaam Rĩungã sõma. (1 Tɩm. 4:13, 16) Yãmb modgdame n boond neb nins y sẽn lebgd n tʋgd n kaagdẽ wã, la neb a taab tɩ b wat n kelgd sõs-kãensã sẽn wɛgsd Biiblã goamã, la sẽn tar yõod wʋsgã bɩ?

10-12. a) Wilg-y bũmb nins sẽn toeem Gũusg Gasgã zãmsg pʋgẽ. b) Yaa sõma tɩ ned kam fãa sok a meng sogs-bʋse?

¹⁰ Gũusg Gasgã zãmsgã: Saam-biis la tʋm-tʋmdã ra yãk tɩ b gilgd n sõsd tigimsã pʋsẽ, la b lʋɩt taoor koɛɛgã mooneg pʋgẽ. Yʋʋmd 1922, nin-kãensã yeela tʋm-tʋmdã tɩ yaa sõma tɩ tiging fãa yãk wakat n zãmsd Gũusg Gasgã n pa vaandẽ ye. Tʋm-tʋmdã sakame tɩ b na n sɩd maan woto. Sɩngrẽ wã, b ra zãmsda Gũusg Gasgã arb bɩ hato.

¹¹ Yʋʋmd 1932 sigr kiuug rasem 15 Gũusg Gasgã pʋgẽ, b wilga Gũusg Gasgã zãmsg sẽn tog n yɩ to-to. B togsa Betɛllã zak rãmb sẽn maand to-to wã, la b yeel tɩ tiging fãa rɩk rẽ makre, n yãk saam-biig t’a lʋɩ zãmsgã taoore. B ra tõe n yãka saam-biis a tãab tɩ b zĩnd taoore, n karemd sulã n deesd taaba. Wakat kãng tɩ b ra pa gʋlsd sull fãa ne a sokr ye. Yaa taoor-lʋɩtã n da segd n kos kɛlgdbã tɩ b sok sogsg b sẽn karmã zugu. Ned sã n sok sokre, taoor-lʋɩtã kota neb a taabã tɩ b leoke. Sokr ning leoor sã n pa tolg n yaa vẽenega, taoor-lʋɩtã n segd n wilg a võorã “takɩ la koɛɛg-koɛɛga.”

¹² Sɩngrẽ wã, b ra basame tɩ tiging fãa tõe n yãk Gũusg Gasg ning nebã wʋsg sẽn dat tɩ b zãmsã. La yʋʋmd 1933 tʋʋl-nif kiuug rasem 15 Gũusg Gasgã pʋgẽ, b yeelame tɩ tigimsã fãa tog n zãmsa sẽn nan yi-a paalmã. Yʋʋmd 1937 wã, b wilgame tɩ tiging fãa tog n zãmsa Gũusg Gasgã hat daare. Yʋʋmd 1942 zĩ-likr kiuug pipi daar Gũusg Gasgã pʋgẽ, b wilga bũmb a taab sẽn tog n toeeme. Yaa rẽ tɛk la Gũusg Gasgã zãmsgã lebg wa tõnd sẽn maand rũndã-rũndã wã. Pipi, b wilgame tɩ seb-neng fãa tẽngre, b na n gʋlsda sull fãa sokre, tɩ zãmsgã sasa bɩ saam-biisã leokdẽ. B paasame tɩ zãmsgã segd n kaoosa lɛɛr a yembre. B wilgame me tɩ ned sã n na n leoke, a pa tog n karem sẽn gʋlsã ye. Segd n yɩɩ “ne yẽ mengã goam.” Ket n yaa ne Gũusg Gasgã zãmsg maasem la tʋm-tʋmdã sõngd Wẽnnaam nin-buiidã n yɩɩda, tɩ b paamd bũmb nins sẽn yaa tɩlae b tẽebã kengr yĩngã tɩ zems a wakate. (Mat. 24:45) Yaa sõma tɩ ned kam fãa sok a meng woto: ‘Semen fãa mam segenda Gũusg Gasgã zãmsg bɩ? Mam modgdame n leokdẽ bɩ?’

13, 14. Togs-y Tigingã Biibl zãmsgã sẽn sɩng to-to, la bũmb nins b sẽn toeemã. Bõe n noom yãmb tigis-kãngã pʋgẽ?

