Tigiss sẽn kɩtd tɩ d ‘bɩɩsd nonglem la d tʋmd tʋʋm-sõma’

HAL pĩnd wẽndẽ n tãag rũndã, a Zeova nin-buiidã tigimda taab tɩ zũnd-zãnd kae ye. Israyɛlle, rapã ra togda sor naoor a tãab n kẽng Zerizalɛm n tɩ maan kibs-kãsemse. (Tõo. 16:16) Pipi kiris-nebã wakate, b ra tigimda taab wakat fãa, la ra wae n yaa b tẽed-n-taag zakẽ. (File. 1, 2) Rũndã-rũndã, d maanda tigiss Rĩungã rotẽ, la d maand tigims sull tigis-kãsemse, la rasem a tãab tigis-kãsems me. Bõe yĩng tɩ Wẽnnaam nin-buiidã tigimd taaba? Sẽn yɩɩd fãa, yaa tɩ tigissã naaga bũmb nins d sẽn maand n waoogd Wẽnnaamã.—Yɩɩn. 95:6; Kolo. 3:16.

² Sẽn paase, tigissã nafda neb nins sẽn kẽnd-bã. Zãn kibsã Israyɛll nebã sẽn da maand semen fãa wã wɛɛngẽ, b ra yeel-b lame yaa: “Tigm-y nin-buiidã fãa, rapã, pagbã, kambã, la sãambã sẽn be yãmb tẽnsã pʋsẽ wã tɩ b kelge, n bao n bãng yãmb Wẽnnaam a Zeova, n zoe-a, la b gũus n tũ Tõ-kãngã goamã fãa.” (Tõo. 31:12) Vẽenega, tigissã bõn-daab a ye sẽn tar yõod wʋsgo, yaa sẽn na yɩl tɩ d ‘paam zãmsg a Zeova nengẽ.’ (Eza. 54:13) Tigissã sõngdame me tɩ d paamd n bãngd taaba, n kengd taab raoodo, la d paamd pãnga.

TIGINGÃ TIGISSI

³ Karen-biisã sẽn tigim taab yʋʋmd 33 Pãntekotã poorã ra wɩngda ne tẽn-tʋmdbã zãmsgã kelgre. La “daar fãa, b ra bee wẽnd-doogẽ wã ne yam a yembre.” (Tʋʋ. 2:42, 46) Kaoosg zugẽ, kiris-nebã sã n da wa tigim taaba, b ra karemda Gʋls-sõamyã wã, tẽn-tʋmdbã ne karen-biis a taab lɛta sẽn naage. (1 Kor. 1:1, 2; Kolo. 4:16; 1 Tes. 1:1; Zak 1:1) B ra tigimda taab n pʋʋsdẽ me. (Tʋʋ. 4:24-29; 20:36) Sasa ninga, b ra taasda tigingã kibay misioneer-dãmbã sẽn paam koe-moonegã pʋgẽ. (Tʋʋ. 11:5-18; 14:27, 28) B leb n da sõsda kiris-nebã sẽn tẽed bũmb ninsã zugu, la bãngr-goam pidsg zugu. Sẽn paase, b ra paamda sagls kiris-nebã vɩɩm wɛɛngẽ, la wẽn-sakrã wɛɛngẽ. B ra sagenda tigingã neb fãa me tɩ b tall yẽesem koe-noogã mooneg pʋgẽ.—Rom. 10:9, 10; 1 Kor. 11:23-26; 15:58; Efɛɛ. 5:1-33.

⁴ Rũndã-rũndã me, kiris-nebã tigimda taab wa tẽn-tʋmdbã wakatã. Tõnd tũuda Ebre-rãmb 10:24, 25 goamã. Be b yetame yaa: “Bɩ d tẽegd taab yelle . . . Bɩ d ra bas taab tiging wa neb kẽer sẽn minim n maandẽ wã ye. La bɩ d kengd taab raoodo. D sẽn ne tɩ daarã kolgdame wã yĩnga, bɩ d wɩng ne bõn-kãensã maanego.” Yaoolem wakat kãensã sẽn yaa toogã, yaa tɩlɛ tɩ d kẽnd tigissã n paamd raood n paasdẽ, sẽn na yɩl tɩ d tẽebã ket n tar pãnga, tɩ d wɩngd ne Wẽnnaam sakre. (Rom. 1:11, 12) Kiris-nebã vɩɩ zãmaan neb sẽn yaa wẽns la sẽn pa maand sẽn yaa tɩrg sʋka. Tõnd zãaga d mens ne wẽn-kɩɩsgo, la ne dũniyã bõn-wẽnsã tʋlgre. (Fili. 2:15, 16; Tɩt 2:12-14) Sɩd me, yɛɛnẽ zĩndg n tar bark n yɩɩd d sẽn na n paam n be ne a Zeova nin-buiidã? (Yɩɩn. 84:10) Sẽn paase, bõe yõod n yɩɩd d sẽn zãmsd Wẽnnaam Gomdã la d sõsd a zugã? D ges tigiss toɛy-toɛy b sẽn lugl tõnd neer yĩnga.

