D sẽn na n maand semennã pʋgẽ tigissã to-to masã
1, 2. Yʋʋmd 2009 yʋʋm-vẽkr kiuugã tɛka, toeen-bʋs la b na n maan tigissã wɛɛngẽ?
1 Yʋʋmd 2008 tʋʋl-nif kiuugã rasem 21 semennã pʋgẽ, b taasa saam-biisã sẽn be dũniyã gill zugã kiba-noogo. B wilgame tɩ “yʋʋmd 2009 yʋʋm-vẽkr kiuugã pipi daar tɛka, d na n naaga Sebrã zãmsgã, Wẽnnaam tʋʋmdã lekollã, la Tʋʋmdã tigisgã fãa taaba, la tɩ b na n boonda Sebrã zãmsgã tɩ Tigingã Biibl zãmsgo.”
2 Semennã pʋgẽ tigissã na-kẽndre: Tigisgã fãa, n paas yɩɩlã la pʋʋsgã na n dɩka lɛɛr a 1 la minit 45. Tigisgã na n sɩnga ne yɩɩll la pʋʋsgo (minit a 5), tɩ tigingã Biibl zãmsgã pʋgle (minit 25), tɩ b kell n kẽng ne Wẽnnaam tʋʋmdã lekollã (minit 30). Rẽ poore, b na n yɩɩla (minit a 5) n sɩng Tʋʋmdã tigisgã (minit 35). Tigisgã na n baasa ne yɩɩll la pʋʋsgo (minit a 5). Sẽn na yɩl n sõng-y tɩ y segend tigissã, b na n ningda Tigingã Biibl zãmsgã, Wẽnnaam tʋʋmdã lekollã, la Tʋʋmdã tigisgã na-kẽndr Rĩungã Tʋʋmd sebrã pʋgẽ kiuug fãa.
3. Wãn to la b na n maan Tigingã Biibl zãmsgã?
3 Tigingã Biibl zãmsgã: Tigingã Biibl zãmsgã na n maanda wa Gũusg Gasgã zãmsg sẽn maand to-to wã. D pa tog n lebg n ges semen ning sẽn loogã zãmsgã n yaool n sɩng zãmsgã ye. Sɩngr goamã me segd n yɩɩ koɛɛg-koɛɛga. Rẽ na n kɩtame tɩ sẽkã sek tɩ ned fãa tõog n leok koɛɛg-koɛɛga. Yel-gɛtbã taoor lʋɩtã na n gesame tɩ kãsem dãmbã lʋɩt taoor n maand zãmsgã n deesd taab semen ne a to fãa.
4. Toeen-bʋs la b na n maan Tʋʋmdã tigisgã pʋgẽ?
4 Tʋʋmdã tigisgã: Tʋʋmdã tigisgã pa na n toeem wʋsg ye. Sõssã minit rãmb la b na n booge. Koeesã na n dɩkda minit a 5. La rẽ seka tigingã koees sẽn yaa tɩlaeyã la Betɛllã lɛta kẽer karengo. D pa na n le karemd koe-moonegã yiib la Rĩungã Roog pɩɩsg koeese, ligdã gɛɛl koɛɛga, la lɛta kẽer Betɛllã sẽn toondẽ n yɩlemdẽ wã bɩ koees a kẽer ɛstaraadã zug ye. D na n tabenda tigingã tablo wã zug tɩ saam-biisã karemdẽ. Ned ning fãa sẽn tar sõsg segd n segla sõma, n tũ sagls nins b sẽn kõ wã, la a gũus n da zʋʋg wakat ning b sẽn kõ-a wã ye.
5. Tigims sull yel-getã kaagr sasa, tigissã na-kẽndr na n yɩɩ wãn-wãn semennã pʋgẽ?
5 Tigims sull yel-gɛtã kaagre: Tigims sull yet-gɛtã kaagrã na-kẽndr pa na n toeem ye. Talaatã daare, b na maana Wẽnnaam tʋʋmdã lekollã la Tʋʋmdã tigisgã, n pʋgl ne yɩɩlle. Rẽ poore, tigims sull yel-gɛtã na n kõo minit 30 diskuuri. Wa d sẽn mi n maandẽ wã, d na n yãka daar a to zaabr semennã pʋgẽ n maan Tigingã Biibl zãmsgã la d yɩɩle, tɩ tigims sull yel-gɛtã yaool n kõ a diskuurã. Tigisgã na n baasa ne yɩɩll la pʋʋsgo.
6. Sull yel-gɛt tʋʋmd yaa bõe?
6 Koe-moonegã yiib tigisgã: Yaa kãsem dãmbã sull n na n yãk sull yel-gɛtb tɩ b get koe-moonegã sul yelle, la b get sullã pʋgẽ neb fãa tẽeb yell me. La sã n yaa kãsemb sõngd la b bobl tʋʋm-kãngã, d boond-a lame tɩ “sull sõngda.”
7. Wãn to la semennã pʋgẽ tigissã tõe n naf tõndo?
7 Yaa vẽeneg tɩ toeeng nins b sẽn maan semennã pʋgẽ tigissã wɛɛngẽ wã na n naf-d lame. D na n paama zãmsg sẽn na n keng d tẽebã wʋsg n paase. Rẽ na n kɩtame tɩ d moond koɛɛgã la d zãmsd nebã sõma tɩ womd biis wʋsgo.—Ef. 4:13, 14; 2 Tɩm. 3:17.
8. D sã n deng n segl d mense, wãn to la na n naf tõnd la neb a taabã?
8 D sã n deng n segl tigissã sõma, na n sõng-d lame tɩ d gãd tags-kãsemsã b sẽn wɛgs tigisgã sasa wã d yamẽ. Tõnd fãa na n paama zu-noog me n kõ leoor n keng taab raoodo. (Rom 1:11, 12; Heb. 10:24) Bũmb ning sẽn kɩt tɩ d segd n segend tigissã yaa sẽn na yɩl n “togsd sɩd koɛɛgã tɩrg bala,” tɩ kɩt ‘tɩ neba fãa yã tɩ d bɩtame.’—1 Tɩm. 4:15; 2 Tɩm. 2:15.
9. Bõe la d fãa segd n maane, la bõe yĩnga?
9 D sũy nooma wʋsg ne toeeng nins b sẽn maan semennã pʋgẽ tigissã wɛɛngẽ wã. Bɩ d fãa ket n tũud “tʋm-tʋmd sẽn tũud sɩd la sẽn tar yamã” sor-wilgri, la d kell n pa d pe-kɩɩm Kãsengã nugẽ, a sẽn segend tõnd “to-kãsengã” sẽn kolgã yĩngã.—Mat. 24:21, 45; Heb. 13:20, 21; Wil. 7:14.