¹³ Tigingã Biibl zãmsgã: B sẽn yiis “ Aurore du Millénium ” sebrã volim dãmb wʋsg poore, saam-biig a Rahn sẽn da be Baltimoor, Etazĩni soolmẽ wã yeelame tɩ sã n tõe bɩ b maan sul-bõonese, n tall sebrã n zãms Biiblã, la b bool sulã tɩ “ Cercles de l’aurore. ” Sɩngrẽ wã, b makame bal n na n gese. Wʋsg ra tigimda saam-biis zagsẽ. Yʋʋmd 1895 bõn-bɩʋʋng kiuugã tɩ b maanda tigis-kãng Etazĩni tẽns wʋsg pʋsẽ, hal tɩ yaa sõma. Rẽ n so tɩ b yeel ki-kãng Gũusg Gasgã pʋgẽ tɩ Biiblã Zãmsdbã tigimd taab n zãmsd sebrã n pa vaandẽ ye. B wilgame tɩ sẽn na n lʋɩ-a zãmsgã taoorã segd n mii kareng sõma. A ra tog n karma gomd fãa, la a yals tɩ kɛlgdbã togs b sẽn tagsde. B sã n wa baas sulli, taoor-lʋɩtã lakda Biiblã n karem vɛrse rãmbã. Sak fãa baasgẽ, ned fãa ra tog n kʋmsa b sẽn zãmsã.

¹⁴ B toeema tigis-kãngã yʋʋrã naoor wʋsgo. B wa n tagsa b sẽn yeel Biiblã pʋgẽ tɩ Beere nebã ra maagda b yĩng n zãmsd Biiblã, n tik rẽ n toeem tɩ lebg Cercles béréens pour l’étude de la Bible. (Tʋʋ. 17:11) Tarẽ-n-tarẽ, b le wa n toeemame n boond tɩ Sebr zãmsgo. Masã d boondame tɩ Tigingã Biibl zãmsgo, la d pa le weel sul-bõones n tigimd saam-biis zagsẽ ye. Tigingã neb fãa naagda taab Rĩungã roogẽ. D zãmsa sɛb toor-toore, brochure dãmba, la baa Gũusg Gasgã sõss kẽer meng tigis-kãngã sasa. Hal n tãag rũndã, b sagenda nebã tɩ b modg n kẽes b toog sõsgã pʋgẽ. Tigis-kãngã sõnga wʋsg tɩ d paam bãngr Biiblã zug n paase. Wakat fãa, yãmb segend-a-la sõma la y kẽesd y toog wa y sẽn tõe tɛk bɩ?

15. Bõe yĩng tɩ b ra sigl Wẽnnaam tʋʋmdã lekolle?

¹⁵ Wẽnnaam tʋʋmdã lekollã: Saam-biig a Carey Barber sẽn da tʋmd Burkilin Betɛllẽ wã Niuyorkã yeelame tɩ “yʋʋmd 1942 wao-fugdg kiuugã rasem 16 sẽn yɩ tẽne daarã zaabre, b kosa rap nins fãa sẽn be Betɛllẽ wã tɩ b gʋls b yʋy n kẽ lekoll ning d sẽn boond masã tɩ Wẽnnaam tʋʋmdã lekollã.” Saam-biig a Barber sẽn wa n lebg Siglgã taoor lʋɩtb Sull ned kaoosg zugẽ wã goma lekoll kãng yelle, n yeel tɩ “naaga bõn-kãsems nins a Zeova sẽn maan a nin-buiidã sõngr yĩngã.” Lekollã sõnga rapã hal tɩ b paam minim zãmsgã wɛɛngẽ la koɛɛgã mooneg pʋgẽ. Rẽ n so tɩ yʋʋmd 1943 tɛka, b sɩngame n yiisd Cours pour le ministère théocratique sebrã n toond tigimsã dũniyã gill zugu. Yʋʋm-kãng sigr kiuug Gũusg Gasgã pʋgẽ, b yeelame tɩ lekollã yaa sẽn na yɩl n sõng Wẽnnaam nin-buiidã tɩ “b paam zãmsgo, n tõog n yɩ Rĩungã koe-moondb sẽn mi kasetã kũun sõma.”—2 Tɩm. 2:15.

16, 17. Bõe n wilgd tɩ Wẽnnaam tʋʋmdã lekoll ra pa sẽn na n sõng ned t’a paam minim n tõe n sõs zãma taoor bala?