WƖKƐN-DÃMBÃ TIGSGÃ

⁵ Wɩkɛn-dãmbã tigsgã pipi babgã sɩngda ne sõsg sẽn tik Biiblã, la sẽn pak zãma wã n yɩɩda, tɩ tõe tɩ b sʋkã, kẽer yaa b sẽn nan wa tigsgã pipi. Sõsgã sõngda nin-paalsã la tigingã koe-moondbã hal wʋsgo, tɩ b paamd bũmb ning b sẽn dat b tẽebã kengr yĩngã.—Tʋʋ. 18:4; 19:9, 10.

⁶ Kirist Zeezi, a tẽn-tʋmdbã la b tũud-n-taasã maana tigiss sẽn wõnd b rãmb nins a Zeova Kaset rãmbã sẽn maand rũndã-rũndã wã. Sãmbg sẽn kae, a Zeezi yɩɩ sõsd sẽn ka to dũniyã zugu. B goma a yell n yeel tɩ “ned zɩ n gom wa yẽ a bada.” (Zã 7:46) A Zeezi ra gomda ne tõogo, tɩ lingd a kɛlgdbã. (Mat. 7:28, 29) Neb nins sẽn kelg a koɛɛgã sõma wã nafa wʋsgo. (Mat. 13:16, 17) Tẽn-tʋmdbã rɩka a naoore. D sã n karem Tʋʋm 2:14-36, d yãta a Pɩyɛɛr sẽn sõs to-to ne nebã yʋʋmd 33 Pãntekotã daar hal tɩ tall pãngã. Neb tusa wã sẽn kelg a koɛɛgã, kenga b raood hal tɩ b sak n tũ bũmb nins b sẽn wʋmã. Kaoos zugẽ, neb sẽn kelg a Poll sõsg Atɛn soolmẽ wã sak n lebga tẽedba.—Tʋʋ. 17:22-34.

⁷ Rũndã-rũndã, sõssã b sẽn wɛgsd semen fãa Rĩungã rotẽ wã, la b rãmb nins b sẽn wɛgsd d tigims sull tigis-kãsemsẽ, la rasem a tãab tigis-kãsemsẽ wã nafa neb milyõ-rãmba. Sõs-kãensã sõngdame tɩ d tẽegd bũmb nins Kiristã sẽn zãmsã, la d kell n wɩngd ne Rĩungã tʋʋma. D sã n boond d Biibl karen-biisã la neb a taab tɩ b wat tigissã, na n sõng-b-la wʋsg tɩ b bãng Biiblã sẽn yetã.

⁸ Sõss zãma wã yĩngã sẽn gomd bũmb nins yellã yaa toor-toore. Sõssã gomda bũmb nins tõnd sẽn tẽeda, tɩ tik Biiblã yelle, bãngr-goam kẽere, noy la sagls zakã pʋgẽ vɩɩm la kãadmã wɛɛngẽ yelle, kom-bɩɩsã zu-loeese, la kiris-nebã sẽn segd n zã b mens to-to wã yelle. Sõss kẽer gomda a Zeova bõn-naandsã sẽn be rasãndã yelle. Sãnda gomda wẽn-tũudb sẽn tall tẽebo, raood la burkĩndi, la yam ning b kibayã sẽn be Biiblã pʋgẽ wã sẽn kõt tõndo.

⁹ D sã n dat n dɩ sõssã yõod sõma, d segd n maaga d yĩng n kelge, n mi n naag sõsdã n gẽes vɛrse-rãmbã d Biiblã pʋgẽ, la d tũ karengã. (Luk 8:18) D sã n wʋmd bũmb nins yell a sẽn gomdã võore, d na n gãda rẽ kãn-kãe la d sak n tũ.—1 Tes. 5:21.

