Bõe n sɩd rẽgemd ninsaala?

Yʋʋmd 32 Pakã sẽn wa n kolgdẽ wã t’a Zeezi bee Galɩle, n wɩngd ne koɛɛgã mooneg la nebã zãmsgo. Wõnda a kẽnga Zeruzalɛm n na n tɩ maan Pakã, wa Wẽnnaam tõogã sẽn yetã. La yɩɩ ne gũusgu, bala zʋɩf-rãmbã ra baood-a lame n na n kʋ. (Zã 7:1) Pakã poore, a lebg n waa Galɩle.

Fariizẽ-rãmb ne tõog karen-saam-dãmb n yi Zeruzalɛm n wa a Zeezi nengẽ. Rẽ t’a tog n bee Kapɛrnawom. Bõe yĩng tɩ b yi hal be n wa? B ra baoodame bal n na n dõd a Zeezi t’a kɩɩsda Wẽnnaam tõogã. B sok-a-la woto: “Bõe yĩng tɩ yãmb karen-biisã kɩɩsd kãsem-dãmbã miningu? Bala, bãmb sã n na n dɩ b ka nudgd b nus ye.” (Matye 15:2) Wẽnnaam zɩ n yeel a nin-buiidã tɩ b “reng n pek b nus n tãag kãntɩɩs” n yaool n dɩ, wa nebã sẽn da minim n maandã ye. (Mark 7:3, Sebr Sõngo) La ned sã n da pa tũ minung kãnga, Fariizẽ-rãmbã getame t’a maana yel-wẽn-kãsenga.

A Zeezi pa yɩ tao-tao n leok Fariizẽ-rãmbã rõdgã ye. A wilgame tɩ bãmb mensã kɩɩsda Wẽnnaam tõogã ne yamleoogo. A sok-b lame yaa: “Bõe yĩng tɩ yãmb kɩɩsd Wẽnnaam tõogã y mensã mining sakr yĩnga? Bala, Wẽnnaam yeelame: ‘Waoog f ba la f ma, la ned ning sẽn na n tʋʋs a ba bɩ a ma, bɩ b kʋ-a.’ La yãmba, yãmb yetame tɩ ned ning sẽn na n yeel a ba bɩ a ma: ‘Ade, bũmb ning mam sẽn dag n na n dɩk n sõng yãmb lebga Wẽnnaam dẽnda.’ Dẽ wã, ka tɩlɛ t’a waoog a ba bɩ a ma ye.”—Matye 15:3-6; Yikri 20:12; 21:17.

Fariizẽ-rãmbã ra yetame tɩ ned sã n dɩk a paoongo, bɩ a ligdi, wall sẽn yaa bũmb ning fãa n kõ Wẽnnaam, lebga wẽnd-doogã n so, t’a pa tõe n le tall rẽ n maan bũmb a to ye. La togs sɩdã, ket n yaa a soabã n so. Wala makre, rao tõe n yeelame t’a paoong yaa “korbã,” rat n yeel tɩ sẽn dɩk n kõ Wẽnnaam bɩ wẽnd-doogã. Lebgda wa wẽnd-doogã n tar noor yẽ paoongã zugu. La yaool n keta a nengẽ, t’a tõe n maan a sẽn date. Baasgo, a yetame t’a pa le tar sor n na n tall rẽ n sõng a roagdb sẽn kʋʋl n dat sõngr ye. Woto, a roagdbã yell gesg pa le zao yẽ zug ye.—Mark 7:11.

A Zeezi sũurã yikame, la a bee bʋʋm, bala nin-kãensã golma Wẽnnaam tõogã. A yeel-b lame: “Yãmb kɩtdame tɩ Wẽnnaam goamã lebg zaalem tɩ yãmb miningã reeg zĩiga. Zãmb dãmba, a Ezayi sɩd togsa bãngr goam ne yãmb yell n yeele: ‘Nin-kãensã waoogda maam ne nobɩmse, la b sũyã zãra ne maam. Bãmb sẽn waoogd maamã yaa zaalem, bala, bãmb zãmsda nebã ninsaalb tõod bala.’” A Zeezi puka Fariizẽ-rãmbã bãong hal tɩ b pa tar b sẽn na n yeel ye. Rẽ poore, a boola neb kʋʋngã n yeel-b yaa: “Kelg-y la y bãng tɩ ka bũmb ning sẽn kẽed ninsaal noorẽ wã n maand-a t’a yɩ rẽgd ye. Yaa bũmb ning sẽn yit ninsaal noorẽ wã, n maand-a t’a lebg rẽgdo.”—Matye 15:6-11; Ezayi 29:13.

Sẽn yɩ bilfu, a Zeezi wa n zĩi roog pʋgẽ, t’a karen-biisã kolg n sok-a yaa: “Yãmb bãngame tɩ y goamã zaba Fariizẽ-dãmbã sɩda?” T’a Zeezi leoke: “B na n võoga bõn-bɩtg ning fãa mam ba sẽn be arzãnã [“saasẽ,” MN] sẽn ka selã. Bas-y-ba. Bãmb yaa zoens sẽn tat zoense. Zoang sã n tat zoanga, bãmb b yiibã fãa na n lʋɩɩ bokẽ.”—Matye 15:12-14.

A Pɩyɛɛr goma tʋm-tʋmdbã fãa yʋʋr yĩnga, n sok a Zeezi a sẽn yeel tɩ yaa sẽn yit ninsaal noorẽ n dẽgemd-a wã võore. Wõnda a sokrã linga a Zeezi, t’a yeel-b yaa: “Yãmb ka mi tɩ bũmb nins fãa sẽn kẽed ninsaal noorẽ kẽeda pʋgẽ tɩ b yaool n tɩ bas-a we-kɛɛng la? La bũmb ning sẽn yit noorẽ yita sũurẽ, la yaa bõn-kãens n maand ned t’a yɩ rẽgdo. Bala, tags-wẽnse, nin-kʋʋre, yoobo, raglem, wagdem, zĩrẽ la kãnegr yita sũur pʋgẽ. Ad yaa bõn-kãens n maand ned t’a yɩ rẽgdo. La tɩ rɩ n ka nudg f nus ka maand ned t’a yɩ rẽgd ye.”—Matye 15:17-20.

A Zeezi ra pa rat n yeel tɩ d pa tog n yɩ yɩlma, bɩ tɩ d pa tog n pegs d nus n yaool n segl rɩɩb wall n dɩ ye. A ra ratame bal n wilg tɩ tũudmã taoor dãmb yaa zãmb dãmba, b sẽn bas Wẽnnaam noyã sẽn yaa tɩrsã tũubu, n yaool n sakd ninsaalb minundã. Sɩd me, tʋʋm-wẽnsã yita sũurẽ, la yaa rẽ n dẽgemd ninsaala.