¹⁶ Sɩngrẽ wã, wa a Clayton Woodworth, neb wʋsg ra getame tɩ yals zãma taoor n sõs yaa toogo. A ba wã ra naaga neb nins b sẽn maan pãng n yõg n kẽes bãens roog ne saam-biig a Rutherford yʋʋmd 1918 wã. A Clayton tẽega a sẽn wa n kẽ Wẽnnaam tʋʋmdã lekollã paalem yʋʋmd 1943 wã, n yeel tɩ pa yɩ nana ye. Ad a sẽn togse: “Yals zãma taoor n sõs ra yaa toog wʋsg ne maam. Ra wõnda mam zɩlemdã lebgda zɩsgo, tɩ m noorã kʋɩ zãnga, tɩ rabeemã kɩt tɩ m koɛɛgã toeem fasɩ.” La saam-biig a Clayton minimã wa n tara paasgo, hal tɩ siglgã yãk-a naoor wʋsg t’a sõs zãma taoore. Lekollã pa sõng-a bal t’a paam minim n tõe n sõs sõma zãma taoor ye. Sõng-a lame t’a bãng sik-m-mengã yõodo, la a bãng me t’a segd n teega a Zeova. A yeela woto: “Mam wa n bãngame tɩ pa sõsdã minim n tar yõod ye. Sẽn tar yõod yaa a sẽn na n segl sõma, la a teeg a Zeova zãng-zãnga. Rẽ, a sõsgã na n talla yamleoogo, tɩ kɛlgdbã paam zãmsg a pʋgẽ.”

¹⁷ Yʋʋmd 1959 wã, b yeelame tɩ saam-bi-pogsã me tõe n kẽe Wẽnnaam tʋʋmdã lekollã. Saam-bi-poak a Edna Bauer tẽega b sẽn na n togs rẽ tigis-kãseng sasa wã, n yeele: “Mam ket n tẽra saam-bi-pogsã sẽn kɩdem to-⁠to wã. B gesame tɩ b le paama bũmb a to b sẽn tõe n maane.” Y yaa rao tɩ y yaa paga, Wẽnnaam tʋʋmdã lekollã yaa bũmb yãmb me sẽn tõe n paam n maane. Na maan yʋʋma, saam-biis la saam-bi-pogs paamame n kẽes b mens Wẽnnaam tʋʋmdã lekollẽ, n paam t’a Zeova zãms-ba. Rũndã-rũndã, d ket n paamda zãmsg Kiris-nebã vɩɩm la b tʋʋma tigsg sasa.—Karm-y Ezai 54:13.

18, 19. a) Masã, yaa ne bõe maasem la d paamd sagls sẽn sõngd tɩ d tõe n moon koɛɛgã sõma? b) Bõe yĩng tɩ d yɩɩnd d tigissã sasa? (Ges-y zĩ-gũbrã sẽn yet tɩ “Yɩɩl sẽn gomd sɩdã koɛɛg yelle.”)

¹⁸ Tʋʋmdã tigsgã: Hal yʋʋmd 1919 wã tɩ b ra sigla koe-moonegã tigissi. La ra pa tigingã nebã fãa n tõe n wa naag ye. Ra yaa neb nins tʋʋmd sẽn da yaa sɛbã pʋɩɩb koɛɛgã mooneg sasa wã bala. Yʋʋmd 1923 wã tɛka, b ra maanda Tʋʋmdã tigsgã vugr kiuug fãa, la tigingã neb fãa ra tog n wa naagame. La yʋʋmd 1928 wã tɩ b ra zoe n yeela tigimsã tɩ b modg tɩ Tʋʋmdã tigsgã zĩnd semen fãa. Yʋʋmd 1935 wã, b yeela Gũusg Gasgã pʋgẽ tɩ Tʋʋmdã tigsgã sasa, bɩ b sõsd bũmb nins sẽn be “ L’instructeur ” sebrã pʋgẽ wã zugu. B wa n boond-a seb-kãng tɩ “ Informateur. ” B le wa n toeema a yʋʋrã, n boondẽ tɩ Rĩungã Tʋʋmd sebre. Tao-tao bal tɩ tigimsã fãa maanda Tʋʋmdã tigsgã n pa vaandẽ ye.

¹⁹ Rũndã-rũndã, Kiris-nebã vɩɩm la b tʋʋma tigsg sasa, d paamda sagls sẽn sõngd tõnd tɩ d tõe n moon koɛɛgã sõma. (Mat. 10:5-13) Sã n mik tɩ b kõta yãmb Kiris-nebã vɩɩm la b tʋʋma tigsg na-kẽndre, rẽ yĩnga y modgdame n karemd-a, tɩ koɛɛgã mooneg sasa bɩ y tũud b sẽn yetã bɩ?

Tigsg ning sẽn tar yõod n yɩɩdã

20-22. a) Bõe yĩng tɩ d tẽegd a Zezi kũumã? b) Yãmb sẽn kẽnd a Zezi kũumã tẽegr yʋʋmd fãa wã, a yõodã yaa bõe ne yãmba?