¹⁰ B sã n tõe n paam sõsdb wʋsgo, semen fãa, tigingã na n paama sõsg zãma wã yĩnga. B tõe n mi n kosa tigims sẽn pẽ sõsdb tɩ b wa wɛgs sõsse. La b sã n pa tõe n paam sõsdba, yaa b sẽn tõe wakat la tigingã na n paam sõsga.

¹¹ Wɩkɛnnã tigsgã babg a yiib-n-soabã yaa Gũusg Gasgã zãmsg sẽn tik Gũusg Gasg ning sẽn yaa zãmsgã rẽndã sõsg zugã. Zãmsgã sasa, b sokda sogsgo, tɩ ned fãa tõe n kẽes a toogo. Ne Gũusg Gasgã zãmsg maasem, a Zeova kõta tõnd bũmb nins sẽn yaa tɩlɛ d tẽebã kengr yĩngã, wakat sẽn zemse.

¹² Gũusg Gasg ning sẽn yaa zãmsgã rẽndã sõssã mi n wilgda d sẽn tõe n tũ Biiblã saglsã to-to d vɩɩmã nens fãa pʋgẽ. Sõssã sõngda kiris-nebã tɩ b zãagd b mens ne “dũniyã yamã.” (1 Kor. 2:12) Gũusg Gasgã mi n bilgda d sẽn tẽed bũmb ninsã la Biiblã bãngr-goam kẽer võor sõma, n sõngd d fãa tɩ d gãd sɩdã kãn-kãe la d kell n kẽn nin-tɩrsã sor zugu. (Yɩɩn. 97:11; Yel. 4:18) D sã n modg n zĩnd Gũusg Gasgã zãmsg wakat la d kẽesd d toogo, tõe n sõngame tɩ d kɩdem sũ-noog dũni-paalgã a Zeova sẽn pʋlem tɩ tɩrlem na n zĩnd a pʋgẽ wã yĩnga. (Rom. 12:12; 2 Pɩy. 3:13) D tigissã leb n sõngda tõnd tɩ d bɩɩsd zʋg-sõma nins vʋʋsem sõngã sẽn kõtã, la b kengd d raood tɩ d tʋll n tũ a Zeova ne yẽesem. (Gal. 5:22, 23) D paamda pãng n tõogd n maood ne zu-loeesã la d lugund “yẽbgr sẽn yaa sõma beoog-daar yĩnga,” sẽn na yɩl n gãd “vɩɩm hakɩɩkã kãn-kãe.”—1 Tɩm. 6:19; 1 Pɩy. 1:6, 7.

¹³ Wãn to la d tõe n dɩ Gũusg Gasgã zãmsg b sẽn sigl d tẽebã kengr yĩngã yõod tɩ pidi? D segd n deng n segla zãmsgã d yembr wall ne d zakã rãmba, n gẽes vɛrse-rãmbã b sẽn sõdgã, tɩ zãmsgã sasa me bɩ d leokd ne tõnd mengã goama. Rẽ na n sõngame tɩ sɩdã kẽ d sũurã sõma, tɩ d taabã sã n kelgd d komantɛɛrã sẽn wilgd tõnd tẽebã bɩ naf-ba. Semen fãa, d sã n maagd d yĩng n kelgd d taabã leoore, na n naf-d lame.

KIRIS-NEBÃ VƖƖM LA B TƲƲMA TIGSGA

¹⁴ Semen fãa, tigingã maanda tigsg a to b sẽn boond tɩ Kiris-nebã vɩɩm la b tʋʋma tigsga. B lugla tigis-kãng sẽn tar babs a tãabo, n na n sõng-d tɩ d ‘tõog n lebg Wẽnnaam tʋm-tʋmdba.’ (2 Kor. 3:5, 6) Kiuug fãa, b ningda sõssã la b na-kẽndrã Kiris-nebã vɩɩm la b tʋʋma: Tigissã na-kẽndr sebrã pʋgẽ. Seb-kãng pʋgẽ me, b wilgda d sẽn tõe n tɩʋʋs sõsg to-to n tõog n taas ned koɛɛgã.

