D boonda yãmb tɩ y wa

TÕE tɩ y zoe n yãa a Zeova Kaset rãmb wẽnd-doog b sẽn boond tɩ Rĩungã Roogã yãmb sakẽ wã n sokd-y meng b sẽn maand bũmb ning be. Yãmb miime tɩ ned ning fãa sẽn dat tõe n kẽnga b tigissã b sẽn maand semen fãa wã bɩ? D boonda sẽn data fãa t’a wa.

Tõe tɩ y sokda y meng woto: Bõe yĩng t’a Zeova Kaset rãmbã tigimd taaba? B tigissã sasa, bõe la b maanda? Bõe la neb nins sẽn pa a Zeova Kaset rãmbã yeel b tigissã wɛɛngẽ?

‘Tigim-y neba fãa’

Hal pĩnd wẽndẽ wã, Israɛll nebã ra tigimda taab n zãmsd Wẽnnaam noyã la b tũud-a. Yʋʋm 3500 sẽn looge, Wẽnnaam yeela Israɛll nebã woto: “Bɩ y tigim neba fãa, rapã ne pagbã la kambã ne sãamb nins sẽn be y tẽnsã pʋsẽ wã tɩ b wʋm, la b zãms Zusoab a Wẽnnaam zoeese, n gũus b mens n sak tõodã goamã fãa.” (Tõodo 31:12) Dẽnd Israɛlle, kãsembã ne kambã fãa ra segd n saka a Zeova la b tũ-a.

Yʋʋm wʋsg loogr poor b sẽn wa n lugl kiris-neb tigingã, kiris-nebã me ra tigimda taaba. La rẽ tara yõod wʋsg tũudum hakɩkã pʋgẽ. Tʋm-tʋmd a Poll gʋlsa woto: “Bɩ tõnd tẽeg taab yell la d yik taab ratem tɩ maan nonglem la tʋʋm sõma. Bɩ d da bas taab tiging wa neb kẽer sẽn maandã ye. La bɩ d sagl taaba.” (Hebre dãmba 10:24, 25) Zak rãmb sã n dɩkd sẽk n sõsd ne taaba, b nonglmã ne taab paasdame. Kiris-nebã me sẽn tigimd taab n zãmsd Wẽnnaam noyã la b waoogd-a wã, b nonglmã ne taab paasdame.

Sẽn zems ne verse nins d sẽn sõdg tigissã wɛɛngẽ wã, a Zeova Kaset rãmbã tigimda taab naoor a yiib b Rĩungã Roogẽ semen fãa. Tigissã sõngda nebã tɩ b wʋmd Biiblã noy võor la b tũud-ba. Dũniyã gill zugu, tigissã na-kẽndr yaa a yembre, tɩ tigisg fãa tar a yõodo. Nand tɩ tigissã sɩng bɩ tigissã sẽn wat n sa, nebã sõsda ne taab n kengd ‘taab raoodo.’ (Rom dãmba 1:12) Tigisg fãa sasa, bõe la b maanda?

Sõsg sẽn tik Biiblã zugu

Pipi tigisg neb wʋsg sẽn nong n kẽngd yaa sõsg sẽn tik Biiblã zugu. B wɛgsda sõs-kãng zãma wã yĩng wɩkɛn fãa. A Zezi ra mi n wɛgsda sõss zãma wã taoore. Wala makre, sõsg ning a sẽn wɛgs tãngã zugã. (Matɩe 5:1; 7:28, 29) Tʋmd-tʋmd a Poll me wɛgsa sõsg Atɛn nebã taoore. (Tʋʋma 17:22-34) Wala a Zezi ne a Poll sẽn maanã, a Zeova Kaset rãmbã me wɛgsda sõss zãma wã yĩnga. Kɛlgdbã sʋka, tõe tɩ kẽer yaa b pipi waoongo.