²⁰ A Zezi yeela a karen-biisã tɩ b tẽegd a kũumã yelle. B ra segd n maana woto n tãag a waoongã. Zʋɩf rãmbã Pakã ra yaa yʋʋmd fãa. Dẽnd a Zezi kũumã tẽegrã me yaa yʋʋmd fãa. (1 Kor. 11:23-26) Sɩd me, neb milyõ rãmb n tigimd taab yʋʋmd fãa rẽ yĩnga. Tigis-kãng tẽegda sẽn paam-b zaeebã tɩ b paamame n na n wa lebg Rĩungã nanambse. (Rom 8:17) Sõngda piis a taabã me tɩ b rat ne b sũy fãa n sak Wẽnnaam Rĩungã Rĩmã, la b wilg tɩ b nand-a lame.—Zã 10:16.

²¹ Saam-biig a Russell ne a tʋmd-n-taasã ra miime tɩ “Soaalã zaabr dɩɩbã” tara yõod wʋsgo, la tɩ segd n yɩɩ vugr yʋʋmd fãa. Yʋʋmd 1880 tʋʋl-nif kiuugã Gũusg Gasgã pʋgẽ, b yeela woto: “Pidisbɛrg kaanẽ, yaa yʋʋm masã la tõnd sʋkã neb wʋsg sẽn . . . maand Pakã [a Zezi kũumã tẽegre], n wãbd burã sẽn makd d Zu-soabã yĩngã, la d yũud divẽ wã sẽn makd a zɩɩmã.” Pa kaoos la b sigl tigis-kãsenga, n maand rẽ me a Zezi kũumã tẽegr daare. Yɩɩ yʋʋmd 1889 la b sɩng n gʋlsd kibay tigis-kãensã zug n bĩngdẽ. Yʋʋm-kãngã, kɛlgdbã sõor yɩɩ 225, tɩ neb 22 reeg lisgu.

²² Rũndã-rũndã, pa le yaa tigis-kãseng sasa la d tẽegd a Zezi kũumã ye. Tiging fãa neb tigimda Rĩungã roogẽ bɩ zĩig a to, n bool neb a taabã tɩ b wa naage. Yʋʋmd 2013 wã, yaa sẽn yɩɩd neb milyõ 19 n tẽeg a Zezi kũumã. Tõnd sẽn paam n tõe n naag n tẽeg a Zezi kũumã, la d bool neb a taab me tɩ b wa naag-dã yaa bũmb sẽn noom-do. Yʋʋmd fãa, yãmb modgdame n bool nebã wa y sẽn tõe bɩ?

Yãmb tagsg sẽn yaa to-to tigissã zugã wilgda bõe?

23. Yãmb tagsg yaa bõe ne tõnd sẽn tigimd taabã?

²³ Sẽn tũud-b a Zeova ne b sũy fãa wã pa get tɩ b sẽn yet tɩ d tigimd taabã yaa toog ye. (Heb. 10:24, 25; 1 Zã 5:3) Rĩm a Davɩɩd ra nonga a Zeova roogẽ wã kẽnde, sẽn yɩɩd fãa, a sã n na n tɩ naaga neb a taab sẽn nong a Zeova n pẽg-a. (Yɩɩl 27:4; 35:18) A Zezi me kõo tõnd mak-sõngo. Baa a sẽn wa n yaa biigã, a sã n da be a Ba wã roogẽ, ra noom-a lame.—Luk 2:41-49.

24. D sã n kẽnd tigissã, wilgda bõe, la bõe me la d paamda?

²⁴ D sã n kẽnd tigissã, wilgdame tɩ d nonga a Zeova, la tɩ d ratame n keng d tẽed-n-taasã raoodo. Leb n wilgdame tɩ d rata ne d sũur fãa n bãng Wẽnnaam Rĩungã poorẽ dãmb sẽn tog n vɩɩmd to-to, bala sẽn yɩɩd fãa, yaa tigissã ne tigis-kãsemsã sasa la d paamd tɩ b zãms-d tɩ d bãng rẽ. Sẽn paase, d paamda minim la raood tigissã sasa, n tõe n kell n tʋm tʋʋmd ning b sẽn bobl-dã, sẽn yaa sõng nebã tɩ b wa lebg Rĩm a Zezi Kirist karen-biisã. Yaa tʋʋmd sẽn naag Wẽnnaam Rĩungã tʋʋm nins sẽn tar yõod wʋsgã. (Karm-y Matɩe 28:19, 20.) Hakɩka, tõnd sã n dat ne d sũur fãa n tigim ne d tẽed-n-taasã, wilgdame tɩ d yamẽ Wẽnnaam Rĩungã sɩd beeme. Bɩ d ned baa a ye ra tol n yĩm tɩ tigissã tara yõod wʋsg ye!