¹⁵ Tigis-kãng pipi babgã yaa: D sẽn bãng Biiblã kareng pʋgẽ. A sõngdame tɩ d bãng Biiblã kibaya, yɛlã sẽn da yaa to-to b gʋlsgã wakate, la d bãng b sẽn tõe n naf-d to-to. Tigsgã yaa diskuuri, Biiblã kareng la sõsg ne kɛlgdbã sẽn tik semennã Biibl kareng zugu. Kiris-nebã vɩɩm la b tʋʋma tigissã na-kẽndr sebrã mi n tara video-rãmb la bũmb a taab sẽn sõngd tɩ d bãng bũmb sẽn tik Biiblã zugu. D sẽn zãmsd Biiblã n zulgd a woto wã nafda tõnd d vɩɩmã pʋgẽ, la paasd d karen-saamdã minim, tɩ d “tõe n paam minim sõma, n segl n sa tʋʋm-sõma buud fãa yĩnga.”—2 Tɩm. 3:16, 17.

¹⁶ Tigsgã babg a yiib-n-soabã yaa: Moon-y koɛɛgã sõma. A kõta weer tɩ neb toor-toor tõe n mak n wilg d sẽn na n taas ned koɛɛgã to-to. A leb n paasda d minim koe-moonegã wɛɛngẽ la nebã zãmsg wɛɛngẽ. Sõs-kãensã b sẽn kõt karen-biisã toor sẽn ka be, d paamda video-koees sẽn sõngd-d koe-moonegã wɛɛngẽ. Tigsgã bab-kãngã sõngd-d lame tɩ d paamd “zãmsg zɩlemde,” sẽn na yɩl tɩ d “bãng n leok ned ning sẽn koms raood ne gomd sẽn zemse.”—Eza. 50:4.

¹⁷ Tigsgã babg a tãab-n-soabã yaa: D wilg tɩ d yaa kiris-neb hakɩɩka. A wilgda d sẽn tõe n tũ Biiblã sagls to-to d vɩɩmã nens fãa pʋgẽ. (Yɩɩn. 119:105) Bab-kãng zĩig ning sẽn tar pãng n yɩɩdã yaa: Tigingã Biibl zãmsgo. B maand-a-la wa Gũusg Gasgã zãmsgo, n mi n sokd sogsg tɩ nebã leokdẽ.

¹⁸ Kiuug fãa, tigingã sã n paam Kiris-nebã vɩɩm la b tʋʋma tigissã na-kẽndr sebrã, kãsem-dãmbã sull yel-gɛtã wall kãsem-soab sẽn sõngd-a maagda a yĩng n karm-a, la a ges a sẽn tõe n bobl neb nins sõssã. Semen fãa, b geta neb nins kãsem-dãmbã sullã sẽn tũusã sʋk n yãk kãsem-soab sẽn tar minim t’a yɩ tigsgã taoor lʋɩta. A tʋʋmd yaa ges tɩ tigsgã sɩng pĩnd la a sa pĩnda, la a pẽg karen-biisã la a kõ-b saglse.

¹⁹ D sã n segend Kiris-nebã vɩɩm la b tʋʋma tigissã la d kẽesd d toog tigsgã sasa, d na n bãngda Biiblã la a noyã sõma, d na n tõogd n moonda koe-noogã ne bas-m-yam, la d paamd minim sõng nebã tɩ b lebg karen-biisã wɛɛngẽ. Sẽn wat-b tigissã la b nan pa a Zeova Kaset rãmbã me paamd n bee ne neb sẽn paasd b tẽebã pãnga, la sẽn gomd goam sẽn kengd b raoodo. Sẽn na yɩl n sõng-d tɩ d segend tigis-kãngã la a taaba, d tõe n tʋma ne Watchtower Library, JW Library^® BIBLIOTHÈQUE EN LIGNE^™ (a sã n bee ne moore) la sɛb nins b sẽn bĩng Rĩungã roogẽ wã. Sɛb nins b sẽn bĩng Rĩungã roogẽ wã yaa sɛb a Zeova Kaset rãmbã sẽn yiisi, Publications de la Société Watch Tower — Index, Vaeesg sebre, a Zeova Kaset rãmbã yĩnga, n paas Biibl toɛy-toɛya, kõnkordãnsã, diksɩonɛɛre, la sɛb a taab sẽn sõngde. Nand tɩ tigsgã sɩng wall a poore, sẽn dat-a fãa tõe n kẽe sɛbã zĩig n karme.