Tigisgã sɩngda ne yɩɩll sẽn be a Zeova Kaset rãmbã yɩɩll sebr pʋgẽ b sẽn boond tɩ Yɩɩl-y n pẽg a Zeovaa wã. Ned ning fãa sẽn dat tõe n yikame n naag neb a taabã n yɩɩle. Rẽ poore, ned n lʋɩt taoor n pʋʋs koɛɛg-koɛɛga, tɩ ned a to wa wɛgs sõsgã minit 30 pʋgẽ. A sõsgã tika Biiblã zugu. (Ges-y zĩ-gũbrã: “Sõss b sẽn segl zãma wã yĩnga.”) Sõsgã sasa, sõsdã kɩtdame tɩ ned fãa lakd a Biibl n tũud verse rãmbã karengo. Dẽnd y tõe n zãa y meng Biibl n wa, wal y kos Biibl a Zeova Kaset soab a ye nengẽ nand tɩ tigisgã sɩnge.

Gũusg Gasgã zãmsgo

A Zeova Kaset rãmbã tigims wʋsg pʋsẽ, sõsg sẽn tik Biiblã zugã poore, yaa Gũusg Gasgã zãmsg sẽn dɩkd lɛɛr a yembrã n pʋgde. Yaa sõsg sẽn tar sogsgo, tɩ sõsdã sogsdẽ tɩ nebã leokdẽ. Tigis-kãngã sõngda nebã tɩ b rɩkd Beere kiris-nebã sẽn zĩnd a Poll wakatẽ wã togs-n-taare. “Bãmb deega Wẽnnaam koɛɛgã ne b sũyã fãa. La bãmb baoo Gʋlsg Sõamyã pʋgẽ daar fãa.”—Tʋʋma 17:11.

Gũusg Gasgã zãmsg sɩngda ne yɩɩlle. Sõsgã ne sogsgã fãa bee Gũusg Gasgã pʋgẽ. Y tõe n paama Gũusg Gasg-kãngã a Zeova Kaset soab a ye nengẽ. Sõss kẽer d sẽn zãms tɩ nan pa kaoos gom-zut la woto: “Roagdba, wub-y y kambã ne nonglem,” “Da lebs-y ned wẽng wẽng yĩng ye,” la “Namsg buud fãa sẽn na n sa ka la bilfã võore.” Sõsdã sogsda sogsg tɩ nebã leokdẽ. La baa ned fãa sẽn tõe n kẽes a toogã, yaa neb nins sẽn deng n karem sõsgã ne verse rãmbã la b tags b zutã n mi n tõogd n leokd sogsgã sõma.Tigisgã na n baasa ne yɩɩll la pʋʋsgo.—Matɩe 26:30; Efɛɛz rãmba 5:19.

Tigingã Biibl zãmsgo

Wɩkɛn dãmbã sẽn yãk b toogo, a Zeova Kaset rãmbã yãka daar n tigimd taab zaabr b Rĩungã Roogẽ, n dɩkd lɛɛr a yembr la minit 45 n maand tigiss a tãabo. Pipi soabã yaa Tigingã Biibl zãmsg sẽn dɩkd minit 25 wã. A sõngda nebã tɩ b tõe n bãng Biiblã sẽn yetã sõma. A leb n sõngda nebã tɩ b remsd b tagsa wã la b manesmã, tɩ kɩtdẽ tɩ b tõe n tũ Kiristã sõma. (2 Tɩmote 3:16, 17) Wala Gũusg Gasgã zãmsgã, tigis-kãngã me sasa, sõsdã sogsda sogsg tɩ nebã leokdẽ. Ned fãa tõe n kẽesa a toogo. Yaa sebr a Zeova Kaset rãmbã sẽn tik Biiblã zug n yiis la b zãmsda.

Bõe yĩng tɩ b zãmsd sebr b sẽn tik Biiblã zug n yiisi? Pĩnd wẽndẽ wã, b ra pa karemd Wẽnnaam sebrã tɩ be saabẽ ye. “Bãmb [ra karemda] tõodã neba fãa taoore, n bilg-a tɩ b bãng a võore.” (Nehemi 8:8) Sẽn nan pa kaoose, sɛb b sẽn yiis tɩ gomd a Ezai sebrã, a Daniɛll sebrã la Wilgr sebrã yell sõnga neb nins sẽn wat tigis-kãngã wã tɩ b wʋm Biiblã seb-kãensã võor sõma.

