Yãmb sogsgã leoore

◼ Wãn to, la ãnd n segd n sɩng Wẽnnaam tʋʋmdã lekollã, Tʋʋmdã tigisgã, zãma sõsgã, la Gũusg Gasgã zãmsg sɩngr yɩɩllã?

Yɩɩl nins d sẽn segd n yɩɩl n sɩng Wẽnnaam tʋʋmdã lekollã semen fãa wã bee Wẽnnaam tʋʋmdã lekoll na-kẽndrã pʋgẽ, zĩ-likr kiuugã Rĩungã Tʋʋmd pʋgẽ. B wilga yɩɩl nins d sẽn segd n yɩɩl Tʋʋmdã tigissã sɩngrẽ la a baasgẽ wã Rĩungã Tʋʋmd sebrã neng a 2. Yɩɩl nins d sẽn segd n yɩɩl n sɩng Gũusg Gasgã zãmsgã me bee Gũusg Gasgã seb-neng a 2. Yɩɩl nins b sẽn yãk tɩ d yɩɩlã naaga tigisg ning sẽn na n pʋglã. Rẽnd yaa saam-biig ning sẽn na n ges tigis-kãng yellã n segd n kɩt tɩ nebã yik tɩ b yɩɩle, la pa saam-biig ning sẽn ges-a tigisg ning sẽn sa wã yellã n na n lebg n kɩt tɩ b yɩɩl n sɩng tigisg ning sẽn na n pʋglã ye.

Wala makre, saam-biig ning sẽn get Wẽnnaam tʋʋmdã lekoll yellã n segd n pʋʋs nebã ne b waoongo, la a kɩt tɩ b yik tɩ b yɩɩl n sɩnge. A sã n wa baas lekollã, a na n boola Tʋʋmdã tigisg pipi sõsdã, tɩ yẽ wa kɩt tɩ b yɩk n yɩɩl n sɩng Tʋʋmdã tigisga.

Zãma sõsg daare, yaa perzidã wã n segd n kɩt tɩ b sɩng zãma sõsgã. A na n pʋʋsa nebã fãa ne b waoongo, la a kɩt tɩ b sɩng ne yɩɩll ning sõsdã sẽn yãkã. Leb n yaa yẽ (pa rẽ bɩ saam-biig b sẽn deng n yãk) n na n pʋʋs tɩ b sɩnge. Rẽ poore, a na n wilga sõsgã gom-zug la a bool sõsdã. Sõsdã sã n wa wɛgs a sõsgã n sa, perzidã wã pa segd n kʋms a sõsgã n togs kɛlgdbã ye. A na n pʋʋsa sõsdã bark koɛɛg-koɛɛga, la a wilg gom-zug ning b sẽn na n wɛgs semen ning sẽn pʋgdã. Rẽ poore, a na n yeela kɛlgdbã tɩ b pa n kelg Gũusg Gasgã zãmsgo. Sã n yaa tiging a to kãsem soab n wa n wɛgs sõsgã, pa tar yõod tɩ perzidã wã sok kɛlgdbã b sã n dat n toola a tigingã pʋʋsem ye. Rẽ poore, a na n boola saam-biig ning sẽn get Gũusg Gasgã zãmsg yelle.

Saam-biig sẽn lʋɩt taoor tɩ b zãmsd Gũusg Gasgã na n kɩtame tɩ nebã yik tɩ b yɩɩl yɩɩll ning b sẽn yãk zãmsgã yĩngã. A segd n tũu sagls nins b sẽn kõ Gũusg Gasgã zãmsg wɛɛngẽ wã, la a kɩt tɩ b yik n yɩɩl n baas zãmsgã. Rẽ poore, a na n boola sõsdã t’a wa baas ne pʋʋsgo.

D sã n tũud sagl-kãensã, na n sõng-d lame tɩ d naag taab n sigl tigissã tɩ yɩ sõma.