TIGSG KOE-MOONEGÃ YĨNGA

²⁰ Sẽn yaa wakat ning fãa semennã pʋgẽ wall wɩkɛndã, koe-moondbã tõe n maana tigsg koe-moonegã yĩnga. Naoor wʋsg yaa saam-biis zagsẽ, wall zĩig ning fãa sẽn zemse. B tõe n maana tigsgã Rĩungã roogẽ me. B sã n welg koe-moondbã sul bõoneg-bõoneg tɩ b tigimd taab zĩis toɛy-toɛya, koe-moonegã tigsg kẽnd na n yɩɩ faag ne-ba, tɩ moonegã zĩigẽ kẽnd me yɩ nana. B segd n pʋɩɩ koe-moondbã tao-tao tɩ ned kam fãa paam tũud-n-taaga, tɩ sã n pʋɩ n sa bɩ b kẽng moonegã zĩigẽ pĩnd-pĩnd n da yals n kaoos ye. Sẽn paase, koe-moonegã sull yel-gɛt tõogd n gesa sullã neb yell sõma. Sẽn são yaa sull fãa sẽn na n tar a tigsg zĩiga. La yɛlã tõe n mi n kɩtame tɩ sull a wãn fãoog taab n maan b tigsga. Wala makre, sã n yaa koe-moondb a wãn bal n yit koe-moonegã ra-za-n-daya, yɩta sõma tɩ b fãoog sul kẽere, wall b kɩt tɩ koe-moondbã fãa seg taab Rĩungã roogẽ bɩ zĩig a to sẽn zemse, n maan koe-moonegã tigsga. Woto na n sõngame tɩ koe-moond fãa paam tũud-n-taaga. Kãsem-dãmbã leb n tõe n gesame tɩ tigingã neb fãa yi koe-moonegã tigã raya, pa rẽ bɩ b sigl koe-moonegã tigsg Gũusg Gasgã zãmsg poore.

²¹ Sull fãa neb sã n tigim taab b zĩigẽ, yaa sullã yel-gɛtã n lʋɩt taoor koe-moonegã tigsg sasa. La a tõe mi n kosa a sõangdã wall saam-biig a to sẽn tõe tʋʋmdã t’a lʋɩ taoore. Sẽn na n lʋɩ-a tigsgã taoorã segd n segla a meng neere, n tõog n wilg kɛlgdbã bũmb sẽn yaa sõma la sẽn tõe n sõng-b koe-moonegã pʋgẽ. A na n gesame tɩ koe-moond fãa paam tũud-n-taaga, n wilg b sẽn na n tɩ moon zĩig ningã, la a kos sullã saam-biig a ye t’a pʋʋse. Rẽ poore, sullã neb fãa loogda koe-moonegã zĩigẽ tao-tao. Tigis-kãensã buudã kaoosda minit a nu bɩ a yopoe, la a sã n yaa tigingã tigsg poore, pa segd n ta woto ye. Tigsgã segd n kenga koe-moondbã raoodo, n kõ-b sagls la wilg-b b sẽn tõe n moon koɛɛgã to-to. B tõe n ninga sẽn nan sɩng-a mooneg paalem wall sẽn dat-a sõngr fãa ne koe-moond sẽn tar minim t’a sõng-a.

TIGSG B SẼN LUGEND TIGIMS WALL SUL-PAALSÃ YĨNGA

²² Kiris-nebã sõor sã n fɩɩgdẽ, tigimsã sõor me paasdame. Naoor wʋsgo, tigims sull yel-gɛtã gʋlsda demand n tool filiyallã. La sasa ninga, sul-bõonegã tõe n mikame tɩ sẽn são ne-ba, yaa b sẽn na n tɩ fãoog tigims sẽn pẽ ne-ba.

²³ Wakat ninga, mi n yaa saam-bi-pogs bal n be tigims bõonegẽ wã. Sã n yaa woto, saam-bi-poak sã n pʋʋsd tigingã pʋg bɩ a sã n lʋɩ tigissã taoore, a segd n luda a zugã peend wa sẽn zems ne Biiblã sẽn yeelã. (1 Kor. 11:3-16) Naoor wʋsgo, a zĩime n tees neb a taabã. Saam-bi-pogsã pa wɛgsd sõss ye. B karemda sebr siglgã sẽn yiisi, la b sõs rẽ zugu. B tõeeme me n maan tɩ yaa sõsg ne kɛlgdbã pa rẽ bɩ mak-n-wilgi. Filiyallã na n yãka saam-bi-poak a ye t’a reesd filiyallã lɛta n taasd neb a taabã, la a sigind tigissã. B sã n wa paam saam-biis sẽn tõe n tʋm tʋʋm-kãensã fãa, bãmb n na n get rẽ yelle.