Wẽnnaam tʋʋmdã lekolle

Tigingã Biiblã zãmsg loogr poore, yaa Wẽnnaam tʋʋmdã lekoll n pʋgde. Tigis-kãngã sẽn dɩkd minit 30 wã yaa sẽn na yɩl n sõng kiris-nebã tɩ b tõog n “zãms nebã” Biiblã sõma. (2 Tɩmote 4:2) Rẽ yĩnga, yãmb biig bɩ y zoa zoe n soka yãmb bũmb Wẽnnaam bɩ Biiblã zug tɩ y pa tõog n leok-a sõma bɩ? Wẽnnaam tʋʋmdã lekoll tõe n sõnga yãmb tɩ y bãng y sẽn tõe n tik Biiblã zug to-to n leok nebã sogsgo. A tõe n sõnga yãmb tɩ y yeel wa no-rɛɛs a Ezai sẽn yeel tɩ “Zusoab a Wẽnnaam kõo [yẽ] gom-minim zelemde, tɩ [yẽ] tõe n bãng goam nins [yẽ] sẽn tog n leok ned ninga pãng sẽn sɛ wã.”—Ezai 50:4.

Wẽnnaam tʋʋmdã lekoll sɩngda ne sõsg sẽn tik Biiblã zugu. La kɛlgdbã segd n deng n karmã babg ning sõsdã sẽn na n wɛgs semennã pʋgẽ wã. Sõsdã sã n wɛgs a sõsgã n sa, a kɩtdame tɩ kɛlgdbã me togs koɛɛg-koɛɛg bũmb nins bãmb sẽn karem n yã tɩ tõe n naf tigingã. Rẽ poore, yaa karen-biis nins b sẽn kõ sõss tɩ b wɛgsã n na n pʋgle.

Karen-bi-kãensã sʋka, b yãkda Biiblã babg a ye n kɩt t’a ye reng n segl n wa karm zãma wã taoore. A taab me n na n lʋɩ zãma wã taoor n wilg d sẽn tõe n tik Biiblã zug n leok ned to-to. Karen-biig fãa sõsg poore, sagend n lʋɩt zãma wã taoore, n tik a sẽn maan bũmb nins tɩ yaa sõma wã zug n pẽg-a. La sagendã sẽn yet bũmb ninsã yita Tirez profit de l’École du ministère théocratique sebrã pʋgẽ. Tigsgã poore, a tõe n boola karen-biig n kõ-a saglse, n wilg-a a sẽn tõe n sõs nindaar tɩ yɩ sõma n paas to-to.

Pa karen-biisã bal la sõs-kãensã nafd ye. B sõngda kɛlgdbã tɩ b tõe n karem sõma, n gomd sõma, la b tõe n zãms nebã sõma me. Wẽnnaam tʋʋmdã lekoll saab poore, b rengd n yɩɩla yɩɩll sẽn tik Biiblã verse zugu, n yaool n sɩng Tʋʋmdã tigisga.

Tʋʋmdã tigisga

Yaa Tʋʋmdã tigisg la yaoolem soabã. Tigis-kãngã tara sõsse, bool-n-sogs la mak-n-wilgi. Sõss kẽer sasa me nebã kõta leoore. Woto fãa sõngda kɛlgdbã tɩ b bãngd b sẽn tõe n zãms ned Biiblã tɩ yɩ sõma to-to. Nand t’a Zezi tʋm a karen-biisã tɩ b tɩ moon koɛɛgã, a tigim-b lame n kõ saglse. (Luk 10:1-16) B sẽn paam saglsã poore, b tõog n tɩ moona koɛɛgã tɩ wom bi-sõmã. Rẽ poore, karen-biisã n wa n wilga a Zezi bũmb nins b sẽn maanã. (Luk 10:17) B ra nong n sõsda ne taab n wilgd kiba-nood b sẽn paam koe-moonegã pʋgẽ.—Tʋʋma 4:23; 15:4.