TIGIMS SULL TIGIS-KÃSEMSE

²⁴ B gesame tɩ yʋʋmd fãa, tigims nins sẽn be sull a ye pʋgẽ wã paamd raar a ye tigis-kãseng naoor a yiibu. Ra-kãng sẽn yaa sũ-noog daarã sõngda kɛlgdbã fãa tɩ b “pak [b] sũyã yaleng” n sõs ne b tẽed-n-taasã. (2 Kor. 6:11-13) A Zeova siglgã yãkda tigsg fãa bõn-daabo, n yaool n gẽes tigis-kãsengã sẽn na n tik vɛrse ninsã, la a segl na-kẽndrã zĩis toɛy-toɛyã tɩ zems ne raab-kãnga. Tigsgã sasa, d paamd n kelgda sõssa, mak-n-wilg toor-toor la bool-n-soke. Bõn-kãensã sẽn zems b wakatã kengda kɛlgdbã fãa tẽebo. Tigissã sasa, karen-bi-paalsã reegda lisgu, tɩ wilg tɩ b rɩka b mens n kõ a Zeova n na n maan a raabo.

RASEM A TÃAB TIGIS-KÃSEMSE

²⁵ Yʋʋmd fãa, b maanda tigiss a taab sẽn yaa kãsems n yɩɩda. Tigis-kãens mi n yaa tigims sul toɛy-toɛy sẽn fãoog taaba, n kaoosd rasem a tãabo. Tõe tɩ filiyall nins sẽn yaa bilfã sã n kɩt tɩ b tigimsã fãa tigim taab zĩ-yɛnga, yɩta sõma ne-b n yɩɩda. Tẽns a taab pʋsẽ, b tõe n sigla tigis-kãens tɩ zems ne yɛlã sẽn yaa to-to, la sagls nins siglgã sẽn kõ wã. Wakat-wakate, tẽns kẽer pʋsẽ, b mi n maanda tigis-kãsems sẽn tigimd tẽns wʋsg neba, pa rẽ bɩ b maan tigis-kãseng sẽn yaa zalle, t’a Zeova Kaset rãmb tus ka tɛk sẽn yit tẽns toɛy-toɛy pʋsẽ kẽnge. Yʋʋma noorã, neb wʋsg wʋma Rĩungã koe-noogã, d sẽn moond la d maand bũmb a taab n boond nebã tɩ b wa a Zeova Kaset rãmbã tigis-kãsemsã yĩnga.

²⁶ Tigis-kãsemsã yaa segb tõnd sẽn yaa a Zeova nin-buiidã sẽn paamde, n na n naagd taab n waoogd-a. Tigis-kãens sasa, b mi n taasa tõnd vẽenem d sẽn paam Biiblã goam kẽer zugu. B mi n wilgame me tɩ b yiisa sɛb d sẽn tõe n tall n zãms Biiblã d yembr la tigingã pʋgẽ, wall n tall n moon koɛɛgã. Neb n deegd lisg tigis-kãsemsã sasa me. Tigis-kãsemsã sõngda hal wʋsg tɩ tũudum hakɩɩkã paamd pãnga. B kɩtdame tɩ d ne vẽeneg t’a Zeova Kaset rãmbã sẽn yit tẽns toɛy-toɛy pʋsẽ wã yaa wa zag-yɛng neb sẽn nong taab tɩ wilgdẽ tɩ b yaa a Zeezi karen-biis hakɩɩka.—Zã 13:35.

²⁷ D sã n kẽnd a Zeova Kaset rãmbã tigissã la b tigis-kãsemsã, d paamda raood kengr n maand a Zeova raabã. Leb n kogenda tõnd sẽn yaa kiris-nebã ne dũniyã yamã sẽn tõe n sãam d tẽebã. Tigiss a woto kɩtdame t’a Zeova paamd waoogr la pẽgre. (Yɩɩn. 35:18; Yel. 14:28) Wakat kãensã sẽn yaa saabã wakatã, d sũur yaa noog ne a Zeova, a sẽn kɩtd tɩ d paamd tigiss sẽn kengd a nin-buiidã tẽebã.

A ZEEZI KŨUMÃ TẼEGRE

²⁸ Vugr yʋʋmd fãa, a Zeezi kũumã sẽn yɩ daar ningã sã n ta, a Zeova Kaset rãmbã sẽn be dũniyã gill zugã tigimda taab n maan a Zeezi kũumã tẽegr bɩ Soaalã zaabr dɩɩbo. (1 Kor. 11:20, 23, 24) Rẽ la a Zeova Kaset rãmbã tigsg ning sẽn tar yõod n yɩɩd yʋʋmdã pʋgẽ. Yaa a Zeezi meng n yeel tõnd vẽeneg tɩ d maand Tẽegrã.—Luk 22:19.

²⁹ Tẽegrã daar zemsa ne pĩnd wẽndẽ Pakã b sẽn wilg Biiblã pʋgẽ wã daare. (Yik. 12:2, 6; Mat. 26:17, 20, 26) Pakã ra yaa kibs b sẽn maand yʋʋmd-yʋʋmde, n tẽegd Israyɛll nebã sẽn yi Ezɩpt yʋʋmd 1513 sẽn deng a Zeezi rogmã. Wakat kãnga, a Zeova yãka b pipi kiuugã rasem 14 daare, tɩ b segd n wãb Pakã pe-bilã la b yi Ezɩpti. (Yik. 12:1-51) Sẽn na yɩl n mag wakat kãngã, b gũuda raar ning wĩntoogã sẽn kaoosd sẽn zems lɛɛr 12, tɩ yʋngã me kaoosd lɛɛr 12 wã (b sẽn boond tɩ équinoxe de printemps wã), n sõd rasem 13, ki-paalg ning b sẽn na n yã Zerizalɛm sẽn deng ra-kãngã bɩ a poorã. Naoor wʋsgo, b maanda Tẽegrã ki-paan-kãng sẽn wat n pelgã.

³⁰ Matiye 26:26-28 pʋgẽ, a Zeezi meng wilga b sẽn segd n tẽeg a kũumã yell to-to. Tẽegrã pa naag ne yel-soalem ye. Yaa bur ne divẽ sẽn yaa bõn-makdse, neb nins sẽn na n tɩ rɩ naam ne a Zeezi Kirist saasẽ Rĩungã pʋgẽ wã sẽn dɩte. (Luk 22:28-30) B sagenda neb nins fãa sẽn dɩk b mens n kõ a Zeova wã la neb a taabã tɩ d maan Soaalã zabr dɩɩbã, baa b sẽn pa na n wãb burã la b yũ divẽ wã. B sã n wa Tẽegrã, b wilgdame tɩ b sũur nooma ne Wẽnnaam a Zeova, bũmb ning a sẽn maan tɩ ninsaalbã fãa na n paam fãagre, a biigã a Zeezi Kirist maasem yĩngã. Nand tɩ Tẽegrã daar ta, b na n wɛgsa diskuur ɛspesɩyall sẽn na n sõng kɛlgdbã tɩ b tʋlg n wa Tẽegrã, la b sak tɩ d zãms-b Biiblã.

³¹ Tõnd sẽn yaa a Zeova Kaset rãmbã, d tigimda taab Rĩung rotẽ n “tẽegd taab yelle, sẽn na yɩl n sõng taab tɩ d bɩɩs nonglem la d tʋm tʋʋm-sõma,” tɩ rẽ kõt-d sũ-noogo. (Ebre. 10:24) Tʋm-tʋmd sẽn tũud sɩd la sẽn tar yamã sõngdame tɩ d paamd sẽn yaa tɩlɛ d tẽebã kengr yĩngã tigis-kãens sasa. B sagenda a Zeova Kaset rãmbã fãa ne sẽn dat-bã fãa tɩ b kẽnd tigissã n pa vaandẽ, n paam n dɩ a yõod sõma. Wẽnnaam nin-buiidã sẽn wilgd tɩ b sũur nooma wʋsg ne a Zeova, a sẽn kõt-b bũmb toor-toor ne a siglgã maasmã, zems-n-taar bee b sʋka. Sẽn yɩɩd fãa, d pẽgda a Zeova la d waoogd-a.—Yɩɩn. 111:1.