Tʋʋmdã tigisg rɩkda minit 35. B ningda a sõssã na-kẽndr Rĩungã Tʋʋmd sẽn yaa seb-vãoog b sẽn yiisd kiuug fãa wã pʋgẽ. Sõss kẽer d sẽn wɛgs tɩ nan pa kaoos gom-zut la woto: “D naag d zakã rãmb n balem a Zeova,” “Bũmb ning sẽn kɩt tɩ d lebgd n tʋgd n moond nebã,” la “D rɩk Kiristã togs-n-taar d koe-moonegã pʋgẽ.” Tigisgã baasgẽ, b rengd n yɩɩlame la b yãk ned t’a wa lʋɩ zãma wã taoor n pʋʋs Wẽnnaam b fãa yĩnga.

Sãambã sẽn yeel bũmb nins tigissã wɛɛngẽ

Tigimsã neb modgdame n deegd sãambã sõma. Wala makre, a Andrew ra wʋma nebã sẽn gomd n sãbsd a Zeova Kaset rãmbã wʋsgo. La pipi daar a sẽn kẽng tigisgã, tigingã neb sẽn deeg-a to-to wã ling-a lame. A yeela woto: “Ad sɩd yaa sũ-noog zĩigã! B sẽn deeg maam to-to la b sẽn nong nebã to-to wã ling-m lame.” A Ashel sẽn yaa bi-pugl sẽn tar yʋʋm 17 n yit Kanada wã yeela woto: “Tigisgã sɩd tara yamleoogo. B sẽn zãmsd nebã bũmb ninsã võor wʋmb yaa nana.”

A José sẽn yit Berzɩllã, ra yaa zab-zabd t’a sakã neb fãa miẽ. Baa ne rẽ, b bool-a lame t’a wa tigisg a Zeova Kaset rãmbã Rĩung Roogẽ sẽn be a sakẽ wã. A yeela woto: “Baa ne tigingã neb sẽn mi m sẽn yaa ned ninga, b reega maam sõma.” A Atsushi sẽn yit Zapõ wã me yeela woto: “M tõe n yeelame tɩ pipi daar m sẽn kẽng a Zeova Kaset rãmbã tigisgã, m yamã ra pa gãe bãan ye. La baa ne rẽ, m wa n bãngame tɩ nin-kãensã yaa nin-sõma. B modgame n sõng maam tɩ m yamã gãand bãane.”

Ne y waoongo

Sãambã sẽn yeel bũmb ninsã wilgdame tɩ tigissã kẽnd sɩd tara yamleoogo. Y sã n kẽnd a Zeova Kaset rãmbã tigissã, y na n bãnga yɛl wʋsg Wẽnnaam a Zeova zugu, la a na n tũnuga ne saglsã sẽn be Biiblã pʋgẽ wã n zãms yãmba, “y meng sõngr yĩnga.”—Ezai 48:17.

A Zeova Kaset rãmbã tigiss kõom yaa zaalem. B pa pɩʋʋgd nebã taoor ne bũmb n deegd ligd ye. Yãmb rat n kẽnga tigisg a Zeova Kaset rãmbã Rĩung Roogẽ bɩ? D boond-y lame tɩ y wa.

[Tẽngr note]

[Zĩ-gũbri, seb-​neng 30]

Sõss b sẽn segl zãma wã yĩnga

B tika Biiblã zug n segl sõss sõor sẽn yɩɩd 170 zãma wa yĩnga. Sõss nins sẽn pʋgdã bee sõs-kãens sʋka:

◼ D sã n bãng sẽn sɩng to-to tɩ ninsaal wa beẽ wã, tara yõod bɩ?

◼ Wẽnnaam tagsg pag ne rao lagengã zugu, la kãadmã zugu

◼ Wẽnnaam na n sɩbga sẽn sãamd-b tẽngã

◼ D sẽn tõe n mao ne zu-loeesã to-to

◼ Vɩɩmã tɛk la woto bɩ?

[Foto rãmba, seb-​neng 30]

Sõsg sẽn tik Biiblã zugu

“Gũusg Gasgã” zãmsgo

[Foto rãmba, seb-​neng 31]

Tigingã Biibl zãmsgo

Wẽnnaam tʋʋmdã lekolle

[Foto seb-​neng 32]

Tʋʋmdã tigisga